Kev Paub, Kev Hlub, thiab Kev Loj Hlob
Thov kom peb txhua tus yuav to taub peb txoj hauj lwm txhawb pab peb thiaj yuav hloov los ua neeg zoo li Nws.
Xyoo 2016 lub Tsev Kheej Pawg Hu Nkauj ntawm Tshav Tuam Tsev tau tuaj rau lub teb chaws Netherlands thiab Belgium. Vim kuv koom tes pab thaum lub sij hawm ntawd, kuv tau muaj cib fim mloog lawv hu nkauj ob zaug.
Thaum lawv hu nkauj kuv xav txog qhov uas yuav tsum ua li cas kom pab ib pawg hu nkauj loj li ntawd mus rau ub rau no. Kuv xav txog qhov uas yuav tsum siv nyiaj ntau kom xa lub nruas hlaus mus li no, tiam sis lub xem xauv, lub raj hlau, los sis lwm yam twj paj nruas los yooj yim nqa tau. Tiam sis thaum kuv xav txog pes tsawg zaus uas lawv siv lub nruas hlau no, tsuas ntaus ob peb zaug xwb, tiam sis lwm yam twj paj nruas me zog los lawv twb siv ntau zaus. Ua rau kuv xav tias yog tsis muaj lub nruas hlau nrov ces tej zaum yuav tsis zoo mloog yog li ntawd lawv twb siv zog muab lub nruas hlau loj no xa mus hla dej hiav txwv.
Tej lub sij hawm ntshe peb xav tias peb zoo li lub nruas hlau ntawd, peb tsuas zoo txaus ua ib txoj hauj lwm me me xwb. Tiam sis cia kuv qhia nej tias nej lub suab nrov los yeej tseem ceeb heev.
Peb xav tau txhua hom twj paj nruas. Peb ib txhia txawj kawm yooj yim thiab ua zoo hauv tsev kawm ntawv, es lwm tus txawj kos duab thiab hu nkauj. Ib txhia txawj tsim tej yam thiab lwm tus txawj tu, pov hwm, thiab qhia lwm tus. Yuav tsum muaj txhua tus kom muaj tej yam uas sib txawv thiab muaj ib lub ntsiab hauv lub neej no.
Rau cov uas xav tias lawv tsis pab dab tsi los sis ntseeg tias lawv tsis tseem ceeb rau leej twg, thiab cov uas xav tias lawv yog cov zoo tshaj plaws, thiab leej twg nyob nruab nrab ob pawg no, los kuv xav hais lus rau nej txhua tus.
Txawm nej nyob qhov twg ntawm txoj kev no los, tej zaum muaj ib txhia xav tias nej ris nra hnyav dhau nej thiaj li xav tias nej yuav tsis taug txoj kev ntawd. Kuv xav caw nej tawm hauv kev tsaus ntuj los rau txoj kev kaj. Txoj kev kaj ntawm txoj moo zoo yuav uas rau nej sov so thiab txais kev kho mob uas yuav pab nej to taub tias nej yog leej twg tiag tiag thiab nej lub hom phiaj hauv lub neej no yog dab tsi.
Peb ib txhia ua loj leeb hauv tej kev uas txwv tsis pub mus vim peb sim nrhiav kev zoo siab nyob ntawd.
Ib Leej Txiv Saum Ntuj Ceeb Tsheej uas hlub peb caw peb taug txoj kev ua thwj tim thiab rov qab los cuag Nws. Nws hlub peb nrog ib txoj kev hlub uas zoo tag nrho.
Txoj kev twg yog txoj kev yog? Txoj kev yog yeej yog kom ib leeg pab ib leeg to taub peb yog leej twg los ntawm txoj kev txhawb pab lwm tus.
Kuv xav tias kev txhawb pab yog txoj kev hlub neeg txawm lawv ua li cas los. Thaum peb ua li ntawd peb npaj chaw rau tus uas pub thiab tus uas txais kev pab xav hloov siab lees txim. Los yog hais tias, peb tig mus thiab txav los ze thiab hloov los ua zoo li peb tus Cawm Seej Yexus Khetos.
Piv txwv hais tias, peb tsis tas pheej qhia peb tus khub los sis cov me nyuam hais tias lawv ua tau li cas kom ua zoo dua; lawv twb paub lawm. Yog peb muaj kev hlub li no ces lawv yuav xav hloov lawv lub neej thiab hloov los ua neeg zoo dua.
Yog ua li no ces kev hloov siab lees txim yog ib tug txheej txheem hloov ua neeg zoo dua txhua hnub es tej zaum peb yuav tsum thov txim thaum peb ua tsis zoo. Kuv tseem nco qab thiab raug tej xwm txheej thaum kuv txiav txim sai dhau los sis kuv tsis mloog zoo. Thaum hnub ntawd tas lawm thaum kuv thov Vajtswv, kuv hnov Vajtswv tej lus ntuas kom kuv hloov siab lees txim thiab ua neeg zoo dua. Kev hlub uas kuv niam kuv txiv, kuv cov kwv tij thiab cov muam, thiab kev hlub uas kuv tus poj niam, me nyuam thiab cov phooj ywg muaj yeej pab kuv ua neeg zoo dua.
Peb txhua tus paub tej yam uas peb ua tau zoo dua. Peb tsis tas qhia lwm tus tas zog txog tej ntawd, tiam sis peb yuav tsum hlub thiab txhawb pab lwm tus thiaj ua rau lawv txaus siab xav hloov lawv tus kheej.
Yog muaj li no ces peb kawm tau peb yog leej twg tiag tiag thiab peb yuav muaj lub luag hauj lwm dab tsi hauv hnub nyoog kawg ua ntej tus Cawm Seej txoj Kev Los Zaum Ob.
Yog tias nej xav paub nej yuav ua txoj hauj lwm twg, kuv xav caw nej nrhiav ib qho chaw rau nej nyob ib leeg thiab thov Leej Txiv Saum Ntuj Ceeb Tsheej qhia nej paub tias nej yuav ua txoj hauj lwm twg. Nyaj cov lus teb yuav los zuj zus thiab yuav meej thaum peb taug raws nraim txoj kev ntawm kev khi lus thiab kev txhawb pab.
Peb yeej raug tej yam nyuaj zoo li Yauxej Xamiv raug thaum muaj neeg sib cav sib ceg thiab muaj tej kev xav nrov nroo ntws. Zoo li peb nyeem hauv nws zaj lus, nws pheej hais rau nws tus kheej tias: “Yuav ua li cas? Tag nrho tej pab no pab twg thiaj yog; los sis, lawv sawv daws puav leej yuam kev? Yog hais tias ib pab ntawm cov ntawd yog, ua li yog pab twg, thiab yuav ua cas kuv thiaj paub?”
Los ntawm kev txawj ntse uas nws nrhiav tau hauv Yakaunpaus tsab Ntawv, uas hais tias “Yog nej leej twg tsis muaj tswv yim, kom nws cia li thov ntawm Vajtswv, Vajtswv yuav pub tswv yim rau nws, rau qhov Vajtswv yog tus muaj siab dawb siab zoo pub ib puas tsav yam rau sawv daws, nws tsis khuv xim li,” Yauxej twb txiav txim siab tias nws yuav “thov Vajtswv.”
Peb nyeem hais tias yog thawj zaug hauv nws lub neej uas nws tau sim ua li ntawd, vim txawm nws txhawj txog ntau yam los, nws tseem tsis tau thov nrov.
Yog peb thov tus uas tau Tsim peb yam li peb tsis tau thov dua ces yeej yuav zoo li no.
Vim Yauxej ua li ntawd, Leej Txiv Saum Ntuj Ceeb Tsheej thiab Nws Leej Tub, Yexus Khetos, tau tshwm sim rau nws, hu nws lub npe, thiab yog li ntawd peb haj yam to taub peb yog leej twg thiab peb muaj nqis tiag tiag.
Peb kuj nyeem hais tias thaum nws tseem hluas Yauxej raug tsim txom los ntawm cov uas nws xav tias yog nws phooj ywg thiab cov uas tsim nyog yuav ua siab zoo rau nws. Yog li ntawd thaum peb ua neej li cov thwj tim, peb yuav tsum xav tias peb yuav tsum paub tias yuav muaj cov neeg uas xav tawm tsam peb.
Yog tias tam sim no nej xav tias nej koom tsis tau nrog pawg qoj nkauj thiab txoj kev hloov siab lees txim yog ib txoj kev nyuaj rau nej, thov kom nej paub tias yog peb siv zog mus tom ntej ces lub nra uas peb ris yuav raug muab tshem ntawm peb xub pwg mus thiab peb yuav rov qab pom txoj kev kaj. Leej Txiv Saum Ntuj Ceeb Tsheej yeej yuav tsis tso peb tseg thaum peb thov Nws. Peb yuav vau thiab rov qab sawv thiab Nws yuav pab peb plhws cov av ntawm peb hauv caug.
Peb ib txhia raug mob, tiam sis tus Tswv pob khoom pab zoo mob yeej muaj tej ntaub qhwv mob loj txaus qhwv tag nrho peb cov nqaij uas raug mob.
Yog li ntawd yeej yog txoj kev hlub ntawd, txoj kev hlub uas peb hu ua kev siab hlub los yog Khetos txoj kev hlub dawb paug, uas peb yuav tsum muaj hauv peb tsev, qhov chaw uas peb cov niam tsev txiv tsev txhawb pab lawv cov me nyuam thiab cov me nyuam txhawb pab lawv niam lawv txiv. Los ntawm txoj kev hlub ntawd, lawv yuav hloov siab thiab xav ua raws li Nws lub siab nyiam.
Yeej yog txoj kev hlub ntawd uas yuav pab Leej Txiv Saum Ntuj Ceeb Tsheej cov me nyuam thiab cov mej zeej ntawm Nws lub Koom Txoos sib koom nrog txhua twj paj nruas hauv pawg qoj nkauj peb thiaj li yuav txawj hu nkauj nrog cov tim tswv uas hu nkauj thaum tus Cawm Seej rov qab los.
Yog txoj kev hlub ntawd, txoj kev kaj uas yuav tsum ci ntsa iab rau txhua yam nyob ib puag ncig thaum peb ua neej niaj hnub. Tib nee yuav pom txoj kev kaj ntawd thiab yuav xav los. Nov yog cov tub txib txoj hauj lwm uas yuav ua rau lwm tus xav “los thiab saib, los thiab pab, thiab los thiab nyob.” Thov nej, thaum peb paub tias txoj hauj lwm tseem ceeb no muaj tseeb thiab peb paub peb txoj hauj lwm, thov kom peb xyiv fab ua ke nrog peb tus yaj saub Yauxej Xamiv, uas nws hais tias, “Vim kuv tau ua yog toog pom; kuv twb paub, thiab kuv paub hais tias Vajtswv twb paub, thiab kuv xyeej tsis tau.”
Kuv ua tim khawv rau nej tias kuv paub kuv yog leej twg, thiab kuv paub tias nej yog leej twg thiab. Peb txhua tus yog Leej Txiv Saum Ntuj Ceeb Tsheej cov me nyuam thiab Nws hlub peb. Thiab Nws tsis tau txib peb los nyob no kom peb poob mus tiam sis Nws xav kom peb rov qab mus cuag Nws. Kuv thov kom peb txhua tus yuav to taub peb txoj hauj lwm txhawb pab peb thiaj yuav hloov los ua neeg zoo li Nws thaum tus Cawm Seej rov qab los, los ntawm Yexus Khetos lub npe, amees.