E Buki

Pa Elder Allan F. Packer

Di e Setentanan

Historia familiar i obra di tèmpel mester ta un parti regular di nos adorashon personal.

Komo un hóben Scout di 12 aña, mi a risibí un regalo di un adishon masha deseá den mi ekipo di Scouting. E tabata un hacha ku un furu di kueru pisá! Na e siguiente trep di kampamentu, nos a yega na kampo despues ku a bira skur, muhá i friu for di e monton di sneu riba e kaminda. Úniko kos ku mi por a pensa ariba tabata pa traha un fogata ku un kandela grandi. Inmediatamente mi a bai kuminsá kap un palu ku a kai ku mi hacha nobo. Miéntras mi tabata kap, mi tabata frustrá pasobra no tabata parse ku e tabata kòrta hopi bon. Den mi frustrashon, mi a traha mas duru. Desapuntá, mi a regresá na e kampamentu ku solamente algun pida palu. Na e lus di un otro persona su kandela, mi a deskubrí e problema. Mi no a kita e furu for di e hacha. Sinembargo, mi por informá, ku e furu tabata di kap na repi. E lès: mi a wòrdu distraí ku otro kosnan.

Ora nos ta traha pa alkansa eksaltashon, nos mester traha riba tur e rekisitonan i no wòrdu distraí dor di enfoká riba un òf dos rekisito òf otro kosnan ku no relashoná. Buska e reino di Dios ta hiba na goso i felisidat.¹ Si ta nesesario, nos mester ta dispuesto pa kambia. Korekshonnan chikitu i frekuente ta ménos doloroso i destruktivo ku korekshonnan grandi.

No muchu tempu pasá, Hermana Packer i ami a biaha pa diferente pais ekstranhero. Nos a prepará nos pasportnan i otro dokumentunan. Nos a haña tur e anguanan, eksamen médiko, visanan, i stampianan. Ora nos a yega, nos dokumentunan a wòrdu kontrolá, i ora tur e rekisitonan tabata na òrdu, nos a wòrdu permití pa drenta.

Kualifiká pa eksaltashon ta meskos ku drenta un otro pais. Nos kada un mester risibí nos propio pasport spiritual. Nos no ta pone e rekisitonan, pero, individualmente, nos mester kumpli ku nan tur. E plan di salbashon ta kontené tur e doktrinanan, leinan, mandamentunan, i ordenansanan nesesario pa tur hende pa kualifiká pa eksaltashon.² Despues, “pa medio di e Ekspiashon di [Jesus] Cristu, henter humanidat por wòrdu salbá.”³ Iglesia ta yuda pero e no por hasié pa nos. Kualifiká pa eksaltashon ta bira e meta pa logra di henter nos bida.

Cristu a organisá Su Iglesia pa yuda nos. El a yama 15 hòmber ku nos ta sostené komo profetanan, videntenan, i reveladónan pa guia e Iglesia i siña e hendenan. E Promé Presidensia⁴ i e Quorum di e Diesdos Apòstelnan⁵ ta igual den poder i outoridat,⁶ ku e Apòstel di mas antigwedat asigná komo e Presidente di Iglesia. E Setentanan ta wòrdu yamá pa asistí.⁷ E lidernan no a pone e rekisitonan pa eksaltashon. Dios a hasié! E lidernan aki ta yamá pa siña, splika, stimulá, i hasta atvertí pa asina nos por keda riba kaminda.⁸

Manera spliká den e manual di instrukshonnan: “Den kumplimentu ku su propósito pa yuda personanan i famianan kualifiká pa eksaltashon, e Iglesia ta enfoká riba responsabilidat divinamente apuntá. Esakinan ta inkluí yuda miembronan biba e evangelio di Jesucristu, reuní Israel pa medio di obra mishonal, sòru pa e pober i nesesitadonan, i permití e salbashon di e mortonan dor di konstruí tèmpelnan i hasi ordenansanan vikario.”⁹ E kuater puntonan importante aki, i tur otro leinan, mandamentunan, i ordenansanan ta nesesario i no ta un opshon. Pa medio di e Ekspiashon di Jesucristu i hasiendo kada un di esakinan, nos ta añadí tur e stampianan nesesario pa nos pasportnan spiritual.

Durante di e konferensha aki nos ta wòrdu siñá tokante di kambionan ku lo yuda nos tur pa ta mihó prepará.

E famia ta e sentro di e plan di salbashon i kisas pa kiko tambe e ta wòrdu yamá e “gran plan di felisidat.”¹⁰ Presidente Boyd K. Packer a bisa, “E propósito prinsipal di tur aktividat den Iglesia ta pa un hòmber i su kasá i nan yunan por ta felis na kas.”¹¹

Presidente Spencer W. Kimball a bisa, “Nos éksito, individual i komo Iglesia, lo ta pa su mayor parti determiná pa kon fielmente nos ta hasi esfuerso na biba e evangelio den nos hogar.”¹² Obra di tèmpel i historia familiar ta parti di bibamentu di e evangelio na kas. E mester ta un aktividat familiar mas ku e ta un aktividat di Iglesia.

Tabatin un énfasis renobá riba historia familiar i obra di tèmpel for di e Promé Presidensia i e Quorum di e Diesdos.¹³ Boso reakshon na e énfasis aki lo oumentá boso goso i felisidat individual i familiar.

Den Doctrina y Convenios ta bisa ku e gran dia di e Señor lo yega pronto. P’esei, nos mester, komo iglesia i persona, prepará, i komo Santunan di delaster Dianan, ofresé na Señor un ofrenda den hustisia. I nos mester presentá den Su santu tèmpel un buki konteniendo e registronan di nos defuntunan, kua buki lo ta digno di wòrdu aseptá pa [Señor].¹⁴

E “buki” aki lo wòrdu prepará usando e registronan di nòmbernan i ordenansanan den e database di Family Tree di Iglesia.

Mi ta kontrolando i poniendo registronan aserka den e database aki pasobra mi ke pa e nòmbernan di tur esnan ku mi ta stima ta den e buki. Boso no?

Doctrina y Convenios sekshon 128 ta bisa ku nos no por bira perfekto sin [nos antepasadonan] i nan tampoko no por bira perfekto sin nos.¹⁵

Historia familiar ta mas ku genealogia, reglanan, nòmbernan, fechanan, i lugánan. E ta mas ku konsentrá riba e pasado. Historia familiar ta inkluí tambe e presente ora nos ta krea nos propio historia. E ta inkluí e futuro ora nos ta forma nos futuro historia pa medio di nos desendientenan. Por ehèmpel un mama hóben, ku ta kompartí su relatonan di famia i pòrtrètnan ku su yunan ta hasiendo obra di historia familiar.

Meskos ku partisipá di santa sena,asistí na e reunionnan, lesa e skrituranan, i hasi orashonnan personal,hasi historia personal i obra di tèmpel lo mester ta un parti regular di nos adorashon personal. E reakshon di nos hóbennan i otronan na invitashonnan profétiko tabata inspiradó i ta proba ku e obra aki por i mester wòrdu hasí pa tur miembronan na kualke edat.

Manera Elder Quentin L. Cook a splika, “Awor nos tin e doktrina, e tèmpelnan, i e teknologia.”¹⁶ Hasi e obra awor ta mas fásil i ta solamente limitá na e kantidat di miembronan ku ta hasi esaki un prioridat. Ainda e obra ta tuma tempu i sakrifisio, pero tur hende por hasié, i ku fasilidat relativo kompará ku djis algun añanan pasá.

Pa asistí miembronan, Iglesia a kolekshoná datonan i a duna materialnan pa asina ku hopi di e obra por wòrdu hasí den nos mes kas i e edifisionan di bario i e tèmpel. Mayoria di e opstákulonan a wòrdu kitá. Kualke sea boso persepshon di pasado, awor aki ta diferente!

Sinembargo, tin un opstákulo ku Iglesia no por kita. Ta un indesishon individual pa hasi e aki. Tur lokual ta nesesario ta un desishon i un poko di esfuerso. E no ta eksihí un kantidat grandi di tempu. Djis un tiki tempu a base di konsistensha lo logra e goso di e obra. Tuma e desishon pa dal un paso, pa siña i puntra otronan pa yuda boso. Nan lo hasié! E nòmbernan ku boso lo haña i hiba tèmpel lo bira e registronan pa “e buki”.¹⁷

Hasta ku e oumento impreshonante di miembronan ku ta partisipá, nos ta haña ku ta relativamente poko miembro di Iglesia ta enbolbí den haña i hasi ordenansanan di tèmpel pa nan famia.¹⁸Esaki ta un yamada pa un kambio den nos prioridatnan. No bringa e kambio, asept’é! Kambio ta parti di e gran plan di felisidat.

Ta nesesario pa e obra aki wòrdu hasí, no pa benefisio di Iglesia pero pa nos defuntunan i pa nos mes. Nos i nos antepasadonan ku a fayesé tin mester di e stampianan den nos pasport spiritual.

E “unimentu”¹⁹ di nos famianan entre generashonnan por sosedé solamente den tèmpel pa medio di ordenansanan di seyamentu. E pasonan ta simpel: djis haña un nòmber i hib’é tèmpel. Despues di un tempu boso lo por ta kapas pa yuda otronan hasié tambe.

Ku algun eksepshon, tur hende—tur hende—por hasi esaki!

Tin bendishonnan real ku ta asosiá ku e obra aki. Hopi mayornan i lidernan ta prekupá tokante di e kondishonnan aktual di mundu i e impakto riba famianan i hubentut.

Elder David A. Bednar a primintí: “Mi ta invitá e hendenan hóben di Iglesia pa siña tokante i eksperensiá e Spiritu di Elia. … Mi ta primintí[ku] boso lo ta protehá kontra di e influensianan intensivo di e atversario. Ora boso partisipá den i stimá e obra sagrado aki, boso lo ta protehá den boso hubentut i durante boso bida.”²⁰

Rumannan, ta tempu pa kita e furu for di nos hachanan i pone man na obra. Nos no mester sakrifiká nos eksaltashon òf esun di nos famianan pa asuntunan di ménos importansia.

Esaki ta e obra di Dios, pa wòrdu hasí pa miembronan i no miembro tambe, hóben i bieu, maskulino i femenino

Mi ta kaba sitando e promé verso di himno 324, kambiando un palabra:

“Lanta riba, O [Santunan] di Dios!
A wòrdu hasi ku ménos kosnan.
Duna kurason i alma i mente i forsa
Pa sirbi e Rei di Reinan.”21

Jesucristu ta e Rei! Mi ta testifiká di Dje den e nòmber di Jesucristu, amèn.