Rawarawa Wale na iVunau i Karisito.
Au vakadinadinataka na cakacaka tabu ni nodra vakavulici na luvena na Tamada Vakalomalagi ena ivakavuvuli rawarawa ni Jisu Karisito
O keda kece e dui tu o ira na lewe ni noda matavuvale lomani era temaki ka vakatovolei tiko ena kaukauwa sega ni oti rawa i Setani, na dauveivakarusai, ka na saga me vakararawataki ira kece na luve ni Kalou. E vuqa vei keda, eda sega tu ni moce vakavinaka. Eda tovolea meda wavoliti ira era sotava na dredre ena kaukauwa kece mera vinaka. Eda masulaki ira. Eda lomani ira. Eda vakaraitaka veiira na ivakaraitaki vinaka.
Alama, e dua na parofita vuku ni veigauna makawa, e sotava na veivakatovolei vata oqori. O ira na tamata a liutaka ka lomana era dau vakacacani vakawasoma ena meca vakarerevaki, ia era tovolea tikoga mera susuga cake na gone buladodonu ena vuravura ni caka ca. E vakila o Alama na nona inuinui ni qaqa , sai koya na kaukauwa eda dau beca ena so na gauna ka vakavuqa ni dau lailai sara noda vakayagataka. A masuta na veivuke ni Kalou.
E kila o Alama ni kevaka me veivuke na Kalou, ena gadrevi mera veivutuni o ira e liutaka, vakakina o ira na nona meca. O koya, sa digitaka kina e dua na iwalewale duatani me vakanamata kina kina ivalu.
E vakamacala ena iVola i Momani: “Me vaka ni dau vakayarayarataki ira na tamata me ra vakayacora na ka e dodonu na vunautaki ni vosa ni Kalou—io, raica sa kaukauwa sara na vosa ni Kalou kina nodra vakanananu na tamata ka mucu na iseleiwau, se dua tale na ka e sa yaco vei ira—o koya e sa nanuma kina ko Alama ni sa kilikili me ra na vakatovolea na kena mana na vosa ni Kalou.”
Na vosa ni Kalou sa ivunau a vakavulica o Jisu Karisito kei ira na Nona parofita. A kila tu o Alama ni tiko na kaukauwa levu ena vosa ni ivunau.
Ena ika 18 ni iwase ni Vunau kei na Veiyalayalati, e vakatakila na Turaga na yavu ni Nona ivunau:
“Ia, raica, au sa vakaroti ira na tamata kecega ena veivanua. …
“Ia, raica, na Turaga na nomudou Dauveivueti sa mai mate vakayago; o koya sa mai colata kina na nodra rarawa na tamata kecega, me rawa vei ira na tamata kecega na veivutuni ka lako mai vua.
“Ka sa tucake tale mai na mate, me rawa ni kauti ira kece mai na tamata ki vua, ena ivakarau ni veivutuni.”
“Ka mo dou qai tekiduru sobu ka qaravi Tamada ena yacaqu.
“… Sa dodonu mo dou veivutuni ka papitaiso, ena yaca i Jisu Karisito.”
“Kerea na Tamada ena yacaqu ena vakabauta, kei na vakanuinui ni na soli vei kemudrau, ka na soli vei kemudrau na Yalo Tabu.”
Ia oqo, nira sa taura na veika oqo, mera muria sara na noqu ivakaro ena ka kecega.”
Mo drau taura na yacai Karisito, ka vunautaka vakadodonu na dina.
“Ia ko ira kecega sa veivutuni ka papitaisotaki ena yacaqu, sai Jisu Karisito, ka vosota me yacova na ivakataotioti, sai ira era na vakabulai.”.
Ena vica na malanivosa oqori, sa solia kina vei keda na iVakabula na ivakaraitaki uasivi sara ni ivakarau meda vakavulica kina na Nona ivunau. Na ivunau oqori sai koya na vakabauta na Turaga ko Jisu Karisito, veivutuni, papitaiso, ciqoma na isolisoli ni Yalo Tabu, ka vosota me yacova na ivakataotioti ena vakalougatataki ira na luve ni Kalou.
Nida vakavulica na ivakavuvuli oqo vei ira eda lomana, ena vukei keda na Yalo Tabu meda kila na ka dina. Nida gadreva na veivakauqeti ni Yalo Tabu, sa dodonu meda levea na noda nanuma ga se noda vakavakadewa ga ka dau uabaleta sara vakalevu na ivunau dina.
Enadredre toka mo cakava nio lomana na tamata o gadreva mo vukea. A rairai vakawalena beka e liu o koya na ivunau e rogoca. E dau veitemaki meda tovolea na veika vou se veivakurabuitaki. Ia na Yalo Tabu ena vakatakila ga na yalo ni dina nida qaqarauni me da kakua ni ulabaleta ena noda ivakavuvuli na ivunau dina. E dua na sala vinaka ni drotani mai na vunau lasu oya me rawarawa tu ga na noda veivakavulici. Eda na taqomaki ena vuku ni sala rawarawa oqo, ka lailai na ka e yali.
Na veivakavulici rawarawa ena rawa kina vei keda meda wasea totolo na ivunau ni veivakabulai, ni se bera ni tarai ira mai na gone na veitemaki nei koya na dauveivakacalai, ka se bera sara ni luvuci na dina e gadrevi mera vulica mai na kosakosa ni veimaliwai raraba, ilawalawa, kei na nodra dui dredre vakataki ira. Sa dodonu meda toboka na madigi kece sara e rawa nida wasea kina vei ira na gone na ivakavuvuli nei Jisu Karisito. Na gauna lailai ni veivakavulici oqori era vakamareqeti sara ka lailai sara ni vakatauvatani kei na nodra sasaga na dauveisaqa. Na veiauwa kece e vakayagataki me vakoti kina na ivunau ena nona bula e dua na gone, e sega ni wiliki rawa na auwa ni veisaqasaqa ka sinai ena itukutuku kei na iyaloyalo e bolea se vagaluya na dina ni veivakabulai oqo.
Eso vei keda ena taroga se na vinaka beka meda voleka ga yani vei ira na luveda ena veika marautaki eso, se eda na taroga beka de sa rui sivia vua na gone na nomu ivakavuvuli. Ia, e dodonu meda vakasamataka, “Ena lailai ni gauna kei na vica wale na madigi, na mala ni ivunau cava e rawa niu wasea mera vaqaqacotaki kina na nodra vorata na bolebole ni veigauna ni nodra vakabauta?” Na malanivosa o wasea nikua e rawa nira na kauta voli, ka na totolo na tasiri yani ni siga nikua.
Au dau qoroya tu na nona yalodina na buqu vakarua o Mary Bommeli ena wasei ni ivunau i Jisu Karisito. E Suwitisiladi a vakavulici kina na nona matavuvale mai vei rau na daukaulotu ni se qai yabaki 24.
Ni papitaiso oti, a gadreva o Mary me laki duavata kei ira na Yalododonu mai Amerika, a mani biubiu kina mai Suwitisiladi ki Berlin ka kune cakacaka vua e dua na marama me dau tali isulu ni matavuvale. E nona icili na rumu ni dauveiqaravi ka vakadabera toka na nona misini ni talitali ena loma ni vale.
Ena gauna oya, e tabu vakalawa na kena vakavulici na ivunau ni Lotu i Jisu Karisito ni Yalododonu Edaidai mai Berlin. Ia a raica o Mary ni sega ni rawa ni tarovi koya mai na nona vakavulica na veika sa vulica. Era wavokiti koya na marama kei na itokani ena yasa ni misini ni talitali mera rogoca na veivakavulici nei Merii. A tukuna na rairai mai ni Tamada Vakalomalagi kei Jisu Karisito vei Josefa Simici, na veisiko mai ni agilosi, kei na iVola i Momani. Ni nanuma na itukutuku nei Alama, a vakavulica o koya na vunau ni Tucaketale. E vakadinadinataka ni rawa nira laki duavata tale na matavuvale ena matanitu vaka silesitieli.
Na nona sasaga o Mary me wasea na ivakavuvuli ni kosipeli vakalesui mai sa lai vakatubuleqa. E sega soti ni dede era sa mai kauti Mary na ovisa ki valeniveivesu. Ni ratou sa kauti koya a taroga se o cei na turaganilewa ena rogoca na nona kisi ena mataka ni siga tarava. A taroga talega me baleta na nona matavuvale ka kevaka e tama ka tagane vakawati vinaka. A kaya na ovisa nio turaganilewa e tagane vakavuravura.
Ena valeniveivesu, a kerea sara o Mary e dua na peni kei na pepa. Ena bogi oya a vola e dua na ivola vei turaganilewa, ka wasea na nona ivakadinadina ni Tucake tale i Jisu Karisito me vaka e vakamacalataki ena iVola i Momani, tukuna na vuravura ni yalo, ka vakamacalataka na veivutuni. E vakatura ni na gadreva o turaganilewa na gauna me vakananuma lesu na nona bula ni bera ni yacova yani na iotioti ni veilewai. A vola ni kila ni levu na ka me veivutunitaka o turaganilewa ka na rawa ni rarawa kina na nona matavuvale ka yaluma vakalevu kina o koya. Ena mataka, ni sa tinia na nona ivola, a kerea vua na ovisa me lai solia vei turaganilewa, ka vakadonuya.
E muri sa mani kacivi o ovisa kina valenivolavola nei turaganilewa. Na ivola nei Mary sa ivakadinadina bula ni sa vakavulica tiko na kosipeli ka sa voroka kina na lawa. Ia, e sega ni dede sa tu tale o ovisa ena valeniveivesu nei Meri. A tukuna vua ni sa vakasukai na veika kece e beitaki vua ka sa rawa ni gole i vale. Na nona vakavulica na kosipeli vakalesuimai i Jisu Karisito sa vakavuna na nona bala ki valeniveivesu. Ni oti na nona cauraka na vunau ni veivutuni vei turaganilewa a sereki kina mai valeniveivesu.
A sega ni mai mudu na veivakavulici nei Mary Bommeli ena nona sa sere mai. Na itukutuku ni nona vosa a vakadrodroya sobu mai na ivunau dina ena veitabatamata se bera ni sucu. Na nona vakabauta ni rawa ni vakavuvulitaka na ivunau i Jisu Karisito e dua sara mada ga se qai saumaki wale mai e vakadeitaka nira na vaqaqacotaki na nona kawa ena nodra ivalu.
Nida cakava na noda vinaka duadua meda vakavulici ira eda lomana ena ivunau i Jisu Karisito, eso era na sega tiko ga ni ciqoma. Ena yaco mai ena nomu vakasama na vakatitiqa. Ona taroga beka se o sa kila vinaka beka na nona ivunau na iVakabula me rawa ni mana kina nomu vakavulica. Ia kevaka o sa tovolea oti mo vakavulica, ona taroga beka se cava na vuna e sega ni laurai mai kina na votukana vinaka. Kakua ni soro kina vakatitiqa oqori . Gole vua na Kalou mo vukei.
“Io, mo tagi vua na Kalou me vukei iko ena ka kecega; … mo dau lomana tikoga na Turaga ka sega ni mudu.”
“Ia oqo au gadreva mo ni yalomalumalumu, mo ni talairawarawa ka yalomalua; mo dou vakamasuti vakarawarawa; sinai ena yalodei kei na vosota vakadede; ka matau ena ka kecega; ia mo dou gugumatua ka muria tiko ga na ivakaro ni Kalou ena gauna taucoko; ia mo ni kerea vua na veika kecega ko ni gadreva, vakayago se vakayalo; ka mo ni dau vakavinavinakataka vua na Kalou na veika kece ko ni rawata.”
Kevaka o masu, kevaka o vosa vua na Kalou, kevaka o masuta na Nona veivuke ena vukuna nomu daulomani, kevaka o vakavinavinaka Vua sega walega baleta na veivuke ia me baleta na vosota vakadede kei na ivalavala malua e dau yaco ni sega ni yaco totolo se sega sara ga ni yaco mai na veika kece o gadreva, au yalataka vei kemuni nio na voleka cake kina Vua. Ena yaco mo gugumatua ka dau vosota vakadede. Sa na qai rawa nio kila nio cakava na veika kece o rawata mo vukei ira o lomana kei ira o dau masulaka mera lako curuma na sasaga nei Setani me vagolei ira tani.
“Ia ko ira era sa waraki Jiova era na vakaukauwataki tale; era na cabe cake me vaka era vakatabana vakaikeli; era na cici ka sega ni oca; era na lako tu ka sega ni malumalumu mai.”
O rawa ni kunea na inuinui ena itukutuku vakaivolanikalou ni matavuvale. Eda wilika kina me baleti ira era gole tani mai na veika era vakavulici kina se o ira era veimulomulo tiko kei na Kalou mera vosoti, me vakataki Alama Lailai, ira na luvei Mosaia, kei Inosi. Ena gauna era leqa kina, erananuma na nodra vosa na itubutubu, na vosa ni ivunau i Jisu Karisito. Era vakabulai kina. Ena nanumi tikoga na nomu a vakavulica na vunau bibi oya.
Au wasea na ivakadinadina ena bibi ni cakacaka tabu ni nodra vakavulici na luvena na Tamada Vakalomalagi ena ivunau rawarawa i Jisu Karisito, ka rawa kina meda vakasavasavataki vakayalo ka na yaco meda vakacurumi kina iserau ni Kalou, meda bula vata kina kei Koya kei na Luvena ena lagilagi tawamudu vakamatavuvale. Ena yacai Jisu Karisito, emeni.