Sostené e Profetanan
Pa Elder Russell M. Nelson
Di e Quorum di e Diesdos Apòstelnan
Nos sostenementu di profetanan ta un kompromiso personal ku nos lo hasi nos máksimo esfuerso pa defendé nan prioridatnan profétiko.
Presidente Eyring, nos ta gradisí bo pa bo mensahe instruktivo i inspirá. Mi rumannan stimá, nos ta gradisí boso pa boso fe i deboshon. Ayera, nos kada un a wòrdu invitá pa sostené Thomas S. Monson komo profeta di Señor i Presidente di Señor Su Iglesia. I hopi bia nos ta kanta, “Te damos Señor nuestras gracias.” [O Dios, nos ta gradisí bo pa un profeta]1 Boso i ami ta komprondé realmente kiko esei ta nifiká? Imaginá e privilegio ku Señor a duna nos pa sostené Su profeta, kende su konseho lo ta sin mancha, sin adorno, sin motivashon pa kualke aspirashon personal, i apsolutamente sierto!
Kon nos ta sostené un profeta realmente? Hopi tempu promé ku el a bira Presidente di Iglesia, Presidente Joseph F. Smith a splika: “Ta un deber importante ku ta poné riba e Santunan ku … ta sostené e outoridatnan di Iglesia, pa hasi esei no ta solamente lanta e man, e forma simpel, pero den hecho i den bèrdat.”2
Mi ta kòrda bon mi “akto” úniko di sostené un profeta bon. Komo un dòkter i siruhano di kurason, mi tabatin e responsabilidat di hasi un operashon di kurason habrí na Presidente Spencer W. Kimball na aña 1972, ora e tabata Presidente den Funshon di e Quorum di e Diesdos Apòstelnan. E tabatin mester di un operashon masha kompliká. Pero mi no tabatin ningun eksperensia di hasi tal operashon riba un pashènt di 77 aña di edat den fayo di kurason. Mi no tabata rekomendá pa hasi e operashon i asina mi a informá Presidente Kimball i e Promé Presidensia. Pero, ku fe, Presidente Kimball a skohe pa laga hasi e operashon, solamente pasobra e tabata konsehá pa e Promé Presidensia. Esei ta mustra kon e tabata sostené su lidernan! I e desishon aki a pone mi tembla!
Danki na Señor, e operashon tabata un éksito. Ora Presidente Kimball su kurason a kuminsá bati, el a hasié ku asina gran forsa! Na e mes momentu ei, mi a haña un testimonio kla di e Spiritu ku e hòmber aki un dia lo bira Presidente di Iglesia!3
Boso sa e resultado. Solamente 20 luna despues, Presidente Kimball a bira Presidente di Iglesia. I el a duna liderazgo enérgiko i balente pa hopi aña.
For di e tempu ei nos a sostené Presidentenan Ezra Taft Benson, Howard W. Hunter, Gordon B. Hinkley, i awor Thomas S. Monson komo Presidentenan di Iglesia—profetanan den tur sentido di palabra.
Mi rumannan stimá, si e Restourashon a hasi algu, el a plama e mito antiguo ku Dios a stòp di papia ku Su yunan. Nada no por ta mas leu di e bèrdat. Un profeta a para na kabes di Dios Su Iglesia den tur dispensashonnan, for di Adam te ku awendia.4 Profetanan ta testifiká di Jesucristu—di Su dibinidat i di Su mishon i ministerio na mundu.5 Nos ta honra e Profeta Joseph Smith komo e profeta di e delaster dispensashon aki. I nos ta honra kada hòmber ku a siguié komo Presidente di Iglesia.
Ora nos ta sostené profetanan i otro lidernan,6 nos ta invoká e lei di komun akuerdo, pasobra e Señor a bisa: “Lo no wòrdu duná na ningun hende pa bai prediká mi evangelio, òf pa edifiká mi iglesia, eksepto ku e wòrdu ordená pa un persona ku tin outoridat, i ku iglesia sa ku e tin outoridat i a wòrdu ordená regularmente pa esunnan na kabes di e iglesia.”7
Esaki ta duna nos, komo miembronan di Señor su Iglesia, konfiansa i fe ora nos lucha pa warda e konseho spiritual pa hasi kaso na Señor Su stèm,8 ora e bini pa medio di e bos di Su sirbidónan, e profetanan.9 Tur lider den Señor su Iglesia ta yamá pa outoridat apropiá. Ningun profeta nunka a wòrdu elegí. Señor a pone esei bon kla ora El a bisa, Boso no a skohe mi, pero ami a skohe boso, i ordená boso.”10 Boso i ami no ta “vota” riba lidernan di Iglesia, na ningun nivel. Sinembargo, nos tin, e privilegio pa sostené nan.
E kamindanan di Señor ta diferente for di hende su kamindanan. Hende su kamindanan ta kita personanan for di ofisina òf negoshi ora nan bira grandi òf ora bira desabilitá. Pero hende su kamindanan no ta i nunka lo bira Señor Su kamindanan. Nos sostenementu di profetanan ta un kompromiso personal ku nos lo hasi nos máksimo esfuerso pa mantené nan prioridatnan profétiko. Nos sostenementu ta manera un indikashon huramentá ku nos ta rekonosé nan yamamentu komo un profeta pa ta legítimo i un akuerdo pa nos.
Bintiseis aña promé ku el a bira Presidente di Iglesia, e tempu ei- Elder George Albert Smith a bisa: “E obligashon ku nos ta hasi ora nos lanta nos mannan … ta unu masha sagrado. E no ta nifiká ku nos lo bai ketu riba nos kaminda i ta dispuesto pa e profeta di Señor lo dirigí e obra aki, pero e ta nifiká … ku nos lo para su tras; nos lo hasi orashon p’e; nos lo defendé su bon nòmber, i nos lo lucha pa kumpli ku su instrukshonnan manera Señor lo manda.”11
E Señor bibu ta guia Su Iglesia bibu!12 Señor ta revelá Su boluntat pa e Iglesia na Su profeta. Ayera, despues ku nos `wòrdu invitá pa sostené Thomas S. Monson komo Presidente di Iglesia, tambe nos tabatin e privilegio pa sostené e konseheronan den e Promé Presidensia, i miembronan di e Quorum di e Diesdos Apòstelnan, vidente, i reveladónan. Pensa riba esei! Nos ta sostené 15 hòmber komo profetanan di Dios! Nan ta poseé tur e yabinan di e saserdosio ku un bia a wòrdu konferí riba hòmber den e dispensashon aki.
E yamamentu di 15 hòmber na e apostolado sagrado ta duna gran protekshon pa nos komo miembronan di Iglesia. Di kon? Pasobra desishonnan di e lidernan aki mester ta unánime.13 Boso por imaginá bo kon e Spiritu mester move riba 15 hòmber pa trese unanimidat? E 15 hòmbernan aki tin antesedentenan edukashonal i profeshonal variá, ku diferente opinion tokante hopi kos. Kere mi! E diesinku hòmbernan aki profetanan, videntenan i reveladónan sa kiko e boluntat di e Señor ta ora logra unanimidat! Nan ta komprometé pa sòru ku Señor Su boluntat lo wòrdu hasí . E Orashon di Señor ta duna e ehèmpel pa kada un di e diesinku hòmbernan aki ora nan ta hasi orashon:”Bo boluntat sea hasí na tera komo na shelu.”14
E Apòstel ku mas tempu den e ofishi di Apòstel ta presidí.15 E sistema di senioridat usualmente lo trese hòmbernan bieu na e ofishi di Presidente di Iglesia.16 E ta duna kontinuidat, madures, eksperensia, i preparashon ekstensivo, manera guiá pa Señor.
E Iglesia di awendia a wòrdu organisá pa Señor mes. El a organisá un sistema remarkabel di gobernashon ku ta ofresé redundansia i back-up. E sistema ei ta sòru pa liderazgo profétiko hasta ora malesanan i inkapasidatnan inevitabel por bini ku subimentu di edat.17 Tin hopi ekilibrio i garantia asina ku ningun hende no por hiba e Iglesia den mal kaminda. Konstantemente lidernan di mas antigwedat ta wòrdu guiá di tal manera ku un dia nan ta kla pa sinta den e sumo konsehonan. Nan ta siña kon pa skucha e stèm di e Salbador pa medio di e susuronan di e Spiritu.
Miéntras ku e tabata sirbi komo Promé Konsehero di Presidente Ezra Taft Benson, ku e tempu ei tabata na fin di su bida mortal, Presidente Gordon B. Hinkley a splika:
E prinsipionan i proseduranan ku Señor a prepará pa e dirigimentu di Su iglesia ta sòru pa kualke … sirkunstansia. Ta importante … ku no tin duda òf prekupashon tokante e dirigimentu di Iglesia i e ehekutashon di e donnan profétiko, inkluso e derechi pa inspirashon i revelashon den atministramentu di asuntunan i programanan di Iglesia, ora e Presidente por ta malu òf no ta kapas pa funshoná kompletamente.
“E Promé Presidensia i e Konseho di e Diesdos Apòstelnan, yamá i ordená pa poseé e yabinan di e saserdosio, tin e outoridat i responsabilidat pa dirigí e Iglesia, pa atministrá su ordenansanan, pa splika Su doktrina, i pa establesé i mantené su práktikanan.”
Presidente Hinkley a kontinuá:
“Ora e Presidente ta malu òf no ta kapas pa funshoná den tur su debernan di su ofishi, su dos Konseheronan huntu ta konstituí un Quorum di e Promé Presidensia. Nan a sigui dilanti ku e obra diario di e Presidensia. …
“… Pero kualke kuestion grandi di maneho, proseduranan, programanan, òf doktrina ta wòrdu konsiderá kuidadosamente i den orashon pa e Promé Presidensia i e Diesdos huntu.”18
Aña pasá, ora Presidente Monson a yega e logro di sinku aña di servisio komo Presidente di Iglesia, el a reflehá riba su sinkuenta aña di servisio apostóliko i a duna e deklarashon aki: “Edat eventualmente ta pone nos den desbentaha. Sinembargo, nos ta uni nos stèmnan ku Rei Benjamin, ken a bisa, … ‘Ami ta manera boso, suheto na tur sorto di enfermedatnan den kurpa i mente; pero mi a wòrdu skohé … i konsagrá dor di mi tata, … i a wòrdu preservá i mantené pa Su poder sin igual, pa sirbi boso ku tur e poder, mente i forsa ku Señor a dunami (Mosia 2:11).”’
Presidente Monson a sigui: “Apesar kualke desafio di salú ku por bini na nos, apesar di kualke debilidat den kurpa òf mente, nos ta sirbi di e mihó manera posibel. Mi ta sigurá boso ku Iglesia ta den bon man. E sistema prepará pa e Konseho di e Promé Presidensia i Quorum di e Diesdos [Apòstelnan] ta garantisá [nos] ku lo e ta semper den bon man i ku, bini lo ke sea, lo no tin mester di prekupá òf teme. Nos Salbador, Jesucristu, ken nos ta sigui, ken nos ta adorá, i ken nos ta sirbi, ta semper na mando.”19
Presidente Monson, nos ta gradisí bo pa bo bèrdatnan! I nos ta duna bo danki pa bo ehèmpel di un bida di servisio dediká. Mi ta kere di por papia pa e miembronan di Iglesia rònt mundu den nos ekspreshon sinsero uní di gratitut pa bo. Nos ta honrá bo! Nos ta stima bo! Nos ta sostené bo, no solamente ku mannan lantá pero ku henter nos kurason i esfuersonan konsagrá. Humilde i fervientemente, “nos ta hasi orashon pa bo, nos profeta stima”!20 Den e nòmber di Jesucristu, amèn.