Los, Nrog Kuv Mus—tus Tswv tus Txheej Txheem thiab Txoj Kev Npaj Tiv Taus
Tus Tswv npaj Nws cov neeg tiv thaiv lawv ntawm tus yeeb ncuab tej kev tawm tsam. Los, Nrog Kuv Mus yog tus Tswv tus txheej txheem thiab txoj kev npaj tiv taus.
Peb zoo siab sib ntsib ua ke nyob hauv lub tuam rooj sab laj ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Yog ib txoj koob hmoov uas peb tau kawm txog tus Tswv lub siab nyiam los ntawm Nws cov yaj saub thiab cov thwj tim tej lus qhia. Thawj Tswj Hwm Russell M. Nelson yog tus Tswv tus yaj saub. Peb zoo siab ua Vajtswv tsaug rau nws tej lus ntuas thiab tej lus qhia uas peb txais hnub no.
Kuv ntxiv kuv zaj lus tim khawv rau cov uas tau hais tas lawm. Kuv ua tim khawv txog Vajtswv, peb Leej Txiv Nyob Mus Ib Txhis. Nws muaj txoj sia nyob thiab hlub peb thiab saib xyuas peb. Nws txoj hau kev zoo siab ua rau peb tau koob hmoov hauv lub neej no thiab qhib kev rau peb rov qab mus nyob ntawm Nws xub ntiag.
Kuv kuj ua tim khawv txog Yexus Khetos. Nws yog Vajtswv Tib Leeg Tub. Nws cawm peb dim kev tuag, thiab Nws txhiv peb dim kev txhaum thaum peb muab siab rau ntseeg Nws thiab hloov siab lees txim. Nws txoj kev theej peb lub txhoj ua rau peb txais tau cov koob hmoov hauv lub neej no thiab lub neej mus ib txhis li. Muaj tseeb tiag, “Ua Vajtswv tsaug rau lub txiaj ntsim zoo tshaj txhua yam uas yog Nws Leej Tub” (“Tus Khetos uas Muaj txoj Sia Nyob: Cov Thwj Tim tej Lus Tim Khawv,” Liahona, Tsib Hlis Ntuj 2017, nyob sab haud).
Haiv Neeg Ntseeg hauv Hnub Nyoog Kawg nyob thoob plaws lub ntiaj teb tau koob hmoov vim lawv teev tiam Yexus Khetos hauv Nws cov tuam tsev. Ib lub tuam tsev uas tam sim no tseem ua yog nyob hauv Winnipeg, Canada. Xyoo no kuv tus poj niam, Anne Marie, thiab kuv tau muaj cib fim mus xyuas qhov chaw ua lub tuam tsev thaum lub Yim Hli Ntuj. Lub tuam tsev yeej yuav zoo nkauj thiab thaum ua tiav mas yuav zoo kawg nkaus. Tiam sis, nej yeej yuav tsis muaj ib lub tuam tsev zoo hauv Winnipeg, los yog lwm qhov chaw, yog tsis muaj ib lub hauv puas ruaj nrees.
Cov av hauv Winnipeg khov thaum lub caij no no thiab yaj thaum lub caij ntuj sov thiaj li nyuaj rau kev npaj lub hauv paus rau lub tuam tsev. Yog li ntawd, lawv twb txiav txim hais tias lub hauv paus rau lub tuam tsev no yuav tso kab hlau hauv 70 lub pob zeb. Tej pob zeb no ntev li 60 fiv (18 m) thiab tuab li 12 mus txog 20 yas tes (30 mus txog 50 cm). Lawv muab ntxig rau hauv av mus txog thaum chwv txheej hauv qab, kwv yees li 50 fiv (15 m) hauv cov av. Li no, 70 tus ncej no ua ib lub hauv paus ruaj nrees rau lub tuam tsev Winnipeg uas zoo nkauj heev.
Peb Haiv Neeg Ntseeg hauv Hnub Nyoog Kawg kuj xav muaj ib lub hauv paus ruaj nrees hauv peb lub neej—ib lub hauv paus rau peb sab ntsuj plig uas yuav tsum muaj kom ua neej no thiab rov qab mus rau peb lub tsev saum ntuj ceeb tsheej. Lub hauv paus ntawd yeej yog peb txoj kev hloov siab los ntseeg tus Tswv Yexus Khetos.
Peb nco qab txog Hilamas tej lus qhia los ntawm Phau Ntawv Maumoos: “Thiab nim no, kuv ob tug tub es, nco ntsoov, nco ntsoov tias twb yog nyob rau saum lub pob zeb uas yog peb tus Txhiv Dim, tus uas yog Khetos, Vajtswv Leej Tub, uas neb yuav tsum cog neb lub hauv paus; xwv kom thaum tus dab phem yuav xa nws tej cua muaj zog, muaj tseeb tiag, nws tej xub nyob hauv tej khaub zig cua, … tej ntawd yuav tsis muaj hwj chim kov yeej neb kom cab tau neb mus rau hauv tus kwj tob tob ntawm kev nyuaj siab thiab kev txom nyem uas tsis muaj qhov kawg, vim yog lub pob zeb uas neb tau cog rau saud, uas yog lub hauv paus ruaj nrees, ib lub hauv paus uas yog neeg cog rau saud lawv yuav tsis vau” (Hilamas 5:12).
Zoo siab uas peb nyob hauv ib lub caij nyoog thaum cov yaj saub thiab cov thwj tim qhia peb txog tus Cawm Seej Yexus Khetos. Yog peb ua raws li lawv qhia ces yuav pab peb txhim tsa ib lub hauv paus ruaj nrees los ntawm Khetos.
Ib xyoos tas los, thaum nws hais lus qhib lub Kaum Hli Ntuj xyoo 2018 lub tuam rroj sab laj, Thawj Tswj Hwm Russell M. Nelson tau hais tej lus tshaj tawm thiab tej lus ceeb toom no: “Lub hom phiaj ntawm lub Koom Txoos no yog kom pab txhua tus mej zeej muaj kev ntseeg tus Tswv Yexus Khetos thiab Nws txoj Kev Theej Txhoj ntxiv, kom pab lawv ua thiab ua raws li lawv tej kev khi lus nrog Vajtswv, thiab kom txhawb lawv tsev neeg lub zog thiab muab lawv khi ua ke. Nyob hauv lub ntiaj teb no, ua li no yeej tsis yooj yim.. Tus yeeb ncuab haj yam tawm tsam kev ntseeg thiab tsev neeg zuj zus tuaj. Yog peb sab ntsuj plig yuav dim, ces peb yuav tsum muaj tej txheej txheem thiab tej kev npaj kom tiv tau.” (“Tej Lus Qhib Rooj Sab Laj,” Liahona, Kaum Ib Hlis Ntuj 2018, 7; ntxiv qhov uas ntawv qaij).
Tom qab Thawj Tswj Hwm Nelson tau hais lus, Txwj Laug Quentin L. Cook ntawm Pawg Kaum Ob tug Thwj Tim tau hais txog phau ntawv Los, Nrog Kuv Mus kom pab tib neeg thiab tsev neeg. Nws tau hais tej yam no:
-
“Phau ntawv pab kawm tshiab Los, Nrog Kuv Mus … yog npaj tseg kom pab cov mej zeej kawm txoj moo zoo hauv tsev.”
-
“Phau ntawv pab kawm no yog rau txhua tus neeg thiab txhua tsev neeg hauv lub Koom Txoos” [Come, Follow Me—For Individuals and Families (2019), vi].”
-
“Peb lub hom phiaj yog kom tej yam peb ua hauv tsev thiab tej yam peb ua tom lub Koom Txoos yuav sib luag zoo kom peb muaj siab ntseeg ntau dua, hnov tau tus Ntsuj Plig zoo dua, thiab hloov siab los ntseeg tiag tiag rau ntawm Leej Txiv Saum Ntuj Ceeb Tsheej thiab tus Tswv Yexus Khetos.” (“Kev Hloov Siab Los Ntseeg rau ntawm Leej Txiv Saum Ntuj Ceeb Tsheej thiab tus Tswv Yexus Khetos uas Tob Heev thiab Kav Ntev,” Liahona, Kaum Ib Hlis Ntuj 2018, 9–10.)
Pib thaum lub Ib Hlis Ntuj xyoo no, Haiv Neeg Ntseeg nyob thoob plaws lub ntiaj teb tau pib kawm Phau Tshiab, nrog phau ntawv pab kawm Los, Nrog Kuv Mus. Vim muaj ib tug txheej txheem kawm txhua lub lim tiam, Los, Nrog Kuv Mus pab peb kawm vaj lug kub, cov lus qhuab qhia txog txoj moo zoo, thiab cov yaj saub thaib cov thwj tim tej lus qhia. Yeej yog ib phau pab kawm zoo rau peb txhua tus.
Tom qab peb kawm vaj lug kub nyob thoob plaws lub ntiaj teb tau cuaj hlis lawm, ces peb tau pom dab tsi? Peb pom Haiv Neeg Ntseeg hauv Hnub Nyoog Kawg nyob txhua qhov chaw muaj kev ntseeg thiab kev hlub tus Tswv Yexus Khetos ntxiv. Peb pom tib neeg thiab tsev neeg teem sij hawm dhau ib lub lim tiam rau kev kawm peb tus Cawm Seej tej lus. Peb pom tias nyob hauv peb tej hoob kawm thaum hnub Sunday peb txawj qhia txoj moo zoo thaum peb kawm vaj lug kub hauv tsev thiab qhia txog peb tej kev xav hauv lub tsev koom txoos. Peb pom tej tsev neeg muaj kev xyiv fab thiab kev koom siab vim peb tsis lam nyeem vaj lug kub ntxiv es peb rau siab kawm vaj lug kub zoo.
Kuv twb muaj cib fim mus xyuas ib co Neeg Ntseeg hauv Hnub Nyoog Kawg thiab hnov tias lawv txoj kev siv Los, Nrog Kuv Mus tau zoo li cas. Lawv hais lus txog lawv txoj kev ntseeg yeej ua rau kuv zoo siab kawg nkaus. Nov yog ob peb yam uas kuv tau hnov cov mej zeej ntawm lub Koom Txoos nyob thoob plaws lub ntiaj teb tau hais:
-
Ib tug txiv tsev hais tias, “Kuv nyiam phau Los, Nrog Kuv Mus vim ua rau kuv muaj cib fim ua tim khawv txog tus Cawm Seej rau kuv cov me nyuam.”
-
Nyob hauv lwm lub tsev, ib tug me nyuam hais tias, “Nov yog ib lub sij hawm uas kuv mloog tau kuv niam kuv txiv hais lus tim khawv.”
-
Ib tug niam tsev hais tias: “Peb tau txais kev tshoov siab kom paub tsom ntsoov rau Vajtswv tshaj txhua yam. Lub sij hawm uas [peb xav tias] ‘peb tsis muaj’ los yeej yog lub sij hawm uas peb muaj kev cia siab, kev xyiv fab, kev kaj siab lug, thiab kev vam meej uas peb tsis tau paub tias peb yuav muaj.
-
Ib khub niam txiv hais tias: “Wb nyeem vaj lug kub txawv dua li wb tau nyeem ua ntej. Wb kawm ntau yam uas wb tsis tau kawm yav tas los. Tus Tswv xav kom wb pom tej yam no txawv dhau los. Tus Tswv npaj wb lub siab.”
-
Ib tug niam tsev hais tias: “Kuv nyiam qhov uas peb kawm tej yam ua ke. Dhau los, peb tau nyeem vaj lug kub. Hnub no, peb kawm vaj lug kub tiag.”
-
Ib tug poj niam tau qhia txog lub ntsiab zoo no: “Dhau los, yus twb muaj ib zaj lus qhia, thiab cov vaj lug kub tau pab yus kawm. Nim no, yus muaj cov vaj lug kub, thiab zaj lus qhia pab yus kawm.”
-
Ib tug poj niam hais tias: “Kuv paub txawv li cas thaum kuv ua [thiab] kuv tsis ua. Kuv xav tias yooj yim ntxiv rau kuv sib tham nrog lwm tus txog Yexus Khetos thiab peb txoj kev ntseeg.”
-
Ib tug pog hais tias, “Kuv hu kuv cov me nyuam thiab cov xeeb ntxwv thaum hnub Sunday thiab peb ib leeg qhia ib leeg txog tej yam uas tau kawm los ntawm Los, Nrog Kuv Mus.”
-
Ib tug poj niam hais tias: “Kev siv phau Los, Nrog Kuv Mus yeej zoo li tus Cawm Seej txhawb pab kuv tus kheej. Vajtswv yeej tau txhawb nqa phau ntawv ntawd.”
-
Ib tug txiv tsev hais tais, “Thaum peb siv Los, Nrog Kuv Mus, peb zoo li tsev neeg Ixayees, uas pleev xim rau tus ncej ntawm peb lub qhov rooj, pov hwm peb tsev neeg kom txhob raug tus uas ua puas tsuaj.”
Cov kwv tij thiab cov muam, yeej ua rau kuv xyiv fab thaum kuv tuaj xyuas nej thiab hnov hais tias vim li cas Los, Nrog Kuv Mus ua rau nej tau koob hmoov. Ua tsaug rau nej txoj kev rau siab ua.
Kev kawm vaj lug kub nrog phau Los, Nrog Kuv Mus yeej ntxiv zog rau peb txoj kev hloov siab los ntseeg Yexus Khetos thiab Nws txoj moo zoo. Peb tsis muab ib teev hauv lub tsev koom txoos thaum hnub Sunday pauv rau ib teev kawm vaj lug kub hauv tsev. Peb yeej siv zog tas ib lub lim tiam kom kawm txoj moo zoo. Ib tug niam tsev qhia rau kuv tias, “Lub hom phiaj tsis yog txiav ib teev ntawm kev nyob hauv lub tsev koom txoos; lub hom phiaj yog kom mus rau lub koom txoos rau hnub ntxiv!”
Nim no, cia li xav txog tej lus ceeb toom uas peb tus yaj saub, Thawj Tswj Hwm Nelson, hais thaum nws qhib lub Kaum Hli Ntuj xyoo 2018 lub tuam rooj sab laj:
“Tus yeeb ncuab haj yam tawm tsam kev ntseeg thiab tsev neeg zuj zus tuaj. Yog peb sab ntsuj plig yuav dim, ces peb yuav tsum muaj tej txheej txheem thiab tej kev npaj kom tiv tau” (“Tej Lus Qhib Rooj Sab Laj,” 7).
Ces (kwv yees li 29 teev tom qab ntawd thaum hnub Sunday tav su, nws tau xaus lub rooj sab laj nrog kev cog lus no: “Kuv cog lus hais tias thaum nej rau siab ntso kho nej lub tsev kom ua lub hauv paus rau txoj kev kawm txoj moo zoo, … ces dab ntxwg nyoog lub hwj chim hauv nej lub neej thiab nej lub tsev yuav tsawg zuj zus mus” (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Liahona, Kaum Ib Hlis Ntuj 2018, 113).
Ua li cas tus yeeb ncuab haj yam tawm tsam kev ntseeg tiam sis tus yeeb ncuab lub hwj chim tsawg zuj zus? Yeej muaj tau li no, thiab muaj li no nyob thoob plaws lub Koom Txoos, vim tus Tswv npaj Nws cov neeg tiv thaiv lawv ntawm tus yeeb ncuab tej kev tawm tsam.. Cos, Nrog Kuv Mus yog tus Tswv tus txheej txheem thiab txoj kev npaj tiv taus. Raws li Thawj Tswj Hwm Nelson tau qhia, “Tus txheej txheem kawm hauv tsev uas lub Koom Txoos txhawb nqa yuav ua rau txhua yim neeg haj yam muaj hwj chim.” Tiam sis, peb yuav tsum ua zoo npaum li peb ua taus; peb yuav tsum “ua tib zoo ua raws li tej lus qhia no thiab pauv [peb] lub tsev los ua ib qho chaw cawm sia vim muaj kev ntseeg” (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” 113).
Vim Thawj Tswj Hwm Nelson kuj hais tias, “Peb txhua tus lav ris peb txoj kev loj hlob ntawm sab ntsuj plig” (“Tej Lus Qhib Rooj Sab Laj,” 8)
Nrog phau ntawv qhia Los, Nrog Kuv Mus, tus Tswv npaj peb “rau lub caij muaj xwm txheej phem uas peb nyob haud niaj hnub nim no” (Quentin L. Cook, “Kev Hloov Siab Los Ntseeg uas Tob Heev thiab Kav Ntev,” 10) Nws pab peb txhim tsa “lub hauv paus ruaj nrees, ib lub hauv paus uas yog neeg cog rau saud lawv yuav tsis vau” (Hilamas 5:12)—lub hauv paus rau ib zaj lus tim khawv uas nyob khov kho rau ntawm kev hloov siab los ntseeg tus Tswv Yexus Khetos.
Thov kom tej yam peb ua niaj hnub thaum peb kawm vaj lug kub pov hwm peb thiab ua rau peb tsim nyog txais cov koob hmoov uas tau cog lus tseg rau peb. Kuv thov li no, los ntawm Yexus Khetos lub npe, amees.