Nos Ministerionan Personal

Pa Elder Hugo E. Martinez

Di e Setentanan

E amor di JesuCristu mester ta nos guia si nos ke bira konsiente di e nesesidadnan di esnan ku nos por yuda di algun manera.

Den e Iglesia di JesuCristu di e Delaster Dianan, nos ta wòrdu duná e oportunidat i bendishon personal pa sirbi. Durante e tempu ku mi ta miembro, mi a sirbi di hopi maneranan. Manera Ruman Udine Falabella, tata di Elder Enrique R. Falabella, a bisa, “Esun ku ta sirbi ta sirbi i esun ku no ta sirbi no ta sirbi {esun ku ta sirbi den algu bon ta sirbi, i esun ku no ta sirbi den algu bon no ta sirbi].” Nan ta palabranan ku nos mester graba den nos mente i [den] nos kurasonnan.

Segun ku mi tabata buska guia durante mi servisio, mi a haña konsuelo ora mi ta kòrda ku Señor ta enfoká riba e individual of famia. Su amor i atenshon suave pa e individuo a siña mi ku E ta rekonosé e balor grandi di kada un di e yunan di nos Tata Selestial i ku e ta esensial pa nos sigurá ku kada persona ta risibí ministrashon i forsa pa medio di e evangelio di JesuCristu.

Den e skrituranan nos ta lesa:

Kòrda ku e balor di almanan ta grandi den e bista di Dios.

I si bosnan ta traha tur boso dianan … i trese, ounku sea un alma na ami, kon grandi lo ta boso goso ku n’e den e Reino di mi Tata!¹

Tur alma ta di balor grandi pa Dios, pasobra nos ta Su yunan i nos tin e potensial di bira manera E ta.²

E amor di JesuCristu mester ta nos guia si nos ke bira konsiente di e nesesidatnan di esnan ku nos por yuda di un manera [òf otro]. E enseñansanan di nos Señor, JesuCristu, ta mustra nos e kaminda. I asina ta kon nos ministerio personal ta kuminsá: deskubriendo nesesidatnan, despues poniendo atenshon na nan. Manera Ruman Linda K. Burton, presidente general di e Sosiedat di Socorro, a bisa, “Promé opservá, despues sirbi.”³

Presidente Thomas S. Monson ta un ehèmpel grandi di e prinsipio aki. Den Yanüari di 2005, e tabata presidí riba un konferensia di liderazgo di saserdosio na Puerto Rico ora el a demonstrá kon e Salbador i Su siervonan ta duna servisioservisio pa medio di ministerio personal. Na e konklushon di e reunion maravioso ei, Presidente Monson a kuminsá kumindá tur e lidernan di saserdosio ku a asistí. Diripiente, el a nota ku un di nan tabata wak tur kos leu for di nan, kompletamente riba su so.

Presidente Monson a kita for di e grupo i kana bai, serka e hermano, i a papia kuné. Ku emoshon, José R. Zayas a bis’é ku tabata un milager ku el a bai serka dje i un kontesta riba e orashonnan di dje i su kasá, Yolanda, a hasi promé di e reunion. El a konta Presidente Monson ku su yu muhé tabata malu i ku e tabatin un karta di su kasá pa duna na Presidente Monson. Ruman Zayas a bisa na su kasá ku e lo tabata ta imposibel dor ku Presidente Monson ta hopi okupá. Presidente Monson a tende e historia i a pidi e karta, lo kual el a lesa den silensio. Despues el a pone e karta den e saku di su flus i a bisa na Ruman Zayas ku e lo bai atendé nan petishon.

Di e manera ak, e famia ei a wòrdu toká dor di nos Señor, JesuCristu, pa medio di Su siervo. Mi ta kere ku e palabranan di e Salbador den e parbola di e bon Samaritano ta apliká na nos: Bai, i hasi meskos.⁴

Na Sèptèmber 21, 1985, horkan Georges a bati Puerto Rico, kousando hopi daño. Hermana Martinez, nos sinku yu, i ami a superá e tempestat grandi i e bientunan ku forsa di horkan dor di keda den nos kas. Sinembargo, nos a dura dos siman sin awa di pipa i sin koriente.

Ora nos suministro di awa a kaba, pa optené mas tabata difísil. Hamas mi lo lubidá e rumannan ku a ministrá nos pa medio di duna nos e líkido presioso, tampoko mi lo lubidá e manera amoroso ku e rumannan muhé a sirbi nos tambe.

Germán Colón a bini nos kas ku un bòter grandi di plèstik ku awa den un pikòp . El a bisa nos ku e tabata hasiéhasié pasó, den su palabranan, “Mi sa ku bo tin yunan chikí ku mester awa.” Un par di dia despues, Ruman Noel Muñoz i Herminio Gómes a karga tres tanki grandi di awa riba un pikòp. Nan a bini nos kas di sorpresa i a yena tur bòter disponibel ku awa pa bebe, tambe nan a invitá nos bisiñanan pa yena esnan di nan tambe.

Nos orashonnan a wòrdu kontestá pa medio di nan servisio personal. E karanan di e tres rumannan a reflehá e amor ku JesuCristu tin pa nos, i su servisio—den otro palabranan, su ministerio personal—a trese mas ku awa di bebe den nos bidanan. Pa tur yu hòmber i muhé di Dios, sa ku hende ta interesá i ta kuida e bienestar di nan ta sialesensial.

Mi ta testifiká na bosnan ku nos Tata Celestial i nos Señor, JesuCristu, ta konosé nos individualmente i personalmente. Pa e motibu ei, Nan ta proveé loke nos mester pa nos por tin e oportunidat di logra nos potensial divino. Riba e kaminda, Nan ta pone hende ku lo yuda nos. Asina, ora nos ta bira instrumento den Su mannan, nos por sirbi i yuda esnan ku Nan ta mustra nos pa medio di revelashon.

Di e manera ei, e Señor JesuCristu lo alkansá tur e yunan di Tata Celestial. E Bon Pastor lo reuní tur Su karnénan. E lo hasié un pa un Miéntras nan ta hasi bon uso di nan albedrio moral—despues di tende e bos di Su siervonan i hañando nan ministrashon. Despues nan lo rekonosé Su bos, i lo siguié. Ministerio personal asina ta integral pa nos warda nos konvenionan di boutismo.

Meskos, ta un bon ehèmpel di un disípulo di JesuCristu ta e mihó introdukshon na esnan ku ken nos por kompartí Su evangelio. Miéntras nos ta habri nos boka i kompartí e evangelio restourá di JesuCristu, nos ta bira Su subpastornan, ku e kargo di nutri e karné di Su pastornan i e lamchi di Su redil⁵; nos ta bira, e debil i e simpel⁶ piskadónan di hòmber.⁷

Nos servisio i ministerio personal no ta limitá na esnan bibiente riba mundu. Nos tambe por hasi obra pa e mortonan—pa esnan ku ta biba den e mundo di spiritu i ku, durante nan bida mortal, no tabatin e oportunidat di risibí e ordenansanan di salbashon di e evangelio di JesuCristu. Nos tambe por tin un diario i skirbi nos historianan familiar pa bolbe e kurason di esnan bibiente na esnan bibiente—i tambe e kurasonnan di esnan bibiente na su antepasadonan. Ta trata di uní nos famia, generashon pa generashon, den lasonan eterno. Miéntras nos ta hasié, nos ta bira salbadornan riba ... e seru di Zion.⁸

Nos tin e oportunidat spesial di ta instrumento den Su mannan. Nos porhasi esei den nos matrimonionan, den nos famianan, ku nos amigunan, i ku tur hende. Esei ta nos ministerio personal komo disípulonan berdadero di JesuCristu.

I dilanti di dje tur nashonnan lo ta [wòrdu tresé] huntu: i e lo separá nan un for di otro, manera un pastor ta separá su karnénan for di e kabritunan:

I e lo pone e karné na su man drechi, pero e kabritunan na esun robes.

Despues e Rey lo bisa esnan na su man drechi, Bini, bosonan [ku ta] bendishoná di mi Tata, risibí e reino prepará pa bosnan for di e fundashon di e mundu;

Pasobra mi tabatin hamber i bosnan a duna mi karni: mi tabatin set, i bosnan a duna mi di bebe: Mi tabata un strañero, i bosnan a laga mi drenta[serka bosonan]:

Sunú, i bosnan a bistí mi: Mi tabata enfermo, i bosnan a bishitá mi: Mi tabata den prison, i bosnan a bini serka ami.

Despues esnan rekto lo kontest’é, bisando, Señor, ki tempu nos a wak bo ku hamber i a duna bo di kume? òf ku set, i a duna bo di bebe?

Ki tempu nos a wak bo manera strañero, i a laga bo drenta [serka nos]? Of sunú, i a bistí bo?

Òf ki tempu nos a wak bo enfermo, of den prison, i a bai serka bo?

I e Rei lo kontestá i bisa nan, Asina mi ta bisa bosnan, Kualkier kos ku bosnan a hasi pa un di mi rumannan mas pober, bosnan a hasié na ami.⁹

Ku nos por hasi es’ei ta mi orashon den e nòmber di JesuCristu, amèn.