Cov Txiv Ntoo
Cia li muab nej qhov muag thiab nej lub siab tsom ntsoov rau tus Cawm Seej Yexus Khetos thiab txoj kev xyiv fab mus ib txhis uas los ntawm Nws tib leeg xwb.
Kuv paub nej xav li cas! Ib zaj ntxiv ces peb yuav mloog Thawj Tswj Hwm Nelson hais lus. Kuv cia siab tias kuv yuav pab nej tsis tsaug zog ob peb feeb ntxiv thaum peb tos peb tus yaj saub, kuv thiaj li tau xaiv ib lub ntsiab txaus nyiam: kuv yuav hais txog cov txiv ntoo.
Tau ntev lawm tib neeg saib cov txiv ntoo rau nqi vim muaj xim zoo nkauj, cov tawv sib txawv thiab qab zib xws li cov txiv hmab, txiv tsawb, dib liab, thiab txiv nkhaus taw, los sis lwm hom txiv ntoo txawv heev xws li kiwano los sis pomegranate.
Thaum Nws nyob hauv ntiaj teb, tus Cawm Seej muab cov txiv ntoo piv rau tej yam uas muaj nqis mus ib txhis. Nws hais tias, “Nej yuav pom lawv [cov txiv ntoo] nej yuav paub.” “Tsob ntoo zoo yeej txi cov txiv zoo.” Nws tau yaum peb kom muab “[cov txiv kom] tau txoj sia ntev mus ib txhis” sau los cia.
Los ntawm kev ua npau suav uas peb paub zoo los ntawm Phau Ntawv Maumoos, tus yaj saub Lihais pom tias nws nyob hauv “ib lub roob moj sab qhua uas tsaus ntuj thiab muaj kev nyuaj siab.” Muaj dej vuab tsuab, kev tsaus ntuj uas muaj huab zig niab, tej kev txawv, thiab tej kev uas txwv tsis pub mus, thiab ib tug nqaj hlau uas raws ib txoj kev ti thiab nqaim mus rau ib tus ntoo uas muaj “cov txiv uas neeg xav tau kom muaj kev zoo siab.” Hais txog kev ua npau suav no, Lihais hais tias, “Kuv tau noj cov txiv ntawd; … cov txiv ntawd qab zib tshaj txhua yam uas kuv tau noj yav tas los. … [Thiab] cov txiv ntawd ua rau kuv tus ntsuj plig muaj kev xyiv fab loj heev.“Cov txiv no yeej yog “ib yam txiv uas qab tshaj txhua yam txiv.”
Lub Ntsiab ntawm tus Ntoo thiab cov Txiv Ntoo
Tus ntoo uas muaj cov txiv zoo tshaj plaws yog lub cim txog dab tsi? Yog “Vajtswv txoj kev hlub” thiab qhia txog peb Leej Txiv Saum Ntuj Ceeb Tsheej txoj hau kev txhiv dim uas zoo kawg nkaus. “Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”
Cov txiv uas muaj nqis no yog ib lub cim txog cov koob hmoov zoo kawg uas los ntawm tus Cawm Seej txoj Kev Theej Txhoj. Peb yuav rov muaj txoj sia tom qab lub neej no, thiab los ntawm peb txoj kev ntseeg Yexus Khetos, peb txoj kev hloov siab lees txim, thiab kev ua raws li cov lus txib, peb yuav txais kev zam txim rau peb tej kev txhaum thiab muaj ib hnub peb yuav ua neeg dawb huv sawv rau ntawm peb Leej Txiv thiab Nws Leej Tub xub ntiag.
Qhov uas peb noj cov txiv ntoo kuj yog ib lub cim txog qhov uas peb txais cov kab ke thiab kev khi lus ntawm txoj moo zoo—thaum ua kev cai raus dej, txais lub txiaj ntsim Vaj Ntsuj Plig Dawb Huv, thiab mus rau hauv tus Tswv lub tsev kom txais vaj txiaj ntsim lub hwj chim los ntawm Vajtswv. Los ntawm Yexus Khetos txoj kev tshav ntuj thiab thaum peb coj raws li peb tej kev khi lus, peb txais tau kev cog lus tias peb yuav nrog peb tsev neeg ncaj ncees nyob mus ib txhis li.
Tus tim tswv yeej piav tias cov txiv yog “yog qhov uas xyiv fab tshaj plaws rau yus tus ntsuj plig.” Yeej yog li ntawd!
Nyuaj Ua Ncaj
Ib yam li peb txhua tus tau kawm, tom qab yus noj cov txiv ntawm txoj moo zoo, kev ua ncaj thiab rau siab ntseeg tus Tswv Yexus Khetos tsis yooj yim. Ib yam li tau hais ntau zaus hauv lub rooj sab laj no, peb tseem raug cuam tshuam, kev dag ntxias, kev paub tsis tseeb, thiab kev ntxhov hnyo uas sim ua rau peb tsis nco txog tej kev xyiv fab thiab tej yam zoo uas peb twb tau txais lawm.
Vim muaj tus yeeb ncuab no, Lihais txoj kev ua npau suav kuj muaj lus ceeb toom! Nyob tus dej sab tid muaj ib lub tsev loj uas muaj neeg laus neeg hluas huv tib si taw tes, thuam, thiab cem cov neeg ncaj ncees uas coj raws li Yexus Khetos.
Cov neeg hauv lub tsev ntawd thuam thiab luag cov uas ua raws li cov lus txib, lawv xav rhuav lawv txoj kev ntseeg Yexus Khetos thiab Nws txoj moo zoo. Thiab vim lawv hais lus tawm tsam kom cov ntseeg ua xyem xyav thiab ntxub, ib txhia ntawm cov uas twb saj cov txiv lawm txaj muag heev. Tej yam cuav ntawm lub ntiaj teb ntxias lawv; lawv tig mus deb ntawm cov txiv; thiab raws li cov vaj lug kub hais, “lawv … poob mus rau tej kev uas txwv tsis pub mus thiab … ploj mus.”
Nyob hauv peb lub ntiaj teb hnub no, tus yeeb ncuab tau txib cov ua hauj lwm dhau sij hawm, kom ua rau lub tsev loj thiab dav muaj chaw ntxiv. Kev ua kom loj loj dav dav ntxiv twb hla tus dej, xav roos peb tsev, es cov uas taw tes thiab thuam qw nrov nrov tas hnub tas hmo nrog lawv tej lub paj taub hais lus kom nrov.
Thawj Tswj Hwm Nelson piav hais tias, “Tus yeeb ncuab siv zog rhuav tib neeg zaj lus tim khawv thiab tab kaum tus Tswv tej hauj lwm.” Cia peb nco txog Lihais tej lus: “Peb tsis quav ntsej lawv.”
Txawm peb tsis tas ntshai los, peb yuav tsum zov saib xyuas. Muaj tej lub sij hawm thaum tej yam me tab kaum peb sab ntsuj plig. Thov kom tsis txhob cia nej tej lus nug, lwm tus tej lus thuam, cov phooj ywg uas tsis ntseeg, los sis tej kev ua yuam kev thiab kev poob siab ua rau nej tig mus ntawm cov koob hmoov qab zib, dawb huv, zoo kawg nkaus, tas siab tas ntsws uas los ntawm cov txiv ntoo uas muaj nqis heev. Cia li muab nej qhov muag thiab nej lub siab tsom ntsoov rau tus Cawm Seej Yexus Khetos thiab txoj kev xyiv fab mus ib txhis uas los ntawm Nws tib leeg xwb.
Jason Hall txoj Kev Ntseeg
Thaum lub Rau Hli Ntuj, kuv tus poj niam, Kathy, thiab kuv wb mus koom Jason Hall lub ntees tuag. Thaum nws tas sim neej, nws muaj 48 xyoo thiab nws yog pawg txwj laug tus thawj tswj hwm.
Nov yog Jason tej lus txog ib yam xwm txheej uas hloov nws lub neej:
“[Thaum muaj 15 xyoos] kuv raug xwm txheej thaum kuv dhia dej. … [Dam] kuv caj dab thiab kuv tuag tes taw txij ntawm lub hauv siab mus rau kuv txhais ko taw. Kuv kav tsis tau kuv txhais ceg hlo li thiab kav tsis tau kuv caj npab zoo. Kuv tsis txawj taug kev, sawv ntsug, … los sis noj mov kuv tus kheej. Kuv tsis tshua txawj ua pa los sis hais lus.”
“Kuv thov tias, ‘Leej Txiv [Saum Ntuj Ceeb Tsheej], tsuas yog kuv siv tau kuv txhais tes, kuv paub kuv ua tau. Thov, Leej Txiv, thov. …
“… ‘Kuv tseg cia kuv txhais ceg rau koj os, Leej Txiv; kuv tsuas [thov] kom kuv siv tau kuv txhais tes.’”
Jason siv tsis taus nws txhais tes tom qab ntawd. Nej puas hnov cov suab los ntawm lub tsev loj ntawd? “Jason Hall, Vajtswv tsis mloog koj tej lus thov! Yog tias Vajtswv hlub koj, ces ua cas Nws yuav tseg koj li no? Vim li cas yuav ntseeg Khetos?” Jason Hall twb hnov lawv lub suab hais li no, tiam sis nws tsis tau quav ntsej. Tiam sis nws noj cov txiv ntawm tus ntoo. Nws txoj kev ntseeg Yexus Khetos yeej ruaj khov kho. Nws tau kawm ntawv tiav thiab yuav Kolette Coleman nyob hauv lub Tuam Tsev Salt Lake, tus uas nws hais tias yog tus nws hlub tas nws lub neej. Tom qab nkawd sib yuav tau 16 xyoo, muaj ib qho txuj ci ntxiv, vim nkawd tus tub, Coleman, yug los.
Nkawd tau ua li cas kom nkawd txoj kev ntseeg loj tuaj? Kolette piav tias: “Wb tau tso siab rau Vajtswv txoj hau kev. Thiab ua rau wb muaj kev cia siab. Wb twb paub tias [yuav muaj ib hnub] Jason yuav zoo mob huv tib si. … Wb paub tias Vajtswv tau muab ib tug Cawm Seej, [Yexus Khetos,] rau peb, tus uas Nws txoj kev theej txhoj pab peb ntsia rau yav tom ntej thaum twg peb xav tso tseg xwb.”
Coleman uas muaj 10 xyoo, thaum nws hais nyob hauv Jason lub ntees tuag, hais tej lus uas nws txiv qhia nws tias: “Leej Txiv Saum Ntuj Ceeb Tsheej [muaj] ib txoj hau kev rau peb, kev ua neej hauv lub ntiaj teb no yuav zoo kawg, thiab peb nyob tau nrog ib tsev neeg. … Tiam sis … peb yuav tsum raug tej yam uas nyuaj thiab peb yuav ua yuam kev.”
Coleman hais ntxiv: “Leej Txiv Saum Ntuj Ceeb Tsheej txib Nws Leej Tub, Yexus, los rau hauv lub ntiaj teb. Nws txoj hauj lwm yog kom ua neeg zoo tag nrho. Kho neeg. Hlub lawv. Ces raug peb txhua tus txoj kev mob, kev tu siab, thiab kev txhaum. Ces Nws tuag theej peb.” Coleman hais tias, “Vim Nws ua li no, Yexus paub kuv xav li cas tam sim no.
“Peb hnub tom qab Yexus tuag, Nws … rov muaj sia nrog Nws lub cev zoo tag nrho. Qhov no yeej tseem ceeb rau kuv vim kuv paub tias … kuv [txiv] lub cev yuav zoo tag nrho thiab peb tsev neeg yuav nyob ua ke.”
Ces Coleman xaus lus: “Txhua hmo txij thaum kuv yog ib tug me nyuam mos liab los, kuv txiv hais rau kuv tias, ‘Koj txiv hlub koj, Leej Txiv Saum Ntuj Ceeb Tsheej hlub koj, thiab koj yog ib tug tub zoo.’”
Muaj Kev Xyiv Fab Vim Muaj Yexus Khetos
Thawj Tswj Hwm Russell M. Nelson piav vim li cas tsev neeg Hall muaj kev xyiv fab thiab kev cia siab. Nws tias:
“Peb txoj kev xyiv fab yeej tsis nyob ntawm seb peb raug dab tsi hauv peb lub neej tiam sis kev xyiv fab nyob ntawm seb peb tsom ntsoov rau dab tsi hauv peb lub neej.
“Thaum peb tsom ntsoov rau Vajtswv txoj kev cawm seej thiab Yexus Khetos thiab Nws txoj moo zoo … peb yuav muaj kev xyiv fab txawm peb raug dab tsi los xij nyob hauv peb lub neej. Kev xyiv fab yeej los ntawm Nws thiab muaj kev xyiv fab vim muaj Nws. Nws yog lub hauv paus ntawm tag nrho kev xyiv fab. …
“Yog peb ua raws li tej yam uas neeg ntiaj teb qhia … , peb yuav tsis muaj kev xyiv fab. … [Kev xyiv fab] yog ib lub txiaj ntsim uas muaj thaum yus ua tib zoo sim ua neej ncaj ncees, raws li Yexus Khetos qhia.”
Kev Cog Lus Thaum Nej Rov Qab Los
Yog tias nej twb tsis tau noj cov txiv ntoo no tau ntev lawm, thov nej paub tias tus Cawm Seej yeej xyab rawv Nws txhais npab tas hnub li. Nws hlub nej thov nej, “Hloov siab lees txim thiab los cuag kuv.” Nws cov txiv los muaj nplua mias thiab yeej tsis tu. Siv tsis tau nyiaj yuav li, thiab yuav tsis txwv leej twg uas ua siab ncaj xav noj cov txiv.
Hais rau nej cov uas xav rov qab mus rau tus ntoo thiab rov qab saj cov txiv dua, cia li thov nej Leej Txiv Saum Ntuj Ceeb Tsheej. Cia li ntseeg Yexus Khetos thiab lub hwj chim ntawm Nws txoj kev theej txhoj. Kuv cog lus rau nej tias thaum nej ntsia ntsoov tus Cawm Seej “nrog txhua txoj kev xav,” ces cov txiv ntoo yuav los ua nej li, qab zib rau nej, thiab ua rau nej xyiv fab heev, “ib lub txiaj ntsim uas zoo tshaj ntawm tag nrho Vajtswv tej txiaj ntsim.”
Peb lub lim tiam no, kuv tau pom kev xyiv fab los ntawm tus Cawm Seej cov txiv, thaum Kathy wb koom kev muab lub Tuam Tsev Lisbon Portugal fij tseg. Qhov tseeb ntawm txoj moo zoo twb nthuav tawm rau Portugal thaum xyoo 1975 thaum lawv tsa kev cai pub kev ywj siab teev ntuj li cas los tau. Nim no muaj Haiv Neeg Ntseeg ntau uas thaum lawv xub saj cov txiv ces tsis muaj pawg ntseeg, tsis muaj tej tsev koom txoos, thiab tsis muaj ib lub tuam tsev ze dua li 1,000 mais (1,600 km), lawv xyiv fab nrog peb hais tias yuav muaj cov txiv ntoo muaj nqis ntawd nyob hauv tus Tswv lub tsev nyob hauv Lisbon, Portugal. Kuv yeej hwm thiab qhuas cov Neeg Ntseeg hauv Hnub Nyoog Kawg uas tau tso siab plhuav rau tus Cawm Seej.
Tus Cawm Seej hais tias, “Tus uas txuas rau ntawm kuv, thiab kuv txuas rau ntawm nws, tus ntawd yuav txi txiv ncw; yog nej tsis txuas rau ntawm kuv, nej yeej ua tsis tau ib yam dab tsi li.”
Hais tag kis no rau cov mej zeej ntawm lub Koom Txoos nyob thoob plaws lu ntiaj teb no, Thawj Tswj Hwm Nelson hais tias, “Kuv cov kwv tij thiab cov muam, nej coj yam ntxwv txog cov txiv ntoo uas los ntawm kev ua raws li Yexus Khetos tej lus qhia.” Ces nws hais tias: “Kuv ua nej tsaug! Kuv hlub nej!”
Peb hlub koj, Thawj Tswj Hwm Nelson.
Kuv yog ib tug ua pov thawj txog lub hwj chim ntawm kev tshwm sim uas peb tus Thawj Tswj Hwm muaj. Nws yog Vajtswv tus yaj saub. Ib yam li Lihais puag thaum ub, Thawj Tswj Hwm Russell M. Nelson thov peb thiab tag nrho Vajtswv tsev neeg los noj cov txiv ntoo. Thov kom peb yuav txo hwj chim thiab muaj zog txaus ua raws li nws hais.
Kuv txo hwj chim ua tim khawv tias Yexus Khetos yog Vajtswv Leej Tub. Nws txoj kev hlub, Nws lub hwj chim, thiab Nws txoj kev tshav ntuj ua rau peb txais tau txhua yam uas muaj nqis kav ib txhis. Kuv hais lus tim khawv li no los ntawm Yexus Khetos lub npe, amees.