Txoj Xov, lub Ntsiab, thiab Ib Tsoom Neeg
Txawm tias niaj hnub nim no muaj kev kub ntxhov ntau, los thov kom peb yuav rau rau siab tsom ntsoov Khetos uas lub plawv ntawm peb lub neej, peb txoj kev ntseeg, thiab peb txoj kev pab lwm tus neeg.
Kuv cov kwv tij thiab cov muam, nov yog Sammy Ho Ching, muaj xya hli xwb, saib lub tuam rooj sab laj hauv nws lub tsev lub Plaub Hlis Ntuj tas los no.
Thaum txog lub sij hawm uas yuav tsa tes txhawb nqa Thawj Tswj Hwm Russell M. Nelson thiab lwm cov Tuam Thawj Coj, Sammy tuav nkaus nws lub taub mis xwb, ces tsis tau tes tsa. Ces nws ua raws li nws ua tau.
Sammy tsis tsa tes, nws tsa ko taw kom qhia tias nws pom zoo.
Zoo siab txais tos nej sawv dawd rau lub rooj sab laj ib xyoos ob zaug ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Kom thiaj npaj hais lus rau nej txog saib yog vim li cas peb thiaj muaj tej rooj sab laj no ib xyoos ob zaug, kuv yuav hais me ntsis txog ib yam uas muaj los hauv Lukas cov ntawv ceev xwm txheej hauv Phau Tshiab:
“Thaum [Yexus] mus yuav txog lub moos Yelikaus, muaj ib tug txiv neej dig muag zaum thov khawv ntawm ntug kev:
“… Hnov muaj neeg coob coob taug kev tuaj nws nug lawv hais tias, Sawv daws ua dab tsi?.
“… Lawv qhia nws hais tias, Yexus tus uas yog neeg Naxales tab tom taug kev tuaj mus.
“Tus dig muag ntawd txawm hu nrov nrov hais tias, Yexus, Daviv tus xeeb ntxwv es, thov koj hlub kuv lauj.”
Cov neeg uas nyob ntawm nws ib ncig cem nws, tiam sis “nws haj yam hu nrov nrov.” Vim rau qhov nws tsis kam tso tseg, thaum kawg cov neeg coj nws los ntsib Yexus, es Yexus hnov nws cov lus thov kom pom tau kev thiab Yexus kho nws qhov muag kom thiaj pom tau kev.
Txhua zaus kuv nyeem zaj no ua rau kuv xav tsis thoob. Peb pom tias tus txiv neej no txom nyem heev thiab xav tau kev pab. Peb hnov tau nws lub suab hais nrov nrov kom tus Cawm Seej pom nws. Peb luag nyav txog qhov uas nws tsis kam nyob twj ywm—twb yog nws yeej meem hais nrov nrov thaum sawv daws hais kom nws hais yau yau. Yog ib zaj lus zoo kawg hais txog ib tug neeg uas muaj siab ntseeg tiag. Tiam sis ib yam li txhua nqes vaj lug kub, peb haj yam nyeem, peb haj yam yuav nrhiav tej yam tshiab.
Ib yam uas kuv xav txog tsis ntev tas los no yog qhov uas tus txiv neej no txawj ntse txaus uas nyob ib ncig ntawm nws yog ib co neeg uas hnov tau tus Ntsuj Plig. Lub ntsiab ntawm zaj lus no nyob ntawm ib co txiv neej thiab poj niam uas, thaum tus txiv neeg dig muag ntawd nug lawv, “Sawv daws ua dab tsi?” lawv paub txaus tias lawv txheeb xyuas tau tus Khetos yog lub ntsiab thiaj muaj neeg coob coob dhau mus nraws nroos; Nws yog tus Neeg uas Yog lub Ntsiab. Muaj ib zaj lus qhia hauv zaj lus no rau peb sawv daws. Hais txog tej yam ntawm kev ntseeg thiab kev coj ruaj nrees, yeej pab uas peb yuav thov txog lawv cov neeg uas muaj siab ntseeg tiag! “Ib tug dig muag yuav coj ib tug dig muag kev puas tau?” Yexus tau nug ib zaug. “[Yog muaj li ntawd,] nkawd yeej yuav poob kwj xwb.”
Ib yam li ntawd peb nrhiav kev ntseeg thiab kev coj ruaj nrees rau ntawm tej rooj sab laj no, thiab vim nej nrog peb koom ua ke hnub no nej pom tau tias txoj kev nrhiav no yog ib yam uas neeg coob heev nrhiav. Cia li saib ncig nej. Nyob ntawm tshav tuam tsev no nej pom tsev neeg ntau tuaj qhov txhia chaw tuaj. Peb pom phooj ywg qub sib ntsib, ib pawg hu nkauj npaj hu nkauj, thiab cov neeg tawm tsam peb nyob nraum zoov qw qw. Cov neeg uas twb tau mus ua tub txib rov qab los lawm ntev nrhiav kom tau lawv cov khub tub txib, hos cov tub txib uas rov qab los tsis ntev tas los no nrhiav kom tau khub tshiab (tej zaum nej to taub zoo kuv hais!). Thiab daim duab? Thov ntuj pab peb! Vim sawv daws muaj xov tooj ntawm tes, peb tau hloov los ntawm “txhua tus mej zeej yog ib tug tub txib” mus rau “txhua tus mej zeej yog ib tug thaij duab.” Thaum muaj tej yam nrov nrov zoo kawg nkaus no, tsim nyog ib tug neeg hais tias, “Tag nrho tej no txhais tau li cas?”
Ib yam li hauv peb zaj lus los ntawm Phau Tshiab, cov neeg uas pom tau kev yuav pom tau hais tias, txawm tias txoj kev li kev cai sib ntsib ua rooj sab laj li no muaj ntau yam zoo rau peb, los nws tsis muaj qab hau dab tsis tsuas yog peb nrhiav kom tau Yexus hauv plawv. Kom to taub zoo saib peb nrhiav kom tau dab tsi, qhov kev kho mob nkeeg uas Yexus cog lus tias peb muaj tau, lub ntsiab ntawm tej yam peb ua ntawm no, peb yuav tsum tsis fim tej yam nrov nrov ib ncig ntawm peb—txawm zoo heev los xij—thiab tsom ntsoov tus Tswv. Txhua tus neeg uas hais lus ntawm lub rooj sab laj no, txhua tus neeg hu nkauj, txhua tus neeg uas coj tswm seeb—puav leej thov Vajtswv, cia siab, thiab coj tus kom thiaj caw tus Ntsuj Plig ntawm tus uas coj lub Koom Txoos no los—twb yog tus Khetos uas muaj sia nyob, Vajtswv tus Yaj, tus Tub Vaj Ntxwv ntawm Kev Kaj Siab Lug.
Tiam sis peb tsis tas nyob hauv ib lub tsev rau rooj sab laj kom thiaj nrhiav tau Yexus. Thaum ib tug me nyuam nyeem Phau Ntawv Maumoos thawj zaug thiab nyiam qhov uas Annpisnidais muaj siab loj los yog nyiam 2,000 tus tub rog hluas, peb ua tib zoo ntxiv tau lo lus qhia tias Yexus yog lub hauv paus ntawm phau ntawv ceev xwm txheej zoo kawg nkaus no, es txhua txhia phab ntawv hauv phau ntawv ntawd hais txog Yexus thiab Yexus yog tus uas tshoov cov neeg nyob hauv uas muaj siab ntseeg tej siab tej ntsws lub siab.
Ib yam li ntawd, thaum peb ib tug phooj ywg tab tom kawm txog peb txoj kev ntseeg, tej zaum nws yuav xav tsis thoob txog tej yam txawv me ntsis thiab cov lus uas peb siv ua neeg ntseeg—tej kev tswj tej yam peb noj haus, kev tseg khoom faj seeb, tej kev taug kev ib yam li cov pioneer, saib yus caj ces tsev neeg hauv koos pis tawj, ua ke nrog ntau lub tsev ceg txheem ntseeg (stake) uas nyob ntawd tej zaum neeg coob heev xav tias yuav noj tau nqaij nyuj ci zoo kawg. Yog li ntawd, thaum peb cov phooj ywg tshiab pom thiab hnov tej yam tshiab no, peb yuav tsum taw tes rau lub ntsiab ntawm txhua yam, kom lawv tsom ntsoov tau lub plawv ntawm txoj moo zoo kav mus ib txhis—Muaj Niam Txiv Saum Ntuj Ceeb Tsheej uas Hlub Peb, lub txiaj ntsim Theej Txhoj ntawm Leej Tub Saum Ntuj, kev coj los ntawm tus Vaj Ntsuj Plig Dawb Huv, txoj kev txum tim rov qab los ntawm tag nrho tej kev tseeb no thiab ntau yam ntxiv.
Thaum ib tug neeg mus tom lub tuam tsev thawj zaug, tej zaum tus ntawd yuav xav tsis thoob. Peb txoj hauj lwm yog pab kom tej cim dawb ceev thiab tej kab ke no, txawm yog tej ris tsho hnav los yog tej yam pom tau, yuav tsis tab kaum tus neeg tshiab, tsis li, xav kom tej no taw rau tus Cawm Seej, uas peb pe hawm nyob ntawd. Lub tuam tsev yog tus Cawm Seej lub tsev, thiab peb yuav tsum xav txog Nws xwb—tus Khetos tej lus qhuab qhia nkag peb tej siab tej ntsws ib yam li tej ntawd nyob hauv lub tuam tsev tej kab ke—txij thaum peb nyeem cov lus saum lub qhov rooj nkag mus txog thaum peb ncaim lub tuam tsev mus tsev. Txawm tias yuav pom ntau yam xav tsis thoob, peb yuav tsum pom Yexus ua lub ntsiab ntawm lub tuam tsev.
Cia li xav txog tej kev tshaj tawm thiab tej yam peb ua tshiab hauv lub Koom Txoos tau ob peb hlis no. Thaum peb ua hauj lwm pab ib leeg rau ib leeg, los yog kho tej yam peb ua thaum hnub Caiv, los yog txais yuav ib qho kev coj ua rau cov me nyuam thiab cov tub hluas ntxhais hluas, peb yuav tsis to taub lub ntsiab ntawm tag nrho tej yam no yog tias peb tsom ntsoov tej no ib qho mus rau ib qho es tsis pom tias tag nrho tej no coj peb mus txhim tsa peb tus kheej saum lub Pob Zeb ntawm peb txoj Kev Cawm Seej. Yeej xav hais tias Thawj Tswj Hwm Russell M. Nelson xav li no thaum nws hais kom peb siv lub Koom Txoos lub npe tiag. Yog tias Yexus—Nws lub npe, Nws cov lus qhuab qhia, Nws tus yam ntxwv, qhov uas Nws los saum ntuj los—yuav ua tau lub plawv ntawm peb tej kev teev tiam Vajtswv, peb yuav ntxiv dag zog rau qhov tseeb uas Amas qhia ib zaug: “Muaj ntau yam yuav los; [tiam sis] saib seb, muaj ib yam uas tseem ceeb tshaj txhua yam— … tus Txhiv Dim [uas muaj txoj sia nyob thiab] yuav los nyob nrog nws cov neeg.”
Ib lub tswv yim ntxiv: Thaum lub sij hawm uas Yauxej Xamiv nyob thaum tiam 19, neeg ntseeg Khetos coob heev sib xeem hais lus txog Yexus. Tiam sis nyob hauv tej kev sib cav sib ceg no, cov neeg ntseeg no tsis paub li no tiam sis lawv muab tus Cawm Seej uas tus tub hluas Yauxej nrhiav kom tau zais. Yauxej nyob hauv “kev tsaus ntuj thiab kev tsis nkag siab,” ces nws mus tom ib koog ntoo es nyob ntawd nws pom thiab hnov ib zaj lus tim khawv zoo kawg nkaus hais txog qhov uas tus Cawm Seej ua lub plawv ntawm txoj moo zoo, ntau tshaj lwm zaj lus tim khawv uas peb hais txog tag kis no. Tau lub txiaj ntsim pom tau tej yam xav tsis thoob, Yauxej ua yog toog pom nws Leej Txiv Saum Ntuj Ceeb Tsheej, Vajtswv ntuj, thiab Yexus Khetos, Nws Tib Leeg Tub uas zoo tag nrho. Ces Leej Txiv txawm ua yam ntxwv ua tib yam li peb hais tag kis no: Nws taw tes rau Yexus thiab hais tias, “Tus no yog Kuv Leej Tub. Cia li mloog Nws hais!” Tsis muaj lwm cov lus uas hais txog qhov uas Yexus los saum ntuj los, qhov uas Nws yog lub ntsiab ntawm txoj kev cawm seej, thiab qhov uas Vajtswv saib Nws rau nqi ntau tshaj xya lo lus no.
Muaj kev nphov thiab kev ntxhov siab los? Muaj neeg coob thiab kev sib cav sib ceg los? Yeej muaj li ntawd hauv peb lub ntiaj teb no. Tiag tiag, cov uas tsis ntseeg thiab cov ntseeg tseem sib cav sib ceg niaj hnub nim no hais txog qhov ua yog toog pom no thiab twb yog tag nrho lwm yam kuv hais txog hnub no. Yog tias koj tab tom sim pom meej meej dua thiab nrhiav kom tau lub ntsiab hauv lub neej no, kuv taw tes rau tib tug Yexus ntawd thiab ua ib tug thwj tim kuv ua tim khawv hais tias qhov uas muaj los rau Yauxej Xamiv muaj tiag, es tau muaj li ntawd 1,800 xyoo tom qab tus dig muag ntawd rov qab pom kev nyob ntawm txoj kev taug mus rau Yelikhos. Kuv ua tim khawv ua ke nrog ob tug neeg no thiab coob tug neeg uas tau ua tim khawv ib tiam dhau ib tiam los hais tias qhov zoo kawg nkaus tsis yog pom Yexus taug kev mus ze peb xwb tiam sis qhov uas Nws yuav los cuag peb, nres ntawm peb, thiab nrog peb nyob.
Kuv cov muam thiab kuv cov kwv tij, thov kom peb yuav rau rau siab tsom ntsoov Khetos ua lub plawv ntawm peb lub neej, peb txoj kev ntseeg, thiab peb txoj kev pab lwm tus neeg. Lub ntsiab ntawm lub neej no yog li ntawd xwb. Thiab yog tias qee hnub peb pom kev tsis tau zoo, thiab peb poob siab, thiab muaj dab tsi uas sim peb txoj kev ntseeg—uas twb yuav muaj—thov kom peb hais nrov nrov hais tias, “Yexus, Daviv tus xeeb ntxwv es, thov hlub kuv los mas.” Kuv cog lus hais tias Yexus yuav hnov nej thiab yuav hais rau nej thaum kawg, “Koj cia li pom kev: twb yog vim koj ntseeg koj thiaj pom kev.” Nyob zoo rau lub tuam rooj sab laj. Los ntawm Yexus Khetos lub npe, amees.