Cov Poj Niam Khi Lus uas Koom Tes Nrog Vajtswv
Kev hloov los ua cov poj niam khi lus uas koom tes nrog Vajtswv yeej yog txoj kev uas Vajtswv cov ntxhais zoo tau ua niam tsev, ua thawj coj, thiab tau txhawb pab lwm tus.
Kuv zoo siab uas kuv tau koob hmoov hais lus rau nej, Vajtswv cov ntxhais khi lus. Hmo no, kuv lub hom phiaj yog kom txhawb nqa nej thaum nej ua txoj hauj lwm tseem ceeb uas Vajtswv hu nej ua. Vajtswv txhua tus ntxhais uas mloog kuv lub suab twb tau txais tus Tswv Yexus Khetos txoj kev hu.
Tau hu nej thaum nej los nyob hauv lub ntiaj teb no, hauv ib qhov chaw thiab ib lub sij hawm uas Vajtswv, tus uas paub nej zoo tag nrho thiab hlub nej vim nej yog Nws cov ntxhais, tau xaiv rau nej. Nyob hauv lub ntuj ntsuj plig ua ntej, Nws tau paub nej thiab qhia nej thiab tso nej hauv ib qho chaw kom nej muaj cib fim txais kev caw los nkag rau hauv ib lub dab ua kev cai raus dej. Nyob ntawd nej twb hnov tej lus uas Yexus Khetos ib tug tub qhe tau hais tias: “Tau muab cai rau kuv los ntawm Yexus Khetos, kuv muab koj ua kev cai raus dej nyob ntawm Leej Txiv, thiab ntawm Leej Tub, thiab ntawm tus Vaj Ntsuj Plig Dawb Huv lub npe. Amees.”
Thaum nej tawm hauv dej los, ces nej txais tau lwm txoj kev hu nej ua hauj lwm pab lwm tus. Vim nej yog Vajtswv cov ntxhais khi lus, nej tau cog lus thiab txais kev txib nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, lub koom txoos uas nej tau los ua mej zeej haud. Nej tau khi lus nrog Vajtswv tias nej yuav ris Yexus Khetos lub npe, coj raws li Nws tej lus txib, thiab ua hauj lwm rau Nws.
Tus uas ua tej kev khi lus no, ces txoj hauj lwm uas tus Tswv hu nws kom ua yeej yog txoj hauj lwm zoo tshaj plaws rau tus neeg ntawd ua. Tiam sis Vajtswv cov ntxhais thiab cov tub khi lus txhua tus muaj ib txoj kev hu tseem ceeb thiab xyiv fab zoo ib yam. Yog txoj kev hu sawv Nws cev pab lwm tus.
Thawj Tswj Hwm Russell M. Nelson tau hais lus rau cov poj niam txog lub ntsiab ntawm tus Tswv txoj kev hu kom nej koom tes nrog Nws ua Nws txoj hauj lwm. Thawj Tswj Hwm Nelson piav txog nej txoj kev hu li no hais tias: “Tus Tswv hais tias, ‘Kuv txoj hauj lwm thiab kuv lub yeeb koob [yog] ua kom tib neeg tsis txawj tuag thiab tau txoj sia nyob mus ib txhis.’ (Mauxes 1:39.) Yog li ntawd Nws cov ntxhais uas yog Nws cov thwj tim thiaj li hais tau tias, ‘Kuv txoj hauj lwm thiab kuv lub yeeb koob yog kom pab cov uas kuv hlub ua raws li lub hom phiaj ntawd.’
“Tus poj niam lub luag hauj lwm ib feem yog kom pab lwm tus neeg hloov ua ib tug neeg xilethi-aus. Nws yog ib tug niam tsev, ib tug xib hwb, los sis ib tug neeg ntseeg saib xyuas es nws pab tib neeg raws li nws txoj kev cia siab zoo li nws puab av nplaum. Nws koom tes nrog Vajtswv ua li nws ntiag tug hauj lwm pab tib neeg ua neej thiab txhawb nqa lawv. Nov yog vim li cas tau tsim nws. Txoj hauj lwm no yeej ua rau nws ua neeg zoo thiab txais kev tsa nto.”
Nej yeej tsis paub thaum twg, thiab tsis paub yuav ua ntev li cas, thaum nej ntiag tug hauj lwm kom pab lwm tus thaum nej ua ib tug niam tsev, tus thawj coj, los sis tus viv ncaus uas txhawb pab. Vim tus Tswv hlub peb, nws thiaj li tsis pub peb xaiv thaum twg, los sis xaiv tias peb yuav ua kev txib li no ntev li cas. Tiam sis nej paub los ntawm cov vaj lug kub thiab cov yaj saub tej lus hais tias tej kev txib no yuav los rau Vajtswv txhua tus ntxhais, nyob hauv lub neej no los sis lub neej tom qab. Thiab tag nrho tej no yog kom npaj nyob mus ib txhis nrog tej tsev neeg uas sib hlub—lub txiaj ntsim zoo tshaj plaws uas Vajtswv pub rau peb.
Nej yeej yuav muaj tswv yim yog nej xav txog qhov kawg npaj siab tam sim no. Qhov no yooj yim dua vim txoj kev npaj ua txhua txoj kev txib no yeej yuav luag zoo ib yam.
Cia peb xav txog kev txib ua ib tug viv ncaus uas txhawb pab. Txawm nej yog ib tug ntxhais uas muaj 10 xyoo hauv ib tsev neeg uas leej txiv tau tso lub ntiaj teb no tseg lawm, los yog Koom Haum Niam Tsev tus thawj tswj hwm uas nyob hauv ib lub zos uas kub hnyiab, los sis nej nyob hauv ib lub tsev kho mob tom qab phais mob tas lawm—txhua tus yeej muaj cib fim ua raws li tus Tswv txoj kev hu nej ua Nws cov ntxhais uas txhawb pab.
Txoj kev txib mus txhawb pab no zoo li nyias txawv nyias. Tiam sis txhua txoj kev txib no los yuav tsum npaj muaj ib lub siab uas muaj hwj chim thiab txawj hlub, yuav tsum tsis txhob ntshai muaj kev ntseeg tias tus Tswv tsis txib yus ua dab tsi tsuas yog Nws npaj ib txoj kev, thiab yus yuav tsum xav mus thiab ua hauj lwm rau Nws.
Vim nws tau npaj siab, tus ntxhais uas muaj 10 xyoo puag nws niam uas yog ib tug poj ntsuam lawm thiab thov Vajtswv kom paub pab nws tsev neeg. Thiab nws yeej meem thov Vajtswv.
Koom Haum Niam Tsev tus thawj tswj hwm tau npaj siab mus txhawb pab uas ntej nws cheeb tsam raug kub hnyiab. Nws twb paub thiab hlub cov neeg nyob ntawd. Nws txoj kev ntseeg Yexus Khetos tau loj tuaj vim nws txais tej lus teb thaum nws thov tus Tswv pab nws thaum nws ua tej hauj lwm me me rau Nws pab lwm tus. Vim nws tau npaj ntev lawm, nws twb npaj siab thiab xav coj nws cov viv ncaus mus txhawb pab cov neeg thiab tsev neeg uas nyuaj siab txhawj xeeb.
Ib tug muam uas nyob hauv lub tsev kho mob tom qab phais mob tas lawm twb npaj mus txhawb pab cov neeg uas nrog nws nyob hauv lub tsev kho mob ntawd. Nws twb tau siv tas nws lub neej sawv tus Tswv cev txhawb pab txhua leej txhua tus uas nws tsis paub zoo ib yam li lawv yog nws cov neeg zej zog thiab phooj ywg. Thaum nws xav hauv nws lub siab tias nws yuav tsum mus txhawb pab lwm tus hauv tsev kho mob, nws ua siab loj thiab hlub lwm tus neeg mob heev lawv thiaj li cia siab tias nws txoj kev kho mob yuav siv sij hawm ntev zog.
Zoo ib yam li nej npaj siab mus txhawb pab, nej yuav tsum npaj siab txais kev hu ua tus Tswv tus thawj coj thaum txog sij hawm ua li ntawd. Nej yuav tsum muaj kev ntseeg Yexus Khetos, uas los ntawm nej txoj kev nyiam cov vaj lug kub yog nej xav coj tib neeg thiab tsis txhob ntshai qhia Nws txoj lus. Ces nej yuav npaj saib muaj tus Vaj Ntsuj Plig Dawb Huv nrog nraim nej nyob. Nej yuav zoo siab hais tias “Kuv mam li qhia,” thaum tus pab cuam hauv Koom Haum Ntxhais Hluas pawg thawj tswj hwm txhawj heev hais tias, “Viv Ncaus Alvarez mob hnub no. Leej twg kam qhia nws hoob?”
Nej yeej yuav npaj siab zoo ib yam li no thaum txog hnub uas tus Tswv hu nej ua ib tug niam tsev. Tiam sis nej yuav tsum muaj ib lub siab hlub lwm tus tshaj qhov uas yuav tsum muaj thaum yav tas los. Yuav tsum muaj kev ntseeg Yexus Khetos hauv nej lub siab ntau tshaj yav tas los. Thiab nej yuav tsum muaj siab xav thov Vajtswv kom txais tau tus Vaj Ntsuj Plig Dawb Huv lub hwj huam, txoj kev coj, thiab kev nplij siab ntau tshaj qhov nej xav tias nej ua tau.
Tej zaum nej xav paub seb puas muaj ib tug txiv neej twg uas paub cov niam tsev xav tau dab tsi. Yeej yog lus nug zoo. Cov txiv neej tsis paub txhua yam, tiam sis peb kawm tau tej yam los ntawm tej kev tshwm sim ntawm Vajtswv. Thiab peb kuj kawm tau ntau yam los ntawm tej yam peb pom tau, thaum peb nrhiav kev muaj tus Ntsuj Plig pab peb to taub tej yam uas peb pom.
Kuv twb saib Kathleen Johnson Eyring tau 57 xyoos uas wb sib yuav lawm. Nws yog leej niam ntawm plaub tug tub thiab ob tug ntxhais. Txog lub sij hawm no, nws twb lees txoj kev hu ua ib tug niam tsev rau ib puas tawm tus neeg hauv wb tsev neeg thiab neeg coob ntxiv uas nws muaj siab pab zoo li ib tug niam tsev.
Nej nco qab txog Thawj Tswj Hwm Nelson tej lus piav txog ib tug poj niam ntiag tug hauj lwm—tsis hais nws ntiag tug hauj lwm ua ib tug niam tsev: “Nws yog ib tug niam tsev, ib tug xib hwb, los sis ib tug Neeg Ntseeg saib xyuas es nws pab tib neeg raws li nws txoj kev cia siab.” Nws koom tes nrog Vajtswv ua li nws ntiag tug hauj lwm pab tib neeg ua neej thiab txhawb nqa lawv. Nov yog vim li cas tau tsim nws.”
Raws li kuv pom tau, kuv tus poj niam, Kathleen, tau ua raws li kev txib ntawd, uas Leej Txiv tau muab rau Nws cov ntxhais. Kuv xav tias qhov tseem ceeb yog cov lus no “nws pab tib neeg raws li nws txoj kev cia siab zoo li nws puab av nplaum … koom tes nrog Vajtswv.” Nws tsis tau yuam. Nws puab av. Muaj ib tug txheej txheem uas nws cia siab rau thiab nws siv thaum nws sim pab cov uas nws hlub thiab cov uas nws ua niam rau. Tus txheej txheem ntawd yog Yexus Khetos txoj moo zoo—ib yam li kuv twb saib tau ntau xyoo lawm.
Kev hloov los ua cov poj niam khi lus uas koom tes nrog Vajtswv yeej yog txoj kev uas Vajtswv cov ntxhais zoo tau ua niam tsev, ua thawj coj, thiab tau txhawb pab lwm tus, ua hauj lwm pab nyob qhov twg uas Vajtswv tau npaj rau lawv. Kuv cog lus rau nej tias nej yuav muaj kev xyiv fab thaum nej tab tom rov qab mus rau nej lub tsev saum ntsuj ceeb tsheej yog nej ua Vajtswv cov ntxhais uas ua raws li lawv tej kev khi lus rov qab mus cuag Nws.
Kuv ua tim khawv tias Vajtswv Leej Txiv muaj txoj sia nyob thiab Nws hlub nej. Nws yuav teb nej tej lus thov. Nws Leej Tub coj Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua txhua yam. Thawj Tswj Hwm Russell M. Nelson yog Nws tus yaj saub. Thiab Yauxej Xamiv pom thiab hais lus nrog Vajtswv Leej Txiv thiab Yexus Khetos nyob hauv ib koog ntoo hauv Palmyra, New York. Kuv paub tias qhov ntawd muaj tseeb. Kuv kuj ua tim khawv tias Yexus Khetos yog nej tus Cawm Seej; Nws hlub nej. Thiab los nawm Nws txoj Kev Theej Txhoj, nej yuav hloov ua neeg huv thiab Nws yuav txhawb nqa nej kom ua raws nej txoj kev hu uas dawb huv. Kuv ua tim khawv li no los ntawm Yexus Khetos lub npe dawb ceev, amees.