E Saserdosio Preparatorio

Pa Presidente Henry B. Eyring

Promé Konsehero di e Promé Presidensha

Den preparashon di saserdosio, “mustra mi” ta konta mas ku “bisa mi.”

Mi ta gradisí pa ta reuní ku e Saserdosio di Dios, ku ta ekstendé rònt mundu. Mi ta apresiá boso fe, boso servisio, i boso orashonnan.

Mi mensahe awe nochi ta tokante e Saserdosio Aaróniko. E ta tambe pa nos tur ku ta yuda den realisashon di e promesanan di Señor pa esnan ku ta poseé loke ta deskribí den skritura komo e “saserdosio menor.”¹ Tambe e ta wòrdu yamá e saserdosio preparatorio. Ta tokante e glorioso preparashon ei ku ami ke papia awe nochi.

E plan di Señor pa Su obra ta yen di preparashon. El a prepará e mundu pa nos pa eksperenshá e pruebanan i e oportunidat di mortalidat. Miéntras ku nos ta aki, nos ta den loke skritura ta yama un “estado preparatorio.”²

E profeta Alma a deskribí e importansia krusial di e preparashon ei pa bida eterno, kaminda nos por biba pa semper komo famia ku Dios e Tata Eterno i JesuCristu.

El a splika e nesesidat pa preparashon di e manera aki: “I nos ta mira ku morto ta yega na e humanidat, si, e morto di kual Amulek a papia, ku ta e morto temporal, sinembargo espasio a wòrdu konsedé na hòmber den kual nan por arepentí; p’esei e bida aki a bira un estado di prueba, un tempu pa prepará pa topa Dios; un tempu pa prepará pa e estado infinito di kual nos a papia di dje, ku ta despues di e resurekshon di e morto.”³

Igual ku e tempu ku nos a wòrdu otorgá pa biba den mortalidat ta pa prepará pa enkontrá ku Dios, e tempu ku nos a wòrdu otorgá pa sirbi den Saserdosio Aaróniko ta e oportunidat ku prepará nos pa siña kon pa duna ayudo krusial na otronan. Meskos ku e Señor ta duna e ayudo ku nos ta rekerí pa pasa e prueba di bida mortal, tambe E ta manda nos ayudo den nos preparashon di saserdosio.

Mi mensahe ta [tantu] pa esnan ku e Señor a manda pa yuda prepará e poseedornan di Saserdosio Aaróniko, komo pa esnan ku ta tin e Saserdosio Aaróniko. Mi ta papia ku tatanan. Mi ta papia ku obispunan. Mi ta papia ku esnan di Saserdosio di Melkisedek ku a wòrdu konfiá pa ta kompañero i maestronan di e Hombres Jovenes ku ta den preparashon di saserdosio.

Mi ta papia den apresio i gratitut pa hopi di bosonan rònt mundu i atraves di tempu.

Lo mi ta negligente si mi no papia di e presidente di rama i di e obispu di mi hubentut. Mi a bira un diákono na e edat di diesdos aña den un rama chikitu den e parti oriental di Merka. E rama tabata asina chikí ku mi ruman mas grandi i ami tabata e úniko Poseedornan di Saserdosio Aaróniko te ora mi tata, ku tabata e presidente di rama, a invitá un hòmber di mediano edat pa uni na Iglesia.

E konverso nobo ta risibí e Saserdosio Aaróniko, i ku n’e un yamamentu pa kuida e Saserdosio Aaróniko. Te ainda mi ta kòrda manera tabata ayera. Mi por kòrda e blachinan bunita di otoño ora e konverso nobo a kompañá mi ruman ku mi pa bai hasi algu pa un viuda. Mi no ta kòrda kiko e proyekto tabata, pero si mi ta kòrda e sentimentu ku e poder di e saserdosio a uni pa hasi loke despues m’a siña ku e Señor a bisa ku nos tur mester hasi pa nos haña pordon di nos pikanan i p’asina ta prepará pa mir’É.

Si mi wak bèk awor aki, mi ta sinti gratitut pa un presidente di Rama ku a yama un konverso nobo pa yuda Señor prepará dos mucha hòmber ku na su turno riba un dia lo bira obispu enkargá ku kuido di e pobernan i esnan den nesesidat, i tambe pa presidí riba e saserdosio preparatorio.

Mi tabata ainda un diákono, ora nos famia a muda pa un bario grandi na Utah. Ta promé biaha ku mi a sinti e poder di un quorum kompletu di Saserdosio Aaróniko. En realidat, tabata e promé biaha ku mi a mira unu. I despues tabata e promé biaha ku m’a sinti e poder i bendishon di un obispu presidiendo e quorum di presbítero.

E obispu a yama mi pa ta e promé asistente den e quorum di presbítero. Mi ta kòrda ku e mes a siña e quorum—okupá ku e tabata ku otro hòmbernan talentoso, ku e por a yama pa siña nos. E tabata tin e stulnan den e klas poné den forma di sirkulo. E tabata laga mi sinta den stul banda di dje, na su man drechi.

Mi por a wak riba su skouder ora e tabata siña. E tabata wak abou den e notanan, koutelosamente di taip den su map di kueru riba su rudia i den e skrituranan bon usá i hopi marká ku e ta tin habrí riba e otro rudia. Mi por kòrda e eksitashon ora e tabata bolbe konta e historia di balentia di e buki di Daniel i su testimonio di e Salbador, e Señor JesuCristu.

Semper lo mi kòrda kon Señor tabata skohe kompañeronan koutelosamente pa su poseedornan di saserdosio den preparashon.

Mi obispu tabatin konseheronan poderoso, i pa rasonnan ku mi no tabata komprondé e tempu ei, mas ku un biaha e tabata yama mi via telefon na kas i bisa, “Hal mi mester pa bo bai ku mi pa hasi algun bishita.” Un biaha, ta pa mi bai ku n’e na kas di un viuda ku tabata biba su so i sin kuminda den su kas. Na kaminda pa kas el a para e outo, habri su skritura, i bisa mi dikon el a trata e viuda komo si e [viuda] tabata tin e poder no solamente pa kuida su mes, pero, den un tempu den futuro lo ta apto pa yuda otronan.

Un otro bishita tabata na un hòmber [ku tabata pa] un tempu largu ousente di Iglesia. Mi obispu a invit’é pa ta ku e santunan. Mi a sinti su amor ku [pa] mi tabata parse un enemigu desagradabel i rebelde.

Na un otro okashon atrobe nos a bishitá un kas kaminda dos mucha muhé chikitu a wòrdu manda dor di nan mayornan alkohóliko pa topa ku nos na porta. E muchanan chikitu a bisa dor di e porta ku nan mama i tata tabata drumí. E obispu a keda papia ku nan, smail i elogiá nan bondat i nan balentia, pa loke a parse dies minüt òf mas. Ora mi tabata kana banda di dje, e di pokopoko, “Esei tabata un bon bishita. E dos muchanan ei nunka lo lubidá ku nos a bin.”

Dos di e bendishonnan ku un kompañero mayor di saserdosio por duna ta konfiansa i un ehèmpel di kuido. Mi a mira esei ora mi yu a haña un kompañero di maestro orientador ku tabata tin hopi mas eksperensha ku e tabatin. Su kompañero mayor a yega di [sirbi komo] presidente di mishon dos biaha i a sirbi den otro yamamentunan di liderato.

Promé ku sali pa bishitá un di nan famianan asigná, e lider di saserdosio ei hopi eksperenshá a puntra pa bishitá mi yu na kas promé. Nan a pèrmití mi pa skucha. E kompañero mayor a habri ku orashon, pidiendo ayudo. Despues el a bisa algu asina ki na mi yu, “Mi ta kere ku nos tin ku siña un lès ku lo zona pa e famia aki komo un yamada pa arepentimentu. Mi ta kere ku nan lo no asept’é muchu bon di mi. Mi ta kere ku nan lo aseptá e mensahe mihó di abo. Kiko bo ta pensa riba esei?”

Mi ta kòrda e teror den e wowonan di mi yu. Te ainda mi por sinti e alegria di e momento ei ora mi yu aseptá e konfiansa.

No ta pa kasualidat ku e obispu a pone e kompañerismo ei huntu. Ta ku preparashon kouteloso ku e kompañero mayor a siña di e sentimentunan di e famianan ku nan tabata na punto di bai siña. Ta pa inspirashon ku el a sinti ku e mester hala atras, pa konfia un hóben sin eksperensha pa yama yunan mayor di Dios pa arepentimentu i na siguridat.

Mi no sa e resultado di nan bishita, pero mi sa ku un obispu, un poseedor di Saserdosio di Melkisedek, i e Señor tabata preparando un mucha hòmber pa ta un hòmber di saserdosio i riba un dia un obispu.

Awor, historianan di éksito asina den preparashon di saserdosio ta familiar pa boso di loke bosonan a mira i a eksperenshá den boso propio bida. Boso a konosé i a tabata obispunan, kompañeronan i mayornan asina. Boso a mira e man di e Señor den boso preparashon pa e e debernan di saserdosio, ku E tabata sa ku lo bin riba boso kaminda.

Nos tur den e saserdosio tin un obligashon pa yuda Señor [pa] prepará otro. Tin algun kos ku nos por hasi ku ta di mas importansha. Mas poderoso ainda ku uso di palabra den nos enseñansa lo ta nos ehèmpel di biba e Evangelio.

E kos di mas importante den nos saserdosio ta invitá hende pa bin na Cristu dor di fe, arepentimentu, boutismo i risibí e Spiritu Santu. Presidente Thomas S. Monson, por ehèmpel, a duna sermonnan pa konmové e kurason riba tur e doktrinanan aki. Pero loke mi sa di kiko el a hasi ku hende i misioneronan i amigunan di e Iglesia tempu e tabata presidí e mishon di Toronto ta motivá mi pa aktua.

Den preparashon di saserdosio, “mustra mi” ta konta mas ku “konta mi.”

Ta p’esei e skrituranan ta asina importante pa prepará nos pa e saserdosio. Nan ta yen di ehèmpel. Mi ta sinti ku ta manera mi por mira Alma siguiendo e mandamentu di e angel i kore bai bèk pa siña e mal hendenan di Ammonihah ku a rechasé.⁴ Mi ta sinti e frialdat den e prison ora e Profeta Jose Smith a wòrdu bisa dor di Dios pa tuma kurashi i ku e lo wòrdu kuidá.⁵ Ku e skrituranan ei visualisá den mente, nos por prepará pa perseverá den nos servisio ora e ta parse duru.

Un tata òf un obispu òf un kompañero di maestro orientador mayor ku ta mustra ku e ta konfia un poseedor di saserdosio yòn por kambia su bida. Mi tata, un biaha a wòrdu puntrá pa un miembro di e quorum di Diesdos Apòstelnan pa skirbi un artíkulo kòrtiku di siensia i religion. Mi tata tabata un sientífiko famoso i un poseedor di saserdosio fiel. Pero te ainda mi por kòrda e momento ku el a pasa mi e papel ku el a skirbi i bisa mi, “Ata ki, promé ku mi mand’é pa e Diesdosnan, mi ke pa bo les’é. Abo lo sa si e ta korekto.” E tabata tin trintidos aña mas bieu ku mi i inmensamente mas sabi i inteligente ku mi.

Te ainda mi ta wòrdu fortalesé pa e konfiansa di un gran tata i un hòmber di saserdosio. Mi tabata sa ku su konfiansa no tabata den mi, pero ku Dios por i lo konta mi kiko ta bèrdat. Boso kompañeronan ku mas eksperensha por bendishoná un poseedor hóben di saserdosio den preparashon ki ora ku boso por mustr’é e tipo di konfiansa ei. E lo yud’é konfia e sentimentu suave di inspirashon pa su mes ora esei ta bin un dia ora e pone su mannan pa seya e bendishon pa sana un yu ku dòkternan a bisa ku ta bai muri. E konfiansa ei a yuda mi mas ku un biaha.

Nos éksito den prepará otronan den e saserdosio lo bin den proporshon di kuantu nos stima nan. Esaki lo ta speshalmente bèrdat ora nos tin ku koregí nan. Pensa riba e momentu ku un poseedor di Saserdosio Aaróniko, kisas na e mesa di santa sena, hasi un eror hasiendo un ordenansa. Esei ta algu serio. Tin biaha e eror ta rekerí korekshon den públiko ku posibilidat di resentimentu, un sentimentu di humiashon òf asta di wòrdu rechasá.

Lo bo rekòrdá e konseho di e Señor: “Reprendé na momento oportuno ku severidat, ora esaki ta indusí pa e Spiritu Santu; y despues demostrando un amor mas grandi na esun ku bo a reprendé, pa e no konsiderá bo su enemigu.”⁶

E palabra[nan] mas grandi tin signifikashon speshal den prepará poseedornan di saserdosio ora nan mester di korekshon. E palabra[nan] ta sugerí un oumento di amor ku tei einan kaba. E “demostrashon” ta tokante e oumento. Esnan di bosonan ku ta preparando poseedornan di saserdosio siguramente lo mira nan kometé erornan. Promé ku nan haña bo korekshon, nan mester a sinti bo amor promé i firmemente. Nan mester a sinti bo elogio genuino promé ku nan lo aseptá bo korekshon.

Señor Mes a karga esnan ku e saserdosio menor ku rèspèt ku ta honrá nan potensial i nan balor p’E. Skucha e palabranan aki, bisá pa Huan Boutista ora e Saserdosio Aaróniko a wòrdu restourá: “Riba bosonan, mi konsiervonan, den e nòmber di e Mesias, mi ta konferí e Saserdosio di Aaron, kual ta poseé e yabinan di e ministerio de angelnan, i di e evangelio di arepentimentu, i di boutismo pa imershon pa e pordon di pikanan; i esaki nunka mas lo wòrdu kita di mundu, te ora e yunan di Levi un biaha mas ofresé un sakrifisio den rektitut na Señor.”⁷

E saserdosio Aaróniko ta un asesorio [parti] di e Saserdosio mayor di Melkisedek.⁸ Komo presidente di tur e saserdosio, e Presidente di e Iglesia ta presidí riba e saserdosio preparatorio tambe. Su mensahe durante e añanan pa bai na reskate ta kuadra perfektamente ku e mandato pa hiba e evangelio di arepentimentu i di boutismo den e bida di otronan.

Quorumnan di diákono, maestro i presbítero ta reuní regularmente pa hala kada miembro di e quorum mas serka di Dios. Presidenshanan ta asigná miembronan pa ekstendé [nan man] den fe i amor. Diákononan ta pasa e santa sena ku reverensha i ku fe ku e miembronan ta sinti e efekto di e Ekspiashon i disidí pa warda e mandamentunan ora nan ta partisipá di e emblemanan sagrado ei.

Maestronan i presbíteronan ta hasi orashon ku nan kompañeronan pa kumpli e karga di kuida e Iglesia, persona pa persona. I e kompañeronan ei ta hasi orashon huntu ora nan siña e nesesidatnan i e speransa di kabesnan di kas di e famianan. Ora nan hasi esaki, nan ta wòrdu prepará pa e dia mas grandi ora nan lo presidí komo tata, den fe, den un famia di nan mes.

Mi ta testifiká ku tur ku sirbi huntu den e saserdosio ta preparando un pueblo pa e binida di Señor na Su Iglesia. Dios e Tata ta biba. Mi sa—mi sa—ku Jesus ta e Cristu i ku E stima nos. Presidente Thomas S. Monson ta e profeta bibiente di Señor. Esaki mi ta testifiká den e nòmber sagrado di JesuCristu amèn.