Tus Cawm Seej cov Thwj Tim Tseeb
Peb yuav muaj kev xyiv fab kav ntev thaum peb tus Cawm Seej thiab Nws txoj moo zoo yog lub hauv npaus ntawm peb lub neej.
Nyob hauv phau Hakais hauv Phau Qub muaj tej lus txog ib pawg neeg uas yeej xav tau Txwj Laug Holland tej lus ntuas. Lawv tau ua yuam kev vim lawv tsis tsom ntsoov rau Khetos hauv lawv lub neej thiab thaum lawv pab lwm tus. Hakais ua rau yus txawj xav txog tej yam uas nws qhuab ntuas cov neeg vim lawv nyob twj ywm hauv lawv tej tsev zoo thiab tsis muab tus Tswv lub tuam tsev txhim tsa:
“Kuv haiv neeg, vim li cas nej twb nyob tej tsev zoo zoo lawm, tiam sis kuv lub Tuam Tsev pob puas tas li?
“[Yog li ntawd tus Tswv hais tias: Cia li xav txog qhov uas nej taug txoj kev twg].
“Nej cog qoob ntau, tiam sis nej sau tau tsawg. Nej muaj zaub mov noj, tiam sis tsis tsau. Nej muaj cawv txiv hmab haus, tiam sis tsis qaug. Nej muaj ris tsho hnav, tiam sis tsis sov. Tej neeg uas ua hauj lwm tau nyiaj los [tso hauv lub hnab uas to qhov].
“[Yog li ntawd tus Tswv hais tias: Cia li xav txog qhov uas nej taug txoj kev twg].”
Nej puas nyiam tej kev piav txog qhov uas lawv saib tej yam uas tsis muaj nuj nqis nyob mus ib txhis rau nqi tshaj tej yam los ntawm Vajtswv.
Nyob hauv kev sib ntsib txais lub cim nco txog tsis ntev tas los, ib tug tub txib uas tau rov qab los tsev lawm hais txog ib leej txiv uas piav txog lub tswv yim no rau nws cov me nyuam hais tias, “Peb yuav tsum muaj Wi-Fi tsawg dua thiab muaj Nifais ntau dua ntxiv!”
Vim kuv nyob hauv Afikas Sab Hnub Poob tau tsib xyoos lawm, kuv twb pom neeg coob uas coj yam ntxwv tsis txaj muag coj raws li txoj moo zoo. Ib tug yam ntxwv yog lub npe ntawm ib qhov chaw kho log thiab ua kom sib luag zos nyob hauv Ghana. Tus tswv tsev hu lub npe ntawd ua “Kho Log Raws Koj Siab Nyiam.”
Peb yuav muaj kev xyiv fab kav ntev thaum peb tus Cawm Seej thiab Nws txoj moo zoo yog lub hauv npaus ntawm peb lub neej. Tiam sis, yeej yooj yim rau peb cia tej yam ntawm lub ntiaj tebua peb lub hauv paus, es ua rau peb lam ua raws li txoj moo zoo, los yog ua rau peb lam mus koom lub koom txoos tau ob teev thaum hnub Sunday xwb. Thaum yog li no ces yeej zoo ib yam li peb tso peb cov nyiaj hauv “ib lub hnab uas to qhov.”
Hakais qhia kom peb rau siab—ua ib yam li peb hais nyob hauv Audaliyas, ua neeg “fair dinkum” txog kev ua raws li txoj moo zoo. Lawv yog neeg fair dinkum thaum lawv yeej yog raws li lawv hais.
Kuv twb kawm me ntsis txog kev ua neeg fair dinkum thiab kev rau siab thaum kuv ntaus pob rugby. Kuv kawm tias thaum kuv rau siab ntsoov ua, thaum kuv ua txhua yam kuv ua taus, ces kuv thiaj li nyiam kev ua si ntawd zoo tshaj plaws.
Xyoo kuv ntaus pob rugby uas kuv kuv nyiam tshaj yog xyoo tom qab kuv kawm ntawv high school tas. Kuv pawg yeej muaj txuj ci heev thiab rau siab kawg. Peb pawg yog cov uas sib tw yeej xyoo ntawd. Tiam sis, muaj ib hnub peb twb sib tw nrog ib pawg uas tsis tshua zoo, thiab tom qab kev sib tw peb yuav coj hluas nkauj mus rau kev seev cev hauv lub tsev kawm ntawv qib siab uas muaj txhua xyoo. Kuv xav tias vim kev sib tw no yuav yooj yim heev, kuv yuav tsum pov hwm kuv tus kheej kom kuv thiaj yuav muaj kev lom zem thaum mus rau kev seev cev. Nyob hauv kev sib tw no, peb tsis rau siab heev ntaus lwm tus npaum li peb txawj ua, thiab peb sw lawm. Qhov phem tshaj, thaum kev sib tw tiav lawm kuv daim di ncauj o o tas ua rau kuv tsis tshua zoo nraug thaum kuv mus tham hluas nkauj. Tej zaum kuv yuav tsum kawm ib yam dab tsi.
Muaj ib lub sij hawm uas txawv lub sij hawm ntawd thaum ua ib txoj kev sib tw uas kuv rau siab heev. Muaj ib zaug kuv twb khiav mus thawb ib tug neeg sib tw; ua rau kuv lub ntsej muag mob kiag tam sim ntawd. Kuv txiv tau qhia kuv tias kuv yeej yuav tsum tsis txhob cia cov yeeb ncuab puab thaum twg kuv mob, kuv thiaj li tau sib tw mus txog kawg lawm. Hmo ntawd, thaum kuv sim noj mov, kuv kawm tias kuv tom tsis taus dab tsi. Tag kis sawv ntxov, kuv mus rau lub tsev kho mob, es muaj ib daim duab hluav taws xob X-ray uas qhia tseeb tias kuv puab tsaig twb dam lawm. Lawv twb xaws kuv lub qhov ncauj kaw tau rau lub lim tiam tom ntej.
Kuv twb kawm tej yam los ntawm zaj lus piv txwv txog kuv daim di ncauj o o thiab kuv puab tsaig uas dam. Txawm yog kuv nco qab ntsoov tias kuv nqhis zaub mov noj tau rau lub lim tiam uas kuv txawj haus kua dej xwb, kuv yeej tsis khuv xim kuv puab tsaig uas dam vim yog los ntawm ib lub sij hawm thaum kuv rau siab plhuav. Tiam sis kuv khuv xim kuv daim di ncauj uas o o vim hais tias yog los ntawm lub sij hawm uas kuv tsis tshua rau siab.
Qhov uas peb rau siab plhuav tsis txhais hais tias peb yuav tau koob hmoov tsis tu tsis tseg los yog yuav vam meej txhua lub sij hawm. Tiam sis qhov uas peb rau siab plhuav txhais hais tias peb yuav muaj kev xyiv fab. Kev xyiv fab tsis yog kev txaus siab uas txawj ploj mus thiab tsis yog kev zoo siab uas txawj tu. Kev xyiv fab nyob ruaj nrees, thiab yog los ntawm qhov uas tus Tswv txais tau peb tej kev siv zog.
Ib zaj lus piv txwv txog qhov uas tus Tswv txais yuav yus yog zaj uas hais txog Oliver Granger. Ib yam li Thawj Tswj Hwm Boyd K. Packer hais tias: “Thaum Haiv Neeg Ntseeg raug ntiab tawm ntawm Kirtland mus, … lawv tseg Oliver nyob kom muag lawv tej teej tug txawm tau nyiaj tsawg xwb los yog. Ntshe yeej tsis muaj hmoov ntau ua rau nws ua tau. Thiab, tiag tiag, nws yeej tsis tau ua li!” Thawj Pawg Thawj Tswj Hwm twb txib nws ua ib txoj hauj lwm uas nyuaj heev, ntshe tsis muaj leej twg ua tau. Tiam sis tus Tswv qhuas nws rau nws txoj kev khwv thaum tus Tswv hais li no:
“Kuv nco ntsoov kuv tus tub qhe Oliver Granger; saib seb, kuv hais tseeb rau nws hais tias yuav nco qab dawb ceev txog nws lub npe ntawm ib tiam neeg mus rau ib tiam, mus ib txhiab thiab ib txhis, tus Tswv hais li.
“Yog li ntawd, cia kom nws mob siab ua hauj lwm rau txoj kev txhiv Thawj Pawg Thawj Tswj Hwm ntawm kuv lub Koom Txoos dim, … thiab thaum nws qaug nws yuav rov qab sawv dua, vim nws txoj kev txi yuav dawb ceev rau kuv dua li nws tej kev vam meej, tus Tswv hais li.”
Tej zaum qhov no muaj tseeb rau peb txhua tus—tsis yog tej yam uas peb ua tau tiam sis yog peb txoj kev txi thiab txoj kev khwv, uas muaj nqis rau tus Tswv.
Ib tug yam ntxwv txog Yexus Khetos tus thwj tim tseeb ntxiv yog kuv ib tug phooj ywg zoo nyob hauv Côte d’Ivoire nyob hauv Afikas Sab Hnub Poob. Tus muam zoo kawg thiab rau siab ntseeg no, nws tus txiv twb ua phem ua lim hiam rau nws tau ib lub caij ntev, thiab thaum kawg nkawd sib nrauj. Nws yeej tsis tau tso nws txoj kev ntseeg thiab kev siab zoo tseg, tiam sis vim nws tus txiv ua phem rau nws, ua rau nws lub siab mob ntev heev. Nws tau piav txog lub sij hawm no li no hais tias:
“Txawm kuv hais tias kuv tau zam txim rau nws lawm, thaum kuv pw kuv yeej muaj ib qho mob hauv kuv lub siab; kuv mob li ntawd tas hnub tas hmo. Zoo li kuv lub siab twb kub hnyiab lawm. Muaj ntau zaus kuv tau thov tus Tswv kom tshem qhov mob ntawm kuv mus, tiam sis mob heev kuv thiaj li ntseeg tias kuv yuav muaj mob li ntawd tas kuv lub neej. Mob dhau qhov uas kuv niam tas sim neej no thaum kuv tseem hluas; mob dhau lub sij hawm uas kuv txiv thiab kuv tus tub twb tso lub ntiaj teb no tseg. Qhov mob ntawd twb hlav tuaj thiab npog kuv lub siab, ua rau kuv xav tias kuv yuav tuag thaum twg los tau.
“Tej lub sij hawm kuv nug kuv tus kheej tias tus Cawm Seej yuav ua li cas yog tias nws yog kuv, thiab kuv xav hais tias, ‘Lub nra no yeej hnyav dhau, kuv tus Tswv.’
“Muaj ib hnub kuv nrhiav qhov mob uas los ntawm txhua yam no hauv kuv lub siab thiab nrhiav ntev zog, nrhiav hauv kuv sab ntsuj plig. Qhov mob ntawd tsis nyob qhov twg lawm. Kuv lub siab tau xav txog tag nrho tej yam uas ua rau kuv raug qhov mob ntawd, tiam sis kuv tsis hnov mob hlo li. Kuv twb tos tas ib hnub ntawd seb kuv puas hnov tau qhov mob hauv kuv lub siab ntxiv; kuv tsis tau hnov li. Ces kuv thiaj li txhos caug thiab ua Vajtswv caug vim Nws ua rau tus Tswv txoj kev txi theej txhoj pab kuv.”
Tam sim no tus muam no tau ua kev cai sib khi nrog ib tug txiv neej rau siab ntseeg uas hlub nws heev.
Yog li ntawd peb yuav tsum coj cwj pwm zoo li cas yog peb yog Khetos cov thwj tim tseeb? Thiab txoj moo zoo muaj nqi npaum li cas rau peb thaum peb “xav txog qhov uas [peb] taug txoj kev twg” raws li Hakais hais?
Kuv nyiam tus yam ntxwv txog tus cwj pwm zoo uas Vaj Ntxwv Lamaunais txiv coj. Nej nco txog nws txoj kev npau taws thaum nws pom nws tus tub nrog Amoos, ib tug Neeg Nifais—ib co neeg uas cov Neeg Lamas ntxub. Nws nqa nws rab ntaj kom tawm tsam Amoos thiab ib pliag tom qab ntawd Amoos rab ntaj nyob ntawm nws caj pas. “Nim no tus vaj ntxwv, vim ntshai tsam nws yuav xiam nws txoj sia, hais tias: Yog koj tseg kuv txoj sia txhua yam uas koj nug kuv yuav muab rau koj, txawm hais tias ib nrab kiag ntawm lub teb chaws.”
Cia li seb nws yuav muab dab tsi—ib nrab kiag nws lub teb chaws rau nws txoj sia.
Tiam sis tom qab ntawd, tom qab nws to taub txog txoj moo zoo, nws hais txaus siab muab ntxiv. “Tus vaj ntxwv hais tias: Kuv yuav ua li cas es kuv thiaj tau txoj sia nyob mus ib txhis uas koj tau hais no? Muaj tseeb tiag, kuv yuav ua dab tsi es kuv thiaj li yuav raug yug los ntawm Vajtswv, muab tus ntsuj plig phem no rho tawm ntawm kuv lub cev mus, thiab txais yuav nws tus Ntsuj Plig, xwv kom kuv yuav muaj kev xyiv fab puv npo, xwv kom kuv yuav tsis raug ntiab tawm nyob rau hauv hnub kawg? Nws hais tias, saib seb, kuv yuav muab txhua yam uas kuv muaj tso pov tseg, muaj tseeb tiag, kuv yuav tso kuv txoj kev kav teb chaws, xwv kom kuv yuav tau txais txoj kev xyiv fab heev no.”
Zaum no, nws npaj siab muab tag nrho ntawm nws lub nceeg vaj, vim txoj moo zoo muaj nqi tshaj txhua yam uas nws muaj! Nws yog neeg fair dinkum txog txoj moo zoo.
Yog li ntawd, txoj lus nug rau peb txhua tus yog li no, Peb puas yog neeg fair dinkum txog txoj moo zoo? Vim qhov uas yus tsis tshua rau siab tsis yog kev ua neeg fair dinkum! Thiab Vajtswv yeej tsis qhuas cov uas tsis tshua rau siab.
Tsis muaj nyiaj txiag, tsis muaj kev ua si, tsis muaj kev muaj koob muaj npe, tsis muaj social media, los yog kev ua video games, tsis muaj kev sib tw, tsis muaj kev sib raug zoo nrog ib tug muaj koob meej, tsis muaj ib yam dab tsi hauv lub ntiaj teb no uas muaj nqi tshaj txoj sia nyob mus ib txhis. Yog li ntawd tus Tswv ntuas txhua tus neeg kom lawv xav txog qhov uas lawv taug txoj kev twg.
Kuv xav zoo ib yam li Nifais hais: “Kuv zoo siab rau kev qhia meej; kuv zoo siab rau qhov tseeb; kuv zoo siab rau kuv tus Yexus, vim nws tau txhiv kuv tus ntsuj plig dim ntawm ntuj txiag teb tsaus.”
Peb puas yog cov uas coj raws li tus uas tau ua txhua yam Nws ua tau rau peb? Tus uas yog peb tus Txhiv Dim thiab tus Daws Peb Zaj rau Leej Txiv? Tus uas rau siab ua Nws txoj Kev Theej Txhoj thiab tam sim no Nws rau siab hlub peb, Nws muaj siab hlub tshua peb, thiab Nws xav kom peb muaj txoj kev xyiv fab nyob mus ib txhis? Kuv thov txhua tus uas mloog thiab nyeem tej lus no: Thov nej tsis txhob tos kom rau siab ntso mus txog thaum yav tom ntej thaum txaus nej lub siab ua. Cia li ua neeg fair dinkum tam sim no thiab muaj kev xyiv fab! Los ntawm Yexus Khetos lub npe, amees.