Mayornan: E Promé Instruktornan di Evangelio di Nan Yunan

Pa Tad R. Callister

Presidente General di Eskuela Dominikal

Ora tur kos ta bisá i hasí, e hogar ta e lugá ideal pa siña e evangelio di JesuCristu.

Ben Carson a bisa di su mes, “Mi tabata e studiante di mas malu di henter 5de klas (grupo 7).” Riba un dia Ben a tuma un èksamen ku trinta problema. E studiante patras di dje a korigié i a dun’é bèk. E maestro, Yùfrou Willamson, a kuminsá yama e nòmber di e studiantenan pa bisa nan e resultadonan. Finalmente, el a yega na Ben. Ku bèrgwensa, el a gruña den boka e kontesta. Yùfrou Willamson, pensando ku el a tende “nuebe,” a respondé ku pa Ben un resultado di nuebe for di trinta tabata un mehorashon grandi. E studiante patras di Ben a sklama, “No [ta] nuebe! … el a kontestá e no tin niun … korekto.” Ben a bisa ku e ta ke pa e tera gulié.

Durante e mesun tempu e mama di Ben, Sonya, tabata enfrentá su propio opstákulonan. E tabata un di bintikuater yu, e tabatin solamente un 3de klas (grupo 5), i e no por lesa. El a kasá na e edat di 13, a divorsiá, [i e] tabatin dos yu hòmber, i tabata kria nan na e Ghetto (barionan ku a keda atras) di Detroit. Sinembargo, e tabata hopi outosufisiente i tabatin un fe firme ku Dios lo yud’é i su dos yu hòmbernan si nan hasi nan parti.

Un dia un kambio a yega den su bida i di su yunan. El a realisá ku e hendenan eksitoso pa kua e tabata klinoia [nan] kasnan tabatin un biblioteka—nan ta lesa. Despues di trabou el a bai na kas i a pagá e televishon ku Ben i su ruman hòmber tabata wak. Básikamente el a bisa: Bosnan ta wak muchu televishon. di awor [en adelante] bosnan por wak tres programa pa siman. Den boso tempu liber bosnan tin ku bai biblioteka—lesa dos buki kada siman i duna mi un reporte.

E muchanan hòmber tabata sorprendé. Ben a bisa ku e nunka ántes el a yega di lesa un buki den su bida, ku esepshon di ora e tabata rekirí na skol. Nan a protestá, kehá, diskutí, pero e no a bale nada. Despues Ben a reflekshoná, “E mama a stipulá e lei nobo. Mi no a gusta e regla nobo, pero su determinashon pa wak nos mehorá a kambia e kurso di mi bida.”

I esta [un gran] kambio esaki a hasi. Den grupo 9 e tabata den e mihó studiante di su klas. El a sigui despues pa e Universidat di Yale ku un beka, despues e skol medisina di Johns Hopkins, kaminda na e edat di 33 el a bira e hefe di neurosirugía pediátrika i un siruhano konosí rònt mundu. Kon esaki por ta posibel? Debí na un mama ku, sin hopi bentahanan di bida, a magnifiká su yamamentu komo mayor.¹

E skrituranan ta papia di e papel di mayornan—ku ta nan deber di siña nan yunan e doktrina di arepentimentu, fe den Cristu e Yu di e Dios bibiente, i di boutismo i e don di e Spiritu Santu (D&C 68:25).

Manera mayornan nos mester ta e promé instruktornan di evangelio i di ehèmpel pa nos yunan—no e obispu, e Eskuela dominikal, e Mujeres òf Hombre Jovenes, pero e mayornan. Komo e promé instruktornan di evangelio, nos por siña nan e poder i realidat di e Ekspiashon—di nan identidat i destino divino—i pa medio di esaki duna nan un fundeshi di baranka riba kual nan lo por konstruí. Ora tur kos a wòrdu bisá i hasí, e kas ta e lugá ideal pa siña e evangelio di JesuCristu.

Aproksimadamente un aña pasá mi tabatin un asignashon na Beirut, Líbano. Miéntras mi tabata ei, mi a siña di un mucha muhé di 12 aña, Sarah. Su mayornan i su dos rumannan mas bieu a wòrdu konbertí na e Iglesia na Rumania pero despues tabata rekirí bolbe na nan tera original ora Sarah apénas a kumpli shete aña. Na su tera original no tabatin e presensia di Iglesia, no [tabatin] unidatnan organisá, no [tabatin] Eskuela dominikal, ni e programa di Mujeres Jovenes. Despues di sinku aña su famia a bin haña sa di un rama na Beirut i, djis promé ku mi a yega, a manda nan yu muhé di 12 aña Sarah, kompañá ku su rumannan mas grandi, pa wòrdu boutisá. Miéntras mi tabata ei, mi a duna un devoshonal riba e plan di salbashon. Ku algun frekuensia Sarah a subi su man i a kontestá preguntanan.

Despues di e reunion, i sabiendo ku su eksperiensha ku e Iglesia tabata kasi ineksistente, mi a bai serka dje i a puntra, “Sarah, kon bo tabata sa e kontestashonnan riba e preguntanan?” Inmediatamente el a respondé, “Mi mama a siña mi.” Nan no tabatin un Iglesia den nan komunidat, pero nan tabatin e evangelio den nan kas. Su mama tabata e promé instruktor di evangelio.

Tabata Enos ku a bisa, “E palabranan ku hopi biaha mi a tende mi tata bisa tokante bida eterno, i e goso di e santunan, a penetrá profundamente den mi kurason” (Enos 1:3). Ta opvio ken tabata e promé instruktor di evangelio di Enos.

Mi ta kòrda mi tata di rè banda e fogon lesando su skrituranan i otro bon bukinan, i nos tambe lo rèk banda di dje. Mi ta kòrda e kartanan ku el a konservá den su saku ku sitanan di e skrituranan i di Shakespeare i palabranan nobo ku el a memorisá i siña. Mi ta kòrda e preguntanan di evangelio i kòmbersashonnan na e mesa di komedor. Mi ta kòrda e hopi biaha ku mi tata a hibá mi pa bishitá e ansianonan—kon nos a bai kumpra eiskrim pa esun of un sena di galiña pa un otro òf ku e ta duna man pa despedí ku un algu di sèn aden. Mi ta kòrda e bon sentimentu i e deseo di ta manera e ta.

Mi ta kòrda mi mama, banda di nobenta aña, kushinando den su kushina kondominio i despues saliendo ku un skalchi di kuminda. Ora mi a puntr’é unda e tabata bai. El a respondé, “Mi ta hiba algu di kuminda pa e ansianonan.” Mi a pensa den mi mes, “Mama, bo ta [un] ansiano .” Nunka lo mi por ekspresá sufisiente gratitut pa mi mayornan, ku tabata mi promé instruktornan di evangelio.

Un di e kosnan di mas nifikashon ku nos por hasi komo mayornan ta pa siña nos yunan e poder di orashon, [i] no solamente e rutina di orashon. Ora mi tabata banda di 17 aña, mi tabata bai na rudia den mi kama bisando mi orashonnan di anochi. Sin mi sa, mi mama tabata pará den porta. Ora mi a kaba, el a bisa, “Tad, bo ta pidi e Señor yuda bo haña un bon kasá?”

Su pregunta a sorprendé mi. Esaki tabata e kos ku tabata mas leu den mi mente. Mi tabata pensa di basketbòl i skol. Anto, mi a kontestá, “No,” i el a respondé, “Wèl, bo mester [hasié], mi yu, e lo ta e desishon mas importante ku lo bo tuma.” E palabranan ei a keda den mi kurason, anto p’esei, pa e siguiente seis aña mi a pidi Dios yuda mi haña un bon kasá. I El a kontestá e orashon ei hopi bon.

Manera mayornan nos por siña nos yunan hasi orashon pa kosnan ku konsekuensia eterno—pa resa pa e forsa di ta ku moralmente limpi den un mundu desafiante, pa ta obediente, i pa nan tin e kurashi pa representá loke ta korekto.

Sin duda e mayoria di nos hubentut ta hasi nan orashon di anochi, pero kisas hopi di nan ta lucha ku e kustumber di orashon personal mainta. Komo mayornan, komo nan promé instruktornan di evangelio, nos por koregí esaki. Kul mayornan den e Buki di Mormon lo tabata laga nan yunan kana dilanti di e bataya sin un protekshon pa pechu òf sin un eskudo i spada pa protehé nan kontra e potensial atakanan mortal di e enemigu. Pero kuantu di nos ta laga nos yunan kana sali bai pafó di e porta kada mainta den e e kampo di bataya mas peligroso, pa enfrentá Satanas, i su hopi tentashonnan, sin un protekshon pa pechu òf sin un eskudo i spada ku ta bini for di e poder protektor di orashon? E Señor a bisa, lesa semper … ku bosnan por vense Satanas (D&C 10:5). Komo mayornan nos por yuda siña nos yunan e kustumber i poder di e orashon di mainta.

Tambe nos por siña nos yunan pa usa nan tempu sabiamente. Tin okashon, meskos ku Sonya Carson, ku nos lo mester limitá ku amor pero firme e tempu ku nos yunan tin pa televishon i otro aparatonan elektróniko ku ta monopolisá nan bidanan. Na lugá di esaki nos mester dirigí nan tempu riba esfuersonan di evangelio mas produktivo. Por tin algun resistensia na kuminsamentu, algun kehamentu, pero komo Sonya Carson, nos mester tin e vishon i e boluntat di keda para firme. Un dia nos yunan lo komprendé i apresiá loke nos a hasi. Si nos no hasi esaki, ken lo hasié?

Nos tur lo por puntra nos mes: nos yunan ta haña nos mihó esfuersonan spiritual, intelektual, i kreativo, òf nan ta haña e sobrá di nos tempu i talentonan, despues ku nos a duna tur kos na nos yamamentu òf metanan profeshonal? Den e bida ku ta bini, mi no sa si títulonan manera obispu òf presidente di Sosiedat di Socorro lo keda, pero mi sa ku e títulonan di esposo i esposa, tata i mama, lo keda i lo wòrdu honrá, mundunan sin fin. Esaki ta un rason ku ta asina importante pa honrá nos responsabilidatnan komo mayornan aki na mundu pa nos por prepará pa e responsabilidatnan mas grandi, pero similar, den e bida ku ta bini.

Komo mayornan, nos por kontinuá ku seguransa ku Dios hamas lo laga nos so. Dios nunka ta duna un responsabilidat sin ofresé un ayudo divino—di esaki mi por testifiká. Laga nos den nos papel divino komo mayornan, i den asosiashon ku Dios, bira e promé instruktornan di evangelio i ehèmpelnan pa nos yunan, asina mi ta rogaa den e nòmber di JesuCristu, amèn.