Faj Seeb Thov Vajtswv Tsis Tu Ncua (Amas 34:39; Maulaunais 6:4; Lukas 21:36)
Peb yuav tsum ceev faj saib xyuas tsis tu tsis tseg thiaj li tsis ua neeg uas lam tau lam ua.
Kuv thov kom tus Vaj Ntsuj Plig Dawb Huv pab nej thiab kuv thaum peb zoo siab teev tiam Vajtswv ua ke.
Thaum lub Plaub Hlis Ntuj ntawm xyoo 1976, Txwj Laug Boyd K. Packer hais rau cov tub hluas ntxhais hluas ntawm lub Koom Txoos nyob hauv lub tuam rooj sab laj. Nyob hauv nws zaj lus hu ua “Cov Kheb ntawm Sab Ntsuj Plig,” nws piav txog qhov uas thaum nws nyob hauv Afikas nws pom cov kheb uas nkaum tos tom cov tsiaj uas tsis paub lawv nyob ntawd. Nws muab cov kheb piv rau Dab Ntxwg Nyoog, tus uas nkaum tos tawm tsam cov tub hluas ntxhais hluas thaum nws muab kev tuag los ntawm kev txhaum zais cia.
Kuv twb muaj 23 xyoos thaum Txwj Laug Packer hais zaj lus ntawd, thiab Susan thiab kuv wb tos wb thawj tus me nyuam yug los tshuav ob peb hnub xwb. Wb txais kev tshoov siab los ntawm nws zaj lus txog kev dim kev txhaum thiab nws txoj kev siv cov tsiaj txhua txoj kev ua tej yam kom qhia txog ib zaj lus tseem ceeb rau peb sab ntsuj plig.
Susan thiab kuv wb kuj tau raug txib mus rau Afikas teb ntau zaus. Thiab wb tau muaj cib fim pom cov tsiaj txhua zoo kawg uas nyob hauv thooj av teb chaws ntawd. Vim wb nco txog Txwj Laug Packer zaj lus hauv wb lub neej, wb tau sim saib thiab kawm tej yam los ntawm cov tsiaj txhua qus nyob hauv Afikas.
Kuv xav piav txog ob tug tsov miv cheetah tej cwj pwm thiab lub tom txwv uas Susan thiab kuv wb saib thaum nkawd nyas cov tsiaj uas nkawd xav tom thiab muab tej yam uas wb saib piv rau peb txoj kev ua raws li Yexus Khetos txoj moo zoo txhua hnub.
Cov Tsov Miv Cheetah thiab cov Mos Lwj Topi
Cov tsov miv cheetah yog cov tsiaj uas khiav ceev tshaj plaws hauv lub ntiaj teb no thiab txawj khiav ceev li 75 mais tau li ib teev (120 km/teev) Cov tsiaj zoo nkauj no los lawv tsuas siv peb chib xwb txij ntawm lub sij hawm lawv nyob twj ywm mus txog lawv khiav ceev 68 mais tau li ib teev (109 km/teev). Cov cheetah yog cov tsiaj uas txawj nyas mus ze zuj zus thiab khiav ceev tsis deb caum thiab tom lwm tus tsiaj.
Susan thiab kuv wb tau siv yuav luag ob teev saib ob tug cheetah nyas yuav tom ib pawg topi, uas yog ib hom mos lwj muaj coob tshaj hauv Afikas. Cov nyom siab thiab qhuav hauv Afikas tej tiaj nras yog xim daj thiab yuav luag npog ob tug cheetah no tag nrho thaum nkawd nyas cov topi. Ob tug cheetah nyias nyob nyias deb li 100 yoj (91 mev) tiam sis nkawd ua hauj lwm ua ke.
Thaum ib tug cheetah zaum hauv cov nyom thiab tsis txav hlo li, lwm tus cheetah maj mam nyas zuj zus mus ze cov topi uas tsis pom hlo li. Ces tus cheetah uas zaum ntawd ploj mus rau hauv cov nyom thaum tib lub sij hawm uas lwm tus cheetah tau zaum twj ywm. Qhov uas ob tug cheetah pheej sib pauv li no ib tug nyas mus ze zuj zus thiab ib tug zaum hauv cov nyom los twb siv sij hawm ntev lawm. Ob tug cheetah siv lub tom txwv no kom ntxias thiab ua rau cov topi tsis pom nkawd yog li ntawd ua rau cov topi tsis tsom ntsoov rau qhov txaus ntshai uas tab tom los. Ob tug cheetah ua siab ntev ua hauj lwm ua ke tsis tu ncua kom thiaj tom tau cov topi.
Nyob ntawm nruab nrab ob tug cheetah uas los ze zuj zus thiab pawg topi ntawd muaj ib co topi uas laus thiab muaj zog tau sawv saum ntsaum kab rwg tej pawg av saib xyuas. Qhov uas cov topi saib xyuas no txawj pom tej tiaj nras zoo dua los ntawm tej pawg av no ua rau lawv txawj pom thaum muaj dab tsi txaus ntshai uas yuav tsum ceev faj.
Ces ua ciav, thaum ob tug cheetah ze txaus tom cov topi, ces pawg topi ntawd tig thiab khiav mus. Kuv tsis paub cov topi uas saib xyuas puas tau qhia thiab xyov lawv tau ua li cas qhia pawg loj ntawd, tiam sis zoo li lawv twb ceeb toom, thiab cov topi txhua tus tau mus rau ib qho chaw nyab xeeb.
Ob tug cheetah tau ua dab tsi tom qab ntawd? Nkawd tsis tau sej, es ob tug cheetah tau rov qab pheej sib pauv, ib tug nyas mus ze zuj zus thiab ib tug zaum twj ywm hauv cov nyom. Nkawd tau nyas mus ntxiv li no. Nkawd tsis tau tsum. Nkawd tsis tau so hlo li. Nkawd yeej meem ua raws li nkawd lub tom txwv kom cov topi tsis pom tseeb thiab tsis nco qab. Susan thiab kuv wb saib ob tug cheetah mus txog thaum tsis pom nkawd, es nkawd pheej mus ze zuj zus txog pawg topi ntawd.
Hmo ntawd Susan thiab kuv wb sib tham txog qhov uas wb tau saib thiab tau kawm. Wb kuj sib tham txog lub sij hawm no nrog wb cov me nyuam thiab cov xeeb ntxwv thiab tau kawm ntau yam uas muaj nqis. Tam sim no kuv xav piav txog peb zaj lus uas peb tau kawm.
Zaj Lus Qhia #1—Ceev Faj cov Phem tej Kev Zais Kom Neeg Txhob Paub
Rau kuv, cov cheetah yeej zoo nkauj, txawj ntxias thiab raug siab heev. Cov cheetah cov plaub uas xim daj thiab xim dawb uas muaj tej teev dub ua nyuaj rau yus pom lawv thaum lawv nyas mus tom lwm tus tsiaj hauv tej tiaj nras ntawm Afikas.
Ib yam li ntawd, tej lub tswv yim thiab tej yam ua uas tsis zoo rau peb sab ntsuj plig los peb saib zoo li yog tej yam txaus nyiam, yog tej yam peb xav tau, los sis haum siab. Yog li ntawd, nyob hauv peb lub ntiaj teb niaj hnub no, peb txhua tus yuav tsum ceev faj txog tej yam phem uas ntxias neeg hais tias yog tej yam zoo. Zoo li Yaxayas ceeb toom hais tias “Kev txom nyem yuav raug rau lawv cov uas hu qhov phem ua qhov zoo, thiab qhov zoo ua qhov phem, uas hu txoj kev tsaus ntuj ua txoj kev kaj, thiab hu txoj kev kaj ua txoj kev tsaus ntuj, thiab muab qhov iab ua qhov qab zib, thiab qhov qab zib ua qhov iab!”
Nyob hauv ib lub caij nyoog thaum neeg hais tias kev txo txoj sia yog ib txoj cai thiab kev ntxhov hnyo yog kev ywj siab, peb tau koob hmoov vim peb nyob hauv hnub nyoog no thaum qhov kaj ntawm txoj moo zoo uas tau muab txum tim rov qab los ci ntsa iab hauv peb lub neej thiab pab peb paub tus yeeb ncuab tej kev ntxias thiab tej kev kom pom tsis tseeb.
“Vim lawv cov uas muaj tswv yim thiab tau txais qhov tseeb, thiab tau cia tus Vaj Ntsuj Plig Dawb Huv ua lawv tus coj kev, thiab tsis tau raug dag ntxias—kuv hais tseeb rau nej tias, lawv yuav tsis raug muab ntov kom vau thiab muab pov rau hauv hluav taws, tiam sis yuav tiv taus hnub ntawd.”
Zaj Lus Qhia #2—Txhob Tsaug Zog thiab Ua Tib Zoo Ceev Faj
Hais txog cov topi, ntshe yog nws tsis xyuam xim los sis tsis nco qab tau ib me pliag xwb ces ib tug cheetah yuav los tom kiag. Ib yam li ntawd, qhov uas peb lam tau lam ua tej yam ntawm sab ntsuj plig ua rau peb raug xwm txheej los ntawm tus yeeb ncuab. Qhov uas peb tsis xav txog sab ntsuj plig ua rau peb raug tej yam txaus ntshai hauv peb lub neej.
iStock.com/Angelika
Nifias tau piav hais tias Dab Ntxwg Nyoog yuav ua li cas hauv hnub nyoog kawg kom dag ntxias Vajtswv cov me nyuam mus kom txaus siab rau sab cev nqaij daim tawv, “kom lawv hais tias: Txhua yam yeej zoo nyob hauv Xi-oos; muaj tseeb tiag, Xi-oos yeej vam meej, txhua yam yeej zoo—thiab tus dab phem dag ntxias lawv tej ntsuj plig li no, thiab maj mam coj lawv mus rau hauv ntuj txiag teb tsaus.”
Peb yuav tsum ceev faj saib xyuas tsis tu tsis tseg thiaj li tsis ua neeg uas lam tau lam ua. Kev ceev faj saib xyuas yog kev ua tib zoo siab xyuas seb puas muaj dab tsi txaus ntshai los yog tej yam nyuaj. Thiab qhov uas yus saib xyuas txhais tias yus tsis tsaug zog kom thiaj li zov thiab pov hwm tau. Hais txog sab ntsuj plig, peb yuav tsum tsis txhob tsaug zog thiab ua tib zoo mloog tus Vaj Ntsuj Plig Dawb Huv tej kev tshoov siab thiab tej yam uas tus Tswv cov neeg zov saum cov pej thuam qhia rau peb.
“Muaj tseeb tiag, thiab kuv kuj ntuas nej … kom nej faj seeb thov Vajtswv tsis tu ncua, xwv kom tus dab phem tej kev ntxias coj tsis tau nej mus, … vim saib seb, nws twb tsis muab ib yam zoo ua nqi zog rau nej.”
Qhov uas peb tsom ntsoov rau tus Cawm Seej thiab Nws txoj moo zoo hauv peb lub neej ua rau peb kov yeej tau tej yam uas neeg ntawm sab cev nqaij daim tawv nyiam thiab tsis txhob ua tub nkeeg ntawm sab ntsuj plig. Thaum peb tau koob hmoov kom muaj qhov muag pom tau thiab pob ntseg uas hnov tau, tus Vaj Ntsuj Plig Dawb Huv yuav ua rau peb haj yam txawj pom thiab mloog thaum twg peb xav tias peb tsis tas pom los sis mloog los sis thaum peb xav tias tsis muaj dab tsi uas pom tau los sis hnov tau.
Zaj Lus Qhia #3—To Taub Qhov tus Yeeb Ncuab Xav Tau
Ib tug cheetah yog ib tug tsiaj uas nyiam nyas tom lwm tus tsiaj. Txhua lub sij hawm, tas txhua hnub ib tug cheetah yog ib tug tsiaj uas nyas tom lwm tus tsiaj.
Dab Ntxwg Nyoog “yog ib tug yeeb ncuab ntawm kev ncaj ncees thiab ntawm cov uas xav ua raws li Vajtswv lub siab nyiam.” Txhua lub sij hawm, nws tsuas muaj tib lub hom phiaj xav muab Vajtswv cov tub thiab cov ntxhais nyuaj siab zoo li nws tus kheej.
Leej Txiv txoj hau kev zoo siab qhia kev rau Nws cov me nyuam, pab lawv muaj kev xyiv fab uas kav ib txhis, thiab coj lawv rov qab los tsev nrog Nws nyob nrog tej cev zoo tag nrho uas tau sawv rov los. Tus dab phem ua hauj lwm kom Vajtswv cov ntxhais thiab cov tub tsis paub meej thiab tsis zoo siab kom lawv yuav tsis vam meej nyob mus ib txhis. Tus yeeb ncuab yeej ua hauj lwm tsis tu tsis tseg kom tawm tsam tej yam ntawm Leej Txiv txoj hau kev uas nws ntxub tshaj plaws.
Dab Ntxwg Nyoog tsis muaj ib lub cev, thiab nws txoj kev vam meej twb raug tso tseg. Ib yam li qhov chaw tauv dej tsis pub cov dej ntws, tus yeeb ncuab txoj kev vam meej nyob mus ib txhis raug txwv vim nws tsis muaj ib lub cev nqaij daim tawv. Vim nws ntxeev siab, Luxifaws tau muab tag nrho cov koob hmoov thiab tej yam yus kawm tau los ntawm sab cev nqaij daim tawv tso tseg. Ib txoj kev txhais lo lus raug txim nyob hauv vaj lug kub yog qhov uas nws tsis muaj peev xwm vam meej thiab hloov los ua neeg zoo li peb Leej Txiv Saum Ntuj Ceeb Tsheej.
Vim yuav tsum muaj ib lub cev nqaij daim tawv nyob hauv Leej Txiv txoj hau kev zoo siab thiab kom peb loj hlob ntawm sab ntsuj plig, Luxifaws xav ntxias peb kom peb siv peb lub cev tsis yog nws thiaj yuav tab kaum peb txoj kev ua neeg zoo li Vajtswv. Thawj Tswj Hwm Russell M. Nelson tau qhia hais tias kev nyab xeeb ntawm sab ntsuj plig yog los ntawm “qhov uas yus tsis mus ib ruam tom ntej ntawm txoj kev uas tsis tsim nyog taug thiab tsis txhob ua tej uas tsis tsim nyog ua.’ … Vim peb yog tib neeg peb txhua tus muaj tej kev ntshaw [ntawm sab cev nqaij daim tawv] uas yuav tsum muaj kom nyob tau. ‘Yuav tsum muaj tej kev ntshaw no kom yuav muaj neeg tsis tu ncua. Yog li ntawd, tus yeeb ncuab ua li cas? … Nws tawm tsam peb los ntawm tej yam peb ntshaw. Nws ntxias kom peb noj tej yam tsis zoo noj, haus tej yam uas tsis zoo haus, thiab nyiam tej yam uas tsis tsim nyog nyiam!’”
Qhov txawv txav heev yog qhov uas tus yeeb ncuab uas nyuaj siab vim nws tsis muaj ib lub cev nqaij daim tawv, nws ntxias kom peb nyuaj siab ib yam li nws dhau los ntawm txoj kev siv peb lub cev tsis yog. Qhov uas nws tsis muaj thiab siv tsis taus yog qhov uas nws siv kom ntxias peb mus raug kev puas tsuaj ntawm sab nqaij daim tawv thiab sab ntsuj plig.
Peb yuav tsum to taub tus yeeb ncuab tej lub hom phiaj yog peb xav npaj zoo rau nws txoj kev tawm tsam. Yog vim tus Thawj Tub Rog Maulaunais paub cov Neeg Lamas lub hom phiaj, nws thiaj li tau npaj ntsib lawv thaum lub sij hawm lawv los thiab nws tau kov yeej lawv. Thiab lub ntsiab cai thiab txoj kev cog lus no yeej yog hais rau peb thiab.
“Yog hais tias nej npaj txhij nej yuav tsis ntshai.
“Thiab xwv kom nej yuav khiav dim cov yeeb ncuab lub hwj chim.”
Kev Caw, Kev Cog Lus thiab zaj Lus Tim Khawv
Ib yam li muaj tej zaj lus qhia tseem ceeb uas peb kawm tau los ntawm txoj kev saib cov cheetah thiab cov topi, peb txhua tus yuav tsum nrhiav tej yam uas peb kawm tau thiab tej kev ceeb toom los ntawm tej uas muaj los txhua hnub. Thaum peb nrhiav kev kom muaj kev qhib siab rau Vajtswv txoj kev coj los ntawm tus Vaj Ntsuj Plig Dawb Huv lub hwj chim, ces tej lus qhia zoo tshaj uas peb txais tau thiab tej lus ceeb toom tseem ceeb tshaj plaws uas yuav pov hwm peb yeej yuav los ntawm tej xwm txheej uas muaj hauv peb lub neej niaj hnub. Muaj tej zaj lus piv txwv uas muaj hwj chim nyob hauv vaj lug kub thiab nyob hauv peb lub neej niaj hnub.
Kuv twb hais txog peb yam los ntawm ntau zaj lus qhia uas yus kawm tau los ntawm Susan thiab kuv wb txoj kev mus ncig Afikas. Kuv caw thiab yaum nej kom xav txog lub sij hawm uas hais txog ob tug cheetah thiab cov topi no thiab xav seb puas muaj tej lus qhia ntxiv rau nej thiab nej tsev neeg. Thov nej nco ntsoov hais tias nej lub tsev yog qhov chaw tseeb rau kev kawm thiab kev ua neej txog txoj moo zoo.
Thaum nej rau siab ntseeg ua raws li txoj kev caw no, nej yuav txais kev tshoov siab, yuav muaj tej kev xav hauv nej lub siab, thiab nej yuav paub tej yam uas yuav tsum ua los sis tseem ua ntxiv kom nej tau “muab tag nrho [Vajtswv] tej cuab yeej tiv rog coj los hnav thiab tuav, xwv kom nej yuav tiv taus hnub phem, tom qab nej ua tiav txhua yam, xwv kom nej yuav nyob khov kho.”
Kuv cog lus tias nej yuav tau koob hmoov uas yog kev npaj zoo thiab kev pov hwm sab ntsuj plig hauv nej lub neej thaum nej rau siab faj seeb thov Vajtswv tsis tu ncua.
Kuv ua tim khawv tias kev txiv mus lawm tom hauv ntej nyob hauv txoj kev khi lus ua rau peb muaj kev nyab xeeb ntawm sab ntsuj plig thiab ua rau peb muaj kev xyiv fab uas kav ib txhis nyob hauv peb lub neej. Thiab kuv ua tim khawv tias tus Cawm Seej uas tau sawv rov los yuav txhawb nqa thiab txhawb peb lub zog tsis hais peb raug zoo los yog raug phem los yog. Kuv ua tim khawv txog tej yam tseeb li no los ntawm Yexus Khetos lub npe dawb ceev, amees.