Kwv Peb tus Ntoo Khaub Lig
Qhov uas nej kwv nej tus ntoo khaub lig thiab coj raws li Nws txhais hais tias nej tseem muaj kev ntseeg taug tus Tswv txoj kev thiab tsis txhob ua li neeg ntiaj teb ua.
Cov kwv tij thiab cov muam, peb tau txais tej lus qhia zoo kawg nkaus los ntawm peb cov thawj coj tau ob hnub no. Kuv ua tim khawv rau nej tias yog peb sim ua raws li tej lus qhia zoo rau peb lub caij nyoog no hauv peb lub neej, tus Tswv, los ntawm Nws txoj kev tshav ntuj, yuav pab peb txhua tus kwv peb tus ntoo khaub lig thiab ua rau peb tej nra tsis hnyav.
Thaum nyob ze Xixaleyas Filipis, tus Cawm Seej tau qhia Nws cov thwj tim tias Nws yuav raug dab tsi nyob ntawm cov txwj laug, cov thawj pov thawj, thiab cov xib hwb qhia kev cai nyob hauv Yeluxalees. Nws tau qhia lawv txog Nws txoj kev tuag thiab txoj Kev Sawv Rov Los. Thaum lub sij hawm ntawd, Nws cov thwj tim tsis tau to taub zoo txog Nws ntiag tug hauj lwm hauv lub ntiaj teb no. Petus, thaum nws hnov qhov uas tus Cawm Seej hais, coj Nws mus rau ib cag thiab cheem Nws, hais tias, “Tus Tswv, thov Vajtswv txwv kom tsis txhob muaj li ntawd. Koj yeej yuav tsis raug tej no li.”
Xwv kom pab Nws cov thwj tim to taub hais tias kev mob siab ua Nws txoj hauj lwm yog kev raug txim thiab raug txom nyem, tus Cawm Seej hais tias:
“Yog leej twg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaub lig nrog kuv mus.
“Rau qhov tus uas khuv xim nws txoj sia, tus ntawd yuav tsis tau txoj sia, tiam sis tus uas tsis khuv xim nws txoj sia, vim nws ntseeg kuv, tus ntawd yuav tau txoj sia.
“Yog leej twg tau ib puas tsav yam hauv ntiaj teb no los ua nws tug, tiam sis nws txoj sia tu lawm, tej ntawd yuav muaj nqis dab tsi rau nws? Yeej tsis muaj ib yam dab tsi uas nws yuav coj mus txhiv tau nws txoj sia rov qab los li!”
Los ntawm zaj lus no, tus Cawm Seej qhia tias cov uas txaus siab coj raws li Nws yuav tsum xyeej lawv tus kheej thiab tswj hwm lawv tej kev xav tau thiab tej kev ntshaw, muab txhua yam txi, tsis hais lawv txoj sia yog yuav tsum ua li ntawd, thiab ywj lawv tus kheej rau Leej Txiv lub siab nyiam—ib yam li Nws tau ua. Qhov no yeej yog tus nqi uas yuav tsum them kom ib tug ntsuj plig txais kev cawm seej. Yexus txhob txhwm siv lub cim ntawm tus ntoo khaub lig pab Nws cov thwj tim to taub tias kev txi thiab kev mob siab ua raws li tus Tswv lub hom phiaj txhais li cas tiag. Tus ntoo khaub lig yog ib lub cim uas Nws cov thwj tim thiab cov neeg nyob hauv lub Nceeg Vaj Loos paub zoo vim tias cov Neeg Loos yuam cov uas yuav raug ntsia kwv lawv tus ntoo khaub lig tab meeg txhua tus mus rau qhov chaw uas yuav muab lawv tua tuag.
Tsuas yog tom qab tus Cawm Seej Sawv Rov Los cov thwj tim thiaj li qhib siab to taub txhua yam uas tau sau txog Nws thiab lawv yuav tsum ua li cas txij thaum ntawd mus.
Ib yam li ntawd, cov kwv tij thiab cov muam, peb txhua tus yuav tsum qhib peb lub siab kom to taub ntxiv txog txoj kev kwv peb tej ntoo khaub lig thiab txoj kev coj raws li Nws. Peb kawm los ntawm cov vaj lug kub hais tias cov uas xav kwv lawv tus ntoo khaub lig yuav hlub Yexus Khetos heev lawv thiaj yuav tsis pub lawv tus kheej ua tej yam uas Vajtswv tsis ua thiab txhob ntsaw dab tsi hauv ntiaj teb thiab ua raws nraim li Nws cov lus txib.
Qhov uas peb mob siab xav tso txhua yam uas tsis yog raws li Vajtswv lub siab nyiam tseg thiab muab txhua txi tseg thiab ua raws li Nws tej lus qhia yuav pab peb nyiaj mus thaum peb ua raws li Yexus Khetos txoj moo zoo—tsis hais thaum peb raug kev tsim txom, thaum peb qaug zog, los sis thaum raug tej neeg tej lub tswv yim uas tawm tsam Nws cov lus qhia.
Piv txwv hais tias, rau nej cov uas tseem tsis tau nrhiav tau ib tug khub nyob mus ib txhis thiab nej kho siab thiab tsis muaj kev cia siab, los sis nej cov uas twb sib nrauj thiab xav tias tsis muaj leej twg nco nej, kuv qhia nej tias qhov uas nej ua raws li tus Cawm Seej hais kom kwv nej tus ntoo khaub lig thiab coj raws li Nws txhais hais tias nej tseem muaj kev ntseeg taug tus Tswv txoj kev, ua neeg tsim nyog, thiab tsis txhob ua li neeg ntiaj teb ua kom tshem tau peb txoj kev cia siab rau Vajtswv txoj kev hlub thiab txoj kev muaj siab hlub tshua.
Tej ntsiab cai no los kuj hais rau nej cov uas yog poj niam nyiam poj niam los sis txiv neej nyiam txiv neej thiab nej poob siab thiab pab tsis tau nej tus kheej. Thiab tej zaum yog vim li no nej ib txhia xav tias Yexus Khetos txoj moo zoo tsis yog rau nej ntxiv li lawm. Yog tias nej xav li ntawd, kuv xav kom nej paub tias yeej muaj kev cia siab rau Vajtswv Leej Txiv thiab Nws txoj hau kev zoo siab, Yexus Khetos thiab Nws txoj kev theej txhoj, thiab kev ua raws li Nkawd cov lus txib. Raws li Nws laj lim tswv yim, lub hwj chim, kev txim lij, thiab kev siab hlub tshua zoo tag nrho, tus Tswv yuav muab peb khi ua Nws li, peb thiaj yuav mus cuag Nws thiab muaj kev cawm seej uas kav ib txhis, yog hais tias peb nyob ruaj nrees thiab khov kho ua raws li cov lus txib thiab ua ntau yam zoo tas mus lis.
Rau nej cov uas tau raug txim loj heev, kev ua raws li Nws hais no txhais hais tias yus txo hwj chim rau Vajtswv, sib tham nrog cov thawj coj ntawm lub Koom Txoos, thiab hloov siab lees txim thiab tso nej tej kev txhaum tseg. Tus txheej txheem no kuj yuav pab txhua tus uas tawm tsam kev muaj yees, xws li kev haus tshuaj phem, haus cawv, thiab kev saib duab liab qab. Ua li ntawd coj nej mus nyob ze tus Cawm Seej, tus uas thaum kawg yuav tso nej dim txim, dim kev tu siab, thiab dim kev ua cev qhev ntawm sab ntsuj plig thiab sab cev nqaij daim tawv. Tej zaum nej kuj yuav xav nrhiav kev txhawb nqa los ntawm nej tsev neeg, phooj ywg, thiab cov kws kho mob thiab cov kws pab tswv yim.
Thov tsis txhob tso tseg tom qab nej ua yuam kev thiab tsis txhob xav tias nej tsis txawj tso kev txhaum tseg thiab tsis txawj kov yeej tej kev muaj yees. Nej yuav tsum tsis txhob nres thiab ua raws li nej tej kev qaug zog thiab ua txhaum ntxiv! Cia li siv zog uas zoo npaum li nej ua taus, qhia los ntawm nej tej hauj lwm hais tias nej xav ua neeg huv, raws li tus Cawm Seej qhia. Tej lub sij hawm tej kev kho teeb meem yuav los ntau lub hlis tom qab uas yus siv zog. Kev cog lus hauv Phau Ntawv Maumoos hais tias “twb yog los ntawm txoj kev tshav ntuj peb thiaj tau txais kev cawm seej, tom qab peb tau ua txhua yam uas peb muaj peev xwm ua,” yeej yog hais rau peb txhua tus. Thov nco ntsoov tias tus Cawm Seej lub txiaj ntsim kev tshav ntuj tsis yog ib qho uas peb txais tau tsuas yog ‘tom qab’ peb tau ua txhua yam xwb. Peb yeej txais tau Nws txoj kev tshav ntuj ua ntej, tom qab, thiab thaum lub sij hawm uas peb siv zog ua tej yam.
Kuv ua tim khawv tias thaum peb yeej meem sim kov yeej peb tej teeb meem, Vajtswv yuav foom koob hmoov rau peb muab tej txiaj ntsim kev ntseeg kom kho mob thiab ua tej txuj ci tseem ceeb. Nws yuav ua tej yam rau peb uas peb ua tsis taus rau peb tus kheej.
Tsis tas li ntawd, cov uas tu siab, npau taws, chim siab, los yog tseem nco ntsoov tej kev nyuaj siab vim yus raug ib yam uas tsis tsim nyog rau yus raug, qhov uas yus kwv yus tus ntoo khaub lig thiab coj raws li tus Cawm Seej txhais hais tias yus yuav tso tej kev xav li no tseg thiab tig mus rau tus Tswv nws thiaj li yuav pab peb dim tej kev xav no thiab pab peb nrhiav tau kev kaj siab lug. Ntshe yog peb tsis kam tso tej kev xav phem li no tseg, ces tej zaum peb yuav ua neej tsis raws li tus Tswv tus Ntsuj Plig hauv peb lub neej. Peb tsis muaj peev xwm sawv lwm tus cev hloov siab lees txim, tiam sis peb zam txim rau lawv los tau—yog peb tsis txaus siab cia cov uas ua phem rau peb kav peb.
Cov vaj lug kub qhia tias muaj ib txoj kev dim tej xwm txheej no—thaum peb caw tus Cawm Seej los pab peb muab lub siab tshiab pauv peb lub siab tawv. Yog peb xav kom muaj li no, peb yuav tsum los cuag tus Tswv nrog peb tej kev qaug zog, thiab thov Nws pab thiab zam txim pub rau peb, qhov tseem ceeb yog thaum hnub Sunday dawb ceev thaum peb txais lub cim nco txog. Thov kom peb nrhiav Nws txoj kev pab thiab thov kom peb ua ib yam uas tseem ceeb thiab nyuaj heev thaum peb zam txim rau cov uas ua rau peb mob peb thiaj kho tau peb tus kheej. Kuv cog lus rau nej tias yog nej ua li ntawd, thaum hmo ntuj nej yuav txais kev nplij siab vim tus Tswv pub nej nyob kaj siab lug.
Thaum tus Yaj Saub Yauxej Xamiv nyob hauv lub Tsev Kaw Liberty, nws sau ib tsab natwv rau cov mej zeej hauv lub Koom Txoos uas qhia txog tej yuav muaj los yav tom ntej hais txog tej xwm txheej no. Nws sau hais tias, “Txhua txoj kev tswj thiab kev kav, tej nom tswv thiab tej lub hwj chim, yuav tshwm sim los thiab yuav muab cob rau tag nrho cov uas rau siab nyiaj rau Yexus Khetos txoj moo zoo.” Yog li ntawd, kuv cov kwv tij thiab cov muam, cov uas ris tus Cawm Seej lub npe, tso siab rau Nws tej lus cog tseg thiab nyiaj kom mus txog thaum kawg, yuav txais kev cawm seej thiab yuav nrog Vajtswv nyob zoo siab tsis paub kawg.
Peb txhua tus muaj tej xwm txheej nyuaj heev hauv peb lub neej uas ua rau peb tu siab, pab tsis tau peb tus kheej, tsis cia siab, thiab qaug zog. Tej zaum tej kev xav no yuav ua rau peb xav nug tus Tswv hais tias: “Vim li cas kuv raug tej xwm txheej no?” los sis “Vim li cas tsis yog raws li kuv xav tau? Kuv yeej ua txhua yam kuv ua taus kom kwv kuv tus ntoo khaub lig thiab coj raws li tus Cawm Seej!”
Kuv cov phooj ywg zoo, peb yuav tsum nco ntsoov tias kev kwv peb tus ntoo khaub lig yog kev txo hwj chim thiab kev tso siab rau Vajtswv thiab Nws laj lim tswv yim uas nyob mus ib txhis. Peb yuav tsum lees hais tias Nws paub peb txhua tus thiab tej yam peb xav tau. Peb kuj yuav tsum lees hais tias tus Tswv kev teem sij hawm yeej txawv peb txoj kev teem sij hawm. Tej zaus peb nrhiav ib txoj koob hmoov thiab teem sij hawm rau tus Tswv foom pub rau peb. Peb yuav tsum tsis txhob xav tias peb yuav tso siab rau Nws tsuas yog Nws ua li peb xav ua ntej txog lub sij hawm uas peb teem tseg. Thaum peb ua li no, peb yeej zoo li cov Neeg Nifais uas tsis ntseeg nyob puag thaum ub, es lawv thuam lawv cov kwv tij hais tias twb dhau lub sij hawm kom muaj raws li Xamuyees tus Neeg Lamas tej lus, ua rau cov uas ntseeg ntxhov siab heev. Peb yuav tsum tso siab rau tus Tswv thiab nyob twj ywm thiab paub tias Nws yog Vajtswv, Nws paub txhua yam, thiab Nws paub peb txhua tus.
Tsis ntev tas los kuv muaj cib fim txhawb pab ib tug poj ntsuam hu ua Franca Calamassi, uas muaj mob heev. Niam Tais Calamassi yog tib tug mej zeej ntawm nws tsev neeg uas koom Yexus Khetos lub Koom Txoos no. Txawm yog nws tus txiv tsis tau ua kev cai raus dej, nws kam ntsib cov tub txib thiab tau koom kev sib ntsib hauv lub Koom Txoos ntau. Txawm yog li ntawd los, Niam Tais Calamassi rau siab ntseeg thiab tu nws plaub tug me nyuam nrog rau Yexus Khetos txoj moo zoo. Ib xyoo tom qab nws tus txiv tas sim neej no, Niam Tais Calamassi tau coj nws cov me nyuam mus rau lub tuam tsev thiab tau ua cov kab ke dawb ceev ua kev cai sib khi ua ib tsev neeg. Tej lus cog tseg los ntawm cov kab ke no ua rau nws muaj kev cia siab, kev xyiv fab, thiab kev zoo siab uas pab nws ua neej.
Thaum nws pib mob, nws tus npisov tau foom koob hmoov rau nws. Thaum lub sij hawm ntawd nws qhia nws tus npisov tias nws txaus siab ua raws li tus Tswv lub siab nyiam, es nws qhia tias nws muaj kev ntseeg txais kev kho mob thiab muaj kev ntseeg nyiaj mus kom txog thaum kawg ib yam thiab.
Thaum kuv tuaj xyuas nws, kuv tuav Niam Tais Calamassi tes thiab saib nws qhov muag, kuv pom cov tim tswv txoj kev ci ntsa iab los ntawm nws lub ntsej muag—uas qhia txog nws txoj kev ntseeg Vajtswv txoj hau kev thiab nws txoj kev cia siab rau Leej Txiv txoj kev hlub rau nws. Kuv twb pom nws txoj kev rau siab xav nyiaj kom mus txog thaum kawg los ntawm kev kwv nws tus ntoo khaub lig, txawm nws raug teeb meem li cas los. Tus niam tais no lub neej yeej yog ib zaj lus tim khawv txog Khetos, uas qhia txog nws txoj kev ntseeg thiab txoj kev teev tiam Yexus.
Kuv cov kwv tij thiab cov muam, kuv ua tim khawv rau nej tias yog peb xav kwv peb tus ntoo khaub lig thiab coj raws li tus Cawm Seej peb yuav tsum coj raws li Nws tus yam ntxwv thiab siv zog hloov los ua neeg zoo li Nws, ua siab ntev nyiaj tej xwm txheej hauv lub neej no, xyeej tej kev ntshaw ntawm tus neeg ntawm lub ntiaj teb no, thiab cia siab tos ntsoov tus Tswv. Tus Sau Nkauj sau tias:
“Cia siab rau tus Tswv! Cia li ntseeg, tsis txhob poob siab. Cia siab rau tus Tswv nkaus xwb.”
“Nws yog tus tsom kwm thiab yog tus pab peb.”
Kuv ua tim khawv rau nej tias yog peb coj raws li peb tus Xib Hwb thiab cia siab tos ntsoov Nws, tus uas kho tau peb lub neej, ces Nws yuav cia peb tus ntsuj plig so thiab ua rau peb tej nra tsis hnyav thiab yooj yim ris. Kuv ua tim khawv txog tej yam no los ntawm Yexus Khetos lub npe, amees.