Na Qaqa ni iNuinui
Na inuinui e dua na isolisoli bula, na isolisoli oqo ena tubu nida vakalevutaka na noda vakabauti Jisu Karisito.
Kemuni na taciqu kei na ganequ e vuravura taucoko, nida tekivutaka na gauna talei oqo ni “koniferedi raraba,” e wanonovi keda tu mai na matai lomalagi. Eda na rogoca na domona na Turaga mai vei ira na Nona italai; eda vakila na “veituberi, veidusimaki, kei na vakacegu” veivakayarayarataki ni Yalo Tabu, ka na vaqaqacotaki na noda vakabauta.
Ena tolu na yabaki sa oti a tekivuna o Peresitedi Russell M. Nelson na koniferedi raraba ena vosa oqo: “Na ivakatakila savasava me baleta na taro ni yalomu ena yaco kina na koniferedi oqo me veivakamamautaki ka guilecavi dredre. Kevaka o se bera ni kerea na veisobuti ni Yalo Tabu me vukea mo rogoca na ka e gadreva na Turaga mo rogoca ena rua na siga oqo, au sureti iko mo cakava. Yalovinaka cakava na koniferedi oqo meda kana magiti ena itukutuku ni Turaga mai vei ira na Nona italai.”
Na ivolanikalou e semati iratou vata e tolu na vosa: vakabauta, inuinui, loloma. Na isolisoli ni inuinui e dua na edaumeni sega ni saumi rawa ni Kalou.
Na vosa inuinui e vakayagataki ena vuqa na ka eda vinakata me yaco. Me vaka, “Au nuitaka ni na sega ni tau na uca,” se “Au nuitaka ni na qaqa na neitou timi.” Noqu inaki meu vosa me baleta na noda inuinui tabu ka tawamudu yavutaki vei Jisu Karisito kei na kosipeli vakalesui mai kei na noda “nanamaki yalodei ena … veivakalougatataki yalataki ni buladodonu.”
Nona inuinui ni Bula Tawamudu
Nanoda inuinui ni bula tawamudu ena vuku ni nona loloma soli wale na Karisito kei na noda dui digidigi, e rawa kina vei keda na veivakalougatataki vakasakiti ni lesu tale kina noda itikotiko vakalomalagi ka bula tawamudu ena sautu kei na marau kei na Tamada Vakalomalagi, na Luvena Daulomani, noda matavuvale kei na itokani lomani, kei ira na tagane kei na yalewa yalododonu mai na veivanua kei na senijiuri kece ga.
Eda na sotava e vuravura na reki kei na yaluma nida vakatovolei ka vakadinadinataki. Na noda qaqa e yaco mai ena vuku ni noda vakabauti Jisu Karisito nida sa vakadruka na noda ivalavala ca, dredre, veivakatovolei, veika sega ni dodonu, kei na bolebole ni bula oqo.
Nida vaqaqacotaka na noda vakabauti Jisu Karisito, eda raibaleta na noda veika dredre kina veivakalougatataki kei na yalayala tawamudu. Me vaka na rarama ni dau tubu na kena serau, na inuinui e vakararamataka na vuravura butobuto, eda raica na noda veimataka lagilagi.
Na iNuinui sa Mai vua na Kalou
Mai na ivakatekivu, na Tamada Vakalomalagi kei na Luvena Lomani erau sa vakalougatataki ira na buladodonu ena isolisoli talei ni inuinui.
Ni rau biuta na were, e vakavulici Atama kei Ivi na agilosi ena yalayala nei Jisu Karisito. A vakararamataka na nodrau bula na isolisoli ni inuinui. A cavuta kina o Atama, “Sa tadola rawa na mataqu, meu kila na marau ena bula oqo.” A tukuna o Ivi na “reki ena nodrau sa vueti, ka vakakina na bula tawamudu sa solia na Kalou vei ira sa talairawarawa.”
Me vaka ga na nona kauta mai vei Atama na Yalo Tabu na inuinui, na mana ni Yalo ni Turaga e vakararamataki ira na yalodina nikua, ka vakacilava na dina ni bula tawamudu.
Sa tala mai vei keda na iVakabula na Dauveivakacegui, na Yalo Tabu, na itokani ni noda vakabauta, inuinui, kei na vakacegu “sega ni vaka e solia ko vuravura.”
E kaya na iVakabula, “Dou na kunea e vuravura na rarawa: ia mo dou vakacegu niu sa vakamalumalumutaki vuravura.”
Ena gauna ni dredre, eda digitaka meda nuitaka na Turaga ena vakabauta. Eda masu ena yalomalua, “Ia me kakua ni yaco na noqu lewa, me yaco ga na nomuni lewa.” Eda vakila na nona veivakadonui na Turaga nida lomasoli ena yalomalua, eda waraka na vakacegu sa yalataki ena solia mai na Turaga ena nona gauna digitaki.
E vakavuvulitaka na iApositolo o Paula, “Ia me vakasinaiti kemudou na Kalou o koya na vu ni inuinui ena reki kei na vakacegu, me levu sara na nomudou inuinui,” dou reki ena inuinui, vosota na ka rarawa;” ena vuku ni nona kaukauwa na Yalo Tabu.”
Na Lesoni ni Nuinui
A kila taumada na Parofita o Moronai me baleta na vakanuinui vei Karisito ena gauna ni rarawa. A vakamacalataka na ituvaki ni nona vakararawataki:
“Au tiko taudua voli ga. E sega meu lako kina.”
“Au vuni voli mera kakua ni kilai de ra na vakarusai au.”
Vakasakiti, ena auwa butobuto ka galili oqo, a vola o Moronai na vosa ni inuinui nei tamana:
O koya gona kevaka e dua sa tu vua na vakabauta, sa tu tale ga vua na inuinui; ni kevaka sa sega na vakabauta sa sega tale ga na inuinui.”.
“Ia na cava na ka dou vakanuinui kina? Dou na rawata na inuinui ena vuku ni veisorovaki i Karisito kei na kaukauwa ni nona tucake tale mai na mate, mo dou vakaturi cake kina bula tawamudu.”
Kemuni na taciqu kei na ganequ, na inuinui e dua na isolisoli bula, na isolisoli oqo ena tubu nida vakalevutaka na noda vakabauti Jisu Karisito. “Na vakabauta sai koya [na vakadeitaki ni veika e vakanuinuitaki.” Eda tara cake na —ivakadinadina ni noda vakabauta—ena masu, veiyalayalati ni valetabu, rokovi ni ivakaro, kanamagiti tikoga ena ivolanikalou kei na nodra vosa na parofita ni gauna oqo, vakayagataka na sakaramede, ka sokalou e veimacawa kei ira na noda itokani Yalododonu.
E Vale ni iNuinui
Me taqomaki na noda inuinui ena gauna e levu cake tikoga kina na ca, e dusimaka na nona parofita na Turaga me roboti vuravura na Nona valetabu.
Nida curuma na vale ni Turaga, eda vakila na Yalo ni Kalou, ni vakadeitaka na noda inuinui.
E vakadinadinataki ena valetabu na ibulubulu lala vakakina ni bula ena tai kadua ni ilati ena tomani tiko vei keda kece.
Vei ira e sega na nodra itokani tawamudu, e vakadeitaka na cakacaka vakalotu ni tamata yalododonu yadua ena ciqoma na veivakalougatataki sa yalataki tu.
E koto na inuinui dei nirau tekiduru e dua na veiwatini gone ena icabocabo ni soro merau vauci vata, sega ni baleta walega na gauna oqo ia me tawamudu.
E dua na inuinui levu e tu vei keda ena veiyalaylati e caka vei ira na noda kawa, se cava ga na kedra ituvaki ena gauna oqo.
E sega ni dua na mosi, na tauvimate, na lewa tawadodonu, na rarawa, e sega ni dua na ka e rawa ni vakabutotaka na noda inuinui nida taura matua toka na noda veiyalayalati kei na Kalou ena vale ni Turaga. E vale ni rarama, e vale ni inuinui.
Ni sa Yali na iNuinui.
E turu na wainimatada ni yaluma ni da raica na yalorarawa kei na mosi vei ira e sega nodra inuinui vei Karisito.
Au dikeva toka mai vakayawa walega oqo e dua na veiwatini rau a vakabauta tu na Karisito ena dua na gauna rau qai nanuma me rau sa vakanadakuya na nodrau vakabauta. Erau bula qaqa e vuravura ka rau kune marau ena nodrau kilaka kei na nodrau sa biuta nodrau vakabauta.
A vinaka tu na ka taucoko me yacova ni vakasauri ga nona tauvimate o tagane ka mate sara ni a bulabula vinaka tu ga ka kaukauwa. Me vaka e dua na butoleka ni matanisiga, erau a tabonaka na rarama ni Luvena, ka vuana na butoleka ni inuinui. E sega ni vakabauta o watina, sa veilecayaki ena gauna oqo, sega tu ni vakarau, sega ni rawa ni vakalomavinakataki ratou na luvena. E kaya vua nona kilaka ni sa vinaka tu na nona bula me yacova ni vakasauri ga sa sega ni raica rawa e dua na mataka vou. Na nona yaluma sa kauta mai na butobuto kei na veilecayaki.
iNuinui ena Gauna ni Rarawa
Meu vakatauvatana mada na nona yaluma kei na mosi kei na inuinui vei Karisito ni dua tale na matavuvale ena dua na gauna vakamosiyalo.
Ena ruasagavulu-kadua na yabaki sa oti a vukataki mai na luvedrau tagane se qai sucu vou na vugoqu o Ben Andersen, kei na watina, o Robbie, mai na vanua ni teitei mai Idaho ki Salt Lake City. Au yaco yani i valenibula, a vakamacalataka vei au o Ben, na dredre e sotava tiko na utona na nodrau gone ena rawa ni vakatubuleqa. Keirau vakataqara na ligai keirau ena ului Trey. A vakalougatataki koya na Turaga me tomana tale nona bula.
A sele na utoi Trey ena imatai ni macawa ni nona bula, ka vuqa na veisele qai tarava mai. Ni toso na veiyabaki, e matata ni na gadreva o Trey me veisau nona uto. E dina ni lailai na veika e rawa ni cakava ena yagona, e rabailevu cake nona vakabauta. A vola o koya, “Au sega vakadua ni vakalomalomani au baleta niu kila tu ga na bibi ni noda vakabauti Jisu Karisito kei na ivakadinadina ni ituvatuva ni veivakabulai.”
E dau maroroya toka ga o Trey na vosa oqo nei Peresitedi Nelson: “Na reki eda vakila e lailai sara ena ituvaki ni noda dui bula ia sa baleta vakatabakidua na veika e vakanamata kina na noda bula.”
A vola o Trey: “Au dau nanamaki tiko kina kaulotu tudei, ia era sega ni vakatara na noqu vuniwai meu kaulotu me yacova ni sa oti, ke lailai, e dua na yabaki mai na veisau ni noqu uto. Au solia noqu vakabauta vei Jisu Karisito.”
E marau o Trey ni sa vakadonui me laki vuli accounting e BYU tekivu ena iwasewase ni vuli oqo, ia sa marau vakalevu cake ni ena mua ni Julai ena nona ciqoma na qiri a namaka tiko me lako yani i valenibula me baleta na veisau ni nona uto.
“Dua na yabaki,” e kaya o Trey, “au na gole i kaulotu.”
E levu na ka e namaki ni curu yani ena rumu ni veisele. Ia, ena nona sele a levu sara na dredre, ka sega tale ni yadra mai o Trey.
E kaya na tinana o Robbie, “Na Vakaraubuka na siga mosimosi duadua ni keirau tovolea tikoga me keirau vakasamataka. A balavu noqu yadra tu ena noqu tovolea meu vakasamataka na veika kece. … Ia ena Vakarauwai, au yadra cake mai ena yalo reki. E sega walega ni vakacegu; e sega ni noqu vakuwai. Au reki ena vuku ni noqu gonetagane, au reki niu tinana. A yadra mai liiu o Ben, ia ni qai rawa me keirau veitalanoa, a yadra mai o Ben ena yalo vata sara ga oya.”
A vakamacalataka o Ben: “A matata ki yaloqu ni vakavulici au na Kalou mai na Nona Yalo Tabu. Au yadra mai ena 4 na mataka au vakasinaiti ena vakacegu kei na reki e sega ni tukuni rawa. E rawa vakacava? Sa rui mosimosi dina na takali nei Trey, kau sa rui nanumi koya vakalevu. Ia e sega ni laivi keirau na Turaga me keirau yalorarawa tu. Au nanamaki tiko kina reki ena gauna keitou na sota tale kina.”
Na iYalayala ni iNuinui
A vola tu o Trey ena nona ivolaniveisiga na malanivosa oqo mai vei Peresitedi Nelson: “E sega ni rawa nida reki ni tauva tiko na luveda e dua na tauvimate sega ni valuti rawa, se sega nomu cakacaka, se sega ni dina vei iko na watimu. Ia oqori sara ga na reki e solia na iVakabula. E tudei na Nona reki, ka vakadeitaka vei keda ni “lekaleka walega na gauna ni noda rarawa” [Vunau kei na Veiyalayalati 121:7] ka da na vakalougatataki meda rawa-ka kina.”
Taciqu kei na ganequ, na vakacegu oni vaqara ena sega ni yaco vakatotolo mai me vaka na nomu gagadre, ia au yalataka vei kemuni, ena nomuni nuitaka na Turaga, ena yaco mai na Nona vakacegu.
Meda susuga na noda vakabauta talei, ka toso i liu ena inuinui taucoko sara na kena serau. Au vakadinadinataka ni noda inuinui na noda iVakabula, o Jisu Karisito. Ena Vukuna, ena vakavotukana na noda tatadra yalodina. O Koya na Kalou nuinui—na inuinui qaqa. E bula tiko ka lomani iko o Koya. Ena yacai Jisu Karisito, emeni.