Raimatua vei Jisu Karisito kei na Nona Kosipeli
Nida vakalecava na ivakatatao kei vuravura ka raimatua vei Jisu Karisito kei na Nona kosipeli, eda na rawaka vakaidina.
Ena 1996 a taura na icocovi koula ni Olympic na timi tagane ni soka ni Nigeria a caka mai Atlanta, Georgia, e Amerika. Ni oti na fainala, era takui yani na tamata kina veigaunisala ena siti yadua kei na taoini; ena vanua oqo ni 110 na milioni na tamata (ena gauna oya) ka carubi vakasauri e dua na marau levu ena rua na kaloko ena bogi! A sega ni tarovi rawa na reki, mamarau, kei na yalo maqusa nira sa kana, lagasere, ka meke na tamata. Ena gauna o ya, sa duavata o Nigeria kei ira yadua era vakacegu nira kai Nigeria.
Ni bera na Olympics, a sotava na timi oqo e so na ibolebole. Ni tekivu na sotasota, e sega tu na veivuke vakailavo. E tekivu qito na timi ka vseganitaucoko tu na nodra iyaya ni qito, vanua ni tereni, kakana, kei na vanua ni savasava.
Jerome Prevost/Getty Images
Ena dua na gauna, sa vo ga e vica na miniti me ratou sa vakadrukai mai na sotasota, ia a qaqa na timi ni Nigeria ka sega ni namaki. Na gauna cecere oqo a veisautaka na nodratou rai baleti iratou. Ena vakabauta vou oqo, vata kei na cakacaka vakaukauwa ni tamata yadua kei na timi kei na gugumatua, era duavata ka sega ni kauwaitaka na vei vakatatao eso era raimatua ga ena qaqa. Na rai oqo e ratou rawata kina na koula, era vakatokai ratou mai Nigeria me “Timi Cecere.” Na Timi Cecere ena Olympic ni 1996 sa vakatokai tu ga ena veiqito e Nigeria.
David Cannon/Allsport/Getty Images
Na gauna ga e ratou sega ni kauwai kina na timi ni soka ni Nigeria kina vuqa na vakatatao e ratou sotava ka raicamatua ga na nodratou lalawa, e ratou a qaqa kina veika a uabaleti iratou ka kunea na reki cecere. (Ka vakakina vei keimami kece e Nigeria!)
Ena salavata oqo, nida sega ni kauwai kina veivagolei tani kei vuravura ka raimatua vei Jisu Karisito kei na Nona kosipeli, eda vakadeitaki ena rawaka e uabaleta yani na noda vakanananu taucoko ka vakila na reki cecere. Me vaka e vakatavulica o Peresitedi Russell M. Nelson, “Ni vakanamata na noda bula vei Jisu Karisito kei na Nona kosipeli, e rawa nida vakila na reki veitalia na cava e yaco—se sega ni yaco—ena noda bula.”
Sa noqu masu ni na vukei keda yadua na Yalo Tabu meda vakaio kina veisureti nei Peresitedi Nelson me raimatua na noda bula vei “Jisu Karisito kei na Nona kosipeli” me rawa nida kune reki vei Karisito “se cava ga e yaco tiko—se sega ni yaco—ena noda bula.”
E vica tiko na itukutuku ena iVola i Momani e tukuni ira tiko e saumaki na nodra bula nira raimatua vei Jisu Karisito kei na Nona kosipeli.
Vakasamataki Alama Lailai. A vakaduiduile ka saqata na Lotu O tamana, o Alama, a masu ka lolo. A rairai mai e dua na agilosi ka kacivi Alama Lailai me veivutuni. Ena gauna oya, sa tekivu me rarawa o Alama ena “mosi e sa vaka na momosi ni yalo sa cudruvi.” Ena nona auwa butobuto, a nanumi tamana kina ni a vakavulica ni Karisito ena lako mai me sorovaka na ivalavala ca kei vuravura. E qai nanuma na vakasama oqo, a masuta na nona loloma cecere na Kalou. Sa yaco kina na reki, na reki a kaya ni totoka sara! A yaco me lomani ka reki o Alama baleta ni o koya kei tamana a raicamatua na iVakabula.
Kivei ira na itubutubu era vakaluveni era lakosese, ni yaloqaqa! Kakua ni lomatarotaka na vuna e sega ni lako mai kina e dua na agilosi me vukei luvemu me veivutuni, mo kila ni Turaga sa lesia tu e dua na agilosi eke ena nona ilakolako: o bisopi se iliuliu ni Lotu, se turaga se marama dauveiqaravi. Ke o lolo ka masu tikoga, ke o sega ni tuva na ituvatuva se yalana na siga vua na Kalou, ka nuitaka ni dodoliga tiko mai o Koya me veivuke, oti ga—vakalailai se vakamalua—o na raica na Kalou ni na tara na yaloi luvemu ni sa digia na luvemu me vakarorogo. E yaco oqo baleta o Karisito na reki—o Karisito na inuinui; Koya na iyalayala “na ka vinaka ena muri mai.” Koya gona mo nuitaki luvemu vei Jisu Karisito, ni o Koya na kaukauwa ni itubutubu yadua, kei na gone yadua.
Ni sa vakila na reki vei Karisito, sa laki bula o Alama Lailai ena reki oqo. A rawa vakacava vua me tudei na nona reki ena loma ni dredre kei na veivakatovolei? A kaya:
“Io, me tekivu mai na gauna oya me yacova sara mai oqo, au sa daucakacaka tiko ga vagumatua ka sega ni cegu, [me] rawa niu kauta mai eso na yalo kina veivutuni; io mera tovolea tale ga na marau cecekia a yaco vei au.
“Io sa solia vei au na Turaga na marau levu ena vua ni noqu cakacaka.
“Ia au sa dauvukei ena gauna ni noqu vakatovolei kei na gauna kecega ni noqu leqa.”
Tekivu nona marau taki Karisito o Alama ena gauna e cakacakataka kina nona vakabauti Koya ka taigica nona loloma cecere. A qai cakacakataka o Alama me vakabauti Karisito ena nona cakacaka mera vukea eso mera tovolea na reki vata oya. Na tomani tiko ni cakacaka oqo a vakavuna me reki vakalevu o Alama ena gauna mada ga ni veimataqali dredre kei na leqa. O raica eke, “ni Turaga e taleitaka na sasaga,” kei na sasaga e raici Koya ena kauta mai na kalougata. Ena veika dredre sara ena rawa meda “marau ga ena vukui Karisito” ”
E dua tale na ilawalawa ena iVola i Momani era a raicamatua na nodra bula vei Jisu Karisito kei na Nona kosipeli ka ra kunea na reki o ya o ira a tauyavutaka na koro o Ilami—na vanua mera na susugi ira kina na luvedra ka marautaka na bula galala ena nodra lotu. O ira na tamata yalododonu oqo era bula vinaka voli era vakabobulataki mai na dua na ilawalawa ca ka kau tani nodra dodonu vakatamata mera qaravi lotu. Ena so na gauna e dau yaco na ka ca vei ira na tamata vinaka:
“Ia sa raica na Turaga ni sa dodonu me totogitaki ira na nona tamata; io, e vakatovolea na nodra dauvosota kei na nodra vakabauta.
“Io—ko koya yadua sa vakararavi vua ena laveti cake ena siga mai muri. Io, sa yaco vakakina vei ira na tamata oqo.”
Era vosota vakacava na tamata oqo na nodra veika dredre kei na vakararawataki? Nida raimatua vei Karisito kei na Nona kosipeli. Ni nodra leqa a sega ni vakadeitaki ira; ia, era gole yadua vua na Kalou baleta ni ra sa vakadeitaki ira nira sa luve ni Kalou, sa gone ni veiyalayalati, ka sa tisaipeli i Jisu Karisito. Nira sa qai nanuma o cei o ira ka kaci vua na Kalou, era sa ciqoma na vakacegu, kaukauwa, ka reki sara vei Karisito.
“Ia ko Alama kei na nona tamata sa tagi vakaidina [vua na Kalou] na yalodra; ka sa kila ko Koya na gagadre ni lomadra.
“Ia sa yaco ni sa rogo mai vei ira na domo ni Turaga ni ra sa rarawa tiko ka kaya: Dou laveta cake na ulumudou ka vakacegu, ni’u sa kila tu na veiyalayalati dou a cakava vei au; ia au na veiyalayalati kei ira na noqu tamata, ka vueti ira mai na nodra vakabobulataki.”
Ni sa rogoca, na Turaga, sa qai “vakamamadataka na icolacola sa vakacolati [vei ira]. Io, a sa vakaukauwataki ira na Turaga me rawarawa vei ira na nodra icolacola, ka ra soli ira ena yalomarau kei na yalovosota kina nona inaki na Turaga.” Meda kila ni ira na Yalododonu oqo era laiva na nodra leqa, rarawa, kei na dredre me rawai ena reki vei Karisito! Ena kena gauna, me vakaraitaka vei Alama na sala mera dro kina, ni o Alama—na parofita ni Kalou—a liutaki ira mera taqomaki.
Nida raicamatua na Karisito ka muria na Nona parofita, eda na muataki talega vei Karisito kei na reki ni Nona kosipeli. E vakavulica o Peresitedi Nelson: “E ka kaukauwa na reki, nida vakanamata ena reki e kauta mai na kaukauwa ni Kalou ki na noda bula. Ena veika kece, O Jisu Karisito na noda ivakaraitaki vinaka, ‘o koya a vosota na kauveilatai ena vuku ni reki a tu e matana’ [Iperiu 12:2.”
Se qai takali toka ga qo na tinaqu, au a kidrowa kina. Au lomani tinaqu kau sega ni namaka me takali yani ni se bulabula. Ena nona sa takali, keitou sotava ruarua vakavuvale na rarawa kei na reki. Au kila ena Vukuna, ni sega ni mate o koya—e bula tiko. Au kila ni ena vuku i Karisito kei na idola ni matabete a vakalesui ki na Lotu oqo maivei Parofita Josefa Simici, au na tiko vata tale kei koya. Na rarawa ni sa yali o tinaqu sa mai kaucake ena reki vei Karisito! Au sa vulica tiko ni “vakasama vakasilesitieli” ka “me qaqa ga na Kalou” e oka kina na raicamatua tiko na reki sa tiko vei Karisito.
E veisureti ena loloma, “Dou lako mai vei au, koi kemudou vakadua ga sa oca, ka colata na icolacola bibi, ia kau na vakacegui kemudou.” Ena yacai Jisu Karisito, emeni.