Hwm Nws lub Npe
Vim peb muaj keeb kwm thiab kev koom siab los ntawm kev khi lus, peb ris Yexus Khetos lub npe.
Thaum cov niam tsev txiv tsev tos ib tug me nyuam yug los, lawv muaj kev lav ris xaiv lub npe rau lawv tus me nyuam mos liab. Tej zaum thaum nej yug los, nej tau txais ib lub npe uas muaj hauv nej tsev neeg tau ntev lawm. Los sis tej zaum nej muaj ib lub npe uas neeg coob muaj hauv xyoo uas nej yug los los sis nyob hauv nej cheeb tsam.
Tus yaj saub Hilamas thiab nws tus poj niam tau tis npe rau nkawd ob tug tub Nifais thiab Lihais. Hilamas qhia nws ob tug tub:
“Kuv tau muab ob lub npe ntawm peb thawj cov yawg koob … xwv kom thaum neb nco txog neb ob lub npe neb yuav nco txog nkawd; thiab thaum neb nco txog nkawd neb yuav nco txog tej uas nkawd tau ua; … [thiab] paub tias cov neeg tau hais tseg, thiab tau sau tseg tias, nkawd yeej ua zoo.
“Yog li ntawd, kuv ob tug tub es, kuv xav kom neb ua tej uas zoo.”
Nifais thiab Lihais ob lub npe pab nkawd nco txog tej yam uas nkawd ob tug yawg koob ua zoo thiab pab kom nkawd xav ua zoo ib yam li ntawd.
Cov viv ncaus, txawm peb nyob qhov twg los, txawm peb hais yam lus twg, txawm peb muaj 8 xyoo los yog 108 xyoo, los peb sawv daws muaj ib lub npe tshwj xeeb uas muaj tej hom phiaj no zoo ib yam.
“Nej twb ua kev cai raus dej rau sawv daws pom lawm hais tias, nej yog cov uas nrog Yexus Khetos koom ib txoj sia … vim nej txhua tus puav leej koom ib lub siab rau ntawm Yexus Khetos.”
Vim peb yog cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, “peb twb cog lus tias peb yuav txaus siab ris Khetos lub npe, los ntawm txoj kab ke ua kev cai raus dej.” Los ntawm kev khi lus no, peb tau cog lus tias peb yuav nco ntsoov Nws, coj raws li Nws tej lus txib, thiab pab lwm tus. Peb rov qab cog lus tias peb txaus siab ua raws li kev khi lus no txhua Hnub Caiv thaum peb txais lub cim nco txog thiab rov qab zoo siab vim peb muaj txoj koob hmoov uas yog “lub neej tshiab.”
Kev tis npe rau peb thaum peb yug los yeej qhia tias nyias muaj nyias keeb kwm thiab ua rau peb koom nrog peb tsev neeg hauv ntiaj teb no. Tiam sis, thaum peb “yug dua tshiab” thaum peb ua kev cai raus dej, peb haj yam to taub tias peb yog leej twg. “Vim yog kev khi lus uas nej tau khi ces yuav muab nej hu ua Khetos cov me nyuam, … vim saib seb, … nws los ua nej leej txiv ntawm sab ntsuj plig; vim nej hais tias nej lub siab tau hloov los ntawm kev ntseeg nws lub npe; yog li ntawd, nej thiaj yug los ntawm nws.”
Yog li ntawd, vim peb muaj keeb kwm thiab kev koom siab los ntawm kev khi lus, peb ris Yexus Khetos lub npe. Thiab “tsis muaj dua lwm lub npe los sis lwm txoj kev los sis lwm tus txheej txheem uas txoj kev cawm seej yuav los tau rau noob neej, tsuas yog los ntawm Khetos lub npe, tus Tswv uas Muaj Hwj Chim Loj Tshaj Plaws.”
Twb paub txog Yexus lub npe ntev lawm ua ntej Nws yug los. Hais rau Vaj Ntxwv Npeyamis, ib tug tim tswv qhia tias, “Thiab nws yuav hu ua Yexus Khetos, Vajtswv Leej Tub, … thiab nws niam yuav hu ua Maivliag.” Nws txoj hauj lwm uas yog “txoj kev hlub uas txhiv dim” los twb qhia rau Vajtswv cov me nyuam thaum twg muaj txoj moo zoo hauv lub ntiaj teb, txij thaum Adas thiab Evas hnub nyoog mus txog hnub no, lawv thiaj li yuav paub “cia siab rau lub hauv paus twg kom txais kev zam txim rau lawv tej kev txhaum.”
Xyoo tas los, Thawj Tswj Hwm Russell M. Nelson tau thov cov poj niam “kom pab yav tom ntej los ntawm [lawv] txoj kev pab muab Ixayees sau los ua ke”. Nws tau caw peb nyeem Phau Ntawv Maumoos thiab “khij txhua nqe uas hais txog tus Cawm Seej.” Nws tau thov kom peb “ua tib zoo hais txog Khetos, zoo siab txog Khetos, thiab qhia txog Khetos rau [peb tsev neeg] thiab phooj ywg.” Tej zaum nej twb pom tej uas los ntawm nws cov lus cog tseg hais tias “nej thiab lawv yuav nyob ze dua li tus Cawm Seej. … Thiab tej yam yuav pib hloov thiab yuav pib muaj tej txuj ci tseem ceeb.”
Peb txoj kev cog lus tias peb yuav nco ntsoov tus Cawm Seej ua rau peb muaj zog coj yam ntxwv txog qhov tseeb thiab kev ncaj ncees—txawm peb nyob hauv ib pawg loj los sis nyob peb ib leeg xwb, qhov chaw uas tsis muaj leej twg paub peb ua li cas tsuas yog Vajtswv xwb. Thaum peb nco txog Nws thiab Nws lub npe uas peb ris, peb yeej tsis muaj chaw hauv peb lub siab rau kev sib piv los sis kev txiav txim loj heev. Thaum peb ntsia ntsoov tus Cawm Seej, peb paub tias peb yog leej twg tiag tiag—Vajtswv cov me nyuam uas Nws hlub.
Peb khi lus tias peb yuav nco ntsoov, ua rau peb tsis txhawj txog tej yam ntawm ntiaj teb, ua rau peb txoj kev ua xyem xyav txog peb tus kheej hloov los ua kev ua siab loj, thiab ua rau peb cia siab thaum raug kev sim siab.
Thiab yog peb dawm ko taw thiab vau thaum peb taug txoj kev ua raws li peb tej kev khi lus, peb yuav tsum nco txog Nws lub npe thiab Nws txoj kev ua siab hlub rau peb xwb. “Vim nws muaj hwj chim tag nrho, muaj tswv yim tag nrho, thiab muaj kev to taub tag nrho; nws thoob tsib to nrog txhua yam, thiab nws yog ib Tug uas muaj kev hlub tshua, … rau cov uas yuav hloov siab lees txim thiab ntseeg nws lub npe.” Yeej tsis muaj ib lub suab zoo tshaj qhov uas cov mob siab thiab xav ua zoo hu Yexus lub npe, vim lawv xav “ua zoo dua thiab ua neeg zoo dua.”
Thawj Tswj Hwm Nelson qhia tias: “Hnub uas yus ua ib tug neeg Ntseeg Khetos nyob twj ywm thiab txaus siab los twb dhau lawm. Nej txoj kev teev ntuj tsis yog tuaj koom lub koom txoos thaum Hnub Caiv. Yeej yuav tsum ua ib tug thwj tim tseeb txij Hnub Sunday sawv ntxov mus txog Saturday hmo ntuj. … Tsis muaj ib tug thwj tim ntawm tus Tswv Yexus Khetos uas ua tau ib nrab sij hawm xwb.”
Peb txoj kev txaus siab ris Khetos lub npe tsis yog tej lus uas peb lam hais xwb. Tsis yog kev lam cog lus los sis ua raws li kab lig kev cai. Tsis yog ib txoj kab ke xwb los sis ib daim npe uas peb coj. Tsis yog ib cov lus uas peb tso rau lub txee los yog muab dai rau ntawm phab ntsa. Nws lub npe yog ib lub npe uas peb “coj,” peb sau cia rau hauv peb lub siab, thiab “yees rau [peb] lub ntsej muag.”
Peb yuav tsum nco ntsoov tus Cawm Seej txoj kev theej txhoj, txhua lub sij hawm, los ntawm peb tej kev xav, tej yam peb ua, thiab kev sib tham nrog lwm tus. Tsis yog Nws nco ntsoov peb tej npe, tiam sis Nws nco ntsoov peb txhua lub sij hawm. Tus Cawm Seej qhia tias:
“Vim ib tug poj niam puas yuav muaj cuab kav hnov qab tau nws tus me nyuam uas tseem noj nws mis, hais tias nws tsis muaj kev khuv leej rau tus tub uas nws yug? Muaj tseeb tiag, tej zaum lawv yuav hnov qab tau, tiam sis kuv yeej yuav tsis hnov qab nej li, auj tsev neeg Ixayees.
Saib seb, kuv tau muab nej txaug rau hauv kuv tej xib teg.”
Thawj Tswj Hwm George Albert Smith qhia tias, “Hwm nej tej npe, vim muaj ib hnub nej yuav muaj cib fim thiab kev lav ris qhia … rau nej Leej Txiv uas nyob saum ntuj ceeb tsheej … hais tias nej tau ua li cas rau [tej npe ntawd].”
Ib yam li ob lub npe uas tau xaiv zoo rau Nifais thiab Lihais, puas yog yuav hais thiab sau ntawv txog peb hais tias peb yog tus Tswv Yexus Khetos cov thwj tim tseeb? Peb puas hwm Yexus Khetos lub npe uas yog lub npe uas peb txaus siab ris? Peb puas yog ib tug uas mus txhawb pab thiab ib tug tim khawv txog Nws txoj kev siab hlub thiab Nws lub hwj chim uas txhiv peb dim?
Tsis ntev tas los, kuv mloog Phau Ntawv Maumoos. Nyob hauv tshooj kawg hauv phau 2 Nifais, kuv hnov Nifais hais ib yam uas uas kuv yeej tsis tau nyeem zoo li ntawd. Nyob hauv tag nrho nws cov ceev xwm txheej, nws qhia thiab ua tim khawv txog “tus Txhiv Dim,” “Ixayees Tus Dawb Huv,” “Vajtswv tus Me Nyuam Yaj,” thiab tus “Mexiyas.” Tiam sis thaum nws xaus nws zaj lus, kuv hnov nws hais tej lus no: “Kuv zoo siab rau kev qhia meej; kuv zoo siab rau qhov tseeb; kuv zoo siab rau kuv tus Yexus, vim nws tau txhiv kuv tus ntsuj plig dim ntawm ntuj txiag teb tsaus.” Thaum kuv tau hnov tej lus no, kuv lub siab xyiv fab thiab kuv yuav tsum rov qab mloog ntau zaus. Kuv twb nco txog nqe ntawd ib yam li kuv nco txog kuv lub npe; ua rau kuv xav ib yam li tau hais kuv lub npe.
Tus Tswv tau hais tias, “Muaj tseeb tiag, cov neeg no uas txaus siab ris kuv lub npe tau koob hmoov; vim yuav muab lawv hu los ntawm kuv lub npe; thiab lawv yog kuv cov neeg.”
Vim peb yog cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, thov kom peb yuav “zoo siab [ris] Khetos lub npe” Kuv ua tim khawv tias Nws yog “Vajtswv tus Me Nyuam Yaj, muaj tseeb tiag, twb yog Leej Txiv tus uas Nyob Mus Ib Txhis Leej Tub.” Los ntawm Nws tus me nyuam dawb huv lub npe, Yexus Khetos, amees.