Kev Ua Raws Li Peb tej Lus Cog Tseg thiab tej Kev Khi Lus
Kuv caw nej xav txog tej lus cog tseg thiab tej kev khi lus ua nej tau khi rau tus Tswv, thiab lwm tus, nrog kev ncaj ncees, vim nej paub tias nej txoj lus yog kev cog lus.
Cov kwv tij thiab cov muam, thaum peb xaus tuas no, thov kom peb tso siab rau tej lus tim khawv txog tej yam tseeb ntawm Yexus Khetos txoj moo zoo. Peb tau koob hmoov vim peb muaj lub sij hawm dawb ceev no ua ke kom nco ntsoov peb txoj kev cog lus rau tus Tswv Yexus Khetos hais tias peb yog Nws cov tub qhe thiab Nws yog peb tus Cawm Seej.
Tej kev cog lus thiab kev ua raws li peb tej kev khi lus yog qhov uas kuv xav txog huav kuv nruab siab tam sim no. Puas tseem ceeb rau nej ua raws li nej hais? ua neeg uas lwm tus tso siab rau? ua li nej hais nej yuav ua? rau siab ua raws li nej tej kev khi lus? ua ib tug neeg ncaj ncees? Thaum peb ua raws li tej yam peb cog lus rau tus Tswv thiab rau lwm tus, peb ua raws li peb tej kev khi lus kom rov qab mus cuag peb Leej Txiv Saum Ntuj Ceeb Tsheej thiab peb muaj Nws txoj kev hlub hauv peb lub neej.
Peb tus Cawm Seej, Yexus Khetos, yog tus uas Coj Yam Ntxwv rau peb thaum peb cog lus thiab ua raws li peb tej kev khi lus. Nws tau los hauv lub ntiaj teb kom ua raws li Leej Txiv lub siab nyiam. Nws tau qhia txoj moo zo cov ntsiab cai los ntawm tej yam Nws hais thiab ua. Nws tau theej peb lub txhoj kom peb yuav rov qab muaj sia dua. Nws tau ua raws li Nws tej lus cog tseg tag nrho.
Peb puas txawj hais li ntawd? Peb yuav raug li cas yog peb khib lab me ntsis, ua txhaum me ntsis, los sis tsis tshua ua raws li tej yam uas peb tau cog lus lawm? Yuav ua li cas yog peb tso peb tej kev khi lus tseg? Puas muaj lwm tus uas yuav los cuag Khetos vim peb coj yam ntxwv zoo? Nej puas ua raws li nej hais? Kev ua raws li nej cog lus tsis yog kev coj yam ntxwv xwb; yeej yog ib tug cwj pwm ntawm Yexus Khetos cov thwj tim.
Vim nws paub zoo txog peb tej kev qaug zog hauv lub neej no tus Tswv cog lus tias, “Cia li zoo siab, thiab tsis txhob ntshai, vim kuv uas yog tus Tswv twb nyob nrog nej, thiab yuav sawv ntawm nej ib sab.” Kuv twb hnov Nws nyob ze thaum kuv xav tau kev nplij siab, sab txais kev tshoov siab los sis lub dag zog ntawm sab ntsuj plig, thiab kuv txo hwj chim heev thiab ua Nws tsaug rau qhov Nws nrog nraim kuv nyob.
Tus Tswv hais tias, “Txhua tus neeg uas tso nws tej kev txhaum tseg thiab los cuag kuv, thiab hu txog kuv lub npe, thiab ua raws li kuv lub suab hais, thiab ua raws li kuv tej lus txib, yuav pom kuv lub ntsej muag thiab paub hais tias muaj kuv.” Tej zaum nov yog Nws cov lus cog tseg zoo tshaj plaws.
Thaum kuv hluas kuv tau kawm tias kev ua raws li kuv hais yeej tseem ceeb. Ib lub sij hawm yog thaum kuv tau sawv thiab hais cov Scout txoj Kev Lav Lus. Peb txoj kev koom tes nrog Boy Scouts of America yeej yuav ua ib yam tseem ceeb rau kuv thiab lub Koom Txoos no, txawm tam sim no peb yuav tso tseg. Rau lub koom haum Scouting, rau cov txiv neej thiab cov poj niam coob uas tau ua hauj lwm ua cov thawj coj Scout, rau cov niam tsev—lawv yeej yog cov txaus qhuas—thiab rau cov tub hluas uas tau koom ua Scouting, peb hais rau nej, “Ua tsaug.”
Nyob hauv tuas no, peb tus yaj saub, Thawj Tswj Hwm Russell M. Nelson, thiab Txwj Laug Quentin L. Cook twb tau tshaj tawm txog tej yam uas yuav pab peb rov qab tsom ntsoov rau cov tub hluas ntxhais hluas thiab ua rau peb tej koom haum koom siab nrog kev qhov tseeb uas tau muab tshwm sim lawm. Tsis tas li natwd, hnub Sunday tas los, Thawj Tswj Hwm Nelson thiab Thawj Tswj Hwm M. Russell Ballard tau piav txog lub txheej xwm tshiab rau cov Me Nyuam thiab cov Tub Hluas Ntxhais Hluas ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg nyob thoob plaws lub Koom Txoos. Yog ib lub hom phiaj uas yuav ua thoob plaws lub ntiaj teb uas tsom ntsoov rau peb tus Tswv thiab Cawm Seej, Yexus Khetos. Thawj Pawg Thawj Tswj Hwm thiab Pawg Kaum Ob tug Thwj Tim yeej koom siab ua qhov tshiab no, thiab kuv ua tim khawv tias tus Tswv tau coj peb mus txhua lub sij hawm. Kuv zoo siab heev rau cov me nyuam thiab cov tub hluas ntxhais hluas ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg vim lawv yuav koom tes tsom ntsoov rau lawv nyob hauv tsev thiab nyob hauv lub koom txoos—los ntawm kev kawm txoj moo zoo, kev pab lwm tus thiab ua tej yam ntxim saib ntxim ua, thiab kev txhawb nqa lawv tus kheej.
Cov tub hluas ntxhais hluas lub ntsiab lus rau xyoo no, 2020, hais txog Nifais cov lus cog tseg kom “mus thiab ua.” Nws sau hais tias, “Thiab tau muaj tias kuv, Nifais, hais rau kuv txiv tias: Kuv yuav mus thiab ua tej uas tus Tswv tau txib kom ua, vim kuv paub tias tus Tswv yeej tsis muab tej lus txib rau noob neej ua ib yam dab tsi li, tsuas yog nws twb npaj ib txoj kev rau lawv xwv kom lawv yuav ua tau yam uas nws txib lawv ua.” Txawm yog tau hais ntev tas los lawm, peb cov hauv lub Koom Txoos ua raws nraim li kev cog lus ntawd hnub no.
“Mus thiab ua” txhais tias yus tsis ua raws li neeg ntiaj teb tej kev, yus txais thiab ua raws li tej kev tshwm sim, yus ua ncaj ncees nrog kev ntseeg thiab kev cia siab rau yav tom ntej, kev ua thiab ua raws li tej kev khi lus tias yus yuav coj raws li Yexus Khetos, thiab hlub Nws ntxiv zuj zus, tus uas yog tus Cawm Seej ntawm lub ntiaj teb.
Ib txoj kev khi lus yog kev cog lus ntawm peb thiab tus Tswv. Peb cov mej zeej ntawm lub Koom Txoos khi lus thaum peb ua kev cai raus dej hais tias peb yuav ris Yexus Khetos lub npe, thiab ua neej zoo li Nws. Zoo li cov uas ua kev cai raus dej hauv cov dej Maumoos, peb khi lus tias peb yuav hloov los ua Nws cov neeg, kom “ib leeg txaus siab ris ib leeg tej nra, xwv kom tej nra thiaj li sib; … nyuaj siab nrog cov uas nyuaj siab; … nplij cov uas xav tau kev nplij siab, thiab ua tim khawv txog Vajtswv txhua lub sij hawm thiab ua tim khawv txog txhua yam, thiab ua tim khawv nyob hauv txhua qhov chaw uas nej nyob.” Qhov uas peb ib leeg txhawb pab ib leeg hauv lub Koom Txoos qhia tias peb yuav ua raws li peb tau cog lus.
Thaum peb txais lub cim nco txog, peb rov qab khi lus tias peb yuav ris Nws lub npe thiab cog lus ntxiv hais tias peb yuav ua zoo dua. Tej yam peb xav thiab ua txhua hnub, tsis hais qhov loj thiab qhov me, yeej qhia txog peb txoj kev cog lus rau Nws. Nws rov qab cog lus rau peb hais tias, “Yog tias nej nco ntsoov txog kuv nej yuav muaj kuv tus Ntsuj Plig nrog nej nyob.”
Hnub no kuv nug hais tias, peb puas ua raws li peb cog lus thiab khi lus los sis peb puas lam cog lus, thiaj li yooj yim rau peb tsis ua raws li peb tau hais lawm? Thaum peb hais rau leej twg tias, “Kuv yuav thov Vajtswv rau koj,” peb puas ua li ntawd? Thaum peb cog lus tias, “Kuv yuav los pab,” peb puas ua li ntawd? Thaum peb yuav tsum them nuj nqis, peb puas ua li ntawd? Thaum peb tsa tes pom zoo txhawb nqa ib tug mej zeej ua ib txoj kev hu tshiab, peb puas ua li ntawd?
Muaj ib hmo thaum kuv hluas kuv niam nrog kuv zaum saum nws lub txaj thiab hais lus txog qhov uas kev ua raws li Txoj Lus Txawj Ntse tseem ceeb npaum li cas. Nws hais tias, “Kuv paub los ntawm lwm tus lub neej, ntau xyoo tas los, qhov uas yus tsis txawj hnov tau tus ntsuj plig los ntawm txoj kev tsis ua raws li Txoj Lus Txawj Ntse.” Nws ntsia kuv thiab kuv hnov nws tej lus tshoov kuv lub siab hais tias: “Cog lus rau kuv, Ronnie, hnub no [nws hu kuv ua Ronnie] hais tias koj yeej yuav ua raws li Txoj Lus Txawj Ntse.” Kuv tau cog lus rau nws tiag tiag, thiab kuv yeej ib txwm tau ua li kuv tau cog lus ntau xyoo tas los.
Kev cog lus ntawd tau pab kuv heev thaum kuv hluas thiab thaum kuv laus thiab ua lag luam nrog cov uas haus cawv ntau. Kuv twb txiav txim siab ua ntej hais tias kuv yuav ua raws li Vajtswv txoj kev cai, thiab kuv thiaj tsis tas xav txog qhov ntawd ntxiv. Tus Tswv tau hais tias, “Kuv, tus Tswv, yuav tsum ua raws li kuv cog lus thaum nej ua raws li kuv hais; tiam sis thaum nej tsis ua raws li kuv hais, nej tsis tau kev cog lus.” Nws hais li cas rau cov uas ua raws li Txoj Lus Txawj Ntse? Nws cog lus tias peb yuav muaj kev noj qab nyob zoo, lub dag lub zog, laj lim tswv yim, kev txawj ntse, thiab cov tim tswv yuav pov hwm peb.
Ntau xyoo tas los, Muam Rasband thiab kuv wb nyob hauv lub Tuam Tsev Salt Lake thaum wb ib tug ntxhais yuav ua kev cai sib khi. Thaum wb sawv lub tuam tsev sab nraud nrog ib tug ntxhais uas hluas dua, uas tseem tsis muaj hnub nyoog txaus saib txoj kab ke ntawd, wb hais txog qhov uas yus ua kev cai sib khi hauv Vajtswv lub tuam tsev yog ib qho tseem ceeb heev. Zoo li kuv niam tau qhia kuv yav tas los, wb tau hais rau wb tus ntxhais tias, “Wb xav kom koj ua kev cai sib khi hauv lub tuam tsev, thiab wb xav kom koj cog lus rau wb tias thaum koj nrhiav tau koj tus khub mus ib txhis, koj yuav teem sij hawm nrog nws ua kev cai sib khi hauv lub tuam tsev.” Nws tau cog lus li ntawd.
Txij thaum ntawd los nws tau hais tias peb txoj kev sib tham thaib nws cov lus cog tseg tau pov hwm nws thiab pab nws nco txog “qhov uas tseem ceeb tshaj plaws.” Nws tau ua kev khi lus dawb ceev thaum ua kev cai sib khi rau nrog nws tus txiv nyob hauv lub tuam tsev.
Thawj Tswj Hwm Nelson tau qhia tias: “Peb … txais tau tus Cawm Seej lub hwj chim ntxiv nyob hauv peb lub neej thaum peb ua kev khi lus thiab ua raws nraim li tej kev khi lus ntawd. Peb tej kev khi lus khi peb rau Nws thiab muab Vajtswv lub hwj chim rau peb.”
Thaum peb ua raws li peb tej lus cog tseg ces peb haj yam yuav xav ua raws li tej yam uas peb cog lus rau tus Tswv. Cia li nco txog tus Tswv tej lus: “Thaum uas nej tau pab kuv cov kwv tij no ib tug, txawm yog tus ntawd muaj hwj chim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag.”
Nrog kuv xav txog tej yam ntxwv ntawm kev cog lus hauv cov vaj lug kub. Amoos thiab Mauxiyas cov tub nyob hauv Phau Ntawv Maumoos tau cog lus “mus tshaj tawm Vajtswv txoj lus.” Thaum cov Neeg Lamas txhom Amoos lawv coj nws mus rau cov Neeg Lamas tus Vaj Ntxwv Lamaunais. Nws cog lus rau tus vaj ntxwv tias, “Kuv yuav ua koj tus tub qhe.” Thaum cov tub sab los nyiag tus vaj ntxwv cov yaj, Amoos txiav lawv tej caj npab. Tus vaj ntxwv xav tsis thoob, nws thiaj li mloog Amoos zaj lus txog txoj moo zoo thiab hloov siab los ntseeg.
Luv, nyob hauv Phau Qub, cog lus rau nws niam tais, “Koj mus qhov twg, kuv yeej yuav nrog koj mus qhov ntawd.” Nws tau ua raws li nws hais. Tus Neeg Xamalis zoo, nyob hauv ib zaj lus piv txwv hauv Phau Tshiab, cog lus tus tswv tsev yog nws tu tus neeg mob ntawd hais tias, “Yog koj siv tshaj ob lub nyiaj no, thaum kuv rov qab los, kuv mam li ntxiv rau koj.” Xaulas, nyob hauv Phau Ntawv Maumoos, cog lus tias nws yuav mus hauv roob moj sab qhua nrog Nifais thiab nws cov tij laug. Nifais tau hais tias, “Thaum Xaulas tau lav lus rau peb, peb thiaj tsis ntshai txog nws lawm.”
Yuav ua li cas txog tej lus cog tseg puag thaum ub uas “tau muab cog rau cov txiv yawg lawm” raws li qhia hauv vaj lug kub tias “cov me nyuam lub siab yuav tig mus rau lawv cov txiv yawg”? Nyob hauv lub neej ua ntej lub neej no peb twb xaiv Vajtswv txoj hau kev, peb ib leeg tau cog lus tias peb yuav pab muab Ixayees sau los ua ke nyob ob sab ntawm daim ntaub thaiv. Txwj Laug John A. Widtsoe piav hais tias “Peb twb sib koom tes nrog tus Tswv. Txoj hauj lwm no tsis yog Leej Txiv Saum Ntuj Ceeb Tsheej, thiab tus Cawm Seej txoj xwb tab sis yog peb txoj thiab.”
Thaum Thawj Tswj Hwm Nelson tau mus thoob plaws lub ntiaj teb nws hais tias, “Kev sib sau no yeej yog qhov tseem ceeb tshaj plaws uas muaj hauv lub ntiaj teb no. Thaum peb hais txog kev sib sau, peb tsuas hais qhov tseeb no hais tias: txhua tus ntawm Leej Txiv Saum Ntuj Ceeb Tsheej cov me nyuam, nyob ob sab ntawm daim ntaub thaiv, tsim nyog hnov txog Yexus Khetos txoj moo zoo.”
Vim kuv yog tus Tswv Yexus Khetos ib tug Thwj Tim, kuv xaus lus thaum kuv hais lus caw nej thiab cog lus rau nej. Qhov thib ib yog lus caw: Kuv caw nej xav txog tej lus cog tseg thiab tej kev khi lus ua nej tau khi rau tus Tswv, thiab lwm tus, nrog kev ncaj ncees, vim nej paub tias nej txoj lus yog kev cog lus. Qhov thib ob, kuv cog lus rau nej, thaum ua li no, tus Tswv yuav txhawb nqa nej tej lus thiab pom zoo rau tej yam nej ua thaum nej rau siab txhawb nqa nej lub neej, nej tsev neeg thiab Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Kuv cov kwv tij thiab cov muam, nws yuav nrog nej nyob, thiab nej yeej cia siab tau hais tias “Vajtswv yuav txais [nej] mus rau hauv ceeb tsheej, xwv kom [nej] thiaj yuav nrog Vajtswv nyob hauv qhov chaw uas muaj kev zoo siab tsis txawj kawg … vim tus Tswv Vajtswv tau hais li.”
Kuv ua tim khawv thiab cog lus li no los ntawm Yexus Khetos lub npe, amees.