Tus Cawm Seej txoj Kev Hlub
Thaum peb los cuag Nws, Vajtswv yuav los cawm peb dim, txawm yog yuav los kho peb los sis ntxiv dag zog rau peb tau kov yeej ib yam teeb meem twg.
Ze li 2,000 xyoo tas los lawm, tus Cawm Seej nqi roob los tom qab qhia txog tej Kev Cai Zoo thiab txoj moo zoo lwm cov ntsiab lus. Thaum Nws taug kev mus, txawm muaj ib tug txiv neej uas mob ruas tuaj ntsib Nws. Tus txiv neej hawm thiab saib nws rau nqi thaum uas nws txhos caug rau ntawm Khetos, nws xav tau kev pab kho nws tus mob. Nws tsuas thov hais tias: “Tus Tswv, yog koj txaus siab kho kuv tus mob, koj yeej kho tau kuv zoo.”
Tus Cawm Seej txawm ncav Nws txhais tes los, kov nws, thiab tias, “Kuv txaus siab pab koj. Koj tej ruas cia li zoo hlo.”
Peb kawm hais tias tus Cawm Seej ib txwm xav foom koob hmoov rau peb. Ib txhia koob hmoov los tas sim ntawd, lwm cov yuav ntev zog, thiab ib co yuav los tom qab lub neej no xaus, tiam sis tej koob hmoov yeej yuav los.
Zoo li tus neeg mob ruas, peb nrhiav tau lub zog thiab kev nplij siab thaum peb kam ua raws li Nws lub siab nyiam thiab paub tseeb hais tias Nws xav foom koob hmoov rau peb. Peb yuav muaj hwj chim kov yeej ib yam teeb meem twg, kom kov yeej kev ntxias, thiab to taub thiab nyiaj txhua tsav txhua yam uas nyuaj. Tiag tiag mas, thaum ib lub sij hawm nyuaj tshaj plaws hauv Nws lub neej, tus Cawm Seej haj yam muaj zog nyiaj kev txom nyeem thaum Nws hais rau Leej Txiv hais tias, “Cia li ua raws li koj lub siab nyiam.”
Tus neeg mob ruas tsis yog hais loj loj los sis quab yuam leej twg li. Nws txo hwj chim hais lus mos mos, yeej xav tau koob hmoov loj tiam sis yeej kam ua raws li tus Cawm Seej lub siab nyiam. Nov yog ib qho yam ntxwv rau tus cwj pwm uas peb yuav tsum yoog thaum peb xav los cuag Khetos. Thaum peb los cuag Khetos peb yuav tsum lees paub hais tias Nws yeej muaj lub siab xav muab qhov zoo tshaj plaws rau peb hauv lub neej no thiab rau peb lub neej uas yuav nyob mus ib txhis li. Nws pom tau lub neej nyob mus ib txhis uas peb tsis muaj cuab kav pom. Peb yuav tsum los cuag Khetos muaj lub siab kam ua raws nraim li Leej Txiv lub sib nyiam, tib yam li Yexus kam ua. Nov yuav pab peb npaj rau lub neej nyob mus ib txhis.
Peb tsis paub tias tus neeg mob ruas muaj kev nyuaj siab thiab hnov mob npaum li cas thaum nws tab tom los cuag tus Cawm Seej. Yam mob ruas ua rau tej leeg xa xov thiab cov tawv nqaij raug mob, ces yus lub cev puas tsis zoo nkuaj lawm thiab ua rau yus xiam hoob qhab. Tsis tas li ntawd xwb, tib neeg muab lawv xyeej pov tseg. Ib txhia neeg uas mob ruas tau khiav ntawm lawv tsev neeg mus thiab cov uas mob li ntawd tau sib sau ua ke ua ib koog zej zog. Luag tej xav tias cov neeg mob ruas yog neeg tsis huv, ntawm sab cev nqaij tawv thiab sab ntsuj plig tib si. Twb yog vim li ntawd, Mauxes txoj kev cai hais tias cov neeg mob ruas yuav tau hnav tej cev khaub ncaws uas ntuag thiab yuav tsum hu hais tias, “Neeg tsis huv!” thaum lawv taug kev. Vim muaj mob thiab raug xyeej pov tseg, cov neeg mob ruas thiaj tau mus nyob hauv tej tsev uas tsis muaj leej twg nyob los sis hauv cov toj ntxa. Ces peb thiaj paub tias tus neeg mob ruas uas los cuag tus Cawm Seej lub siab twb tawg rhe lawm.
Tej thaum—imuaj ib yam dab tsi thaum—peb muaj lub siab tawg rhe thiab, txawm yog vim peb ua txhaum los sis lwm tus ua txhaum lawm, txawm yog tej yam uas peb muaj los sis tsis muaj cuab kav tswj kav los xij. Thaum zoo li ntawd, peb mam li tso peb lub siab hauv Nws ob txhais tes.
Ntau xyoo tas los lawm, Zulma—kuv tus me poj niam, kuv tus khub zoo— tau ib zaj xov tsis zoo li ob lim piam ua ntej wb ib tug me nyuam yuav poj niam. Nws txawm muaj ib lub qog hauv nws pob qa, thiab lub qog tab tom huam loj tuaj sai heev. Nws lub ntsej muag pib o tuaj, thiab nws tau mus raug phais tas sim ntawd. Nws xav ntau yam thiab nws nyuaj siab heev. Nws xav paub seb lub qog puas yuav hlav tuaj? Nws lub cev puas yuav zoo mob zoo nkees? Nws lub ntsej muag puas yuav loog tag? Nws yuav hnov mob ntau npaum li cas? Nws lub ntsej muag puas yuav sawv caws pliav tas li? Lub qog puas yuav rov qab hlav tuaj tom qab muab tshem tawm? Nws puas yuav mus koom tau wb tus tub lub rooj tshoob? Thaum nws pw hauv chav phais, nws lub siab twb tawg nrho.
Hauv lub sij hawm tseem ceeb ntawd, tus Ntsuj Plig ntxhi lus rau nws tias nws twb kam ua raws li tus Tswv nyiam. Ces nws txiav txim tias nws yuav tso siab plhuav rau Vajtswv. Nws xav tias txawm muaj xwm dab tsi los, qhov uas ua raws li Vajtswv lub siab nyiam yuav yog qhov zoo tshaj plaws rau nws. Ces nws txawm tsaug zog vim lawv yuav muab nws phais.
Yav tom qab ntawd, nws sau paj lug hauv nws phau ntawv ceev xwm txheej hais tias: “Nyob ntawm tus kws phais lub rooj kuv txhos caug rau ntawm Koj, thiab lees hais tias yuav ua raws li Koj lub siab nyiam. Kuv paub tias kuv tso siab tau rau Koj, vim paub tias tsis muaj ib yam dab tsi phem uas los ntawm Koj.”
Nws nrhiav tau lub zog thiab kev nplij siab uas pab nws ua raws li Leej Txiv lub siab nyiam. Hnub ntawd, Vajtswv foom koob hmoov nplua mias rau nws.
Txawm peb lub neej zoo li cas los xij, peb siv tau peb txoj kev ntseeg pab peb los cuag Khetos thiab nrhiav tau ib tug Vajtswv uas peb yuav tso siab rau. Zoo li kuv ib tug me nyuam, Gabriel, sau ib zaug hais tias:
Raws li tus yaj saub hais, Vajtswv lub ntsej muag ci ntsa iab tshaj lub hnub
thiab Nws cov plaub hau dawb paug tshaj cov daus
thiab Nws lub suab nrov li dej tsaws tsag,
thiab yog muab txiv neej piv rau Nws ces txiv neej tsis muaj qab hau dab tsi. …
Kuv lub siab puas tas vim kuv paub tias kuv tsis tsim nyog li.
Thaum ntawd kuv thiaj li maub mus txog tus vajtswv uas kuv tso siab rau.
Ces thaum ntawd kuv thiaj nrhiav tau tus Vajtswv uas kuv tso siab rau.
Ib tug Vajtswv uas peb tso siab rau ua rau peb muaj chaw cia siab. Peb tso siab rau Nws vim hais tias Nws hlub peb thiab xav kom peb tau txhua yam uas zoo.
Tus neeg mob ruas los vim nws muaj chaw cia siab. Lub ntiaj teb tsis tau pab, yeej tsis muab kev nplij siab. Yog li ntawd, tus Cawm Seej txoj kev kov kiag zoo nkaus li nws plhws tus neeg mob tus ntsuj plig tag nrho. Peb tsuas lam xav txog tus neeg mob ruas tej kev ris txiaj thaum tus Cawm Seej kov nws, nws haj yam tau kev zoo siab thaum nws hnov cov lus hais tias “Kuv txaus siab pab koj. Koj tej ruas cia li zoo hlo.”
Zaj dab neeg hais ntxiv tias “tas sim ntawd nws tej ruas cia li dawb huv lawm.”
Peb kuj hnov tau tus Cawm Seej txoj kev kov peb siab, thiab kho peb tej kev mob. Kev xyiv fab, kev cia siab, thiab kev ris txiaj hauv peb lub siab vim peb paub tias Nws xav kom peb yuav ua neeg dawb huv! Thaum peb los cuag Nws, Vajtswv yuav los cawm peb dim, txawm yog yuav los kho peb los sis ntxiv dag zog rau peb tau kov yeej ib yam teeb meem twg.
Txawm yog li cas los xij, txoj kev ua raws li Nws lub siab nyiam—tsis ua raws li peb xav—yuav pab peb to taub peb lub neej. Tsis muaj ib yam dab tsi phem uas los ntawm Vajtswv los. Nws paub dab tsi yog qhov zoo tshaj plaws rau peb. Tej zaum Nws yuav tsis tshem peb tej nras tas sid. Tej thaum Nws yuav pab ua kom tej ntawd sib me ntsis, ib yam li Nws ua rau Amas thiab nws cov neeg. Thaum kawg ces, vim muaj tej kev khi lus, ces yuav tshem tej nras mus, txawm yog nyob rau hauv lub neej no los yog thaum muaj Kev Sawv Rov Los los xij.
Lub siab uas xav ua raws li Nws lub siab nyiam, nrog rau qhov kev paub hais tias peb tus Txhiv Dim los saum ntuj los, yuav pab tau peb muaj kev ntseeg ib yam li tus neeg mob ruas muaj kom peb yuav ua tau neeg dawb huv thiab. Yexus Khetos yog ib tug Vajtswv ntawm kev hlub, ib tug Vajtswv ntawm kev cia siab, ib tug Vajtswv ntawm kev kho mob, ib tug Vajtswv uas xav foom koob hmoov rau peb thiab pab peb uas neeg dawb huv. Nws twb xav kom muaj li ntawd ua ntej Nws los nyob hauv ntiaj teb no thaum Nws zoo siab hlo xaiv los cawm peb dim thaum twg peb poob ua txhaum. Nws xav kom muaj li ntawd hauv lub vaj Khexemanes thaum Nws raug kev mob kawg nkaus thaum Nws them tus nqi rau kev txog kev txhaum. Tas sim no Nws tseem xav kom muaj li ntawd thaum Nws taij thov sawv peb cev rau ntawm Leej Txiv. Yog vim li ntawd Nws suab hu hais tias: “Nej cov uas sab sab vim nej ris nra hnyav, nej cia li los cuag kuv, kuv yuav cia nej so.”
Nws kho thiab txhawb nqa tau peb vim hais tias Nws muaj cuab kav ua li ntawd. Nws tau ris tag nrho txhua yam kev mob ntawm sab cev nqaij tawv thiab sab ntsuj plig tib si kom Nws thiaj muaj tau kev hlub tshua txaus Nws thiaj pab tau peb ua txhua yam tsav thiab kho peb thiab txhawb nqa peb. Yaxayas cov lus, raws li Anpinadais hais, qhia zoo zoo hais tias:
“Nws yeej tau tiv peb tej kev nyuaj siab, thiab ris peb peb tej kev txom nyem. …
“… Nws tau raug mob rau peb tej kev txog txhaum, nws raug doog ntshav rau peb tej kev tsis ncaj ncees; txoj kev qhuab ntuas ntawm peb txoj kev thaj yeeb twb nyob rau saum nws; thiab nrog nws tej tawv nqaij txaij peb raug kho zoo.”
Peb kawm tib ntsiab lus ntawd hauv zaj paj huam no:
“Au tus Kws Ntoo hauv Naxales,
Lub siab no, uas tawg es kho tsis tau li,
Lub neej no, uas puas tsuaj twb yuav tuag mus li,
Au, koj kho puas tau, tus Kws Ntoo as?”
Thiab thaum muaj nws txoj kev ua siab zoo ncav tes los pab.
Nws txoj sia yeej pab muab kho li as
Peb lub neej puas tas, mus txog thaum kawg
Txawm muaj kev Tsim Tshiab—“txhua yam tshiab dua.”
Yog nej xav tias nej muaj ib yam dab tsi uas tsis huv, yog nej xav tias nej puas tas, thov kom nej yuav paub hais tias nej yeej ua tau neeg huv dua, nej raug tau kev kho kom zoo, vim Nws hlub nej. Cia li ntseeg hais tias tsis muaj ib yam phem dab tsi uas los ntawm Vajtswv los.
Vim nws “nqis qis tshaj txhua yam,” Nws thiaj muaj cuab kav kho txhua yam uas raug puas tsuaj hauv peb lub neej kom zoo, ces yog li ntawd peb mam li rov qab nrog Vajtswv sib raug zoo. Dhau ntawm Nws, yuav kho tau txhij txhua, hais txog tej yam hauv ntiaj teb no thiab tej yam saum ntuj ceeb tsheej, pab kom muaj “kev nyab xeeb dhau ntawm cov ntshav saum ntoo khaub lig.”
Cia peb ua txhua yam, uas peb yuav tsum ua kom los cuag Khetos. Thaum peb ua li no, thov kom peb yuav muaj lub siab hais tias, “Tus Tswv, yog koj txaus siab kho kuv tus mob, koj yeej kho tau kuv zoo.” Yog peb ua tau li no ces, peb yuav tau tus Xib Hwb Zoo txoj kev kho, nrog rau nws lub suab hu hais tias: “Kuv txaus siab pab koj. Koj tej ruas cia li zoo hlo.”
Tus Cawm Seej yog ib tug Vajtswv uas peb yuav tso siab rau. Nws yog tus Khetos, tus uas Xaiv Tseg Cia, tus Mexiyas, uas kuv hais lus tim khawv txog hauv Nws lub npe dawb huv, tus uas yog Yexus Khetos, amees.