Na iTutu Vakaturaga ni iTabagone
Ea nuitaki iko na Kalou, na luve ni veiyalayalati, mo vukea na Nona cakacaka mera kau bula taucoko mai na Luvena ki Vua.
Elder Stevenson, oqo na koniferedi me kua ni guilecavi rawa.
Keitou dau taleitaka vakamatavuvale ni ivola lailai e vakatokai Children’s Letters to God. Oqo e vica:
“Na Kalou Lomani, mai na nodra mate tu na tamata kei na caka tale na ka vovou, vakacava moni maroroi ira ga sa tiko rawa vei kemuni?”
“Na cava e tini ga kina na nomuni lawa, ia milioni ena neitou koronivuli?”
“Na cava oni vakavuna kina na mosi ni tilotilo ke oni na kauta tani tale?”
E sega na gauna edai mera saumi taucoko kina na veitaro vakaoqo, ia e dua tale na taro au rogoca wasoma mai vei ira na itabagone au na via vosa kina. Mai Ulaanbaatar, Mongolia, kivei Thomas, Idaho, e tautauvata na taro: “Cava na vuna? Cava na vuna mera bula duatani kina na Yalododonu Edaidai mai na so tale?”
Au kila ni dredre meda duatani—vakabibi nio gone ka vinakata saraga mera taleitaki iko na vo ni tamata. Eda via okati taucoko, ka sa vakalevutaki na gagadre oya kina ivotavota tawabulabula eso ni vuravura vakalivaliva edai e tawana tu na vakauitukutuku raraba kei na veivakatotogani.
Ia, ena veidredre oqo, cava na vuna era sa bula duidui kina na Yalododonu Edaidai? Sa vuqa tu na isaunitaro vinaka: Baleta nio sa luve ni Kalou. Baleta nio sa maroroi tu ena veisiga emuri. Baleta nio sa dua na tisaipeli i Jisu Karisito.
Ia na isaunitaro oya e sega ni kauti iko tani mai kina. Eda sa luve ni Kalou taucoko. Na tamata kece e vuravura edai eda talai mai ena otioti ni siga qo. Ia era se sega ni bulataka taucoko na Vosa ni Vuku se na lawa ni tiko savasava ena sala o saga tu. E vuqa tu na tisaipeli yaloqaqa i Karisito ka sega tu ni lewe ni Lotu oqo. Era sega ni kaulotu ka vakayaco cakacaka tabu vakalotu ena vale ni Turaga ena vukudra na tubudra me vakataki iko. Sa dodonu me levu cake sara, ka vakakina.
Au na via vakanamata edai kina dua na ikuri ni vuna esa dau vakaibalebale tu kina noqu bula. Ena 1988, a vosa e dua na Apositolo gone na yacana o Russell M. Nelson ena Univeseti e Brigham Young ka vakatokai “Vinaka na Veiyalayalati.” E loma, a vakamacalataka kina o-Elder Nelson ni gauna eda vakayagataka kina na noda digidigi matau ni caka ka maroroi veiyalayalati kei na Kalou, eda sa itaukei ni veiyalayalati tawamudu e cakava na Kalou vei ira na tubuda ena veitabagauna. Ena dua tale na ivosavosa, eda sa “luve ni veiyalayalati.” Oya eda kilai tani kina. E vakatara vei keda na veivakalougatataki vataga era ciqoma na tubuda turaga kei na marama, oka kina na itutu vakaturaga.
iTutu Vakaturaga! O sa rogoca beka na vosa oya. Eda lagata ena sere ni lotu: “Tabagone lagilagi, gu ki liu, gu ki liu, gu ki liu!” E veivakurabuitaki na kena vosa. Na cava mada na kena ibalelebale?
Ena gauna ni Veiyalayalati Makawa ni mate e dua na tama, e vakatau vua na luvena tagane ulumatua na veika baleti tinana kei na ganena. Sa taukena na tacina na ka e nodra ka gole yani kina nodra sala e vuravura, ia e sega ni lako kina dua na vanua na luvena tagane ulumatua. Ena vakawati o koya ka vakamatavuvale, ena tiko me yacova na iotioti ni nona siga me vakatulewataka na veika ena matanitu i tamana. Ena vuku ni kuri ni tavi oqo, sa vakaikuritaki vua na tiki ni veika e taukena. E levu beka me kerei na nodra liutaki ka kauwaitaki na tani? Sega ke o vakasamataka na ikuri ni ka e taukeni a soli vua.
Nikua eda sega ni veivosakitaka na ivakarau ni nomu sucu ena nomu matavuvale e vuravura se ituvaki vakaikoya ni Veiyalayalati Makawa. Eda veivosakitaka na ka o taukena o ciqoma vaka itaukei semati kei Karisito baleta na veimaliwai ni veiyalayalati o sa digitaka mo curuma kei Koya kei na Tamamu mai Lomalagi. E sivia vua na Kalou me namaka vei iko mo bula duatani tu mai vei ira na luvena tale eso mo rawa tu ni liutaki ka qaravi ira vakavinaka? Sega ke o vakasamataka na veivakalougatataki—vakayago ka vakayalo—e sa soli tu vei iko.
Sa ibalebale beka ni nomu itutu vakaturaga nio sa vinaka cake vei ira tale eso? Sega, ia sa kena ibalebale nio sa namaki mo vukei ira na tani mera vinaka cake. Sa ibalebale beka ni nomu itutu vakaturaga nio sa digitaki? Io, ia sega ni digitaki mo lewai ira na tani; o sa digitaki mo qaravi ira. E sa ivakadinadina beka ni loloma ni Kalou na nomu itutu vakaturaga? Io, vakabibi sara, e sa ivakadinadina ni Nona vakanuinui.
Sa dua na ka mo lomani tu ka dua tale na ka mo nuitaki vakataucoko. Ena idusidusi ni Me iSakisaki ni Tabagone eda wilika: “Sa nuitaki iko na Tamamu mai Lomalagi. Sa solia vei iko o Koya na veivakalougatataki levu, oka kina na taucoko ni kosipeli kei na cakacaka tabu vakalotu kei na veiyalayalati e vauci iko ki Vua ka tikora na Nona kaukauwa kina nomu bula. Na veivakalougatataki oqori sa sala vata na kena icolacola. Sa kila o Koya nio rawa ni vakayaco veisau e vuravura, ka sa gadrevi tu vakalevu, mo duatani mai vuravura.”.
Na ka eda sotakaya sa rawa ni vakatauvatani kina dua na waqa ni sara vanua e sa biuti ira taucoko kina na Kalou nira soko voli mai na matasawa kina dua tale. Na soko sa levu kina na madigi ni vuli, tubu, marau, ka rawaka, kei na toso ia sa levu talega na ka rerevaki. Na Kalou sa lomani ira taucoko na Luvena ka sa kauwaitaka na nodra tiko vinaka. E sega ni via vakayalia e dua vei ira, ka sa sureti ira o Koya sa lomasoli tu mera sa Nona kaimua—oya o iko. Ena vuku ni nomu digidigi mo cakava ka muri veiyalayalati, sa nuitaki iko o Koya Sa nuitaki iko o Koya mo duatani, vakasakiti, ka vakatikori baleta na bibi ni cakacaka e sa nuitaki iko mo cakava.
Vakasamataka mada! E nuitaki iko na Kalou—vei ira na tamata kece e vuravura, na luve ni veiyalayalati—Nona kaimua—mo vukea na Nona cakacaka ena kena kau bula taucoko Vua na Luvena. Sega ni kurabuitaki nona kaya o Peresitedi Brigham Young, “Na agilosi taucoko mai lomalagi sa raici ira tu na iwiliwili lailai ni tamata oqo.”
Nio rai wavolita na waqa oqo vakatokai o vuravura, ona raica nira dabe na tamata eso ena dabedabe dakoba ka gunu tiko, veimau i lavo ena kasino, daramaki ni sulu vakarairai, taba talevoni voli, ka vakaoti gauna tu ena qito vakalivaliva eso. Ia era lomatarotaro beka, “Cava na vuna au sega ni cakava kina oya?” e rawa nio nanuma nio sega ni dua wale ga na pasidia. O sa lewe tu ni kaimua. Sa tiko na nomu itavi e sega ni tiko vei ira na pasidia. Me vaka a kaya o Sister Ardeth G. Kapp, “O sega ni rawa ni veivakabulai kevaka o rairai vata tu kei ira kece na qalo tiko e waitui.”
Ni se bera nio lomabibi tu ena ikuri ni tavi taucoko, yalovinaka nanuma nira taura na kaimua e dua na ka e sega vei ira na pasidia eso: isau ni cakacaka. A kaya o Elder Neil L. Andersen, “E tiko na isau ni kaukauwa vakayalo baleti ira na yalododonu,” oka kina “na veivakadonui levu, veivakadeitaki levu, kei na yalodei levu.” Vakataki Eparama eliu, o ciqoma na marau kei na vakacegu levu, yalododonu levu, kei na kilaka levu. Na kemu isau e sega ni dua ga na tikina mai lomalagi kei na sala ukutaki ena koula. Ena rawarawa tu vua na Tamada Vakalomalagi me solia saraga vei iko na ka kece e tu Vua. E gadreva o KOya me vukei iko mo vakataki Koya. Io, e gadrevi vakalevu na nomu gauna ni oqori na sala e vakayagataki iko kina vakalevu na Kalou.
E “ka levu na kerei ni dua na tamata, ia o sa sega ni dua ga na tamata”! O sa itabagone ni tutu vakaturaga. Na nomu veimaliwai ni veiyalayalati kei na Kalou kei Jisu Karisito e veimaliwai ni loloma kei na veidinadinati ona rawata kina na ivakarau levu cake ni Nodra loloma soliwale—Na Nodrau veitokoni vakalou, veivakaukauwataki, kei na qaqa tudei. Na kaukauwa oya e sega ni ka ni vakasama walega, e dua na kalougata totoka, se parofisai e vakayacori vakaikoya. E ka dina.
Nio vakayacora na nomu itavi ni itutu vakaturaga, o sa sega ni galili. E cakacaka vata kei iko na Turaga ni loga ni Vaini. O sa cakacaka vata sara tu ga kei Jisu Karisiro. Ena veiyalayalati vou yadua—ka sa vakatitobutaki na nomu veimaliwai kei Koya—drau veitauri matua me yacova ni drau sa vaqaqacotaki. Ena ivakatakilakila tabu oya ni Nona loloma soliwale, ona raica tu na gagadre kei na kaukauwa mo bulataka saraga na iwalewale ni bula ni iVakabula—duatani mai na vuravura. O sa rawata oqo ni sa rawati iko o Jisu Karisito!
Ena 2 Nifai 2:6 eda wilika, “Ia, sa yaco na veivueti ena vukui koya na Mesaia Tabu; ni sa sinai tu ena loloma soli wale kei na dina.” Baleta ni sa sinai tu o Koya ena dina, sa raica o Koya na kemu ituvaki dina—cala, malumalumu, veivutuni, kei na so tale. Baleta ni sinai tu o Koya ena loloma soliwale, sa raica o Koya nio rawa ni vakataka dina. E sotavi iko o Koya ena vanua o tiko kina ka vukei iko mo veivutuni ka caka vinaka, lako sivita ka vakakina.
“Tabagone lagilagi, gu ki liu, gu ki liu, gu ki liu!” Au vakadinadinataka nio sa lomani—ka sa nuitaki tu—edai, ena 20 na yabaki, ka tawacava. Kakua ni volitaka na nomu itutu vakaturaga ena dua na kuro rourou. Kua ni veivolitaka wale na ka kecega. Me kua ni veisautaki iko na vuravura nio sa sucu mo veisautaka na vuravura. Ena yacai Jisu Karisito, emeni.