Salba den Unidat
Pa Elder Shi Hong (Sam) Wong
Di e Setentanan
Pa asistí e Salbador, nos mester traha huntu ku den unitdat i den harmonia. Tur hende, tur posishon, i tur yamamentu, ta importante.
Hopi biaha nos ta tende Presidente Thomas S. Monson bisa, “ekstendé e mannan pa salba.”1 Un relato den e Testamènt e Nobo ta yega na mi mente. E ta un ilustrashon perfekto di kon miembronan i mishoneronan por traha huntu den unidat pa medio di konsehonan di bario pa buska maneranan pa salba. E historia ta den Markos 2:1–5. Mi ta pensa ku e eksperiensianan ku Jesus a usa pa siña nos siertu doktrinanan òf prinsipionan semper ta mas inspirá i fasil pa komprende.
Un di e karakternan den e kuenta aki ta un hòmber ku parálisis, un hende ku no por move sin asistensia. E hòmber aki solamente por keda kas, i warda pa wòrdu salbá.
Den nos dia, e por pasa asina. Kuater hende tabata kumpli un asignashon di nan obispu pa bishita, na su kas, un hòmber kende tabata sufri di parálisis. Mi por visualisá un di nan biniendo for di Sosiedat di Socorro, unu for di e quorum di eldernan, un for di e Saserdosio Aaroniko, i, esun delaster pero no ménos importante, un mishonero di tempu kompleto. Despues di e konseho di bario mas resien, despues di a konsultá huntu e nesesidatnan di e bario, e obispo a duna asignashonnan di salbashon. E kuater hende aki a wòrdu asigná pa yuda e hòmber sufri di parálisis. Nan no por warda pa e bini iglesia riba su mes. Nan tabatin ku bai na su kas i bishit’é. Nan tabatin ku buské, anto nan a bai. E hòmber tabata wòrdu hibá na Jesus.
I nan a bin serka dje, hibando un hende ku ta sufri di parálisis, ku tabata wòrdu kargá dor di kuater (Markos 2:3).
Sinembargo, e kamber tabata yen di hende. Nan no por pasa dor di e porta. Ami ta sigur ku nan a purba tur kos ku nan por a pensa, pero nan no por a drenta. Kosnan no a pasa asina fásil manera nan a planeá. Tabatin obstakulonan riba nan kaminda di “salba.” Pero nan no a entregá. Nan no a laga e hòmber ku parálisis banda di e porta. Nan a konsultáku otro pa disidí kiko nan ta bai hasi awor—kon nan por trese a hòmber serka Jesus pa sanashon. E obra pa asistí JesuCristu den salbashon di almanan, por lo menos pa nan, hamas tabata demasiado eksigente. Nan a traha un plan—no un plan fásil, pero nan a aktuá riba dje.
Ora nan no por yega serka dje, nan a kita e dak unda e tabata: i ora nan a habri’ele, nan a baha e kama riba kua esun ku tabata sufri di parálisis tabata drumí (Markos 2:4).
Nan a hib’e riba e dak. Suponiendo ku no tabatin trapinan pa nan subi, e lo ta tuma hopi tempu pa tur hende subi riba e dak. Mi ta pensa ku e tabata por sosodé asina: e mucha hòmber di su bario lo tabata subi riba e dak promé. Dor ku e tabata yon i yén di energia, e no tabata difísil p’e. Su kompañero di maestro orientador di e quorum di eldernan i tambe e mishonero di tempu kompleto haltu i fuerte ta pusha hopi duro for di abou. E ruman muhé di e Sosiedat di Socorro ta kòrda nan pa nan tin kuidao i ta duna palabranan di apoyo. Despues e hòmbernan a kita e dak miéntras e ruman muhé ta sigui duna konsuelo na e hòmber miéntras el tabata warda pa wòrdu saná—pa e por move su mes i ta liber.
E asignashon di salbashon aki tabatin mester di tur hende trahando huntu. Na e momentu krusial, e ta tuma hopi kordinashon pa baha e hòmber ku ta sufri di parálisis for di e dak. E kuater hendenan tin ku traha den unidat i den harmonia. No por tin kontenshon entre nan. Nan lo tabatin ku baha e hòmber ku ta sufri di parálisis na mesun velosidat. Si un hende a laga e kabuya slèk mas lihé ku e otro tres, e hòmber ta bai kai di su kama. E no por wanta riba su mes dor ku e tabata debil.
Pa nos por asistí e Salbador, nos mester traha huntu den unidat i den harmonia. Tur hende, tur posishon, i tur yamamentu ta importante. Nos mester ta uní den nos Salbador Jesu Cristu.
Al final, e, hòmber ku ta sufri di parálisis tabata poné dilanti di Jesus. Ora Jesus a wak su fe, el a bisa esun ku ta sufri di parálisis, Yu, bo pikánan ta perdoná (Markos 2:5). Jesus a mustra misèrikòrdia na dje i a san’é—no solamente fisíkamente pero spiritualmente tambe; Yu, bo pikánan ta pordoná. Esaki no ta maravioso? Nos lo no gusta pa esaki pasa ku nos tambe? Ami sigur lo gust’é.
Nos konosé hende den nos bida ku ta afligí ku ta sufri di parálisis spiritual, un hòmber òf muhé ku no por bini bèk na e Iglesia nan mes? E hòmber òf muhé por ta un di nos yunan, òf un di nos mayórnan, òf un kasá, òfun amigo.
Ku hopi mas misioneronan di tempu kompletu disponibel na tur unidat di Iglesia, e lo ta sabí pa obisponan i presidentenan di rama hasi mihó uso di nan konsehonan di bario i rama. E obispo por invitá kada miembro di e konseho di bario pa hasi un lista di nòmbernan di esnan ku por mester asistensia. Miembronan di e konseho di bario por konsehá huntu kon nan por yuda na e mihó manera. Obisponan lo tende ku atenshon na e ideanan i duna asignashonnan.
Misioneronan di tempu kompleto ta rekursonan grandi pa barionan den e esfuersonan di salbashon. Nan ta yòn i yén di energia. Nan ta stima traha ku un lista di nòmber di hende spesífiko. Nan ta gusta traha huntu ku miembronan di bario. Nan sa ku esakinan ta bon oportunidat pa haña hende. Nan ta dediká na establesé e reino di Señor. Nan tin un testimonio grandi ku nan lo bira mas manera Cristu miéntras ku nan ta partisipá den e esfuersonan di salbashon.
Pa konkluí, laga mi komparti ku bosnan un tesoro mas skondí, [ku por wòrdu] hañá den e kuenta di skritura aki. E ta den versíkulo sinku: Ora Jesus a wak nan fe. Mi no a nota esaki den a pasado—nan fe. Nos fe kombiná lo afektá e bienestar di otronan.
Kende tabata e hendenan ku Jesus a menshoná? Pa sigur nan por inkluí e kuater hendenan ku a hiba e hòmber ku ta sufri di parálisis, e hòmber mes, e hende ku a resa p’e, i tur esnan ku tabata tabata einan tende e predikashon di Jesus i ku tabatin kontentu den nan kurason pa e milager ku lo bini despues. Nan tambe por inkluí un kasá, un mayór, un yu hòmber òf muhé, un misionero, un presidente di quorum, un presidente di Sosiedat di Socorro, un obispo, i un amigu leu. Nos tur por yuda otronan. Nos mester partisipá ku animo buskando esnan ku mester salbashon.
Mi ta testifiká ku JesuCristu ta un Dios di milagernan. Jesus Cristu ta stima nos tur i tin e poder pa salba i sana, tantu fisikamente komo spirituamentel. Ora nos ta asistié den Su mishon di salba almanan, nos tambe lo wòrdu salbá den e proseso. Asina mi ta testifiká den Su nòmber sagrádo, kual ta JesuCristu, amèn.