Nos Tur No ta Limosnero?

Pa Elder Jeffrey R. Holland

Di e Quorum di e Diesdos Apòstelnan

Riku òf pober, nos mester “hasi loke nos por” ora otronan ku ta den nesesidat.

Esta un elemento maravioso introdusí den nos konferensha general. Bien hecho Eduardo.

Den lokual lo bira e momentu di mas asombroso di kuminsamentu di Su ministerio, Jesus a lanta para den e sinagoga na su suidat Nazaret i a lesa e palabranan aki profetisá pa Isaías i registrá den e Evangelio di Lukas: “E Spiritu di Señor ta riba mi, pasobra el a ungí mi pa anunsiá e bon notisia na e pobernan; El a manda mi pa kura esunnan ku kurason kibrá, pa prediká libertat pa e prezunan, … [i] pone den libertat esunnan oprimí.”¹

Asina e Salbador a hasi Su promé anunsio públiko di Su ministerio komo e Mesias. Pero e verso aki tambe ta pone bon kla ku na kaminda pa Su sakrifisio ekspiatorio i Resurekshon infinito, Jesus Su promé i prinsipal deber komo e Mesias lo ta pa bendishoná e pober, inkluso e pober di spiritu.

For di kuminsamentu di Su ministerio, Jesus a stima esun pober i esun desbentahoso den un manera ekstraordinario. El a nase den kas di dos di nan i a krese entre hopi mas di nan. Nos no sa tur e detayenan di Su bida temporal, pero El a bisa un biaha, “Zoro tin kueba, i … para … tin nèshi; ma e Yu di hende no tin niun kaminda pa e sosegá su kabes.”² Aparentemente e Kreadó di shelu i tera “i tur kos ku tin den nan”³ tabata por lo ménos den Su bida adulto, un hende sin lugá pa biba.

Durante historia, pobresa tabata un di e problemanan di mas grandi i amplio di humanidat. E sufrimentu opvio komo resultado di pobresa ta usualmente físiko, pero e daño spiritual i emoshonal ku e por trese por ta hasta mas debilitante. Den kualke kaso, e gran Redentor a hasi e yamada mas persistente di deber pa nos yud’é den kita e karga pisá aki for di hende. Komo Yehova, El a bisa ku E lo husga e kas di Israel severamente pasobra“ boso a hòrta di e pobernan.”

“Ku ki derechi boso ta trapa mi pueblo i kaba ku dignidat humano di pobernan?”⁴

E eskritor di Proverbionan lo hasi e asuntu sumamente kla: “Esun ku oprimí hende pober ta ofendé e Kreador,” i “Esun ku sera orea pa sklamashon di e pober … e lo sklama [tambe], pero e lo no haña oido.”⁵

Den nos tempu, e Iglesia restourá di Jesucristu ainda no a mira su promé aniversario ora ku Señor a manda e miembronan pa sòru pa e pobernan i … esunnan den nesesidat, i duna nan alivio pa nan no tin ku sufri.”⁶ Tuma nota di e tono imperativo den e palabranan aki—pa nan lo no sufri. Asina Dios ta papia ora e ta serio tokante algu.

Konsiderando e desafio inmenso pa superá desigualdat den mundu, kiko un hòmber òf muhé por hasi? E Maestro mes a duna un kontesta. Ora, promé ku Su traishon i Krusifikashon, Maria a hunta Jesus su kabes ku un ungwente karu pa entiero, Hudas Iskariot a protestá pa e ekstrabagansia aki i “a murmurá kontra dje.”⁷

Jesus a bisa:

“Pakiko boso ta molesti’é? El a hasi un bon obra. …

“El a hasi loke e tabata por.”⁸

“El a hasi loke e tabata por”! Esei ta un fórmula poderoso! Un biaha un reportero a puntra Mama Teresa di Calcutta tokante di su tarea sin speransa pa reskatá esunnan den nesesidat na e suidat ei. El a bisa ku, papiando di statistiknan, e tabata logra apsolutamente nada. E muhé chikitu i remarkabel aki a kontestá sin duda ku su obra tabata tokante amor, no statistik. Apesar di e kantidat abrumador fuera di su alkanse, el a bisa e por warda e mandamentu di stima Dios i su próhimo dor di sirbi esunnan fuera di su alkanse ku kualke rekurso ku e tabatin. “Lokual ku nos ta hasi no ta nada mas ku un gota den oséano,” el a bisa na otro okashon. “Pero si nos no hasié, e oséano lo bira un gota ménos [ku e ta].⁹ Seriamente, e reportero a konkluí ku Kristiandat opviamente no ta un esfuerso di statistik. El a rasoná ku tabatin mas goso den shelu pa un pekadó ku arepentí ku pa nobentinuebe ku no tin mester di arepentimentu, e ora ei aparentemente Dios no ta demasiado prekupá ku porsentahe.¹⁰

Pues kon nos por “hasi loke nos por”?

Pa kuminsá, nos por, meskos ku Rei Benjamin a siña, stòp di retené nos medionan pasobra nos ta mira manera ku e pober a trese nan miseria riba nan mes. Kisas algu a krea nan mes difikultatnan, pero e resto di nos no ta hasi mes un kos? No ta p’esei e mandatario kompasivo aki ta puntra, “Nos tur no ta limosnero?”¹¹ Nos tur no ta sklama pa yudansa i speransa i kontesta den nos orashonnan? Nos tur no ta roga pa pordon pa fayonan i problemanan ku nos a kousa? Nos tur no ta implorá ku grasia lo kompensá pa nos debilidatnan, ku miserikòrdia lo triunfá riba hustisia al ménos den nos kaso? No ta sorpresa, ku Rei Benjamin ta bisa ku nos ta haña un remishon di nos pikánan dor di roga na Dios, ken ku kompashon ta respondé, pero nos ta retené un remishon di nos pikánan pa medio di reakshoná ku kompashon na e pober ku ta pidi na nos.¹²

Banda di tuma akshon miserikordioso na nan bienestar, nos mester hasi orashon tambe pa esunnan den nesesidat. Un grupo di Zoramitanan, konsiderá pa algun ruman di nan kongregashon di ta “sushedat” i “sin balor”—eseinan ta palabranan di skritura—tabata wòrdu saká for di nan kasnan di orashon “pa motibu di pobresa di nan pañanan.” Mormon ta bisa, nan tabata, “pober segun e kosnan di mundu; i tambe … pober di kurason”¹³—dos kondishon ku kasi semper ta bai huntu. Kompañeronan mishonal Alma i Amulek ta argumentá kontra di e personanan pober bistí siendo rechasá inhustamente dor di bisa nan ku kualke privilegio ku otronan por ninga nan, nan semper por hasi orashon—den nan kamponan i den na kasnan, den nan famianan, i den nan kurason.¹⁴

Pero despues, na e mes un grupo aki ku a wòrdu rechasá, Amulek ta bisa, “despues ku [boso] a hasi [orashon], si [boso] manda esnan ku nesesidat bai, i esnan sunú, i no bishitá esnan malu i aflihí, i duna di boso poseshonnan, si [boso] tin[esaki], na esnan ku tin nesesidat—mi ta bisa na boso, … boso orashonnan ta enbano, i no ta sirbi boso di nada, i [boso] ta manera hipókritanan ku ta ninga nan fe.”¹⁵ Esta un rekordatorio impreshonante ku riku òf pober, nos “tin ku hasi loke nos por” ora otronan ta den nesesidat.

Awor djis pa mi no ta akusando di ta proponé programanan sosial global ekstrabagante pero poko práktiko, òf deklará e akto di bai mendigá riba kaya pa ta un obra ku bale la pena, mi ta sigurá boso ku mi reverensia pa e prinsipionan di industria, ekonomia, outosufisiensia, i ambishon ta mes un fuerte ku di kualke hòmber òf muhé. Semper ta wòrdu sperá di nos pa nos yuda nos mes promé nos buska yudansa di otronan. Ademas, mi no sa eksaktamente kon kada un di boso lo kumpli ku boso obligashon na esunnan ku no ta òf no por yuda nan mes semper. Pero mi sa ku Dios sa, i El lo yuda boso i guia boso den aktonan di kompashon di disipulado si boso ta deseá konsientemente i ta hasi orashon i ta buska na maneranan pa warda e mandamentu ku El a duna nos kada biaha atrobe.

Boso lo rekonosé ku mi ta papia aki di nesesidatnan sosial difísil ku ta bai mas leu ku miembronan di Iglesia. Afortunadamente Señor su manera pa yuda nos mes ta mas fásil: tur ku ta físikamente kapas mester kumpli ku e lei di ayuno. Isaías a skibi:

“Esaki no ta e ayuno ku mi a skohe? …

“E no ta konsistí di parti bo pan ku esun ku tin hamber, i tuma e pober sin kas den bo kas? Ora bo mira esun sunú, pa boso tap’é …? pa boso kita e karganan pisá, i … laga esun oprimí liber … ?”¹⁶

Mi ta duna testimonio di e milagernan, tantu spiritual i temporal, ku ta bini na esunnan ku biba e lei di ayuno. Mi ta duna testimonio di e milagernan ku a bini na mi. Di bèrdat manera Isaias a skibi, i a sklama den ayuno mas ku un bia, i di bèrdat Dios a respondé, “Ata mi aki.”¹⁷ Kuida e privilegio sagrado aki por lo ménos pa luna, i sea mes generoso manera sirkunstansia ta pèrmití den boso ofrendanan di ayuno i otro kontribushonnan humanitario, edukashonal, i mishonal. Mi ta primintí ku Dios lo ta generoso pa boso, i esunnan ku haña alivio na boso man lo yama boso nòmber bendishoná pa semper. Mas di tres kuart mion miembro di Iglesia a wòrdu yudá aña pasá pa medio di ofrendanan di ayuno Atministrá pa obispunan i Presidentenan di Sosiedat di Sokoro deboto. Esei ta masha hopi Santunan di Delaster dia gradesido.

Rumannan, un predikashi asina ta eksigí pa mi rekonosé abiertamente e bendishonnan no ganá, no meresí, sin fin den mi bida, tantu temporal i spiritual. Meskos ku boso, tabatin tempu ku mi tabatin prekupashon finansiero, pero nunka mi no tabata pober, ni mi no sa kon ta sinti pa ta pober. Ademas, mi no sa tur e motibunan di kon e sirkunstansianan di nasementu, salú, edukashonal, i oportunidatnan ekonómiko ta varia asina tantu den mortalidat, pero ora mi mira e nesesidat bou di asina tantu hende, mi sa ku “pa e grasia di Dios mi ta wardá.”¹⁸ Mi sa tambe ku ounke mi lo no ta wardadó di mi ruman, mi ta sòru pa mi ruman, i “hopi a wòrdu duná na mi, mi tambe mester duna.”¹⁹

Pa loke ta esei, mi ta duna un homenahe personal na Presidente Thomas Spencer Monson. Mi a wòrdu bendishoná pa un asosiashon ku e hòmber aki pa 47 aña awor, i e imágen di dje ku lo mi kuida te ora mi muri ta e biahando di regreso pa kas for di un Alemania oriental ekonómikamente destruí den su slòfnan pasobra el no a duna solamente su di dos bachi i su èkstra kamisanan, pero hasta e sapatunan mes for di su pianan. “Esta bunita riba e tòp di e serunan [ i lastrando pia dor di un terminal di aeropuerto] ta e pianan di dje ku ta trese e bon notisia, ku ta publiká pas.”²⁰ Mas ku kualke hòmber ku mi konosé, Presidente Monson a “hasi loke e mester a hasi,” pa e biuda i esunnan wèrfano, esun pober i esun oprimí.

Den un revelashon na aña 1831 na e Profeta Jose Smith, Señor a bisa ku e pobernan un dia lo mira e reino di Dios bini pa libra nan “den poder i gran gloria.”²¹ Laga nos por yuda kumpli ku e profesia dor di bini den e poder i gloria di nos miembresia den e Iglesia berdadero di Jesucristu pa hasi loke nos por pa libra kualke ku nos por for di e pobresa ku ta tene nan koutivo i ta daña tur nan soñonan, mi ta pidi den e nòmber miserikordioso di Jesucristu, amèn.