Tso Siab Ruaj Nrees thiab Tsis Tseg Li
Kev tso siab rau tus Tswv suav qhov uas peb tso siab rau Nws lub sij hawm thiab yog vim li ntawd peb thiaj yuav tsum rub siab ntev thiab nyiaj mus ntev dhau tej nag xob nag cua hauv lub neej no.
Kuv poj niam wb tus tub Dan muaj mob heev thaum nws ua tub txib hauv teb chaws Afikas thiab lawv txawm coj nws mus pw tsev kho mob uas tsis muaj ntau yam kev pab. Thaum wb nyeem wb tus tub thawj tsab ntawv uas nws xa tuaj rau wb tom qab nws zoo mob zoo nkeeg, wb xav tias nws yuav poob siab me ntsis, tiam sis nws sau ntawv hais tias, “Twb yog thaum kuv pw hauv chav kam ceev, kuv lub siab kaj. Kuv yeej tsis tau zoo siab yam ruaj nrees thiab tsis tseg li hauv kuv lub neej.”
Thaum kuv thiab kuv poj niam nyeem cov lus no, wb quaj zoo siab me ntsis. Zoo siab ruaj nrees thiab tsis tseg li. Wb yeej tsis tau hnov leej twg hais txog kev zoo siab li ntawd, tiam sis nws cov lus muaj tseeb. Wb paub hais tias txoj kev zoo siab uas nws hais txog tsis yog qhov zoo uas los thaum ua ib yam dab tsi uas yus nyiam, tiam sis yog kev kaj siab lug thiab kev xyiv fab uas los thaum peb yeem ua raws li Vajtswv lub siab nyiam thiab tso siab plhuav rau Vajtswv rau txhua yam. Wb kuj muaj tej lub sij hawm hauv wb lub neej thaum Vajtswv ua rau peb muaj kev kaj siab lug thiab ua rau wb cia siab rau Khetos txawm tias lub neej no nyuaj thiab muaj kev cov nyom ntau.
Lihais tau qhia tias yog Adam thiab Evas tsis tau poob “ntshe nkawd yuav nyob tsis muaj txim, thiab tsis muaj kev xyiv fab, vim nkawd tsis paub kev nyuaj siab; …
“Tiam sis saib seb, tau ua txhua yam raws li tus uas paub txhua yam lub tswv yim.
“Adas poob xwv kom thiaj yuav muaj taus tib neeg; thiab muaj tib neeg xwv kom lawv yuav muaj kev xyiv fab.”
Ua ib yam ntxim xav txog, tej kev txom nyem thiab tej kev nyuaj siab npaj peb muaj txoj kev xyiv fab yog tias peb yuav tso siab rau tus Tswv thiab Nws txoj hau kev rau peb. Ib tug kws sau paj huam thaum tiam 13 tau hais txog qhov tseeb li no hais tias: “Kev tu siab npaj koj rau kev xyiv fab. Nws cheb txhua yam tawm ntawm koj lub tsev mus, kom kev xyiv fab tshiab yuav los nyob tau. Nws muab cov nplooj dag nchos tawm ntawm ceg ntoo ntawm koj lub siab, xwv kom tej nplooj ntsuab xiab yuav hlav tau tuaj. Nws dob tej cag lwj, xwv kom tej cag tshiab yuav muaj chaw tuaj. Txawm tias kev tu siab nchos dab tsi tawm ntawm koj lub siab, tej yam zoo dua yuav los pauv nws qhov chaw.”
Thawj Tswj Hwm Russell M. Nelson qhia hais tias, “Tus Cawm Seej … txoj kev xyiv fab [uas Nws] muab rau [peb] … tsis tu tsis tseg kom ‘tej kev txom nyem yuav muaj ib me pliag xwb’ [Lus Qhuab Qhia thiab Kev Khi Lus 121:7] thiab yuav pab peb loj hlob tuaj.” Peb tej kev txom nyem thiab tej kev sim siab yuav npaj chaw rau kev xyiv fab ntau dua.
Txoj moo zoo tsis yog txoj lus cog tseg hais tais yuav muaj ib lub neej uas tsis muaj kev tu siab thiab kev sim siab, tiam sis yuav muaj ib lub neej muaj ib lub ntsiab zoo—ib lub neej uas cia peb tej kev tu siab thiab tej kev txom nyem yog “txoj kev xyiv fab los ntawm Khetos kov yeej tej kev txom nyem ntawd.” Tus Cawm Seej twb hais tias, “Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.” Nws txoj moo zoo yog ib zaj lus xov txog kev cia siab. Kev tu siab ua ke nrog kev cia siab rau ntawm Yexus Khetos tuav txoj lus cog tseg ntawm txoj kev xyiv fab kav mus ib txhis li.
Peb siv tau zaj lus hais txog cov neeg Yales txoj kev mus rau thaj av uas cog lus cia ua ib zaj lus piv txwv hais txog peb txoj kev taug mus hauv lub neej no. Tus Tswv tau cog lus rau Yales tus tij laug thiab nws cov neeg hais tias Nws yuav “ua [lawv] ntej mus rau hauv ib thaj av uas yog thaj uas zoo tshaj lwm thaj av tag nrho hauv ntiaj teb.” Tus Tswv txib kom lawv ua nkoj, thiab lawv rau rau siab ua hauj lwm ua nkoj raws li tus Tswv cov lus qhia. Txawm yog li ntawd los, thaum ua mus, Yales tus tij laug txhawj txog tus Tswv tus qauv rau cov nkoj. Nws quaj thov hais tias:
“Auj tus Tswv es, kuv tau ua txoj hauj lwm uas koj tau txib kuv, thiab kuv tau txua cov nkoj raws li qhov uas koj tau hais kom kuv txua.
“Thiab saib seb, auj tus Tswv es, tsis muaj teeb pom kev nyob hauv cov nkoj ntawd.”
“Auj tus Tswv es, koj puas yuav cia peb hla cov dej loj no nyob hauv kev tsaus ntuj nti?”
Puas tau muaj ib lub sij hawm uas nej tau thov txog Vajtswv li ntawd? Thaum nej rau rau siab ua raws li tus Tswv cov lus txib thiab nej tseem tsis tau txais nej tej kev xav tau uas ncaj ncees, nej puas tau xav paub saib nej puas yuav tsum mus dhau lub neej no hauv kev tsaus ntuj nti?
Yales tus tij laug thov txog qhov uas nws txhawj heev uas yog lawv ua tsis tau pa hauv cov nkoj. Nws thov hais tias, “Thiab peb kuj yuav piam sij, vim peb ua tsis taus pa nyob hauv cov nkoj, tsuas yog muaj pa uas nyob haud xwb.” Es tej kev cov nyom ntawm lub neej no puas tau ua rau nej ua pa tsis taus thiab ua rau nej xav paub saib nej puas yuav nyiaj tau ib lub hnub xwb, es tsis hais txog qhov uas nyiaj mus kom txaus rov qab mus saum ntuj ceeb tsheej?
Tom qab tus Tswv nrog Yales tus tij laug ua hauj lwm kom kho txhua txoj kev txhawj xeeb uas nws muaj, ces Nws ho piav hais tias, “Nej yuav tsis muaj peev xwm hla tej dej tob heev no tsuas yog kuv yuav npaj [ib txoj kev rau nej dhau] tej nthwv dej ntawm dej hiav txwv, thiab tej cua uas tau tawm mus, thiab tej dej nyab uas yuav los.”
Tus Tswv hais meej meej hais tias thaum kawg cov neeg Yales yuav mus tsis tau txog thaj av uas cog lus cia yog tias tsis muaj Nws pab lawv. Lawv tsis yog cov uas tswj tau txhua yam, thiab lawv yuav hla tau tej dej tob heev no tsuas yog thaum lawv tso siab rau Nws. Tej yam uas muaj los rau Yales tus tij laug thiab tej yam uas tus Tswv tau qhia nws tau ua rau nws kev ntseeg muaj zog thiab ua rau nws tso siab tau rau tus Tswv ntau zog.
Nej puas pom tias nws tej kev thov Vajtswv tau hloov los ntawm kev nthuav tej kev txhawj xeeb thiab tej lus nug mus rau tej kev hais tawm saib nws muaj siab ntseeg thiab tso siab ntau npaum li cas:
“Kuv paub, auj tus Tswv es, tias koj muaj hwj chim tag nrho, thiab muaj peev xwm ua tau txhua yam uas koj xav ua los pab tib neeg; …
“Saib seb, auj tus Tswv es, koj yeej ua tau li no. Peb paub tias koj yeej muaj peev xwm ua tau lub hwj chim loj tawm los, uas saib mas zoo li me me rau tib neeg txoj kev to taub.”
Ces cov neeg Yales txawm “nce mus rau hauv lawv … cov nkoj, thiab tawm mus rau hauv hiav txwv, muab lawv tus kheej cob rau tus Tswv lawv tus Vajtswv.” Lo lus cob no txhais tau hais tias nyoo rau los yog tso siab rau. Cov neeg Yales tsis tau nkag mus rau hauv cov nkoj vim lawv paub tseeb saib txhua yam yuav ua hauj lwm li cas thaum lawv hla dej hiav txwv mus. Lawv nkag haud rau qhov lawv tau kawm tias lawv tso siab tau rau tus Tswv lub hwj chim, siab zoo, thiab siab hlub tshua, thiab lawv txawm kam tso siab rau tus Tswv es tsis muaj kev ua xyem xyav thiab kev ntshai.
Tsis ntev tas los wb tus tub xeeb ntxwv hu ua Abe nws ntshai caij ib tug tsiaj hlau uas txav ub txav no. Nws xav caij ib tus uas tsis txav hlo li. Nws pog yaum nws tias nws yuav tsis ua li cas, yog li ntawd, vim nws tso siab rau nws pog, nws cia li caij. Nws luag nyav hais tias, “Kuv tseem ntshai, tiam sis kuv ntseeg koj.” Tej zaum cov Neeg Yales zoo li ntawd. Thaum xub tso siab rau Vajtswv lawv ntshai, tiam sis kev xyiv fab yeej yuav los tiag.
Txoj kev hla dej hiav txwv tsis yooj yim hlo li rau cov Neeg Yales. “Muaj ntau zaus lawv raug faus mus tob tob hauv dej hiav txwv, vim yog tej nthwv dej luaj roob uas tawg los npog lawv.” Txawm yog li ntawd los vaj lug kub hais tias “tej cua yeej tshuab [lawv] tsis tu mus rau tim thaj av uas cog lus cia.” Qee zaum nyuaj heev to taub, twb yog thaum tej lub sij hawm hauv peb lub neej thaum tej nthwv cua muaj zog thiab tej dej tsis tus, tiam sis peb tso siab tau hais tias Vajtswv yeej tshuab peb mus rau tim peb lub tsev saum ntuj ceeb tsheej.
Zaj lus hais txuas ntxiv tias, “Thiab li no lawv tau raug ntsawj mus; thiab tsis muaj tsiaj phem uas nyob hauv hiav txwv yuav ua tau lawv tawg, los sis tej ntses loj loj ua kom lawv puas tau; thiab lawv tau muaj qhov pom kev tsis tu ncua, tsis hais nyob saum qaum dej los sis hauv qab dej” Peb ua neej nyob hauv ib lub ntiaj teb uas muaj tej nthwv dej luaj roob ntawm kev tuag, kev mob ntawm lub cev thiab paj hlwb, thiab ntawm tej kev sim siab thiab kev cov nyom txhua yam tawg los npog peb. Txawm yog li ntawd los, dhau los ntawm kev ntseeg rau ntawm Yexus Khetos thiab qhov uas peb xaiv kom tso siab rau Nws, peb kuj muaj tau teeb cig txhua lub sij hawm txawm peb nyob hauv qab deg los yog saum nplaim dej tib si. Peb tso siab tau hais tias Vajtswv yeej tshuab peb tsis tu mus rau tim thaj av uas cog lus cia.
Thaum lawv cov nkoj raug mus rau ub no, cov neeg Yales “hu nkauj qhuas tus Tswv; … thiab [lawv] tau ua tsaug rau thiab qhuas tus Tswv tag nrho ib hlub; thiab thaum tsaus ntuj tuaj, lawv tseem tsis tau tseg qhuas tus Tswv.” Lawv muaj kev xyiv fab thiab ua Vajtswv tsaug txawm tias lawv tseem tab tom raug kev txom nyem. Lawv tseem tsis tau mus txog thaj av uas cog lus cia, txawm yog li ntawd los lawv zoo siab txog txoj koob hmoov uas tau cog lus tias yuav los rau lawv vim lawv rau siab tso siab rau Nws tsis tu tsis tseg.
Cov neeg Yales raug tshuab mus saum nplaim dej kam 344 hnub tag nrog. Nej xav li cas txog qhov ntawd? Kev tso siab rau tus Tswv suav qhov uas peb tso siab rau Nws lub sij hawm thiab yog vim li ntawd peb thiaj yuav tsum rub siab ntev thiab nyiaj mus ntev dhau tej nag xob nag cua hauv lub neej no.
Thaum kawg, cov neeg Yales “mus sua rau ntawm ntug dej ntawm thaj av uas cog lus cia. Thiab thaum lawv muab lawv ko taw mus tsuj rau saum ntug dej ntawm thaj av uas cog lus cia lawv khoov lawv tus kheej ti nkaus rau hauv av, thiab txo lawv lub hwj chim rau ntawm tus Tswv, thiab los kua muag ntawm kev xyiv fab rau tus Tswv, vim yog nws txoj kev hlub tshua uas muaj nplua mias rau lawv.”
Yog tias peb yuav coj ruaj nrees ua raws li peb tej kev khi lus, peb kuj yuav mus txog peb lub tsev saum ntuj ceeb tsheej thiab yuav txhos caug rau ntawm tus Tswv thiab los kua muag vim yog Nws tej kev pab hauv peb lub neej txhua hnub, suav tej kev tu siab uas tseg chaw rau tej kev xyiv fab.
Kuv ua tim khawv hais tias thaum peb xaiv kom tso siab rau tus Tswv yam ruaj nrees thiab tsis tseg li rau Yexus Khetos thiab Nws lub ntsiab rau peb lub neej, Nws yuav los xyuas peb ua rau peb muaj kev cia siab, muaj kev nyob kaj siab lug, thiab ua rau peb “cia siab tias nws yuav tso peb dim.”
Kuv ua tim khawv tias Yexus yog tus Khetos. Nws yog lub hauv paus ntawm tag nrho kev xyiv fab.” Nws txoj kev tshav ntuj yeej txaus, thiab Nws muaj hwj chim cawm peb. Nws yog txoj kev kaj kaj, yog txoj sia, thiab kev cia siab rau lub ntiaj teb. Nws yuav tsis cia peb piam sij. Los ntawm Yexus Khetos lub npe, amees.