Rau Siab Ntseeg, Tsis Txhob Tso Kev Ntseeg Tseg
Peb yuav tsum txhob txwm siv sij hawm txhua hnub kom txiav txoj kev sib txuas nrog lub ntiaj teb thiab cia li sib txuas nrog lub ntuj ceeb tsheej.
Tsis ntev tas los kuv tau tsim los thiab npaj kawm vaj lug kub. Kuv tau nqa kuv lub xov tooj thiab zaum ntawm kuv lub txaj ib sab es kuv xav tias kuv qhib kuv qhov app Txoj Moo Zoo cov Ntawv. Kuv qhib kuv lub xov tooj thiab yuav luag pib kawm thaum kuv pom tsib rau zaj lus xov xwm uas qhia tias kuv txais kev ntaus ntawv thiab tsab email thaum hmo ntuj. Kuv xav tias, “Kuv mam li saib tej zaj lus ntawd, ces kuv yuav kawm vaj lug kub tom qab ntawd.” Ntshe ob teev tom qab ntawd kuv tseem nyeem tej zaj ntaus ntawv, email, xov xwm, thiab tej lus uas tso hauv social media. Thaum kuv paub tias yog pes tsawg teev, kuv maj maj mus npaj ua hauj lwm. Tag kis ntawd kuv tsis tau kawm vaj lug kub, kuv thiaj li tsis tau txais kev pab rau kuv tus ntsuj plig uas kuv xav tau.
Kev Pab Sab Ntsuj Plig
Nyaj nej txhua tus feem coob to taub zaj no. Tej txuj ci technology hauv lub caij nyoog no yeej pab peb tau koob hmoov ntau. Tej ntawd pab peb sib raug zoo nrog phooj ywg thiab tsev neeg, thiab qhia xov xwm txog tej xwm txheej nyob thoob plaws lub ntiaj teb no. Tiam sis, tej ntawd kuj ua rau peb tsis nco txog kev sib raug zoo uas tseem ceeb tshaj plaws: txoj kev sib raug zoo nrog Vajtswv saum ntuj ceeb tsheej.
Kuv rov qab hais qhov uas peb tus yaj saub, Thawj Tswj Hwm Russell M. Nelson, tau hais tias: “Peb nyob hauv ib lub ntiaj teb uas muaj kev kub ntxhov thiab haj yam muaj kev sib cav. Qhov uas sawv daws siv hluas taw xob tas li thiab qhia xov xwm tawm 24 xuab moos yeej tsim txom peb lub siab tas li. Yog tias peb yuav muaj cuab kav paub tej suab uas hais lus rau peb thiab to taub tib neeg tej tswv yim uas tawm tsam qhov tseeb, peb yuav tsum kawm kom paub txais kev tshwm sim.”
Thawj Tswj Hwm Nelson twb ceeb toom hais tias, “hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.”
Ntau xyoo tas los, Thawj Tswj Hwm Boyd K. Packer tau qhia txog ib pawg mos lwj, thaum los daus ntau heev, nyob hauv ib qho chaw uas lawv tsis swm thiab ntshe lawv yuav tuag tshaib tuag nqhis. Ib co neeg uas xav pab cov mos lwj, lawv tso cov quav nyab ntau hauv cheeb tsam ntawd—tsis yog yam uas cov mos lwj nyiam noj, tiam sis lawv cia siab tias yuav pab cov mos lwj nyob txog thaum lub caij no no tas lawm. Tu siab uas cov mos lwj feem coob twb tuag lawm. Lawv tau noj cov quav nyab, tiam sis tsis tau pab lawv, thiab lawv tuag tshaib txawm yog lawv tsaus plab lawm.
Ntau zaj uas tawm tsam peb hauv hnub nyoog no yeej zoo ib yam li cov quav nyab uas pub rau cov mos lwj—peb noj tau txhua hnub, tiam sis pab tsis tau peb loj hlob.
Peb yuav nrhiav kev pab sab ntsuj plig nyob qhov twg? Feem ntau, tsis yog nyob hauv social media. Peb nrhiav taau thaum peb “txiv mus lawm tom hauv ntej” nyob hauv txoj kev khi lus, “tuav rawv tus nqaj hlau ruaj ruaj tsis tso,” thiab noj cov txiv ntawm tus ntoo uas cawm txoj sia. Qhov no txhais hais tias peb yuav tsum txhob txwm siv sij hawm txhua hnub kom txiav txoj kev sib txuas nrog lub ntiaj teb thiab sib txuas nrog lub ntuj ceeb tsheej.
Nyob hauv nws zaj npau suav, Lihais pom tib neeg uas tau noj cov txiv ces tau muab tso tseg vim yog lub hwj huam ntawm cov neeg hauv lub tsev loj thiab dav, uas yog kev muab hlob ntawm lub ntiaj teb. Cov cov tub hluas ntxhais hluas uas loj hlob hauv tej tsev ntawm cov Neeg Ntseeg hauv Hnub Nyoog Kawg, uas koom tej kev sib ntsib thiab hoob kawm hauv lub Koom Txoos, ua kab ke hauv lub tuam tsev, muaj peev xwm tso txhua yam no tseg thiab “poob mus rau tej kev uas txwv tsis pub mus thiab … ploj mus.” Vim li cas yuav muaj li no? Ntau zaus yog vim, txawm yog lawv lam ua tej yam uas pab tau yus sab ntsuj plig, lawv tsis tau hloov siab los ntseeg tiag tiag. Tau pub mov rau lawv noj tiam sis tsis tau pab lawv kom loj hlob.
Tiam sis, kuv twb ntsib nej Haiv Neeg Ntseeg hauv Hnub Nyoog Kawg hluas uas txawj ntse, muaj zog, thiab rau siab ntseeg. Nej paub tias nej yog Vajtswv cov tub thiab cov ntxhais thiab Nws muaj ib txoj hauj lwm rau nej ua. Nej hlub Vajtswv “kawg nej lub siab lub ntsws thiab lub dag lub zog.” Nej ua raws li nej tej kev khi lus thiab pab lwm tus, thaum xub thawj ua li ntawd hauv tsev. Nej muab siab rau ntseeg, hloov siab lees txim, thiab ua zoo dua txhua hnub, thiaj li ua rau nej muaj kev xyiv fab uas kav ntev. Tam sim no nej npaj txais cov koob hmoov ntawm lub tuam tsev thiab lwm lub cib fim uas nej yuav muaj vim nej coj raws li tus Cawm Seej tiag tiag. Thiab nej pab npaj lub ntiaj teb rau txoj Kev Los Zaum Ob, caw txhua tus los cuag Khetos thiab txais cov koob hmoov los ntawm Nws txoj Kev Theej Txhoj. Nej sib txuas nrog lub ntuj ceeb tsheej.
Nej yeej raug tej teeb meem thiab. Tiam sis txhua tiam neeg muaj li ntawd. Nov yog peb hnub nyoog, thiab peb yuav tsum rau siab ntseeg, tsis txhob tso kev ntseeg tseg. Kuv ua tim khawv tias tus Tswv paub txog peb tej teeb meem, thiab los ntawm Thawj Tswj Hwm Nelson txoj kev coj peb, tus Tswv npaj peb lub siab kov yeej tej ntawd. Kuv ntseeg tias tus yaj saub txoj kev hais kom muaj lub koom txoos hauv tsev, uas peb txhawb nqa los ntawm tej yam peb ua hauv peb tej pawg ntseeg, yog tsim kom pab peb nyob tau—los sis vam meej—nyob hauv hnub nyoog no uas muaj kev noj tsis txaus ntawm sab ntsuj plig.
Kev Qhia hauv Tsev
Lub koom txoos uas ua hauv tsev txhais li cas? Txhua tsev neeg yeej sib txawv nyob thoob plaws lub ntiaj teb. Tej zaum nej nyob hauv ib tsev neeg uas nyob hauv lub Koom Txoos tau ntau tiam neeg. Los sis nej yog tib tug mej zeej hauv nej tsev neeg. Tej zaum nej twb sib yuav los sis tsis tau, muaj los sis tsis muaj me nyuam hauv tsev.
Txawm yog nej raug xwm txheej dab tsi los, nej ua tau rau nej lub tsev ua lub hauv paus ntawm kev kawm txog txoj moo zoo thiab kev ua raws li txoj moo zoo. Qhov no txhais hais tias yus lav ris yus txoj kev hloov siab los ntseeg thiab kev loj hlob ntawm sab ntsuj plig. Qhov no txhais hais tias yus ua raws li Thawj Tswj Hwm Nelson tej lus ntuas “kho nej lub tsev ua ib qho chaw ntawm txoj kev ntseeg.”
Tus yeeb ncuab yuav sim yaum nej hais tias tsis tas txais kev pab txhawb nqa sab ntsuj plig los sis, qhov phem tshaj, yus tos tau. Nws yog tus uas txawj ua rau yus tsis nco qab thiab tus uas tsim kev laug sij hawm. Nws yuav ua rau nej tsom ntsoov rau tej yam uas yus xav tias yuav tsum ua tam sim no tiam sis yog tej uas tsis tseem ceeb tiag. Nws xav kom nej “ntxhov siab rau ntau yam” kom nej thiaj li txhob xav txog qhov uas yuav tsum ua tiag tiag.
Kuv zoo siab rau kuv “niam thiab txiv uas zoo,” uas tu nkawd tsev neeg nyob hauv ib lub tsev uas pub kev pab sab ntsuj plig, kev sib hlub, thiab yam ntxim saib ntxim ua zoo tsis tu tsis tseg. Tej lus qhia uas nkawd tau qhia kuv thaum kuv hluas twb pab kuv ntau heev. Cov niam tsev txiv tsev, thov nej sib raug zoo nrog nej cov me nyuam. Lawv xav tau nej lub sij hawm ntxiv, tsis xav tau tsawg dua.
Lub Koom Txoos Txhawb Nqa
Thaum nej ua li no, lub Koom Txoos yuav txhawb nqa nej. Tej yam uas peb kawm hauv lub koom txoos yeej txhawbn qab tau txoj kev pab sab ntsuj plig uas peb txais hauv tsev. Xyoo no, peb twb pom lub Koom Txoos txoj kev txhawb nqa no hauv Hnub Caiv Kev Kawm Vaj Lug Kub thiab lub Koom Haum Me Nyuam Yaus. Peb yuav pom ntxiv nyob hauv lub Pov Thawj Hwj Aloos thiab Koom Haum Ntxhais Hluas tej kev sib ntsib thiab. Pib thaum lub Ib Hlis Ntuj no, tus txheej txheem qhia ntawv rau tej kev sib ntsib no yuav hloov me ntsis. Tseem yuav tsom ntsoov rau tej ntsiab lus ntawm txoj moo zoo, tiam sis tej ntsiab lus no yuav sib txuas rau phau Los, Nrog Kuv Mus—Rau Ib Leeg thiab Tsev Neeg. Nov yog ib txoj kev hloov me me, tiam sis yuav pab cov tub hluas ntxhais hluas sab ntsuj plig ntau heev.
Lub Koom Txoos pub tej kev txhawb nqa ntxiv? Nyob hauv lub koom txoos peb txais lub cim nco txog, uas pab peb rov qab cog lus rau tus Cawm Seej txhua lub lim tiam. Thiab nyob hauv lub koom txoos peb sib sau ua ke nrog cov ntseeg uas twb tau khi lus zoo ib yam li ntawd. Kev sib raug zoo uas peb muaj nrog Yexus Khetos lwm tus thwj tim yeej pab txhawb nqa peb txoj kev ua thwj tim hauv tsev.
Thaum kuv muaj 14 xyoos, kuv tsev neeg tsiv tsev mus rau ib lub zej zog tshiab. Nim no, tej zaum nej xav tias qhov no tsis yog kev tu siab loj heev, tiam sis raws li kuv xav, thaum lub sij hawm ntawd, ua rau kuv nyuaj siab kawg nkaus. Muaj neeg uas kuv tsis paub nyob ib puag ncig. Cov tub hluas hauv kuv pawg ntseeg txhua tus yuav mus rau ib lub tsev kawm ntawv txawv kuv lub. Thiab kuv lub siab uas muaj 14 xyoos xwb xav hais tias, “Ua cas kuv niam thiab txiv ho ua li no rau kuv?” Kuv xav tias kuv lub neej raug puas tsuaj tas.
Tiam sis, los ntawm tej yam ntxim saib ntxim ua, kuv txawj sib raug zoo nrog lwm tus hauv kuv pawg, thiab lawv nrog kuv ua phooj ywg. Tsis tas li ntawd, cov hauv pawg npisov thiab cov pab lub Pov Thawj Hwj Aloos pib xav paub txog kuv lub neej. Lawv los saib kuv txoj kev sib tw. Lawv tau sau tej tsab ntawv uas kuv khaws cia txog hnub no uas tau pab kuv heev. Lawv tseem sau ntawv rau kuv mus txog thaum tom qab kuv mus kawm ntawv thiab thaum kuv tau mus ua tub txib. Ib tug twb nyob hauv tshav nyab hoom thaum kuv los tsev. Kuv yeej zoo siab rau cov kwv tij zoo no thiab lawv txoj kev hlub thiab kev cia siab rau kuv. Lawv twb pab kuv tsom ntsoov rau lub ntuj ceeb tsheej thiab kuv lub neej cia ntsa iab, zoo siab, thiab muaj kev xyiv fab.
Peb cov thawj coj thiab cov niam tsev txiv tsev yuav ua li cas pab cov tub hluas ntxhais hluas paub tias lawv tsis nyob lawv ib leeg thaum lawv taug txoj kev khi lus? Ntxiv rau kev sib raug zoo nrog lawv, peb caw lawv koom tej kev sib sau loj thiab me—rooj sab laj Ntxiv Dag Zog rau cov Tub Hluas Ntxhais Hluas thiab tej kev koom ua ke rau cov tub hluas ntxhais hluas thiab tej yam ntxim saib ntxim ua hauv tej pawg txhua lub lim tiam. Tsis txhob saib tsis taus lub zog uas los ntawm kev sib sau ua ke nrog lwm tus uas kuj sim muaj dag muaj zog. Cov npisov thiab lwm tus thawj coj, thov tsom ntsoov rau kev pab cov me nyuam thiab cov tub hluas ntxhais hluas hauv nej pawg ntseeg. Lawv xav tau nej lub sij hawm ntxiv, tsis xav tau tsawg dua.
Txawm nej yog ib tug thawj coj, ib tug neeg zej zog, ib tug hauv nej pawg, los sis ib tug Haiv Neeg Ntseeg xwb, yog nej muaj cib fim pab ib tug tub hluas ntxhais hluas lub neej, pab nws sib txuas nrog lub ntuj ceeb tsheej. Tej zaum nej lub hwj huam yeej yog “lub Koom Txoos txoj kev txhawb nqa” uas tus neeg hluas ntawd xav tau.
Cov kwv tij thiab cov muam, kuv ua tim khawv tias Yexus Khetos yog tus thawj ntawm lub Koom Txoos no. Nws tshoov peb cov thawj coj lub siab thiab coj peb mus rau kev pab sab ntsuj plig uas peb xav tau kom nyob tau thiab vam meej hauv hnub nyoog kawg no. Txoj kev pab sab ntsuj plig yuav pab peb rau siab ntseeg, thiab tsis txhob tso kev ntseeg tseg. Los ntawm Yexus Khetos lub npe, amees.