Wὸrdu Guiá pa Kas ku Seguridat
Pa Presidente Thomas S. Monson
Nos ta buska den shelu pa e sentido sigur di direkshon, pa nos planifiká i sigui e kurso sabio i apropiá.
Rumannan, nos ta reuní manera un kurpa poderoso di saserdosio, aki den e Sentro di Konferensha i den hopi lugá rònt mundu. Mi ta honrá sinembargo humilde pa e responsabilidat kua ta di mi pa dirigí algun palabra na boso. Mi ta hasi orashon pa e Spiritu di Señor yuda mi ora ku mi ta hasi asina.
Setentisinku aña pasa, riba 14 di febrüari 1939, den Hamburg, Alemania, un dia di fiesta nashonal tabata wὸrdu selebrá. Meimei di e diskursonan ferviente, hende selebrando, i músika patriótiko, e barku di guera Bismarck tabata yega den e Riu Elbe. Esaki, e barku, mas poderoso ku tabatin, tabata un espektákulo impreshonante di arma i mashineria. E konstrukshon di e ocho kañonnan pisá di 380 milimeter kontrolá pa radar a rekerí mas di 57,000 blueprint. E barku tabatin 45,000 km di sirkuito eléktriko. E tabata pisa 35,000 tonelada di plaka di armadura ku a duna seguridat máksimo. Mahestuoso den aparensia, masha grandi di tamaño, kapasidat di armamentu, e poderoso barku a wὸrdu konsiderá komo un ku no por senk.
E sita di e Bismarck ku destino a yega mas di dos aña despues, ora riba 24 di mei 1941, e dos barkunan di guera mas poderoso den e armada Britániko, e Prince of Wales i e Hood, a kuminsá bataya ku e Bismarck i e krusero Aleman Prinz Eugen. Den sinku minüt e Bismarck a manda den e profundidat di Atlántiko e Hood i tur di e tripulashon di 1,400 ménos tres hòmber. E otro barku Britániko di guera, the Prince of Wales, a sufri hopi daño i a bira bai.
E próksimo tres dianan, e Bismarck a wòrdu ataká kada bia atrobe, pa barkunan di guera i avionnan Britániko. Den tur e Británikonan a konsentrá e forsa di ocho barku di guera, dos porta avion, 11 krusero, i 21 destruktor den un esfuerso pa haña i senk e poderoso Bismarck.
Durante e bataya aki, hopi proyektil tras di proyektil a duna un tiki di daño superfisial so na e Bismarck. E no por a senk despues di tur esei? Despues un torpedo gòlpi di suerte suerte i a pega e timon di e Bismarck. Esfuersonan di reparashon no a yuda. Ku e armanan kla pa tira, e Bismarck únikamente por a nabegá lentamente den sirkulo. E forsa área Aleman tabata apénas for di alkanse. E Bismarck no por a yega e seguridat di e haf di kas. Ni tampoko e por a duna e protekshon na e Bismarck ku a pèrdè e abilidat pa nabegá e ruta stipulá. Sin timon; sin yudansa; i sin haf . E final a yega serka. Armanan Britániko a dal duru miéntras e tripulashon aleman a senk loke tabata parse un barku indestruktibel. E olanan hambrá di e Atlántiko a kuminsá kubri e bandanan promé i despues a guli e orguyo di e marina Aleman. E Bismarck no tabat’ei mas.1
Manera e Bismarck, kada un di nos ta un milager di ingenieria. Sinembargo nos kreashon, no tabata limitá pa ingenio humano. Hòmber por diseñá mashinnan di mas kompleho pero e no por duna nan bida o duna nan e podernan di rasonamentu i huisio. Esakinan ta donnan dibino, duná únikamente pa Dios.
Meskos ku e timon vital di un barku, rumannan, un manera a wὸrdu duná na nos pa determiná e direkshon ku nos ta biaha. E faro di Señor ta guia nos tur ora ku nos ta nabegá e lamannan di bida. Nos propósito ta pa nabegá un kurso sin desviashon na nos meta deseá—asta e reino selestial di Dios. Un hòmber sin propósito ta manera un barku sin timon, ku nunka lo alkansá su haf di kas. Na nos ta yega e señal: planifiká boso kurso, koloká e bela, posishoná boso timon, i prosedé.
Meskos ku e poderoso Bismarck, asina tambe ta ku hòmber. E forsa di e turbina i poder di e propèler no sirbi sin un sentido di direkshon, e uso di e energia, ku ta dirigí e poder duná pa e timon, skondí for di e bista, relativamente chikí na tamaño, pero apsolutamente esensial den funshon.
Nos Tata a duna e solo, e luna, i e streanan—galaksianan selestial pa guia marineronan ken ta nabegá riba laman. Na nos, ora ku nos ta kana e kaminda di bida, El a duna un mapa kla i ta señalá e kaminda asta nos destino deseá. E ta atvertí: kuidou ku desviashon, ekibokashon, i trampanan. Nos no por wὸrdu gañá pa esnan ku lo guia nos na kaminda robes, esnan ku ta tentadornan di pika ku ta tenta nos aki i aya. Enbes, nos mester tuma pousa i hasi orashon; nos ta tende na e stèm chikí i trankil kua ta papia na e profundidat di nos alma e Maestro su invitashon bondadoso, “Bini, sigui mi.”2
Tòg tin esnan ku no ta tende, ku no ta obedesé, ku ta preferá pa kana un kaminda di nan mes. Muchu bia nan ta sukumbí na e tentashonnan kua ta rondoná nos tur i kua ta parse hopi atraktivo.
Komo poseedornan di saserdosio, nos a wὸrdu poné riba tera den tempunan problemátiko. Nos ta biba den un mundu kompleho ku korientenan di konflikto tur kaminda. Intriganan polítiko ta kaba ku stabilidat di nashonnan, déspotanan ta tuma poder, i segmentonan di sosiedat ta parse vensí pa semper, deprivá di oportunidat, i wὸrdu lagá ku un sentimentu di frakaso. E filosofia di hòmbernan ta zona den nos oreanan i piká ta rondia nos.
Di nos ta e responsabilidat pa ta digno di tur e bendishonnan glorioso ku nos Tata na Shelu tin reservá pa nos. Unda ku nos bai, nos saserdosio ta bai ku nos. Nos ta para den lugánan santu? Por fabor, promé ku boso ta pone boso mes i boso saserdosio den peliger dor di bai den kamindanan of partisipá den aktividatnan ku no ta digno di boso òf di e saserdosio ei, pousa pa konsiderá e konsekuensianan.
Nos ku a wὸrdu ordená na e saserdosio di Dios por hasi un diferensia. Ora nos ta mantené nos puresa personal i honra nos saserdosio, nos ta bira ehèmpelnan di rektitut pa otronan sigui. E Apòstel Pablo a amonestá, “Sea abo un ehèmpel na e kreyentenan, den palabra, den kombersashon, den karidat, den spiritu, den fe, den puresa.”3 El a skibi tambe ku e siguidornan di Cristu mester ta “manera lusnan den e mundu.”4 Dunando un ehèmpel di rektitut por yuda iluminá nos mundu skur ku ta oumentando.
Hopi di nos lo kòrda Presidente N. Eldon Tanner, ken a sirbi komo un konsehero na kuater Presidente di Iglesia. El a duna un ehèmpel inkambiabel di rektitut durante su karera den industria, durante su servisio den e gobièrnu na Canada, i komo un Apòstel di JesuCristu. El a duna nos e konseho inspirá aki: “Nada lo trese goso mas grandi i éksito ku pa biba segun e siñansanan di evangelio. Sea un ehèmpel, sea un influensia pa bon.”
E ta sigui: “Kada un di nos a wὸrdu preordená pa algun obra komo siervo eskohí di Dios den kua el a konsiderá apropiá pa konferí e saserdosio i poder pa aktua den su nòmber. Semper kòrda ku hende ta buska pa boso liderazgo i boso ta influensiá e bidanan di individuonan sea pa bon of malu, kua influensia lo wὸrdu sintí pa generashonnan futuro.”5
Nos ta wὸrdu fortalesé pa medio di e bèrdat ku e forsa di mas grandi den e mundu awe ta e poder di Dios ku e ta traha dor di hòmber. Pa nabegá ku seguridat riba lamánan di mortalidat, nos mester e guia di e Marinero Eterno—si hasta e gran Yehova. Nos ta buska, nos ta supliká, pa opten’é yuda selestial.
Un bon ehèmpel di unu ku no a buska yuda selestial ta Kain, yu di Adam i Eva. Poderoso potensial, pero boluntat debil, Kain a laga e kodisia, envidia, desobediensia, i asta matamentu pega e timon kua lo por a gui’é’ pa seguridat i eksaltashon. E kosnan di mundu a wὸrdu remplasá e kosnan selestial; Kain a kai.
Den otro tempu i pa medio di un rei inikuo, un siervo di Dios a wὸrdu probá. Yudá pa e inspirashon di shelu, Daniel tabata interpretá pa e rei e kosnan skibí riba e muraya. Tokante di e rekompensanan—asta un mantel real, un kadena di oro, i poder polítiko—Daniel a bisa, “Laga bo regalu pa bo mes, i duna bo rekompensa na un otro.”6 Rekompensanan grandi i poder a wὸrdu ofresé na Daniel, rekompensanan representando e kosnan di mundu i no di Dios. Daniel a risistí i a keda fiel.
Despues, ora Daniel a adorá Dios a apesar di e dekreto deklarando ku e kos ei lo wὸrdu prohibí, el a wὸrdu bentá den kueba di leonnan. E registro bíbliko ta bisa nos ku e siguiente mayan. “Daniel a wὸrdu saká for di e kueba, i niun sorto di herida a wὸrdu hañá riba dje, pasobra e tabata kere den … Dios.”7 Den tempu di nesesidat kritiko, determinashon di Daniel pa nabegá un kurso konstante a duna protekshon dibino I duna un santuario di seguridat. E protekshon i seguridat ei por ta di nos ora ku nos ta nabegá den kurso konsistente na nos kas eterno.
E oloshi di historia, manera e santu den e oloshi di glas, ta marka e pasahe di tempu. Un grupo nobo ta okupá e estado di bida. E problemanan di nos dia ta menasá nos. Durante e historia di mundu, Satanas ta traha inkansablemente pa e destrukshon di e siguidornan di e Salbador. Si nos sukumbí na su tentashonnan, nos—manera e poderoso Bismarck—lo pèrdè e timon ei kua ta guia nos na seguridat. Enbes, rondoná pa e kosnan sofistiká di bida moderno, nos ta buska den shelu pa e sentido sigur di direkshon, pa nos planifiká un kurso sabí, i apropiá. Nos Tata Selestial no ta bai laga nos petishon sinsero sin kontesta. Ora ku nos ta buska e yudansa selestial, nos timon, ku diferensia di e Bismarck, lo no frakasá.
Ora ku nos ta aventurá den nos biahe individual, laga nos nabegá ku seguridat riba e lamánan di bida. Laga nos tin e kurashi di un Daniel, pa nos por keda berdadero i fiel apesar di e piká i tentashon ku ta rondoná nos. Laga nos testimonionan ta mes profundo I fuerte manera Jakob, e ruman di Nefi, ken ora ku a wὸrdu konfrontá pa unu ku a buska den kada manera posibel pa destruí su fe, a deklará, “Mi no por a wὸrdu gañá.”8
Ku e timon di fe guiando nos pasahe, rumannan, nos tambe lo haña nos kaminda ku seguridat na kas—kas na Dios, pa biba ku N’e eternamente. Ku esei lo por ta pa kada un di nos, mi ta hasi orashon den e sagrado nòmber di JesuCristu, nos Salbador i Redentor, amèn.