Nej txoj Kev Yos Teb Chaws
Tus Cawm Seej caw peb, txhua hnub, kom tso peb tej kev txaus siab tseg thiab koom nrog Nws los taug txoj kev ua thwj tim.
Hais txog cov Hobbit
Ib phau ntawv uas sau rau cov me nyuam ntau xyoo tas los pib li no hais tias “Nyob hauv ib lub qhov hauv av los muaj ib tug hobbit nyob ntawd.”
Zaj dab neeg txog Bilbo Baggins yog ib zaj txog ib tug hobbit uas zoo li lwm tus thiab tsis tseem ceeb tiam sis nws muaj cib fim zoo kawg nkaus—nws muaj cib fim mus yos teb chaws thiab txais nqi zog loj heev.
Qhov teeb meem yog qhov uas cov hobbit uas tsim nyog tshaj plaws yeej tsis xav mus yos teb chaws. Lawv ua neej nyob xav txaus siab xwb. Lawv nyiam noj rau plua mov ib hnub thiab siv sij hawm hauv lawv lub vaj, ib leeg hais dab neeg rau ib leeg, hu nkauj, ntaus nkauj paj nruas, thiab nyiam ua neej nyob zoo siab xwb.
Tiam sis, thaum Bilbo muaj cib fim mus deb yos teb chaws, muaj ib yam dab tsi tshoov nws lub siab heev. Nws to taub hais tias thaum xub thawj nws txoj kev taug mus yuav nyuaj heev. Ntshe muaj tej yam txaus ntshai. Ntshe tej zaum nws yuav tsis rov qab los.
Tiam sis, txoj kev hu kom nws mus yos teb chaws twb tshoov nws lub siab heev. Yog li ntawd, tus hobbit uas tsis txawv leej twg hlo li tso kev nyob txaus siab tseg thiab sawv kev mus yos teb chaws kom mus “txog ntawd thiab rov qab los.”
Nej txoj Kev Yos Teb Chaws
Tej zaum feem coob nyiam zaj dab neeg no yog vim nov yog peb zaj dab neeg thiab.
Puag thaum ub, ua ntej peb yug los, nyob hauv ib lub caij nyoog uas ntev dhau lawm thiab tsis muaj leej twg nco qab, peb kuj txais kev caw mus yos teb chaws. Vajtswv, peb Leej Txiv Saum Ntuj Ceeb Tsheej, yog tus uas tau hais qhov no. Qhov uas peb lees mus ua neej li no txhais hais tias peb yuav tsum muab kev txaus siab tso tseg thiab peb yuav tsis nrog Nws nyob. Qhov no txhais tias peb yuav los rau hauv lub ntiaj teb no kom raug tej xwm txheej ceev thiab kev sim siab.
Peb twb paub tias yuav tsis yooj yim.
Tiam sis peb kuj paub tias peb yuav nrhiav tau tej yam uas muaj nqis heev, tsis hais ib lub cev nqaij daim tawv thiab muaj kev xyiv fab thiab kev tu siab uas los ntawm lub neej no. Peb yuav kawm kom rau siab, paub nrhiav, thiab kov yeej teeb meem. Peb yuav kawm qhov tseeb txog Vajtswv thiab peb tus kheej.
Muaj tseeb tiag, peb paub tias peb yuav ua yuam kev ntau heev. Tiam sis peb twb tau txais kev cog lus: vim tias Yexus Khetos tau theej peb lub txhoj, peb tej kev txhaum yuav raug ntxuav mus, yuav hloov peb tej ntsuj plig ua huv, thiab muaj ib hnub peb yuav sawv rov los thiab rov qab los koom nrog cov uas peb hlub.
Peb tau kawm tias Vajtswv hlub peb npaum li cas. Nws pub peb muaj txoj sia thiab Nws xav kom peb vam meej. Yog li ntawd, Nws tau npaj ib tug Cawm Seej rau peb. Peb Leej Txiv Saum Ntuj Ceeb Tsheej tau hais tias, “Txawm li ntawd los, [nej] xaiv tau rau [nej] tus kheej, vim twb pub txoj kev xaiv rau [nej].”
Muaj ib feem ntawm lub neej hauv ntiaj teb uas ua rau Vajtswv cov me nyuam txhawj thiab ntshai, vim muaj ib feem ntawm peb cov kwv tij thiab cov muam ntsuj plig uas txiav txim siab tias lawv tsis xav ua.
Los ntawm lub txiaj ntsim thiab lub hwj chim ntawm kev ywj siab xaiv, peb txiav txim siab tias vim peb yuav kawm ntau yam thiab yuav hloov los ua neeg zoo mus ib txhis ces peb txaus siab raug tej xwm txheej no.
Yog li ntawd, vim peb tso siab rau Vajtswv thiab Nws Leej Tub tej lus cog tseg thiab lub hwj chim, peb tau txais yuav txoj kev nyuaj no.
Kuv twb ua li ntawd.
Thiab nej tau ua li ntawd.
Peb tau pom zoo ncaim kev nyab xeeb ntawm peb lub neej thib ib thiab mus yos teb chaws mus “txog ntawd thiab rov qab los.”
Txoj Kev Hu Mus Yos Teb Chaws
Tiam sis, lub neej no yeej ua rau peb tsis nco qab, puas yog? Peb pheej tsis nco qab txog peb lub hom phiaj tseem ceeb, peb nyiam nyob txaus siab thiab tej yam yooj yim thiab tsis nyiam kawm txuj ci thiab loj hlob tuaj.
Tiam sis, tseem muaj ib yam uas txwv tsis taus, nyob rau hauv peb nruab siab, uas xav ua raws li ib lub hom phiaj siab thiab zoo dua ntxiv. Kev xav ua li no yeej yog vim tib neeg muaj siab xav paub txog txoj moo zoo thiab Yexus Khetos lub Koom Txoos. Txoj moo zoo yeej yog ib txoj kev rov qab hu peb mus yos teb chaws uas peb twb xav ua puag thaud. Tus Cawm Seej caw peb, txhua hnub, kom tso peb tej kev txaus siab tseg thiab koom nrog Nws los taug txoj kev ua thwj tim.
Txoj kev no nkhaus mus nkhaus los. Muaj toj hav, thiab txoj kev lug. Yeej muaj tej yam uas txaus ntshai npaum li cov kab laug sab, cov dab qhov tsuas, thiab cov zaj. Tiam sis yog nej raws nraim txoj kev thiab tso siab rau Vajtswv, ces thaum kawg nej yuav nrhiav tau nej txoj hmoov uas muaj yeeb koob thiab rov qab mus saum ntuj ceeb tsheej.
Yog li ntawd nej yuav pib li cas?
Yog ib qho yooj yim.
Muab Siab Npuab Vajtswv
Qhov thib ib, nej yuav tsum xaiv kom muab siab npuab Vajtswv. Siv zog nrhiav Nws txhua hnub. Kawm hlub Nws, Thiab cia txoj kev hlub ntawd tshoov nej lub siab kom kawm, to taub, thiab coj raws li Nws tej lus qhia thiab kawm coj raws li Vajtswv tej lus txib. Peb tau kawm txog Yexus Khetos txoj moo zoo uas tau txum tim rov qab los los ntawm ib txoj kev meej thiab yooj yim uas ib tug me nyuam txawj to taub. Tiam sis, Yexus Khetos txoj moo zoo kuj muaj txoj kev teb tej lus nug nyuaj tshaj plaws hauv lub neej no thiab yog ib yam uas yus kawm tsis tau txawm yus kawm thiab xav txog kom tas ib lub neej, peb yeej tsis to taub tsis hais ib feem me los yog.
Yog nej tseem tos mus yos teb chaws li no vim nej tsis ntseeg nej ua taus, cia li nco ntsoov kev ua thwj tim tsis yog kev ua zoo tag nrho; yog kev txhob txwm ua zoo. Yog tej yam uas nej xaiv uas qhia tias nej yog leej twg, ntau tshaj nej tej txuj ci.
Txawm yog nej ua tsis yog lawm, nej tseem muaj peev xwm xaiv kom tsis txhob tso tseg, es ua siab loj, txiv mus lawm tom hauv ntej, thiab sawv tsees. Qhov ntawd yog kev sim siab ntawm lub neej no.
Vajtswv paub tias nej tsis yog neeg zoo tag nrho, thiab tej lub sij hawm nej yuav ua yuam kev. Vajtswv hlub nej thaum nej muaj teeb meem ib yam li thaum nej kov yeej.
Ib yam li ib leej txiv uas hlub nej, Nws tsuas xav kom nej txhob txwm siv zog mus ntxiv. Kev ua thwj tim yeej zoo li yus kawm ntaus piano. Tej zaum yus tsuas txawj ntaus ib zaj nkauj yooj yim kawg thaum xub thawj. Tiam sis yog nej xyaum ntxiv, ces tej zaj uas nej tsis tshua txawj ntaus los muaj ib hnub nej yuav txawj ntaus kom zoo mloog heev.
Tej zaum yuav tsis txog hnub ntawd nyob hauv lub neej no, tiam sis yeej yuav txog hnub ntawd. Vajtswv tsuas hais kom nej yeej meem siv zog mus ntxiv.
Ncav Tes Hlub Lwm Tus
Yeej muaj ib yam txawv txav ntawm txoj kev uas nej tau xaiv taug: tib txoj kev rau nej vam meej ntawm txoj moo zoo yog kom pab lwm tus vam meej ib yam thiab.
Txoj kev pab lwm tus yeej yog txoj kev ua ib tug thwj tim. Kev ntseeg, kev cia siab, kev hlub, kev khuv leej, thiab kev pab lwm tus ua rau peb hloov los ua cov thwj tim.
Los ntawm nej txoj kev pab cov neeg pluag thiab txom nyem, kev ncav tes pab cov uas nyuaj siab txhawj xeeb, ua rau nej tus cwj pwm huv thiab zoo, nej sab ntsuj plig loj tuaj, thiab nej haj yam zoo siab rau nej tus kheej.
Tiam sis kev hlub zoo li no los yuav tsum tsis txhob xav tias yuav tau nqi zog rov qab los. Yuav tsum tsis txhob pab lwm tus vim yus xav kom txais kev qhuas los sis xav tau ntsej muag.
Yexus Khetos cov thwj tim tseeb hlub Vajtswv thiab Nws cov me nyuam es lawv tsis xav tias lawv yuav txais tau tej yam rov qab. Peb hlub cov uas ua rau peb poob siab, cov uas tsis hlub peb. Peb hlub cov uas thuam, ua lim hiam, thiab xav ua rau peb mob.
Thaum nej muab Khetos txoj kev hlub dawb paug puv nej lub siab, tsis muaj chaw rau kev chim siab, kev txiav txim, thiab kev ua rau lwm tus txaj muag. Yus ua raws li Vajtswv cov lus txib vim yus hlub Nws. Ua li ntawd los, ua rau yus maj mam hloov los ua neeg zoo li Khetos ntawm yus tej kev xav thiab tej yam yus ua. Puas muaj kev yos teb chaws uas zoo dua li qhov no?
Qhia Nej Zaj
Qhov thib peb uas peb sim ua taus zoo thaum peb taug txoj kev no mus yog kev ris Yexus Khetos lub npe thiab tsis txhob txaj muag txog qhov uas peb yog mej zeej hauv Yexus Khetos lub Koom Txoos.
Peb tsis muab peb txoj kev ntseeg zais cia.
Peb tsis muab faus.
Tiam sis, peb qhia txog peb txoj kev taug mus rau lwm tus los ntawm tej txoj kev uas yooj yim hais. Cov phooj ywg ua li no—lawv sib tham txog tej yam uas tseem ceeb rau lawv. Tej yam uas nyob hauv lawv lub siab thiab yog tej yam uas pab tau lawv.
Nej yeej ua li ntawd. Nej qhia nej tej zaj lus txog qhov uas nej yog mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.
Tej lub sij hawm nej zaj lus yuav ua rau neeg luag. Tej zaum yuav ua rau lawv los kua muag. Tej lub sij hawm nej yuav pab tib neeg ua siab ntev, rau siab mus ntxiv, thiab ua siab loj nyob tau ib teev ntxiv, ib hnub ntxiv kom los ze Vajtswv me ntsis ntxiv.
Cia li hais nej zaj tab meeg lwm tus, siv social media, nyob hauv tej pawg, txhua qhov chaw.
Ib yam kawg uas Yexus qhia Nws cov thwj tim yog qhov uas lawv yuav tsum mus thoob plaws lub ntiaj teb thiab hais dab neeg txog tus Khetos uas sawv rov los. Hnub no peb kuj xyiv fab ua raws li kev txib tseem ceeb ntawd.
Yeej yog ib zaj zoo kawg uas peb qhia: vim muaj Yexus Khetos, txhua tus txiv neej, poj niam, thiab me nyuam rov qab mus tau rau lawv lub tsev saum ntuj ceeb tsheej, thiab nyob ntawd nrog yeeb koob thiab kev ncaj ncees!
Muaj tej moo zoo ntxiv uas tsim nyog qhia rau lwm tus.
Vajtswv tau tshwm sim rau tib neeg hauv peb lub caij nyoog! Peb muaj ib tug yaj saub uas muaj txoj sia nyob.
Kuv xav kom nej nco ntsoov tias Vajtswv tsis tas muaj nej mus “muag” txoj moo zoo los sis Yexus Khetos lub Koom Txoos.
Nws tsuas xav kom nej tsis txhob muab phiab khwb rau xwb.
Thiab yog tib neeg txiav txim siab tias lawv tsis xav koom lub Koom Txoos, ces yeej nyob ntawm lawv.
Tiam sis qhov no tsis txhais hais tias nej twb ua tsis yog lawm. Nej tseem ua siab zoo rau lawv. Thiab nej tseem caw tau lawv ib zaug ntxiv thiab.
Qhov txawv ntawm kev sib paub me ntsis thiab kev ua thwj tim uas ua siab loj yeej yog—kev caw lwm tus!
Peb hlub thiab saib Vajtswv cov me nyuam txhua tus rau nqi, txawm lawv yog neeg tseem ceeb npaum li cas, txawm yog haiv neeg twg los sis ntseeg li cas los, txawm lawv tau ua li cas los yog.
Peb tej dej num yog hais tias, “Los thiab saib! Kawm ntawm koj tus kheej tias kev ua thwj tim yeej tsim nyog thiab yuav ua rau nej txais tau nqi zog.”
Peb caw tib neeg “los pab, thaum peb siv zog ua kom lub ntiaj teb no hloov ua ib qhov chaw zoo dua.”
Thiab peb hais tias, “Los nyob nrog peb! Peb yog nej cov kwv tij thiab cov muam. Peb tsis yog neeg zoo tag nrho. Peb tso siab rau Vajtswv thiab xav ua raws li Nws cov lus txib.
“Koom nrog peb, thiab nej yuav ua rau peb ua neeg zoo dua. Thiab, thaum ua li ntawd, nej yuav hloov ua zoo dua thiab. Cia peb ua neej zoo kawg no ua ke.”
Kuv Yuav Tsum Pib Thaum Twg?
Thaum twg Bilbo Baggins hnov tau txoj kev xav mus ncig teb ncig tshiab hauv nws lub siab, nws txiav txim siab tias nws yuav pw ib hmo, noj tshais kom txaus siab, thiab sawv kev mus thaum sawv ntxov.
Thaum Bilbo tsim los, nws pom tias nws lub tsev sw sw, thiab ua rau nws yuav luag tsis nco qab txog qhov uas nws tau npaj lawm.
Tiam sis nws tus phooj ywg Gandalf tuaj thiab nug hais tias, “Koj ho yuav mus thaum twg na?” Kom mus cuag nws cov phooj ywg, Bilbo yuav tsum txiav txim siab tias nws yuav ua li cas.
Yog li ntawd, tus hobbit uas tsis tseem ceeb thiab tsis txawv hlo li twb khiav tawm nws lub qhov rooj mus taug txoj kev yos teb chaws sai dhau nws thiaj li tsis nco qab nqa nws lub kaus mom, tus pas nrig mus kev, thiab phuam so ntswg. Nws twb tau tso nws pluas tshais thib ob tseg tsis noj tas.
Tej zaum muaj ib zaj lus qhia rau peb txhua tus thiab.
Yog tias peb twb txais kev tshoov siav los koom kev mus yos teb chaws uas yog lub neej no thiab peb xav qhia tej yam uas peb Leej Txiv Saum Ntuj Ceeb Tsheej uas hlub peb tau npaj rau peb puag thaum ub, kuv qhia tseeb rau nej hais tias, hnub no yog hnub uas yuav tsum coj raws li Vajtswv Leej Tub thiab peb tus Cawm Seej kom taug Nws txoj kev pab lwm tus thiab ua Nws cov thwj tim.
Peb yeej tos tau tas ib sim neej mus txog thaum lub sij hawm uas txhua yam zoo tag nrho ua li ntawd. Tiam sis tam sim no yog lub sij hawm cog lus tias peb yuav nrhiav Vajtswv, txhawb pab lwm tus, thiab qhia peb zaj rau lwm tus.
Tso nej lub kaus mom, tus pas nrig, phuam so ntswg, thiab lub tsev sw sw tseg.
Rau cov uas twb sawv kev taug txoj kev ntawd lawm, cia li ua siab loj, muaj kev khuv leej, ntseeg nej tus kheej, thiab mus tom ntej!
Rau cov uas twb yuam kev lawm, thov nej rov qab los, koom nrog peb dua, ua rau peb muaj zog ntxiv.
Thiab rau cov uas tseem tsis tau sawv kev mus, vim li cas yuav tos? Yog nej xav pom tej yam xav tsis thoob ntawm txoj kev taug mus ntawm sab ntsuj plig no, cia li sawv kev mus yos teb chaws nej tus kheej! Sib tham nrog cov tub txib. Sib tham nrog nej cov phooj ywg uas yog Haiv Neeg Ntseeg hauv Hnub Nyoog Kawg. Sib tham nrog lawv txog txoj hauj lwm zoo kawg nkaus thiab xav tsis thoob.
Twb txog lub sij hawm pib!
Los, Koom Nrog Peb!
Yog nej xav muaj ib hom phiaj siab dua ntxiv, ib tsev neeg uas muaj zog dua ntxiv, thiab kev sib raug zoo nrog Vajtswv ntxiv, thov, cia li los koom nrog peb.
Yog nej xav koom ib co neeg uas ua hauj lwm kom hloov ua neeg zoo npaum li lawv ua taus, pab cov uas xav tau, thiab pab kom lub ntiaj teb ua ib qho chaw zoo dua ntxiv, thov los koom nrog peb.
Cia li los saib seb txoj kev yos teb chaws, zoo kawg nkaus thiab xav tsis thoob zoo li cas.
Thaum nej taug txoj kev no nej yuav nrhiav tau nej tus kheej.
Nej yuav nrhiav tau lub ntsiab ntawm lub neej no.
Nej yuav nrhiav tau Vajtswv.
Nej yuav nrhiav tau txoj kev taug mus uas zoo tshaj plaws nyob hauv nej lub neej.
Kuv ua tim khawv txog tej no los ntawm Yexus Khetos lub npe, amees.