Tsis Txhob Dag Ntxias Kuv
Thaum peb ua raws li Vajtswv cov lus txib, Nws yeej yuav coj peb mus raws txoj kev yog thiab peb yuav tsis raug ntxias.
Hnub no, kuv hais lus rau txhua tus, tiam sis qhov tseem ceeb kuv hais rau nej cov hauv tiam neeg uas tab tom loj hlob tuaj—cov hauv lub Koom Haum Me Nyuam Yaus, thiab cov tub hluas ntxhais hluas. Tus Tswv tus yaj saub hauv peb hnub nyoog no, Thawj Tswj Hwm Russell M. Nelson, hlub nej heev, nws thiaj li tau hais rau nej feem coob nyob hauv kev tshaj tawm rau cov neeg hluas thoob ntiaj teb xyoo tas los hu ua “Ixayees Kev Cia Siab.” Peb yeej hnov Thawj Tswj Hwm Nelson hu nej ua, “Ixayees kev cia siab,” yog tiam neeg uas tab tom loj hlob tuaj thiab cov uas yuav coj thaum yav tom ntej hauv Yexus Khetos lub Koom Txoos.
Kuv cov phooj ywg, kuv xav qhia ob zag dab neeg txog kuv tsev neeg rau nej.
Tus Aub Dalmation thib 102
Ntau xyoo tas los, kuv ua hauj lwm rov los tsev thiab ua ciav ho pom xim dawb pleev rau ub rau no—hauv av, qhov rooj rau chaw nres tsheb, thiab peb lub tsev xim liab. Kuv soj ntsuam thiab kawm tias cov kua xim tseem ntub. Muaj ib txoj kab xim dawb mus rau tiaj nraum qaum tsev kuv thiaj li taug raws. Nyob ntawd, kuv pom kuv tus tub uas muaj tsib xyoos nrog ib tug pleev xim caum peb tus aub. Peb tus aub dub zoo nkauj ntawd tau muab ib xim dawb no pleev nws ib yas!
“Koj ua dab tsi as?” Kuv nug li tsis zoo siab.
Kuv tus tub nres, ntsia kuv, ntsia tus aub, ntsia tus pleev xim uas tseem muaj kua xim nrog tej tee, thiab hais tias, “Kuv tsuas xav hloov nws ua zoo li cov aub dawb muaj tej teev dub nyob hauv movie—koj paub os, muaj 101 tus aub li ntawd.”
Kuv hlub peb tus aub. Kuv twb xav tias kuv tus aub yeej zoo tag nrho lawm, tiam sis hnub ntawd kuv tus tub muaj ib lub tswv yim txawv.
Tus Miv Txaij
Kuv zaj dab neeg thib ob yog hais txog Dab Laug Grover, uas nyob deb heev, hauv ib lub tsev uas nyob deb ntawm lub nroog. Dab Laug Grover pib laus lawm. Wb xav tias wb cov tub yuav tsum ntsib nws ua ntej nws tas sim neej. Yog li ntawd, muaj ib tav su, peb tsav tsheb mus deb rau nws lub tsev me me. Peb tau zaum ua ke sib tham thiab cia wb cov tub ntsib nws. Tsis ntev tom qab peb pib sib tham, wb ob tug me nyuam tub, uas muaj tej zaum tsib thiab rau xyoo, xav mus nraum zoov ua si.
Dab Laug Grover, thaum nws hnov lawv thov li ntawd, khoov kom ntsia tau nkawd zoo. Nws lub ntsej muag laus thiab nkawd tsis swm nws nkawd thiaj li ntshai me ntsis. Nws hais rau lawv nrog nws lub suab laus hais tias, “Cia li ceev faj—muaj cov puam sem nyob nraud.” Hnov li no, Lesa thiab kuv wb xav tsis thoob; wb txhawj tias ib tug puam sem mam li tsuag nws cov kua tsw phem raug nkawd! Ob tug tub twb mus nraum zoov thaum peb sib tham ntxiv.
Tom qab uas peb nce tsheb yuav mus tsev, kuv nug ob tug tub, “Nej puas pom ib tug puam sem?” Ib tug twb teb hais tias, “Tsis pom, wb tsis pom ib tug puam sem, tiam sis wb twb pom ib tug miv dub muaj txaij dawb rau ntawm nws nrob qaum!”
Tus Txawj Dag Ntxias
Ob zag no txog cov me nyuam tsis muaj txim uas kawm txog lub neej thiab tej yam tseeb tej zaum ua rau peb luag nyav, tiam sis ob zag no kuj qhia ib lub ntsiab cai tseem ceeb.
Nyob hauv zaj thib ib, wb tus me nyuam tub twb muaj ib tug aub zoo nkauj; tiam sis, nws tseem tuav ib thoob pleev xim, thiab tuav ib tug pleev xim, txiav txim siab nws yuav tsim ib tug raws li nws siab xav xwb.
Nyob hauv zaj ob, wb ob tug tub tsis tau paub hlo li txog qhov tsw phem uas nkawd yuav raug thaum nkawd nrhiav tau ib tug puam sem. Vim nkawd tsis muaj peev xwm paub nkawd nrhiav tau dab tsi, ntshe nkawd yuav raug tej xwm txheej tsis zoo. Nov yog ob zag txog qhov uas yus pom yuam kev—yus xav tias qhov tseeb yog ib yam dab tsi ntxiv. Nyob hauv ob zag no, lawv twb raug tej xwm txheej me me xwb.
Tiam sis, neeg feem coob muaj tej teeb meem zoo li no uas loj heev. Lawv tsis txawj pom qhov yog los sis lawv xav pauv qhov tseeb. Tsis tas li ntawd, niaj hnub nim no muaj tej yam uas neeg txhob txwm tau tsim kom coj peb mus deb ntawm qhov tseeb. Tej kev dag ntxias no yeej tsis yog kev pom yuam kev xwb thiab muaj tej xwm txheej uas yeej phem heev.
Dab Ntxwg Nyoog, leej txiv ntawm kev dag thiab tus ntxias neeg, xav kom peb ua xyem xyav txog tej yam tseeb thiab tso qhov tseeb mus ib txhis tseg los sis muab pauv rau tej yam uas ntxim nyiam. “Nws ua rog nrog Vajtswv haiv neeg ntseeg” thiab nws twb tau siv ntau txhiab xyoo tsim tom txwv thiab xyaum kom txawj yaum tag nrho Vajtswv cov me nyuam ntseeg tias kev zoo yog kev phem thiab kev phem yog kev zoo.
Nws txawj ntxias tib neeg hais tias cov puam sem yog cov me nyuam miv xwb los sis, yog tsuas pleev xim rau xwb, ces hloov tau ib tug aub dub los ua ib tug aub dawb uas muaj teev dub!
Cia peb kawm ib zaj uas qhia txog lub ntsiab cai no nyob hauv vaj lug kub thaum tus Tswv tus yaj saub Mauxes tau kawm txog qhov teeb meem no. “Vajtswv muab Mauxes coj mus rau puag saum ib lub roob siab siab, … nws pom Vajtswv tim ntsej tim muag, thiab nws hais lus nrog Vajtswv.” Vajtswv tau qhia Mauxes txog nws keeb kwm mus ib txhis. Txawm Mauxes yog ib tug neeg xwb thiab nws tsis zoo tag nrho, Vajtswv qhia tias Mauxes “muaj yam ntxwv zoo li kuv Tib Leeg Tub; thiab kuv Tib Leeg Tub … yuav yog tus Cawm Seej.”
Mauxes, tau ua yog toog tau pom Vajtswv, thiab nws kuj tau kawm ib yam tseem ceeb txog nws tus kheej: nws yeej yog Vajtswv ib tug tub.
Cia li mloog zoo seb muaj dab tsi thaum xaus kev ua yog toog ntawd. “Thiab tau muaj tias … Dab Ntxwg Nyoog los ntxias nws,” hais tias, “Neeg leej tub Mauxes, teev tiam kuv!”” Mauxes ua siab loj teb hais tias: “Koj yog leej twg? Vim saib seb, kuv yog Vajtswv ib tug tub, uas muaj yam ntxwv zoo li nws Tib Leeg Tub; thiab koj lub yeeb koob nyob qhov twg, es thiaj tsim nyog kuv teev tiam koj?”
Los yog Mauxes hais tias: “Koj tsis muaj peev xwm ntxias kuv, vim kuv paub kuv yog leej twg. Vajtswv tau tsim kuv raws li Nws tus yam ntxwv. Koj tsis muaj Nws txoj kev kaj thiab lub yeeb koob. Yog li ntawd vim li cas kuv yuav tsum teev tiam koj los sis raug koj tej kev ntxias?”
Cia li tsom ntsoov seb Mauxes hais li cas ntxiv. Nws hais tias, “Koj cia li khiav mus, Dab Ntxwg Nyoog; tsis txhob dag ntxias kuv.”
Muaj ntau yam uas peb kawm tau los ntawm Mauxes tej lus kom tawm tsam tus yeeb ncuab tej lus ntxias. Kuv caw nej teb ib yam li ntawd thaum nej raug kev dag ntxias. Cia li txib nej tus yeeb ncuab hais tias: “Khiav mus! Koj yeej tsis muaj yeeb koob. Tsis txhob ntxias los sis dag kuv! Vim kuv paub kuv yog Vajtswv ib tug me nyuam. Thiab kuv yeej yuav hu kuv tus Vajtswv kom Nws pab kuv.”
Tiam sis tus yeeb ncuab yeej tsis tso tseg nws txoj kev ntxias thiab kev saib tsis taus peb. Nws yeej tsis tau ua li ntawd thaum nws hais lus rau Maxues, vim nws xav kom Mauxes tsis nco qab tias nws yog ib tug neeg uas nyob mus ib txhis.
Zoo li nws yog ib tug me nyuam uas tsias, “Dab Ntxwg Nyoog qw ib lub suab nrov, thiab tsawm thaj av, thiab txib, hais tias: Kuv yog Tib Leeg Tub, cia li teev tiam kuv.”
Cia peb rov xyuas dua. Nej puas tau hnov nws hais li cas? “Kuv yog Tib Leeg Tub. Teev tiam kuv!”
Zoo li tus uas txawj dag hais tias, “Tsis txhob txhawj, kuv yuav tsis hem koj—kuv tsis yog ib tug puam sem; kuv yog ib tug me nyuam miv dub uas muaj txaij dawb.”
Ces Mauxes tau thov Vajtswv thiab tau txais dag zog los ntawm Nws. Txawm tus yeeb ncuab tshee hnyo thiab cov av deeg daws, Mauxes tsis tau ywj. Nws hais lus meej thiab tseeb. Nws hais tias, “Khiav ntawm kuv mus, Dab Ntxwg Nyoog, vim yog tib tug Vajtswv no xwb uas kuv yuav teev tiam, yog tus Vajtswv uas muaj yeeb koob.”
Thaum kawg, “Dab Ntxwg Nyoog … khiav … kiag ntawm Mauxes xub ntiag mus.”
Tom qab tus Tswv tau tshwm sim thiab foom koob hmoov rau Mauxes vim nws mloog lus, tus Tswv hais tias:
“Koj tau koob hmoov, Mauxes, vim … yuav ua kom koj muaj zog dua cov dej hiav txwv. …
“Thiab xyuas seb, kuv twb nyob nrog koj, kom mus kawg koj lub neej.”
Mauxes txoj kev tiv taus tus yeeb ncuab yeej yog yam ntxwv zoo rau peb txhua tus, tsis hais peb laus los hluas los yog. Yeej yog ib zaj uas muaj hwj chim rau nej—kom nej paub ua li cas thaum nws sim ntxias nej. Vim nej, zoo li Mauxes, tau koob hmoov txais ib lub txiaj ntsim pab los saum ntuj los.
Cov Lus Txib thiab Cov Koob Hmoov
Nej yuav ua li cas kom nrhiav tau kev pab saum ntuj, zoo li Mauxes, thiab tsis txhob raug dag los sis raug kev ntxias? Tau qhia meej tias yuav txais Vajtswv txoj kev pab li cas nyob hauv lub caij nyoog no thaum tus Tswv tau tshaj tawm tias: “Yog li ntawd, kuv uas yog tus Tswv, vim kuv paub tej kev puas tsuaj uas yuav los rau cov neeg hauv lub ntiaj teb, kuv thiaj hu kuv tus tub qhe Yauxej Xamiv, tus Hluas, thiab hais lus saum ntuj ceeb tsheej los rau nws, thiab muab tej lus txib rau nws.” Los yog hais tias, tej zaum peb hais tias tus Tswv, uas “paub qhov kawg txij thaum chiv keeb los,” yeej paub tej yam nyuaj hauv peb lub caij nyoog. Yog li ntawd, Nws twb tau npaj ib txoj kev rau peb tiv taus tej teeb meem thiab kev ntxias, feem ntau yog los ntawm tus yeeb ncuab txoj kev tawm tsam dag ntxias peb.
Txoj kev no yeej yooj yim to taub. Los ntawm Nws cov tub qhe, Vajtswv hais lus rau peb, Nws cov me nyuam, thiab muab lus txib rau peb. Peb hloov tau tej nqe uas kuv nyuam qhuav hais li no tias, “Kuv, tus Tswv, … hu kuv tus tub qhe [Thawj Tswj Hwm Russell M. Nelson], thiab hais lus saum ntuj ceeb tsheej los rau nws, thiab muab tej lus txib rau nws.” Qhov ntawd puas yog qhov tseeb zoo tiag?
Kuv ua tim khawv tias tus Tswv twb hais lus rau Yauxej Xamiv tiag tiag, pib thaum muaj nws Thawj Zaug Ua Yog Toog. Nws kuj hais lus rau Thawj Tswj Hwm Nelson hauv peb lub caij nyoog. Kuv ua tim khawv tias Vajtswv tau sib koom nrog cov yaj saub thaum ub thiab tau muab cov lus txib rau lawv uas yuav pab coj Nws cov me nyuam muaj kev zoo siab hauv lub neej no thiab txais lub yeeb koob hauv lub neej tom ntej.
Vajtswv tseem muab lus txib rau peb tus yaj saub niaj hnub nim no. Muaj tej yam ntxwv ntau heev—kev qhia txoj moo zoo hauv tsev uas lub Koom Txoos txhawb nqa; pauv kev qhia tom tsev thiab kev mus saib xyuas tom tsev nrog kev txhawb pab; kev hloov tej txheej txheem thiab cov kab ke ntawm lub tuam tsev; thiab lub txheej xwm tshiab rau cov Me Nyuam thiab cov Tub Hluas Ntxhais Hluas. Kuv xav tsis thoob thaum kuv xav txog txoj kev zoo thiab txoj kev khuv leej ntawm Leej Txiv Saum Ntuj Ceeb Tsheej thiab Nws Leej Tub, tus uas tau muab Nws lub Koom Txoos txum tim rov qab los thiab hu ib tug yaj saub hauv peb lub caij nyoog. Qhov uas tau muab Yexus Khetos txoj moo zoo Txum Tim Rov Qab Los yeej pab tau peb nyob hauv lub caij nyoog uas muaj tej yam txaus ntshai vim yog lub caij nyoog uas muaj txhij txhua.
Kev Phem Yeej Ib Txwm Tsis Yog Kev Zoo Siab
Kev ua raws li cov lus txib uas tau muab rau peb tus yaj saub yeej tseem ceeb kom tsis txhob raug tus yeeb ncuab tej kev ntxias tiam sis qhov no kuj tseem ceeb rau peb kom txais tau kev xyiv fab thiab kev zoo siab uas kav ib txhis. Vajtswv tus txheej txheem yeej tsis nyuaj to taub: kev ncaj ncees, los sis kev ua raws li cov lus txib, ua rau yus txais tau cov koob hmoov, thiab cov koob hmoov ua rau peb muaj kev zoo siab, los sis kev xyiv fab, hauv peb lub neej.
Tiam sis, ib yam li tus yeeb ncuab sim ntxias Mauxes, nws xav ntxias nej. Nws ib txwm tau ua txuj tias nws yog ib tug uas nws tsis yog. Nws sim zais nws tus kheej txhua lub sij hawm. Nws hais tias kev mloog lus yuav ua rau nej nyuaj siab thiab yuav ua rau nej tsis zoo siab hlo li.
Nej puas muaj peev xwm xav txog nws tej tom txwv ntxias nej? Piv txwv hais tias, nws muab tej xwm txheej los ntawm kev noj tshuaj phem thiab kev haus cawv zais cia thiab hais tias tej ntawd yuav ua rau nej zoo siab. Nws ua kom peb pheej koom tes ua tej yam phem nyob hauv social media, xws li kev muab peb tus kheej piv rau lwm tus thiab kev saib lwm tus zoo li lawv zoo dua li peb. Tsis tas li ntawd, nws pov hwm lwm yam phem nyob online, xws li kev saib duab liab qab, kev tawm tsam lwm tus li cyberbullying, thiab kev qhia xov xwm tsis yog kom tib neeg ua xyem xyav thiab ntshai hauv peb lub siab. Nws ntxhi lus hais tias, “Coj raws li kuv xwb, thiab nej yeej yuav zoo siab.”
Tej lus uas ib tug yaj saub hauv Phau Ntawv Maumoos tau sau thaum ub yeej muaj nqis rau peb hauv lub caij nyoog no: “Kev phem yeej ib txwm tsis yog kev zoo siab.” Thov kom peb yuav pom tau Dab Ntxwg Nyoog tej kev ntxias yog dab tsi tiag tiag. Thov kom peb yuav tiv taus thiab paub tej kev ntxias thiab tej lub hwj huam ntawm tus uas xav ua rau peb cov ntsuj plig puas tsuaj thiab nyiag peb txoj kev xyiv fab tam sim no thiab lub yeeb koob yav tom ntej.
Kuv cov kwv tij thiab cov muam, peb yuav tsum rau siab ntseeg thiab saib xyuas zoo zoo, vim yog tib txoj kev ntawd xwb kom peb paub qhov tseeb thiab hnov tau tus Tswv lub suab los ntawm Nws cov tub qhe. “Vim tus Ntsuj Plig hais qhov tseeb thiab tsis dag. … Tau muab tej yam no ua tshwm sim los rau peb paub tseeb, rau peb tej ntsuj plig txoj kev cawm seej. … Vim Vajtswv kuj tau hais tej yam no rau cov yaj saub thaum ub thiab.” Peb yog Vajtswv tus uas Muaj Hwj Chim Tag Nrho Haiv Neeg Ntseeg, Ixayees txoj kev cia siab! Peb yuav poob los? “Puas kam tso tus nqaj hlau mus? Los? … Mloog Vajtswv lus, kawg siab kawg ntsws, peb yeej yuav ntseeg thiab tso siab plhuav mus.”
Kuv ua tim khawv txog Ixayees tus Dawb Huv—Yexus Khetos. Kuv ua tim khawv txog nws txoj kev hlub, qhov tseeb, thiab kev xyiv fab uas los ntawm Nws txoj kev txi theej txhoj uas nyob mus ib txhis li. Thaum peb ua raws li Nws cov lus txib, Nws yeej yuav coj peb mus raws txoj kev yog thiab peb yuav tsis raug ntxias. Los ntawm peb tus Cawm Seej lub npe dawb ceev, amees.