Muaj Kev Zoo Siab Thaum Qhia txoj Moo Zoo
Peb muaj ib Leej Txiv Saum Ntuj Ceeb Tsheej uas hlub peb thiab tos peb tig los rau Nws kom foom koob hmoov rau peb thiab cov neeg uas nyob ib ncig peb.
Me nyuam yaus ib zaj nkauj uas kuv nyiam tshaj plaws pib nrog:
Peb ntseeg tej lus uas yooj yim thiab zoo nkauj uas muaj tseeb tiag no!
Peb yog mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb paub peb yog leej twg. Peb paub tias “Vajtswv yog Leej Txiv ntawm peb sab ntsuj plig. Peb yog … Nws cov me nyuam, thiab Nws hlub peb. Peb nyob [nrog Nws hauv Ntuj Ceeb Tsheej] ua ntej peb [los] hauv ntiaj nteb no.”
Peb paub Vajtswv txoj hau kev. Peb yeej nrog Nws thaum Nws qhia txoj hav kev rau sawv daws. Peb Leej Txiv Saum Ntuj Ceeb Tsheej “tib lub hom phiaj—Nws txoj hauj lwm thiab Nws lub yeeb koob—yog kom peb txhua tus txais tau Nws tej koob hmoov. Nws … muab ib txoj hau kev kom thiaj li ua tau Nws lub hom phiaj. Peb to taub thiab lees txais txoj hau kev no … kev zoo siab, … kev txhiv dim, thiab … kev cawm dim” ua ntej peb los rau lub ntiaj teb no.
“Yexus Khetos yeej tseem ceeb rau Vajtswv txoj hau kev. Dhau los ntawm Nws txoj Kev Theej Txhoj, Yexus Khetos ua raws li Vajtswv lub hom phiaj thiab ua rau peb txais tau txoj kev tsis txawj tuag thiab kev tsa nto. Dab Ntxwg Nyoog, los yog tus dab phem, yog tus uas tawm tsam Vajtswv txoj hau kev” thiab yog li ntawd txij thaum chiv keeb los.
“Kev ywj siab xaiv yog Vajtswv ib lub txiaj ntsim zoo tshaj plaws rau Nws cov me nyuam. … Peb yuav xaiv ua raws li Yexus Khetos los yog ua raws li Dab Ntxwg Nyoog.”
Tej lus uas yooj yim thiab muaj tseeb no yog tej lus uas peb qhia tau rau txhua tus.
Cia kuv qhia txog ib zaug uas uas kuv niam tau hais cov lus uas yooj yim no rau nej thaum uas nws lam sib tham thiab paub tias nws muaj ib lub cib fim zoo.
Ntau xyoo tas los lawm, kuv niam thiab kuv tus nus rov mus saib teb chaws Argentina. Kuv niam ib txwm tsis nyiam ya nyob hoom, nws hais kom kuv ib tug tub foom koob hmoov kom nplij thiab pov hwm nws. Nws xav pab coj nws pog kev thiab pab nws txais tus Vaj Ntsuj Plig Dawb Huv lub dag zog thiab pab coob leej uas xav kawm txoj moo zoo.
Hauv lub tshav dav hlau hauv Salt Lake, kuv niam thiab kuv tus nus ntsib ib tug me nyuam ntxhais uas muaj xya xyoo, uas nyuam qhuav mus caij ski los. Nws niam thiab txiv pom tias nws tau nrog kuv niam thiab nus sib tham ntev me ntsis nkawd txiav txim los sib tham thiab. Lawv qhia tias lawv thiab lawv tus ntxhais yog Eduardo, Maria Susana, thiab Giada Pol. Muaj ib yam zoo thiab sov siab txog tsev neeg no.
Ob tsev neeg zoo siab heev vim yuav tau mus tib lub dav hlau mus rau Beunos Aires, Argentina. Lawv rau siab ntso sib tham ntxiv mus, kuv niam kawm tias tsev neeg no yeej tsis tau hnov txog Yexus Khetos lub Koom Txoos dua li.
Cov lus xub thawj uas Susana nug yog, “Thov koj pab qhia kuv txog lub tsev zoo nkauj muaj tus mlom kub nyob rau saub tus thuv?”
Kuv niam qhia tias lub tsev zoo nkauj ntawd tsis yog il lub tsev museum tiam sis yog tus Tswv ib lub tuam tsev nyob hauv peb cog tej lus tseg nrog Vajtswv es peb thiaj li yuav rov qab mus nrog Nws tau. Susana hais rau kuv niam hais tias ua ntej nws tuaj xyuas Salt Lake nws tau thov Vajtswv kom muaj dab tsi pab ua rau nws sab ntsuj plig muaj zog ntxiv.
Thaum nkawd ya dav hlau ua ke no, kuv niam hais lus tim khawv txog txoj moo zoo thiab caw kom Susana nhriav cov tub ntxib uas nyob hauv nws zej zog. Susan tau nug kuv niam hais tias, “Es kuv yuav nhriav lawv li cas?”
Kuv niam teb hais tias, “Koj yeej yuav pom lawv xwb mas; lawv yog ob tug tub hluas hnav tsho dawb los sis ob tug ntxhais hnav zoo zoo, thiab lawv yeej coj daim natwv qhia lawv npe thiab sau hais tias ‘Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.’”
Ob tsev neeg sib txauv xov tooj thiab hais nyob zoo thaum txog tshav dav hlau Buenos Aires. Txij thaum ntawd los, Susana yog ib tug phooj ywg zoo heev, thiab tau hais rau kuv hais tias nws tu siab heev tsis xav tso kuv niam tseg tom tshav dav hlau. Nws hais tiam, “Koj niam mas ci ntsa iab. Kuv piav tsis tau, tiam sis nws muaj qhov ci ntsa iab uas kuv tsis xav tso tseg.”
Thaum Susana rov qab mus txog nws lub zos, nws thiab nws tus ntxhais, Giada, tau mus piav tej no rau Susana niam, uas tsuas nyob ob peb txoj kev ntawm lawv xwb. Thaum nkawd tsav tsheb, Susana pom kiag ob tug tus hluas taug kev ntawm txoj kev ntawd hnav ob lub tsho dawb li kuv niam tau hais tiag. Nws cia li nres nws lub tsheb hauv nruab nrab kev, tawm ntawm nws lub ntseb, thiab noog ob tug tub hluas ntawd tias, “Nej puas yog tus txib rau Yexus Khetos lub Koom Txoos?”
Nkawd teb hais tias, “Wb yog los mas.”
“Neb yog tub txib los?” nws nug.
Nkawd ob leeg teb tias, “Wb yog los mas!”
Ces nws cia li hais tias, “Nkag hauv kuv lub ntseb; neb yuav tsum mus nrog kuv mus tsev thiab qhia kuv.”
Ob hlis tom qab ntawd, Maria Susana tau ua kev cai raus dej. Nws tus ntxhais, Giada, tau ua kev cai raus dej thaum nws muaj cuaj xyoos. Peb tseem niaj hnub qhia Eduardo, txawm li cas los peb yeej hlub nws.
Txij li ntawd, Susana tau pib ua ib tub txib zoo tshaj uas kuv tau pom dua. Nws zoo li Mauxiyas cov tub, es coj coob tus los rau Khetos.
Muaj ib zaug thaum wb sib tham, kuv nug nws tias, “Koj ua li cas? Koj ho ua li cas qhia txoj moo zoo rau lwm tus?”
Nws teb tias, “Yooj yim heev. Txhua hnub ua ntej kuv mus qhov twg, kuv thov Leej Txiv Saum Ntuj Ceeb Tsheej coj kuv mus rau leej twg uas xav tau txoj moo zoo hauv lawv lub neej. Tej lub sij hawm kuv nqa ib Phau Ntawv Muamoos mus faib rau lawv los sis tej daim xa mus uas los ntawm cov tub txib—thiab thaum kuv pib nrog lwm tus tham, kuv nug seb lawv puas tau hnov txog lub Koom Txoos.”
Susana hais ntxiv tias, “Tej zaum thaum kuv tos lub tsheb nqaj hlau ces kuv luag nyav xwb. Muaj ib hnub ib tug txiv neej nug kuv tias, ‘Koj luag hnav txog dab tsi na?’ Nws ua rau kuv xav tsis thoob.
“Kuv teb hais tias, Kuv luag nyav vim kuv zoo siab!’
“Ces nws nug kuv tias, ‘Es koj zoo siab rau dab tsi?’
“Kuv teb tias, ‘Kuv yog ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, thaib qhov ntawd ua rau kuv zoo siab. Koj puas tau hnov txog?’”
Thaum tus txiv neej ntawd teb tias tsis tau, nws muaj tau ib daim me nyuam ntawv yais rau thiab caw kom nws tuaj koom lawv hauv lub koom txoos. Hnub Sunday tom qab ntawd, nws tau txais tus txiv neej ntawd ntawm qhov rooj.
Thawj Tswj Hwm Dallin H. Oaks qhia tias:
“Muaj peb yam uas txhua tus mej zeej ua tau kom pab qhia txog txoj moo zoo. …
“Qhov thib ib, peb txhua tus thov tau Vajtswv kom muaj kev xav pab ua txoj hauj lwm cawm seej tseem ceeb no. …
“Qhov thib ob, peb ua raws li cov lus txib. … Cov mej zeej rau siab ntseeg yeej yuav muaj tus Cawm Seej tus Ntsuj Plig … nrog nraim lawv, kom coj lawv nrhiav kev koom tes ua txoj hauj lwm qhia txog Yexus Khetos txoj moo zoo no.
Qhov thib peb,peb thov Vajtswv kom txais kev tshoov siab seb pebyuav ua licas … pab qhia txoj moo zoo rau lwm tus … [thiab] thov Vajtswv pab nrog lub siab uas kam ua raws li txoj kev tshoov siab uas nej yuav txais.”
Cov nus muag, thias tub hluas ntxhais hluas, peb ua puas tau li kuv tus phooj ywg es faib txoj moo zoo rau lwm tus? Peb caw puas tau ib tug phooj ywg uas tsis ntseeg li peb mus rau peb lub koom txoos nrog peb hnub Sunday no? Los sis peb muab puas tau ib Phau Ntawv Maumoos rau ib tug txeeb ze los sis phooj ywg? Peb pab puas tau lawv nriav lawv cov poj koob yawm txwv hauv FamilySearch los sis qhia lwm tus txog tej yam uas peb tau kawm txhua lub lim piam thaum peb kawm qhov Los, Nrog Kuv Mus? Peb hloov puas tau los ua neeg zoo li peb tus Cawm Seej Yexus Khetos thiab qhia luag tej hais tias yam dab tsi ua rau peb muaj kev zoo siab hauv lub neej no? Lo lus teb rau tag nrho cov lus nug no yeej hais tias tau kawg! Peb yeej ua tau li no!
Hauv cov vaj lug kub peb nyeem tias cov mej zeej hauv Yexus Khetos lub Koom Txoos raug txib mus “ua hauj lwm nyob hauv nws lub vaj txiv hmab rau txoj kev cawm seej ntawm neeg cov ntsuj plig.” (Lus Qhuab Qhia thiab Kev Khi Lus 138:56) “Txoj hauj lwm cawm neeg txoj sia yog kev ua tub txib rau cov mej zeej, kev pab cov neeg hloov siab los ntseeg, kev pab cov uas tsis tshua muaj siab ntseeg, ua hauj lwm hauv lub tuam tsev thiab nrhiav tsev neeg caj ceg, thiab qhia txoj moo zoo.”
Kuv cov me phooj ywg, tus Tswv xav kom peb sau haiv neeg Ixayees ua ke. Hauv phau Lus Qhuab Qhia thiab Kev Khi Lus, Nws hais tias, “Tsis txhob txhawj ua ntej hais tias nej yuav hais dab tsi; tiam sis khaws tej lus uas cawm neeg txoj sia cia rau hauv nej lub cim xeeb tsis tu ncua, thiab yuav muab qhov uas nej yuav tsum hais rau txhua tus neeg los rau nej nyob rau lub sij hawm ntawd kiag.”
Tsis tas li ntawd, Nws tau cog lus rau peb hais tias:
“Txawm yog hais tias [nej] khwv tag [nej] lub neej tshaj txoj kev hloov siab lees txim rau cov neeg no, es tsuas ho coj tau ib nyuag tug ntsuj plig los rau kuv xwb los, yeej yuav muaj txoj kev xyiv fab loj kawg nrog [tus ntawd] nyob hauv kuv Txiv lub nceeg vaj!
“Thiab nim no, yog hais tias [nej] twb yuav muaj txoj kev xyiv fab loj nrog rau ib tug ntsuj plig uas [nej] tau coj los rau kuv mus nyob hauv kuv Txiv lub nceeg vaj, ces txoj kev xyiv fab yuav loj npaum cas yog hais tias ho coj tau ntau tus ntsuj plig los cuag kuv!”
Me Nyuam Yaus zaj nkauj xaus muaj tej lus zoo heev hais tias:
Kuv hais lus tim khawv tias tej lus no muaj tseeb thiab peb muaj ib Leej Txiv Saum Ntuj Ceeb Tsheej uas hlub peb htiab tos peb tig los rau Nws kom foom koob hmoov rau peb htiab cov neeg uas nyob ib ncig peb. Kuv thov kom peb yuav coj peb cov nus thiab viv ncaus los cuag Khetos es hais li no los ntawm Yexus Khetos lub npe, amees.