Kev Sib Khi Lus
Kom yuav ua Vajtswv haiv neeg thiab ib leeg nrog ib leeg taug Nws txoj kev khi lus yog ib txoj koob hmoov vim muaj kev sib khi lus.
Cov kwv tij thiab cov muam, muaj ib zaj dab neeg txog ib tug me nyuam hauv Koom Haum Me Nyuam Yaus uas kawm thov Vajtswv. “Ua tsaug rau tus tsiaj ntawv A, tus tsiaj ntawv B, … tus tsiaj ntawv G.” Tus me nyuam yaus thov Vajtsw ntxiv, “Ua tsaug rau tej tsiaj ntawv X, Y, Z. Leej Txiv Saum Ntuj Ceeb Tsheej, ua tsaug rau tus naj npawb 1, tus naj npawb 2.” Tus xib hwb qhia hauv Koom Haum Me Nyuam Yaus txhawj tiam sis ua siab ntev tos. Tus me nyuam hais tias, “Ua koj tsaug rau tus naj npawb 5, tus naj npawb 6—thiab ua koj tsuag rau kuv tus xib hwb qhia hauv Koom Haum Me Nyuam Yaus. Nws yog tib leeg uas cia kuv hais kuv zaj lus thov Vajtswv kom tiav tag.”
Leej Txiv Saum Ntuj Ceeb Tsheej yeej hnov txhua tus me nyuam zaj lus thov. Muaj kev hlub dawb paug, Nws hu kom peb los ntseeg thiab ua raws li txoj kev khi lus.
Lub ntiaj teb no muaj tej kev ua yog toog, kev feeb tsis meej, kev dag ntxias. Muaj ntau yam uas ib sij hloov thiab tsis tseem ceeb. Thaum peb tso tej daim npog ntsej muag, kev dag pov tseg, tsis nco qab txog tej yam uas lwm tus neeg nyiam, peb thiaj xav tau tej yam uas kav ntev mus, tej yam tseeb, los sis tsis ntshaw tej yam hauv ntiaj teb no. Zoo siab kawg, vim muaj ib qho kev pab tej no.
Thaum peb hais txog Vajtswv txoj lus txib kom hlub Nws thiab cov uas nyob ntawm peb ib ncig vim peb twb khi lus tseg yuav ua li ntawd, peb ua li ntawd tsis yog ua neeg qhuas tiam sis yog ua zoo vim peb zoo li Nws ib tug me nyuam hauv tsev. Muaj lus tseeb uas hais tias: Thaum peb tsis nco qab ntshaw tej khoom ntiaj teb vim muaj tej kev khi lus, peb thiaj nrhiav tau thiab rais los mus ua tus neeg zoo tshaj—nyob ywj siab, muaj sia nyob, thiab ua qhov ncaj—thiab muaj kev sib raug zoo nrog luag tej zoo tshaj plaws li. Kev sib khi lus yog thaum ua Vajtswv tej kab ke peb thiaj cog lus thiab lav lus nrog Vajtswv thiab lwm tus neeg uas coj kev tshav ntuj thiab kev ua siab zoo los rau hauv peb lub neej. Thaum peb sib khi lus tag siab tag ntsws, peb thiaj rais los mus ua neeg zoo tshaj peb ua tas sim no. Kev sib khi lus txhawb nqa thiab uas kom peb dawb huv. Nws ntxiv txoj kev ntseeg kom tau txoj sia nyob thiab kev cawm dim.
Tej kev khi lus rais los mus ua kev hlub rau thiab los ntawm Vajtswv ces yog li ntawd rau thiab los ntawm lwm tus neeg thiab. Vajtswv, peb Leej Txiv Saum Ntuj Ceeb Tsheej, hlub peb tshaj plaws thiab paub peb zoo dua li peb hlub thiab paub peb tus kheej. Txoj kev ntseeg Yexus Khetos thiab kev pauv peb tus kheej (kev hloov siab lees txim) coj kev hlub tshua, kev tshav ntuj, kev zam txim los. Tej no pab kho kev mob siab, kev kho siab, kev tsis ncaj uas peb raug hauv lub neej no. Ua Vajtswv mas, peb Leej Txiv Saum Ntuj Ceeb Tsheej xav kom peb yuav txais Vajtswv lub txiaj ntsim zoo tshaj plaws—uas yog Nws txoj kev xyiv fab, Nws txoj sia nyob mus ib txhis.
Peb tus Vajtswv yog ib tug Vajtswv ntawm kev sib khi lus. Los ntawm Nws tus cwj pwm, Nws thiaj “ceev tej kev khi lus thiab muab kev hlub tshua.” Nws tej kev khi lus kav ntev mus “heev npaum li lub sij hawm yuav ntev, los sis npaum li lub ntiaj teb yuav nyob, los sis puas yuav muaj ib tug neeg nyob rau saum qhov ntawd raug cawm dim taus.” Peb tsis yog tsim tseg los ua loj leeb tsis paub yuav ua li cas thiab poob siab xwb, tiam sis yog kom muaj kev zoo siab hauv tej kev sib khi lus “muaj kev sib raug zoo uas muaj zog tshaj txoj kev tuag.”
Vajtswv tej kab ke thiab kev khi lus yeej zoo tib yam rau sawv daws thiab nyias pab tau nyias tus. Vim Vajtswv ua ncaj ncees, txhua tus neeg hauv txhua qhov chaw txawm muaj hnub nyoog li cas los txais tau tej kab ke uas cawm neeg. Yeej muaj kev ywj siab xaiv—tib neeg xaiv seb lawv puas kam txais yuav tej kab ke no. Vajtswv tej kab ke coj peb taug Nws txoj kev sib khi lus. Peb hu Vajtswv txoj kev uas coj Nws cov me nyuam rov los tsev ua txoj kev cawm dim, txoj kev cawm seej, txoj kev zoo siab. Txoj kev cawm dim, kev cawm seej, kev zoo siab xilethi-aus yeej muaj vim yog Yexus Khetos “txoj kev theej txhoj zoo tag nrho.”
Kom yuav ua Vajtswv haiv neeg thiab ib leeg nrog ib leeg taug Nws txoj kev khi lus yog ib txoj koob hmoov vim muaj kev sib khi lus.
Qhov thib ib, kev sib khi lus tso Yexus Khetos hauv nruab plawv uas “tus sawv cev rau txoj kev khi lus tshiab. Txhua yam tsav yeej yuav pab peb ua zoo thaum peb raug ua “neeg dawb huv hauv Khetos … nyob hauv Leej Txiv txoj kev khi lus.” Txhua txoj koob hmoov zoo uas raug cog lus tseg yuav los rau cov uas muaj kev ntseeg ruaj khov mus txog thaum kawg. Cov “uas ceev Vajtswv cov lus txib yuav muaj kev zoo siab” thiab yuav tau “koob hmoov hauv txhua txhia yam, tsis hais sab cev nqaij daim tawv los sis sab ntsuj plig,” thiab yuav “nrog Vajtswv nyob muaj … kev zoo siab tsis tu tsis tseg.”
Thaum peb sim ua raws li peb tej kev khi lus, muaj tej lub sij hawm thaum peb xav hais tias muaj cov tim tswv nyob ib puag ncig peb. Thiab yeej yuav muaj li ntawd—cov uas peb hlub thiab cov uas foom koob hmoov rau peb hauv lub ntiaj teb no thiab cov uas hlub thiab foom koob hmoov rau peb los ntawm daim ntaub thaiv sab tom ub.
Tsis ntev tas los no Muam Gong wb pom kev sib khi lus no hauv ib chav pw hauv lub tsev kho mob. Ib leej txiv hluas xav tau kev pauv raum. Nws tsev neeg tau quaj, yoo mov, thiab thov Vajtswv kom nws txais tau ib lub raum. Thaum hnov xov hais tias muaj ib lub raum rau nws, nws tus poj niam hais lus mos mos hais tias, “Kuv cia siab tias lwm tsev neeg ntawd yuav OK.” Yog yus yuav nyob hauv kev khi lus, yuav tsum muaj raws li tus Thwj Tim Pov Lauj hais, “tias kom peb ib leeg pab ib leeg kuv kev ntseeg yuav pab nej thiab nej kev ntseeg yuav pab kuv.”
Hauv lub neej no, tej zaum peb yuav poob kev ntseeg Vajtswv, tiam sis nws yeej tsis poob nws txoj kev ntseeg peb. Li lawv hais, nws taw teeb tos peb kev tas mus li. Nws caw peb los los sis rov qab los rau tej kev khi lus hauv Nws txoj hau kev. Nws ua siab ntev tos los puag peb, tab txawm peb “tseem nyob nrug deb los xij.” Thaum peb muaj kev ntseeg peb yuav pom tau tej tus qauv los sis tej yam uas peb raug, ces peb thiaj yuav pom Nws tej kev ua siab zoo thiab kev txhawb nqa peb, thaum uas peb raug txom nyem, kev nyuaj siab, thiab teeb meem, thiab peb tej kev zoo siab. Txawm peb dawm taw los sis ntog ntau npaum li cas los, yog peb tseem txav mus ze Nws, ces Nws yuav pab peb, ib ruam taw dhau ib ruam taw.
Qhov thib ob, Phau Ntawv Maumoos yog puav pheej uas peb tuav tau hauv peb txhais tes uas qhia txog kev sib khi lus ntawd. Phau Ntawv Maumoos yog qhov cuab yeej uas teem tseg yuav pab sau Vajtswv cov me nyuam ua ke los rau txoj kev khi lus tshiab. Thaum peb nyeem Phau Ntawv Maumoos, peb tus kheej thiab nrog lwm tus neeg, txawm nyeem ntsiag tos los sis nrov, peb muaj cuab kav nug Vajtswv “nrog ib lub siab xav paub tiag tiag thiab muaj kev ntseeg Khetos,” thiab los ntawm tus Vaj Ntsuj Plig Dawg Huv lub hwj chim yuab paub tseeb hais tias Phau Ntawv Maumoos muaj tseeb. Kuj yuav paub hais tias Yexus Khetos yog peb tus Cawm Seej, Yauxej Xamiv yog tus yaj saub rau Kev Txum Txim Rov Qab Los, thiab tus Tswv lub Koom Txoos raug hu raws li Nws lub npe uas yog—Yexue Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.
Phau Ntawv Maumoos yog hais los ntawm tej kev khi lus rau yav thaum ub thiab niaj hnub nim no rau nej cov uas yog Lihais cov me nyuam uas yog, “cov yaj saub cov tub cov ntxhais.” Nej cov poj koob yawm txwv tau kev cog lus tseg hais tias nej, cov uas yog lawv cov xeeb leej xeeb ntxwv, yuav hnov lub suab los ntawm cov pluav tshauv hauv Phau Ntawv Maumoos. Lub suab uas nej hnov thaum nej nyeem yuav hais lus tim khawv hais tias nej yog “cov me nyuam ntawm kev khi lus”thiab tias Yexus yog tus Tswv Yug Yaj Zoo.
Phau Ntawv Maumoos caw peb txhua tus, raws li Amas hais, los “khi lus nrog [tus Tswv], hais tias [peb] yuav ua hauj lwm rau nws thiab ua raws li nws tej lus txib, xwv kom nws yuav pub nws tus Ntsuj Plig nplua mias ntau ntxiv rau [peb].”Thaum peb xav hloov los ua neeg zoo dua—li ib tug neeg hais, “tsis txhob ua neeg siab phem thiab cia li muaj kev zoo siab vim yus zoo siab”—peb thiaj kam mloog lus, txais kev pab, thiab kev ntxiv dag zog. Thaum peb khi lus tias peb yuav ua Vajtswv li thaib koom tes nrog ib pab neeg ntseeg, peb yuav txais tau tej koob hmoov uas cog lus tseg hauv Khetos tej lus qhuab qhia—nim no.
Lub pov thawj hwj txoj cai uas raug muab txum tim rov qab los foom koob hmoov rau tag nrho Nws cov me nyuam yog qhov thib peb ntawm txoj kev sib khi lus. Nyob hauv lub caij nyoog no, Yauhas tus uas Muab Neeg Ua Kev Cai Raus Dej thiab cov Thwj Tim Petus, Yakanpaus, thiab Yauhas tau ua Vajtswv cov tub txib muaj yeeb koob los muab Nws lub pov thawj hwj txoj cai txum tim rov qab los. Vajtswv lub pov thawj hwj thiab Nws tej kab ke ua rau peb haj yam muaj kev sib raug zoo hauv ntiaj teb no thiab yuav pom zoo rau tej kev sib khi lus saum ntuj ceeb tsheej.
Lub pov thawj hwj foom tau koob hmoov txij thaum yug los mus txog thaum muab faus cia—qhov uas tis npe rau me nyuam mos liab thiab muab ib txoj koob hmoov thaum fij lub ntxa tseg. Lub pov thawj hwj tej koob hmoov kho tib neeg tej kev mob, nplij neeg lub siab, qhuab ntuas. Muaj ib leej txiv uas chim rau nws tus tub mus txog thaum leej txiv muab lub pov thawj hwj ib txoj koob hmoov rau nws tus tub ces nws thiaj zam txim kiag rau nws. Muaj ib tug ntxhais hluas uas yog tib tug neeg hauv nws tsev neeg uas ua mej zeej nws tsis paub tias Vajtswv puas hlub nws mus txog thaum nws txais lub pov thawj hwj ib txoj koob hmoov. Nyob thoob plaws ntiaj teb no, cov yawg suab npaj ntawm sab ntsuj plig li yuav muab tus yawg suab txoj koob hmoov. Thaum tus yawg suab tso nws txhais tes rau saum nej lub taub hau, nws hnov thiab qhia Vajtswv txoj kev hlub rau nej. Nws qhia seb nej los ntawm caj ceg twg ntawm haiv neeg Ixayees. Nws muab tus Tswv tej koob hmoov rau nej. Muaj ib zaug uas ib tug yawg suab tus poj niam uas txawj xav, qhia kuv tias nws thiab nws tsev ua li cas caw tau tus Ntsuj Plig los hauv lawv tsev thaum lawv Txiv yuav muab tus yawg suab ib txoj koob hmoov.
Qhov kawg, tej koob hmoov los ntawm txoj kev sib khi lus hauv Nws txoj hau kev yeej nyob rau hauv txoj kev sib khi lus thaum sib yuav. Txoj kev sib khi lus thaum sib yuav yeej zoo kawg thiab kav mus ib txhis thaum peb niaj hnub xaiv los muab kev zoo siab rau peb tus khub thiab tsev neeg ua ntej muab rau peb tus kheej. Thaum uas “kuv” hloov los ua “wb,” ces wb loj hlob ua ke. Wb laus zuj zus ua ke; wb hluas zuj zus ua ke. Thaum peb ib leeg foom koob hmoov rau ib leeg hauv tag nrho peb lub neej es tsis nco qab txog peb tus kheej, peb nrhaiv tau oeb tej kev cia siab thiab kev xyiv fab rau lub neej no thiab lub caij nyob mus ib txhis.
Txawm nyias txawv nyias li, thaum peb ua txhua yam peb ua tau, ua zoo npaum li peb ua tau, thiab mob siab nrhiav thiab thov Nws txoj kev pab, tus Tswv yeej yuav coj peb kev, raws li Nws lub caij thiab siab nyiam, los ntawm tus Vaj Ntsuj Plig Dawb Huv. Tej kev khi lus thaum sib yuav yog qhov uas ib khub niam txiv xaiv los ua—nws yog ib qho uas pab peb nco txog Vajtswv thiab peb txoj kev saib kev ywj siab thiab nco txog qhov koob hmoov uas peb xav tau Nws txoj kev pab.
Peb pom tej koob hmoov ntawm txoj kev sib khi lus hauv ntau tiam neeg hauv peb vaj peb tsev. Cia kuv piav txog ob peb qhov piv txwv hauv kuv lub neej.
Thaum Muam Gong wb tab tom pib sib hlub es xav sib yuav, kuv tau kawm txog kev ywj siab thiab kev txiav txim. Muaj ib lub sij hawm, uas wb nyias nyob nyias ib lub teb chaws hauv ob thaj chaw sib txawv. Yog vim li ntawd kuv thiaj hais tias kuv kawm tau kuv daim PhD txog tej teb chaws txoj kev sib raug zoo.
Thaum kuv nug hais tias, “Leej Txiv Saum Ntuj Ceeb Tsheej, puas tsim nyog kuv yuav Susan ua kuv poj niam?” Kuv tau hnov kev kaj siab lug. Tiam sis thaum kuv kawm mob siab thov Vajtswv hais tias, “Leej Txiv Saum Ntuj Ceeb Tsheej, kuv hlub Susan thiab xav yuav nws ua poj niam. Kuv cog lus hais tias kuv yuav ua tus txiv thiab leej txiv zoo tshaj plaws”—thaum kuv ua thiab txiav txim ua zoo, thaum ntawd ces kuv thiaj hnov tau tus ntsuj plig ntau kawg.
Nim no peb tsev neeg Gong thiab Lindsay caj ceg, tej dab neeg, thiab duab pab peb nrhiav thiab sib raug zoo thiab koom tib lub siab vim muaj tej kev sib khi lus. Rau peb mas, cov poj koob yawm txwv uas peb hawm yog:
Tus pog koob Maria Elizabetha Blauer, uas muaj ib hnub peb tug txiv neej thov yuav nws ua poj niam, yav tom qab ntawd tau thov nws tus txiv kho lub tshuab do mis roj, kom nws tuam tau lub tshuab do mis roj tib lub caij uas nws xaws khaub ncaws.
Yawg koob Loy Kuei Char tau ev nws cov me nyuam thiab nog nws tsev neeg cov khoom ntawm tus nees zag thaum lawv tab tom hla tej tiaj nrag hauv lub koog pov txwv loj Hawaii. Ntau tiam neeg hauv yim neeg Char tej kev sib cog lus thiab kev txi tseem niaj hnub foom koob hmoov rau peb tsev neeg.
Pog Mary Alice Powell Lindsay ua poj ntsuam uas muaj tsib tug me nyuam thaum nws tus txiv thiab nws tus tub hlob txawm tuag mus. Nws txawm ua poj ntsuam rau 47 xyoo, Pog tu nws tsev neeg nrog rau ntau tus thawj coj thiab mej zeej ib ncig nws uas hlub lawv heev. Hauv ntau ntau xyoo ntawd, Pog cog lus rau tus Tswv hais tias yog tus Tswv yuav pab nws ces, nws yeej yuav tsis yws yws. Tus Tswv yeej pab nws. Nws tsis tau yws hlo li.
Cov kwv tij thiab cov muam, raws li tus Vaj Ntsuj Plig Dawb Huv ua tim khawv hais tais, txhua yam zoo thiab txhua yam nyob mus ib txhis yeej nyob ntawm qhov uas muaj Vajtswv, peb Leej Txiv Nyob Mus Ib Txhis thiab Nws Leej Tub, Yexus Khetos, thiab Nws txoj Kev Theej Txhoj. Peb tus Tswv, Yexus Khetos, yog tus Neeg Sawv Cev rau txoj kev khi lus tshiab. Lub ntsiab rau Phau Ntawv Maumoos yog kom ua ib qho tim khawv txog Yexus Khetos. Los ntawm kev lav lus thiab kev khi lus, Vajtswv lub pov thawj hwj txoj cai uas raug txum tim rov qab los yog pab kom foom koob hmoov rau tag nrho Vajtswv cov me nyuam, nov hais txog kev khi lus ntawm kev sib yuav, khi tej tiam neeg ua ke, thiab muab tej koob hmoov.
Peb tus Cawm Seej tshaj tawm hais tias, “Kuv yog Alafas thiab Aumenkas, Khetos uas yog tus Tswv; muaj tseeb tiag, kuv twb yog tus ntawd, yog qhov chiv keeb thiab qhov kawg, yog tus Txhiv Dim ntawm neeg ntiaj teb..”
Thaum peb nyob tom qhov chaw pib, Nws nrog peb nyob, hauv tag nrho peb tej kev sib khi lus, mus txog rau hnub kawg. Kuv hais lus tim khawv li no los ntawm Yexus Khetos lub npe uas dawb ceev thiab dawb huv, amees.