Lub Hwj Chim uas Pab Kov Yeej tus Yeeb Ncuab
Peb yuav ua li cas thiaj tau kev kaj siab, ua li cas thiaj nco qab hais tias peb yog leej twg, thiab kov yeej tus yeeb ncuab peb lub tom txwv no?
Cov kwv tij thiab cov muam, ua nej tsaug rau txhua yam nej ua kom rais los mus ua, thiab pab lwm tus neeg rais los mus ua, cov neeg ntseeg Khetos tiag tiag thiab txais tej koob hmoov hauv lub tuam tsev dawb huv. Ua nej tsaug rau nej txoj kev rau siab ua. Nej yeej zoo kawg nkaus; nej ntxim hlub kawg li.
Kuv thov Vajtswv kom peb yuav nco qab paub txog tus Vaj Ntsuj Plig Dawb Huv vim peb to taub zoo hais tias peb yog Vajtswv cov me nyuam. “Tsev Neej: Ib zaj Lus Tshaj Tawm Rau lub Ntiaj Teb” hais tias: “Txhua txhia tus tib neeg—txiv neej thiab poj niam—raug tsim muaj yam ntxwv zoo li Vajtswv. Txhua txhia tus yog nkawm niam txiv saum ntuj ceeb tsheej ib tug tub ntsuj plig los yog ib tug ntxhais ntsuj plig uas nkawd hlub thiab xws li txhua tus yog li ntawd, txhua txhia tus muaj ib tug cwj pwm thiab txoj hmoov los saum ntuj los.” Peb yog “cov ntsuj plig zoo uas Vajtswv tau muab tshwj tseg kom ua los pab tej yam npaj rau tes hauj lwm yuav ua thaum lub caij nyoog kawg.” Thawj Tswj Hwm Russell M. Nelson hais tias: “Nej raug qhia hauv lub ntuj ntsuj plig pab npaj nej rau txhua yam tsav thiab yam dab tsi los xij uas nej yuav raug hauv lub caij nyoog kawg no. (saib Q&K 138:56). Zaj lus qhia ntawd tseem nyob hauv nej nruab siab!”
Nej yog Vajtswv cov tub cov ntxhais uas Nws xaiv cia lawm. Nej yeej muaj hwj chim uas pab nej kov yeej tus yeeb ncuab. Tiam sis, tus yeeb ncuab, yeej paub hais tias nej yog leej twg. Nws paub tias nej los qhov twg los thiab nws xav txwv nej txoj kev muaj peev xwm hauv ntiaj teb no thiab saum ntuj thaum nws siv peb lub tom txwv los tab kaum nej:
-
Kev dag
-
Kev thaiv kev
-
Kev poob siab
Kev dag
Tus yeeb ncuab siv qhov cuab yeej uas yog kev dag hauv Mauxes lub caij nyoog. Tus Tswv tshaj tawm rau Mauxes hais tias:
“Saib seb, koj yog kuv tus tub. …
“Kuv muab ib txoj hauj lwm rau koj ua, … thiab koj zoo li kuv Tib Leeg Tub.”
Tsis ntev tom qab txoj kev ua yog toog pom no, Dab Ntxwg Nyoog sim dag ntxias Mauxes. Nws siv ib co lus txawv txav hais tias: “Mauxes, neeg leej tub, cia li pe hawm kuv.” Kev dag ntxias tsis yog qhov uas nws hais kom nws pe hawm Dab Ntxwg Nyoog xwb tiam sis kev dag ntxias kuj yog lo uas nws siv piav hais tias Mauxes yog neeg leej tub. Nco qab hais tias, tus Tswv nyuam qhuav qhia Mauxes hais tias nws yog Vajtswv ib tug tub, uas raug tsim muaj yam ntxwv zoo li Vajtswv Tib Leeg Tub.
Tus yeeb ncuab yeej rau siab ntso sim dag ntxias Mauxes, tiam sis Mauxes tsis kam thaum nws hais tias: “Dab Ntxwg Nyoog, cia li khiav ntawm kuv mus, rau qhov Vajtswv yog tib tug uas kuv yuav pe hawm, vim Vajtswv muaj yeeb koob.” Mauxes nco qab hais tias nws yog leej twg—Vajtswv ib tug tub.
Tus Tswv cov lus rau Mauxes yeej zoo ib yam li ntawd rau kuv thiab nej txhua tus. Peb raug tsim los ua yam ntxwv zoo li Vajtswv, thiab Nws muaj ib txoj hauj lwm rau peb ua. Tus yeeb ncuab sim ntxias peb kom peb tsis nco qab hais tias peb yog leej twg tiag. Yog tias peb tsis to taub hais tias peb yog leej twg, ces nyuaj rau peb to taub hais tias peb muaj cuab kav rais los mus ua tau neeg zoo li cas.
Kev thaiv kev
Tus yeeb ncuab sim thaiv peb kev ntawm Khetos thiab Nws txoj kev khi lus. Txwj Laug Ronald A. Rasband qhia zaj no hais tias: “Tus yeeb ncuab lub tom txwv yog ua kom peb tsis xav txog tej yam ntawm sab ntsuj plig, tiam sis tus Tswv xav kom peb to taub thiab ua Nws tej hauj lwm.”
Nyob hauv peb lub caij, muaj ntau yam thaiv peb kev, xws li Twitter, Facebook, Instagram, tej kev ua si, thiab ntau yam ntxiv. Tej txuj ci no yeej zoo kawg nkaus, tiam sis yog peb tsis xyuam xim, tej no yuav thaiv peb kev uas pab peb rais los mus ua neeg zoo li Vajtswv. Txoj kev ua tib zoo siv tej no yuav coj lub ntuj ceeb tsheej lub hwj chim los thiab yuav pab peb pom tau tej txuj ci loj thaum peb sim sau ib tsoom haiv neeg Ixayees uas nyob ntawm ob sab daim ntaub thaiv los ua ib ke.
Cia peb ua tib zoo thiab tsis txhob lam tau lam siv tej txuj ci tseem ceeb no. Yuav tsum pheej sim siv tej txuj ci no kom peb txav los nyob ze tus Cawm Seej thiab cia peb ua Nws tej hauj lwm thaum peb npaj rau Nws Txoj Kev Rov Los Zaum Ob.
Kev poob siab
Qhov kawg mas, tus yeeb ncuab xav kom peb yuav poob siab. Tej zaum peb yuav pib poob siab thaum peb sim muab peb lub neej piv rau lwm tus los sis xav hais tias peb tsis ua zoo li luag tej xav, los sis tsis ua zoo li peb xav.
Thaum kuv pib kawm tsev kawm ntawv qib siab, kuv tau pib poob siab. Qhov uas kuv yuav kawm tsuas kam txais plaub tus tub kawm ntawv xyoo ntawd, thiab lwm cov tub kawm ntawv yeej txawj ntse heev. Lawv twb xeem tau ntawv zoo tshaj kuv thiab tau ua ntau yam hauj lwm lawm, thiab lawv muaj siab loj vim lawv muaj peev xwm. Tom qab kuv kawm tau ob lim piam, kuv tau pib poob siab thiab tsis tso siab ntseeg, kuv yuav luag kov tsis yeej tej no.
Kuv thiaj txiav txim yog tias kuv yuav kawm qhov plaub xyoos no, ces kuv yuav tau nyeem tag nrho Phau Ntawv Maumoos txhua rau hli kawm ntawv. Txhua hnub thaum kuv nyeem, kuv pom hais tias tus Cawm Seej lo lus tshaj tawm hais tias tus Vaj Ntsuj Plig Dawb Huv yuav qhia txhua yam tsav thiab yuav pab kuv nco qab txhua yam tsav. Qhov ntawd pab kuv nco qab hais tias kuv yog Vajtswv ib tug tub, nws hais kom kuv tsis txhob piv kuv tus kheej rau lwm tus, thiab ua rau kuv tso siab ntseeg kuv lub peev xwm uas los saum ntuj los.
Kuv cov me phooj ywg, tsis txhob cia leej twg nyiag nej txoj kev zoo siab. Tsis txhob muab nej tus kheej piv rau lwm tus neeg. Nco qab ntsoov tus Cawm Seej cov lus uas hais tias: “Kuv muab kuv txojkev kaj siab tso rau nej, txoj kev kaj siab uas kuv muab pub rau nej, kuv tsis muab rau nej li neeg ntiaj teb muab. Nej tsis txhob txhawj,tsis txhob nyuaj siab thiab tsis txhob ntshai.”
Peb yuav ua li cas thiaj ua tau? Peb yuav ua li cas thiaj tau kev kaj siab no, ua li cas thiaj nco qab hais tias peb yog leej twg, thiab kov yeej tus yeeb ncuab peb lub tom txwv no?
Qhov xub thawj mas, nco qab hais tias txoj lus txib thib ib thiab tseem ceeb tshaj yog kom hlub Vajtswv kawg siab, kawg ntsws, kawg plab, kawg plawv. Txhua yam tsav uas peb ua yuav tsum yog ua vim peb hlub Nws thiab Nws Tib Leeg Tub. Thaum peb haj yam hlub Nkawd ces thaum ua raws li Nkawd cov lus qhia, peb haj yam txawj hlub peb tus kheej thiab yuav hlub lwm tus neeg thiab. Ces peb yuav pib ua hauj lwm pab tsev neeg, cov phooj ywg thiab neeg zej zog vim peb pom lawv ib yam li tus Cawm Seej pom lawv—uas yog Vajtswv cov tub thiab cov ntxhais.
Qhov thib ob, thov Leej Txiv rau ntawm Yexus Khetos lub npe, txhua hnub, txhua hnub, txhua hnub. Txoj kev thov Vajtswv yuav pab peb hnov Vajtswv txoj kev qhia thiab yuav qhia Vajtswv hais tias peb hlub Nws tiag tiag. Dhau ntawm txoj kev thov Vajtswv peb qhia peb txoj kev ris txiaj thiab thov kom tau lub zog thiab kom muaj siab loj txaus txo hwj chim los ua raws li Vajtswv lub siab nyiam thiab tau kev coj qhia ua txhua txhia yam.
Kuv yaum kom nej yuav “thov Leej Txiv kawg siab kawg ntsws, kom nej yuav muaj Khetos txoj kev hlub dawb huv, … xwv kom nej yuav rais tau los mus ua Vajtswv tej tub [thiab cov ntxhais]; kom thaum nws yuav tshwm los peb yuav zoo li nws.”
Qhov thib peb, nyeem thiab kawm Phau Ntawv Maumoos txhua hnub, txhua hnub, txhua hnub. Kuv haj yam kawm Phau Ntawv Maumoos zoo thaum kuv muaj ib lo lus nug thaum kuv tab tom nyeem. Thaum peb muaj ib lo lus nug thaum peb nyeem, peb thiaj txais tau kev tshwm sim thiab kawm paub tias tus Yaj Saub Yauxej Xamiv qhia qhov tseeb thaum nws tshaj tawm hais tias, “Phau Ntawv Maumoos [yog] phau raug tshaj txhua phau ntawv nyob hauv ntiaj teb no, … thiab tus neeg uas ua raws li phau ntawv no tej lus qhuab qhia yuav txav tau los ze rau Vajtswv dua lwm phau ntawv.” Phau Ntawv Maumoos muaj Khetos cov lus thiab pab peb nco qab seb peb yog leej twg.
Qhov kawg, ua tib zoo thov Vajtswv thaum noj lub cim nco txog txhua lub lim piam, txhua lub lim piam, txhua lub lim piam. Twb yog dhau ntawm lub pov thawj hwj tej kab ke, qhov no hais txog lub cim nco txog, peb thiaj pom tau Vajtswv lub hwj chim hauv peb lub neej. Txwj Laug David A. Bednar qhia tias: “Txoj kab ke txais lub cim nco txog yog kev dawb huv uas caw peb hloov siab lees txim tiag tiag thiab rov qab ua neeg tshiab ntawm sab ntsuj plig. Qhov uas peb txais lub cim nco txog, tsis ua rau peb txais kev zam txim rau peb tej kev txhaum. Tiam sis thaum peb ua tib zoo koom siab ua txoj kab ke dawb huv no nrog rau ib lub siab mob thiab lub siab xav ua zoo, ces peb txais lo lus cog tseg hais tias peb yuav muaj nws tus Ntsuj Plig niaj hnubnrog peb nyob.”
Thaum peb txo hwj chim noj lub cim nco txog, peb nco txog Nws txoj kev raug txom nyem hauv lub vaj dawb huv uas hu ua Khexemanes thiab Nws txoj kev txi nyob saum ntoo khaub lig. Peb qhia txoj kev ris txiaj rau Leej Txiv vim Nws xa Nws Tib Leeg Tub, peb tus Txhiv Dim los, thiab qhia tias peb puas kam ua raws li Nws cov lus txib thiab kom peb yuav nco txog Nws tas mus li. Muaj tau kev txhib peb sab ntsuj plig thaum lub cim nco txog—yog ib yam uas peb raug, nws muaj hwj chim, thiab yog ib yam uas peb xav tau.
Kuv cov phooj ywg, kuv cog lus hais tias thaum peb sim rau sib ntso ua raws li Vajtswv hais, thov Vajtswv hauv Yexus Khetos lub npe, kawm Phau Ntawv Maumoos, thiab noj lub cim nco txog, peb thiaj yuav muaj cuab kav, vim muaj tus Tswv lub dag zog, kom los kov yeej dab ntxwg nyoog kev dag ntxias, ua kom tej kev tiv thaiv peb sab ntsuj plig ploj mus, thiab kom peb tiv taus kev poob siab uas ua rau peb tsis tshua muaj cuab kav hnov peb Leej Txiv Saum Ntuj Ceeb Tsheej thiab Nws Leej Tub txoj kev hlub. Peb thiaj yuav paub tag nrho hais tias peb yog Vajtswv cov tub thiab cov ntxhais.
Cov kwv tij thiab cov muam, kuv qhia kuv txoj kev hlub rau nej thiab hais lus tim khawv tias kuv paub tias Leej Txiv Saum Ntuj Ceeb Tsheej muaj sia nyob thiab tias Yexus yog tus Khetos. Kuv hlub Nkawd. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Vajtswv lub nceeg vaj hauv ntiaj teb no. Peb raug teem tseg saum ntuj los kom sau haiv neeg Ixayees ua ke thiab npaj lub ntiaj teb rau tus Mexiyas Kev Rov Qab Los Zaum Ob. Los ntawm Yexus Khetos lub npe, amees.