Biba e Evangelio ku Goso
Pa Presidente Dieter F. Uchtdorf
Di Dos Konsehero den e Promé Presidensia
Konfia den e poder salbador di Jesucristu; warda Su leinan i mandamentunan. Ku otro palabra—e evangelio ku goso.
Mi hermananan stimá, mi kerido amigunan i disípulonan bendishoná di Jesucristu, mi ta honrá di tin e oportunidat aki pa ta ku boso segun nos ta habri un otro konferensha general di e Iglesia di Jesucristu di e Santunan di e Delaster Dianan. Den e siman ku ta bini e Promé Presidensia i e Diesdos Apòstelnan lo reuní ku tur e Outoridatnan General i lidernan ousiliar general, i e sobra seshonnan di nos konferensha general mundial lo sigui riba djasabra i djadumingu ku ta bini. Mi ta masha gradisí na Presidente Thomas S. Monson, e profeta di Dios pa nos tempu, pa pidi mi pa representá e Promé Presidensia ora mi ta papia ku e hermananan di Iglesia.
Ora mi tabata pensando kiko lo mi por bisa, mi pensamentunan a bai bèk na e muhénan ku a forma mi bida i a yuda mi den e desafionan di mortalidat. Mi ta gradesido pa mi wela ku dékadanan pasá a disidí pa hiba su famia na un reunion sakramental Mormon. Mi ta gradesido na Hermana Ewig, un dama Aleman soltero di edat avansá, ken su nòmber ta tradusí na ingles komo “Hermana Eterno.” E tabata esun ku a ekstendé e invitashon balente i maravioso aki na mi wela. Mi ta masha gradisí na mi mama, ku a guia kuater yu dor di turbulensia durante di Dos Guera Mundial. Mi ta pensa tambe riba mi yunan muhé, nietunan, i futuro generashonnan di muhénan fiel ku un dia lo sigui.
I, klaro, mi ta eternamente gradisí pa mi esposa, Harriet, ku a enkantá mi komo un teenager, soportá e karganan pisá di nos famia hóben komo un mama, para huntu ku mi komo esposa, i stima i kariñá nos yunan, nietunan i bisa- nietunan. E tabata un fortalesa den nos hogar durante tempu bon i malu. El a trese alegria den e bida di tur ku konosé.
Finalmente, mi ta masha gradesido na boso tur, e miónes di hermananan rònt mundu di kualke edat ku ta hasi asina tantu pa edifiká e reino di Dios. Mi ta gradesido na boso pa e maneranan inkontabel ku boso ta inspirá, nutri, i bendishoná esunnan rondó di boso.
Yunan Muhé di Dios.
Mi ta komplasí di ta entre asina tantu yunan muhé di Dios. Ora nos ta kanta e kantika “Mi ta un Yu di Dios,” e palabranan ta penetrá den nos kurasonnan. Meditando riba e bèrdat aki—ku nos ta yunan di mayornan selestial1—ta yena nos ku un sentido di orígen, propósito, i destino.
Ta bon pa rekordá ku semper boso ta un yu di Dios. E konosementu aki lo hiba boso dor di e tempunan di mas difísil den boso bida i lo inspirá boso pa logra kosnan remarkabel. Sinembargo, tambe ta importante pa rekòrdá ku ta un yu muhé di mayornan eterno no ta un distinshon ku boso a gana òf lo pèrdè nunka. Boso lo keda pa semper un yu muhé di Dios. Boso Tata Selestial tin aspirashonnan pa boso, pero boso orígen divino so no ta garantisá boso un herensia divino. Dios a manda boso aki pa prepará pa un futuro mas grandi ku kualkier kos ku boso por imaginá.
E bendishonnan primintí pa Dios na esunnan fiel ta glorioso i inspiradó. Entre nan tin “trononan, reinonan, prinsipadonan, i podernan, dominionan, tur halturanan i profundidatnan.”2 I ta tuma mas ku un sertifikado di nasementu spiritual òf un “Karchi di Miembresia di un Yu di Dios” pa kualifiká pa e bendishonnan inkomprensibel aki.
Pero Kon nos ta haña nan?
E Salbador a kontestá e pregunta aki den nos tempu:
Solamente si bosonan warda Mi mandamentu bosonan lo por haña e gloria aki.
Pasobra e porta ta stret, i pèrtá ta e kaminda ku ta hiba na eksaltashon.
P’esei nos mester risibí Mi lei.3
Pa e motibu aki, nos ta papia di kana e kaminda di disipulado.
Nos ta papia di obedensia na Dios Su mandamentunan.
Nos ta papia di biba e evangelio ku goso, ku henter nos kurason, forsa, mente, i alma.
Dios Sa Algu ku Nos No sa.
I sinembargo pa algun di nos, obedensia na Dios Su mandamentunan no semper ta sinti masha alegre. Laga nos ta sinsero: lo por tin algun ku ta parse mas difísil òf ménos atraktivo—mandamentunan ku nos ta aserká ku e entusiasmo di un mucha sinta dilanti di un tayó di kuminda saludabel pero berdura odioso. Nos ta primi nos djentenan i ta forsa nos mes pa kumpli pa asina nos por sigui dilanti pa aktividatnan mas deseabel.
Kisas durante tempunan manera esakinan nos por haña nos mes ta hasi e pregunta, “Di bèrdat nos tin ku obedesé tur Dios Su mandamentunan?”
Mi kontesta riba e pregunta aki ta simpel:
Mi ta pensa ku Dios sa algu ku nos no sa! Kosnan ku ta fuera di nos kapasidat pa komprondé! Nos Tata Selestial ta un ser eterno ken su eksperensia, sabiduria, i inteligensia ta infinitamente mas grandi ku di nos.4 No solamente esei, pero E ta tambe eternamente amoroso, kompasivo, i konsentrá riba un meta bendishoná: pa duna nos inmortalidat i bida eterno.5
Ku otro palabra, E no solamente sa kiko ta mihó pa boso; tambe ansiosamente E ke pa boso skohe lokual ta mihó pa boso.
Si boso ta kere esaki den boso kurason—si boso berdaderamente ta kere e gran mishon di nos Tata Selestial ta pa eksaltá i glorifiká Su yunan i ku E sa mihó kon pa hasié—no ta signifikante pa brasa i sigui Su mandamentunan, hasta esunnan ku ta mustra difísil? Nos no mester apresiá e palunan di lus ku El a duna pa guia nos den e skuridat i e pruebanan di mortalidat? Nan ta marka e kaminda di regreso pa nos kas selestial! Dor di skohe Tata Selestial su kaminda, boso ta pone un fundeshi divinodivino pa boso progreso personal komo un yu muhé di Dios ku lo bendishoná durante henter boso bida.
Mi ta pensa, parti di nos desafio ta, ku nos ta imaginá ku Dios tin tur Su bendishonnan será na yabi den un nubia enorme ariba den shelu, i ta ninga pa duna nan na nos a ménos ku nos kumpli ku algun rekisitonan paternal estrikto ku El a prepará. Pero e mandamentunan no ta manera esei mes. Den realidat, Tata Selestial ta basha bendishonnan konstantemente riba nos. Ta nos miedu, duda, i piká ku, manera un paraplü, ta blòkia e bendishonnan aki pa yega serka nos.
Su mandamentunan ta instrukshonnan amoroso i e yudansa divino pa nos pa sera e paraplü, pa asina nos por risibí e ducha di bendishonnan selestial.
Nos tin ku aseptá ku e mandamentunan di Dios no ta djis un lista di bon ideanan. Nan no ta “lemanan pa bida” for di un Internet blog òf un sita di motivashon for di un bòrchi di Pinterest. Nan ta konseho divino, basá riba bèrdatnan eterno, duná pa trese “pas den e mundu aki, i bida eterno den e mundu binidero.”6
Di manera ku nos por skohe. Na un banda, tin e opinion di e mundu ku su teorianan ku ta kambia semper i motibunan kuestionabel. Na e otro banda, tin Dios Su palabra na Su yunan—Su sabiduria eterno, Su promesanan berdadero, i Su instrukshonnan amoroso pa regresá na Su presensia den gloria, amor, i mahestat.
E desishon ta di boso!
E Kreador di e lamannan, santunan, i streanan sin fin ta yega serka boso e dia aki mes! E ta ofresiendo e gran reseta pa felisidat, pas, i bida eterno!
Pa kualifiká pa e bendishonnan glorioso aki, boso mester humiliá boso mes, ehersé fe, tuma e nòmber di Cristu riba boso, buska E den palabra i hecho, i “para firme komo testigu di Dios na tur tempu i den tur kos, i na tur lugá.”7
E Pa kiko di Obedensia
Asina ku boso komprondé e naturalesa berdadero di Dios Su mandamentunan, boso lo komprondé boso mes mihó i e propósito divino di boso eksistensia. Ku esaki, boso motivashon pa sigui e mandamentunan ta kambia, i e ta bira boso deseo di kurason pa biba e evangelio ku goso.
Por ehèmpel, esunnan ku ta mira bishitamentu di reunionnan di Iglesia komo un manera personal pa oumentá nan amor pa Dios, haña pas, elevá otronan, buska e Spiritu, i renobá nan kompromiso pa sigui Jesucristu lo haña un eksperensia mas riku ku esunnan ku simplemente ta pone nan tempu sintando den un banki. Hermananan, ta masha importante pa nos bishitá nos reunionnan di djadumingu, pero mi ta basta sigur ku nos Tata Selestial ta ainda mas prekupá tokante nos fe i arepentimentu ku tokante statistik di presensia.
Aki tin un otro ehèmpel:
Un mama soltero ku dos yu chikitu resientemente a haña sende paga. Klaro, ku no a dura muchu promé ku su yunan tambe a bira malu. E tarea pa kuida su mes i su chikitinnan su so tabata kasi demasiado hopi pa e mama hóben. I, komo resultado, e kas ku normalmente ta limpi a bira desordená i bruá. Tayónan shushi a montoná riba otro den baki di anrègt, i pañanan shushi pa laba a montoná tur otro kaminda.
Miéntras e tabata luchando ku yunan yorando—i ku gana pa yora tambe—a wòrdu batí na porta. Tabata su maestranan bishitante. Nan por a mira e mama hóben su angustia. Nan por a mira su kas, su kushina. Nan por a tende e gritunan di e muchanan.
Awor, si e hermananan aki tabata solamente prekupá ku kumplimentu di nan bishitanan asigná di tur luna, nan lo por a duna e mama un tayó ku kuki, menshoná ku nan a sinti su falta den Sosiedat di Sokoro [di] siman pasá, i a bisa algu manera, “Laga nos sa si tin kualkier kos ku nos por hasi!” Despues nan lo a sigui nan kaminda kontentu, gradesido ku nan tabatin 100 porshento pa un luna mas.
Afortunadamente, e hermananan aki tabata berdadero disípulonan di Cristu. Nan a nota e nesesidat di nan ruman i a pone nan hopi talentonan i nan eksperensia na obra. Nan a aklará e káos, a trese lus i klaridat den e kas, i a yama un amiga pa trese algun komestibel ku tabata hopi nesesario. Ora ku porfin nan a kaba nan trabou i nan a yama ayó, nan a laga e mama hóben ei ku lágrima—lágrima di gratitut i amor.
For di e momentu ei, e mama hóben su opinion di maestra bishitante a kambia. “Mi sa,” el a bisa, “ku mi no ta djis un marka di selekshon riba un otro hende su lista di kos pa hasi.”
Si, maestranan bishitante mester ta fiel den hasimentu di nan bishitanan tur luna, pero sin falta emas importante “di kon” tras di e mandamentu aki: pa stima Dios i próhimo.
Ora nos ta trata Dios Su mandamentunan i nos parti den edifikamentu di Su reino manera un kos pa marka for di lista di kosnan pa hasi, nos ta falta e kurason di disipulado. Nos ta falta e kresementu ku ta bini for di biba e mandamentunan di nos Tata na Shelu ku alegria.
Kana den e kaminda di disipulado no tin mester di ta un eksperensia amargo. E “ta dushi riba tur kos ku ta dushi.”8 E no ta un karga ku ta hala nos abou. Disipulado ta elevá nos spiritu i ta aliviá nos kurason. E ta inspirá nos ku fe, speransa, i karidat. E ta yena nos spiritu ku lus den tempunan di skuridat i trankilidat durante tempunan di tristesa.
E ta duna nos poder divino i goso sin fin.
Biba e Evangelio ku Goso
Mi hermananan stimá den evangelio, sea ku boso ta 8 òf 108, tin un kos ku mi ta spera ku di bèrdat boso ta komprondé i sa:
Boso ta stimá.
Boso ta apresiá pa boso mayornan selestial.
E Kreador infinito i eterno di lus i bida konosé boso! E ta kòrda riba boso.
Si, Dios ta stima boso e dia aki i semper.
E no ta wardando pa stima boso te ora boso vense boso debilidatnan i mal kustumbernan. E ta stima boso awe ku un komprendementu kompleto di tur boso luchanan. E ta konsiente ku boso ta yega na Dje den orashon sinsero i yen di speransa. E sa di e biahanan ku boso a tene na e lus ku a mengua i a kere—hasta meimei di skuridat kresiente. E sa di boso sufrimentunan. E sa di boso duele pa e biahanan ku boso a faya òf frakasá. I tòg E ta stima boso.
I Dios sa di boso éksitonan; ounke nan por parse chikitu pa boso, E ta rekonosé i ta apresiá kada un di nan. E ta stima boso pa ekstendé boso mes na otronan. E ta stima boso pa sali i yuda otronan karga nan pesonan pisá—hasta ora boso ta luchando ku esun di boso mes.
E sa tur kos tokante boso. E ta mira boso klaramente—E konosé boso manera boso ta realmente. I E ta stima boso—awe i semper!
Boso ta suponé ku ta importá boso Tata Selestial sea ku boso makeup, paña, kabei, i uñanan ta perfekto? Boso ta pensa boso balor ta kambia pa E basá na kuantu siguidó boso tin riba Instagram òf Pinterest? Boso ta pensa E ke pa oso prekupá i bira depresivo si un hende kibra amistat òf stòp di sigui boso riba boso Facebook òf Twitter? Boso ta pensa ku atrakshon eksterno, boso sais di paña, òf popularidat ta hasi masha poko diferensha den boso dignidat na Esun ku a krea e universo?
E ta stima boso no solamente pa ken boso ta e dia aki, pero tambe pa e persona di gloria i lus ku boso tin e potensial i deseo pa bira.
Mas ku boso lo por imaginá, E ke pa boso alkansá boso destino—pa regresá na boso hogar selestial den honor.
Mi ta testifiká ku e manera pa logra esaki ta pa pone deseonan egoista i ambishonnan indigno riba un altar di sakrifisio i servisio. Hermananan, konfia den e poder salbador di Jesucristu; warda Su leinan i mandamentunan. Den otro palabranan—biba e evangelio ku goso.
Ta mi orashon ku boso lo eksperensiá un midí amplio i renobadó di amor bunita di Dios den boso bidanan; ku boso lo haña e fe, determinashon, i kompromiso pa siña Dios Su mandamentunan, tesorá nan den boso kurason, i biba e evangelio ku goso.
Mi ta primintí ku ora boso hasi asina, boso lo deskubrí boso mihó parti—realmente boso mes. Boso lo deskubrí kiko ta nifiká pa enbèrdat ta un yu muhé di e Dios Sempiterno, e Señor di tur rektitut. Di esaki mi ta testifiká i ta laga na boso mi bendishon komo un Apòstel di e Señor, den e nòmber di Jesucristu, amèn.