Mi Sa e Kosnan Aki di Mi Mes

Pa Elder Craig C. Christensen

Di e Presidensha di e Setentanan

Siña pa nos mes ku e evangelio restourá di JesuCristu ta bèrdat por ta un di e eksperenshanan di mas grandi i yen di goso den bida.

Mi rumannan stimá, kontinuamente nos ta inspirá pa e ehèmpel personal i servisio di saserdosio di Presidente Thomas S. Monson. Resientemente, [na] diferente diákono a wòrdu puntrá, “Kiko bo ta atmirá mas di Presidente Monson?” Un diákono a kòrda kon Presidente Monson, komo mucha a duna su kosnan di hunga na amigunan den nesesidat. Un otro a menshoná kon Presidente Monson tabata sòru pa hopi viudanan den su bario. Un di tres a nota ku el a wòrdu yamá komo apòstel na un edat hopi hóben i a bendishoná hendenan rònt mundu. E ora ei un hóben a bisa, “e kos ku mi ta atmirá mas di Presidente Monson ta su testimonio fuerte.”

Sigur, nos tur a sinti nos profeta su testimonio special di e Salbador JesuCristu i su kompromiso pa semper sigui e susuro di e Spiritu. Ku kada eksperensha ku e kompartí, Presidente Monson ta invitá nos pa biba e evangelio mas kompletu i [pa] buska i fortalesé nos propio testimonio personal. Kòrda kiko el a bisa di e pulpito aki djis algun konferensha atras. “Pa nos por ta fuerte i soportá tur forsa ku ta hala nos den direkshon robes … , nos mester tin nos propio testimonio. Sea ku bo tin 12 òf 112—òf kua [aña] ku ta keda meimei—bo por sa pa bo mes ku e Evangelio di JesuCristu ta berdadero.”¹

Maske mi mensahe awe nochi ta dirigí na esnan ku ta mas serka di 12 ku 112, e prinsipionan ku mi ta kompartí ta apliká ta tur hende. Kontestando e ponensia di Presidente Monson, lo mi puntra, Kada unu di nos sa pa nos mes ku e evangelio ta berdadero? Nos por bis ku seguransa ku nos testimonio ta di bèrdat di nos mes? Pa sita Presidente Monson atrobe: “Mi ta afirmá ku un testimonio fuerte di nos Salbador i di Su evangelio lo [protehá bosonan for di e piká i maldat rònt di bo]. … Si te ainda bo no tin un testimonio di e kosnan aki, hasi e loke ta nesesario pa haña unu. Ta esensial pa bo pa yega na bo propio testimonio, pasó e testimonio di otro lo hiba solamente na un pida di kaminda.”²

Mi sa E Kosnan Aki di Mi Mes

Siña pa nos mes ku e evangelio restourá di JesuCristu ta berdadero por ta un di e eksperensha mas grandi i di hopi alegria den bida. Kisas nos tin ku kuminsá pa konfia riba e testimonio di otronan—bisando, manera e balente guereronan, “Nos no ta duda ku nos mamanan tabata sa.”³ Esaki ta un kaminda pa kuminsá, pero nos mester konstruí di einan. Pa ta fuerte bibando e evangelio, no tin nada mas importante ku risibí i fortalesé nos propio testimonio. Nos mester ta kapas pa deklará, manera Alma, “Mi sa e kosnan aki di mi mes.”⁴

“I kon bosonan ta suponé ku mi sa di nan sertesa?” Alma ta sigui, “Ata aki, mi ta bisa boso nan ta duná na konosé na mi pa medio di e Spiritu Santu di Dios. Ata aki, mi a yuna i resa hopi dia pa mi por sa e kosnan aki pa mi mes. I awor mi sa di mi mes ku nan ta berdadero.”⁵

Mi ta Deseá pa Wak e Kosnan Ku Mi Tata a Mira

Meskos ku Alma, Nefi tambe a yega na sa e bèrdat pa su mes. Despues di skucha su tata papia di su hopi eksperenshanan spiritual, Nefi tabata ke sa kiko su tata tabata sa. Esaki ta mas ku simpel kuriosidat—tabata algu ku e tabatin hopi deseo di wak. Maske ku e tabata “hopi yòn,” e tabatin un deseo grandi pa sa di e misterionan di Dios.”⁶ E tabata anhelá pa “wak, i tende, i pa sa di e kosnan aki, pa medio di e Spiritu Santu.”⁷

Ora Nefi “tabata sinta pensa [den] su kurason,” el a wòrdu hiba “den e spiritu … den un seru hopi haltu,” kaminda el a wòrdu puntrá, “Kiko bo ta deseá?” Su kontesta tabata simpel: “Mi ta deseá pa wak e kosnan ku mi tata a wak.”⁸ Dor di su kurason kreyente i su esfuerso diligente, Nefi a wòrdu bendishoná ku un eksperensha maravioso. El a risibí un testimonio di e nasementu benidero, bida i krusifikashon di e Salbador JesuCristu; el a mira e binida di e Buki di Mormon i di e Restourashon di e evangelio den e delaster dianan—tur komo resultado di su deseo sinsero pa sa pa su mes.⁹

E eksperenshanan personal aki ku e Señor a prepará Nefi pa e arversidat i desafionan ku pronto e lo enfrentá. Nan a abilit’é pa para firme asta ora otronan di si famia tabata luchando. E por a hasi esaki pasó el a siñá pa su mes i e tabata sa pa su mes. El a wòrdu bendishoná ku su propio testimonio.

Laga E Pidi Dios

Meskos ku e historia di Nefi, e Profeta Jose Smith tabata “sumamente yòn” ora su “mente a wòrdu yamá pa reflekshon serio” di bèrdatnan spiritual. Pa Jose, tabata tempu di “gran intrankilidat,” di ta rondoná pa mensahenan kontradiktorio i konfuso tokante religion. E ker a sa kua iglesia ta berdadero.¹⁰ Inspirá pa e palabranan aki den Beibel: “Si algun di bosonan tin falta di sabiduria, lag’é puntra Dios,”¹¹ el a aktua pa su mes pa haña un kontesta. Riba un mainta bunita den e primavera 1820, el a drenta den e mondi di palunan i bai den orashon na rudiá. Dor di su fe i pasó Dios tabata tin un obra speshal pa e hasi, Jose a risibí e vishon glorioso di Dios e Tata, Su Yu, JesuCristu i a siña pa su mes kiko e mester a hasi.

Bo ta mira den e eksperensha di Jose un patronchi ku bo por usa pa gana òf fortalesé bo propio testimonio? Jose a permití e skritura pa penetrá den su kurason. El a skrudiñá nan profundamente i apliká nan den su mes situashon. Despues el a aktua riba loke e tabata sa. E resultado tabata e Promé Vishon Glorioso—i tur kos ku a bin despues di esei. E Iglesia literalmente a wòrdu fundá riba e prinsipionan ku tur hende—inkluyendo un granjero di 14 aña di edat—por “puntra Dios” i risibí un kontesta riba nan orashonnan.

Bon Kiko ta un testimonio?

Hopi biaha miembronan di Iglesia ta bisa ku nan testimonio di e evangelio ta nan poseshon di mas balor. Ta un don sagrado di Dios ku ta bin na nos dor di e poder di e Spiritu Santu. Ta e seguridat kalmu i ku no ta kibra, ku nos ta risibí, ora nos studia, hasi orashon, i biba e evangelio. Ta e sentimentu di e Spiritu Santu testifikando na nos alma ku loke nos ta siñando i hasiendo ta korekto.

Algun persona ta papia di testimonio manera ku ta un suich di lus e ta—òf e ta sendé òf pagá; òf bo tin un testimonio, òf bo no tin. En realidat, un testimonio ta mas manera un palu ku ta pasa den diferente etapa di kresementu i desaroyo. Algun di e palunan di mas grandi na mundu por wòrdu haña den Redwood National Park na e parti oksidental na Merka. Ora bo para na base di e palunan masif aki, ta asombroso pa pensa ku kada unu a krese di un simia chikitu. Meskos ta ku nos testimonionan. Maske ku nan por kuminsá ku un solo eksperensha spiritual, nan lo krese i desaroyá segun tempu dor di nutrishon konstante i frekuente enkuentro spiritual.

No ta sorpresivo e ora ei, ku ora Alma a splika kon nos por desaroyá un testimonio, el a papia di un simia ku ta krese bira un palu. “Si bo duna lugá,” el a bisa, “ku un simia wòrdu sembrá den bo kurason, ata aki, si e ta un simia di bèrdat òf un bon simia, si bo no sak’é afó dor di no kere, e ta kuminsá ta hincha den bo pechu; i ora bo sinti e movishonnan di hinchamentu aki, lo bo kuminsá di bisa den bo mes—E mester ta un bon simia, òf ku e palabra ta bon, pasó e ta kuminsá hasi mi kurason mas grandi; si, e ta kuminsá di iluminá mi komprondementu, si e ta kuminsá di ta sabroso pa mi.”¹²

Esaki ta hopi biaha kon un testimonio ta kuminsá: ku sagrado, iluminashon,i un sentimentu di siguransa ku ta demostrá na nos ku e palabra di Dios ta berdadero. Sinembargo, kon maravioso ku e sentimentunan aki ta, nan ta solamente e kuminsamentu. E trabou pa kresementu di bo testimonio no a kaba—meskos ku e trabou di kresementu di un palu di “redwood” ta kaba ora e promé parti chikitu di e palu sali for di tera. Si nos ignorá òf neglish’é e susuronan spiritual di kuminsamentu, si nos no dun’é nutrishon dor di kontinuamente studia e skrituranan i hasi orashon, i dor di buska mas eksperensha ku e Spiritu, nos sentimentunan lo blikia i nos testimonio lo disminuí.

Manera Alma a poné: “Si bo neglishá e palu, i no pone atenshon na su nutrishon, ata aki e lo no haña ningun rais; i ora e kayente di solo ta bini i rank’é, pasó e no tin rais, e ta bula bai, i abo ta kue i tir’é afó.”¹³

Den mayoria kaso, nos testimonionan lo krese meskos ku e palunan ta krese: gradualmente, kasi sin wòrdu persibí, komo resultado di nos konstante kuido i esfuersonan diligente. “Pero si bo ke nutri e palabra,” Alma ta prometé, :si, nutri e palu ora e kuminsá krese, dor di bo fe ku gran diligensha, i ku pasenshi, mirando dilanti pa e frutanan di dje, e lo haña rais; i ata ki e lo ta un palu ku ta brota pa bida eterno.”¹⁴

Awor Ta e Ora; Awe Ta e Dia

Mi propio testimonio a kuminsá ora mi tabata studiando i skrudiñando e enseñansanan ku tin den e Buki di Mormon. Ora m’a bai na rudia pa puntra Dios den humilde orashon, e spiritu Santu a testifiká na mi alma ku loke mi tabata lesando tabata berdadero. E testimonio tempran aki a bira e katalisadó pa mi testimonio di hopi otro bèrdatnan di e evangelio, pa, manera presidente Monson a siña: “si nos sa ku e Buki di Mormon ta bèrdat, e ora ei ta sigui ku Jose Smith enbèrdat tabata un profeta i ku el a mira Dios e Tata Eterno i Su Yu, JesuCristu. Tambe ta sigui ku e evangelio a wòrdu restourá den e delaster dianan aki dor di Jose Smith—inkluyendo e restourashon di tantu e Saserdosio Aaróniko komo di Melkisedek.”¹⁵ For di e dia ei, mi a yega di tin hopi eksperenshanan sagrado ku e Spiritu Santu ku ta reafirmá na mi ku JesuCristu ta e Salbador di e mundu i ku Su evangelio restourá ta berdadero. Ku Alma mi por bisa ku siguridat ku mi sa [ku] e kosnan aki ta bèrdat pa mi mes.

Mi amigunan hóben, awor ta e tempu i awe ta e dia pa siña i reafirmá pa nos mes ku e evangelio ta berdadero. Kada unu di nos tin un obra importante pa hasi. Pa logra e obra ei, i pa ta protehá di tentashonnan di mundu ku ta parse di tei tur kaminda, nos mester tin fe manera Alma, Nefi, i e hóben Jose Smith pa optené i desaroyá nos propio testimonio.

Meskos ku e hóben diákono di kual mi a papia anteriormente, mi ta atmirá Presidente Monson pa su testimonio. Ta manera un palu “redwood” masha grandi mes, sinembargo asta e testimonio di Presidente Monson mester a krese i desaroyá durante tempu. Nos por yega na sa pa nos mes, meskos ku Presidente Monson, ku JesuCristu ta nos Salbador i Redentor di e mundu, ku Jose Smith ta e profeta di e Restourashon, inkluyendo e restourashon di e saserdosio di Dios. Nos ta poseedornan di e santu saserdosio ei. Ku nos por siña e kosnan aki i sa nan pa nos mes ta mi humilde orashon den e nòmber sagrado di JesuCristu, amèn