Talei vua na Kalou
Nida vakasinaiti ena loloma ni Kalou ena taqomaki keda ena cava ni bula ia ena vakamarautaki keda talega na veigauna vinaka.
Ni bera niu tekivu, meu tukuna vei kemuni ni rua na luvequ erau matabuto ni rau vosa tiko ena itutu ni vunau, au se bera vakadua ni vakila niu semati vakalevu cake vei rau me vaka ena gauna oqo. E vuqa na ka au vakasamataka mai na katuba lawalawa.
E ono na luvei keirau, era dau veivakalialiai ena so na gauna se ocei e gone ni toko. E duidui na vuna era vinakata kina. Na neirau lomani ira yadua na luvei keirau e savasava ka veivakacegui ka taucoko. Keirau sega ni lomana rawa e dua vei ira vakalevu cake mai na dua tale—ena sucu e yadua na gone e ivakraitaki ni neirau loloma levu. Au semati au vakalevu kina loloma i Tamaqu Vakalomalagi me baleti au ena loloma au vakila me baleti ira na luvequ.
Nira vakatovotovotaka yadua na nodra nanuma nio koya na gone lomani duadua, onananuma ni segavakadua ni dua na nodra rumu me duka tu. E vakilai ni cala tu na veiwekani ena maliwa ni itubutubu kei na gone e sa lailai mai ni sa vakanamata kina loloma.
Ena dua na gauna, au raica ni rawa ni yaco me keitou veivala vakamatavuvale, au na tukuna e dua na ka vakaoqo “Io, dou sa vakaosoosotaki au, ia au na sega ni kacivaka; dou sa kila o cei vei kemudou na noqu gone ni toko.” Na noqu lalawa oya me ratouna kila na lewe ono niratou qaqa ka-sega na veivala—me yacova na gauna ka tarava!
Ena nona Kosipeli e vakamacalataki koya o Joni me “na tisaipeli ka sa lomana ko Jisu” me vaka ni ituvatuva koya e dua na ka mareqeti. Au via vakasamataka ni oqo e baleta nio Joni e vakila nio Jisu e lomani koya vakataucoko. A solia vei au o Nifai e dua na veika tautauvata ni a vola “Au vakalagilagia ena noqu Jisu.” E dina sara, na iVakabula e sega tale ni nei Nifai me vaka e sega ni nei Joni, ia na ituvaki ni nona veimaliwai o Nifai kei na “nona” Jisu a kauti koya kina ivakamacala malumu o ya.
E sega li ni totoka ni tiko eso na gauna eda rawa ni vakila kina nida raici ka lomani vakavinaka sara? E rawa vei Nifai me vakatokai Koya me “nona” Jisu, ka rawa talega vei keda. Na loloma ni noda iVakabula e “cecere duadua, vakaturaga duadua, kaukauwa duadua,” ka dauvakarautaka me yacova nida sa “vakasinaiti” Na loloma vakalou e sega ni dau maca mai, eda sa ka taleitaki dina. Na loloma ni Kalou sa ikoya na vanua, me vaka na iwirini ni dua na droini ni Venn, eda veisotari kece kina. Se vakacava na noda duidui, na Nona loloma ea vanua eda kunea kina na duavata.
E kurabuitaki beka ni na ivakaro levu duadua sai koya mo lomana na Kalou ka lomani ira era tu wavokiti keda? Niu raici ira na tamata era vakaraitaka na loloma va Karisito vei ira yadudua, au vakila ni vaka na loloma e vakatawana e levu cake na ka mai na nodra loloma, walega e sa loloma ka tu kina na veivakamareqeti. Nida veilomani vakaoqo, ena kena taucoko kei na maucokona eda rawata, e oka kina o lomalagi.
Ia kevaka e dua eda kauwaitaka e vaka me yawa mai na yalo ni loloma vakalou, e rawa nida muria na ivakarau oqo—ena noda cakava na veika e kauti keda voleka yani vua na Kalou ka qai cakava na veika e kauti keda voleka yani vei ira—e sega ni tukuni ena noda vakataki Karisito.
Au diva meu rawa ni dabe vata kei kemuni ka tarogi kemuni se cava na ituvaki e vakavuna mo ni vakila na loloma ni Kalou. Na tikina cava ena ivolanikalou, na cakacaka ni veiqaravi cava soti? O via tu ivei?” Na ivakatagi cava? Ocei ena tokona? Na koniferedi raraba e vanua vutuniyau me vulici kina na semati kina loloma vakalomalagi.
O rairai vakila beka nio yawa mai na loloma ni Kalou? De dua beka na rorogo ni veivakayalolailaitaki se butobuto e bika na nomu vakasama, itukutuku e tukuna vei iko nio sa mavoa ka veilecayaki, maumalumu ka beci, sa rui dredre se sega ni gadrevi ena loloma vakalomalagi ena sala dina. Kevaka o rogoca na vakasama oqori yalovinaka rogoca na ka oqo: era cala ga na domo oqori. E rawa nida guilecava na yaloraramusumusu ena sala ka rawa ni sega ni vakatara kina medarawata na loloma vakalomalagi—ena veigauna kece eda lagata kina na serenilotu ka vakananuma vei keda ni noda iVakabula lomani ka sega ni cala e digitaka me “mavoa, ka ramusu, [ka] dresulaki ena vukuda,” ena veigauna ekce eda kani kina na madrai. E dina sara ni kauta tani o Jisu na madua mai vei ira na ramusu. Mai na Nona kavoro, a yaco kina o Koya me vinaka sara, ka rawa ni vakavinakataki keda o Koya e dina ga ni da sa voroki. Na ramusu, galili, basuraki, ka mavoa o Koya—ka da vakila beka nda vakakina—ia eda sa tawasei tani mai na loloma ni Kalou eda sega ni vakakina. “O ira na kavoro; loloma uasivi sara,” me vaka sara na sere.
O na rairai kila e dua na ka vuni me baleti iko ka na vakavuna mo sega ni lomani. Ia na dodonu o na rairai baleta na veika o kila me baleti iko, o sa cala ni o nanuma ni o sa biuti iko tani mai na tarai cake ni loloma ni Kalou. Ena so na gauna eda dau voravora ka sega ni dau vosota vei keda ena sala eda na sega ni rawa ni vakasamataka nida cakava vua e dua tale. E levu sara na ka meda cakava ena bula oqo, ia na veicati-lvakai keda kei na veicudruvi-lvakai keda e sega ni volai. Ia ke o bulicaki ca vakacava eda rairai nanumi keda ia, na Ligana e sega ni lekaleka. Sega. Enabalavu tu ga mera “[dolele] mai vei keda” ka ciqomi keda yadua.
Nio sega ni vakila na katakata ni loloma va kalou, e sega ni lako tani. Na vosa ni Kalou sai koya “ena takali na veiulunivanua, ka kau tani na veidelana; ia [na nona] yalovinaka ena sega ni lako tani mai [vei keda].” Me matata ga, na vakasama ni sa sega ni dau loloma na Kalou e dodonu me sa yawa sara mai na lisi ni ivakamacala e rawa ena bula eda sega ni rawata me yacova ni sa biubiu na veiulunivanua ka sa yali na veidelana!
Au taleitaka vakalevu nai vakaraitaki oqo ni ulunivanua e ivakadinadina ni tudei ni loloma ni kalou. Na ivakatakarakara kaukauwa oqori e vauci ena kedra itukutuku o ira era lako kina veiulunivanua me ra ciqoma na ivakatakila kei na ivakamacala nei Aisea me baleta na “ulunivanua ni vale ni Turaga” ni ra “tauyavutaki ena dela ni veiulunivanua.” Na vale ni Turaga sa itikotiko ni noda veiyalayalati talei ka vanua meda vakasuka kece kina ka lutu vakatitobu kina na ivakadinadina ni loloma nei Tamada me baleti keda. Au sa marautaka talega na vakacegu e yaco mai ki yaloqu niu ologa vakavinaka cake ena noqu veiyalayalati ni papitaiso ka kunea e dua e lolositaka tiko e dua na yali se lolositaka tiko e dua na rarawa kau tovolea meu vukei ira me ra taura matua ka cakacakataka na lomadra. Oqo beka na sala eda na rawa ni lakocuruma vakalevu cake kina ena loloma talei ni veiyalayalati, yalodina?
Kevaka sa sega ni biuti keda na loloma ni Kalou, na cava eda sega ni vakila kina? Me qarava ga na veika o namaka: Au sega ni kila. Ia na nomu lomani e sega ni tautauvata kei na vakila ni lomani, ka tiko e vica na noqu vakasama ka na vukei iko nio vakasaqara tiko na nomu isau ni taro o ya.
De dua o sa veimulomulo tiko ena rarawa, yalolailai, veivakacacani, galili, bitaki, se dua tale na ka e kaukauwa sara ki na nomu rawa ni vakila na loloma ni Kalou me baleti iko. Ke vaka kina, na veika oqo ena rawa ni vakamalumalumutaka se tarova na noda na vakila na veika eda rawa ni vakila. Ena dua na gauna, de na sega beka ni rawa nio vakila na Nona loloma ka sa na rauti iko mada ga na kilaka. Ia au vakataroga kevaka e rawa nio vakatovotovo—ena vosota—ena duidui sala ni kena vakaraitaki ka ciqomi na loloma vakalou. E rawa beka nio lesu tale mai na veika kecega sa tu e matamu ena dua na ikalawa kei na dua tale me yacova nio raica e dua na vanua rabailevu, rabailevu ka rabailevu kevaka e gadrevi me yacova nio sa “vakasamataka vakasilesitieli” baleta nio raica tiko na kalokalo ka nanuma tiko na vuravura e sega ni wiliki rawa ka mai vei ira kina nodra Dauniveibuli?
Na tagi ni manumanu, vakila na kata ni siga se cagi se uca kina kuli ni yagoqu, kei na gauna e vakurabuitaka kina na yagoqu na veika bula baleta na Kalou—era sa vakaitavi yadua ena kena vakarautaki vei au na isema vakalomalagi. De dua ena veivuke beka na veitokoni ni itokani yalodina. Se ivakatagi? Se veiqaravi? O dau vola beka e dua na ivolatukutuku se ivolagauna me baleta na gauna a matata kina vei iko na kemu isema vua na Kalou? De dua e rawa nio sureti ira o nuitaka mera wasea na nodra ivurevure ni isema vakalou vei iko nio vakasaqara na vakacegu kei na kila ka.
Au vakataroga, kevaka mena digitaka o Jisu e dua na vanua mo sota kina kei Koya, e dua na vanua vakaitaukei ka na rawa nio raimatua kina Vua, ena digitaka beka o Koya na vanua duatani ni nomu rarawa, na vanua ni nomu gagadre titobu duadua, na vanua e sega tale ni dua e rawa ni lako kina? Ena dua na vanua o sa galili kina ka sa dodonu mo tiko duadua vakaidina ia o sega ni vakakina, e dua na vanua e rairai sa lako kina o Koya ia sa vakarau tu me sotavi iko mai kea ni ko yaco yani? Kevaka onawaraki Koya me lako yani, e sega beka ni tiko o Koya mai kea ka rawa ni tarai?
Kevaka o vakila na loloma ena gauna oqo ni nomu bula, yalovinaka tovolea mo taura matua me vaka e dua na itatarovi. Kaburaka e veivanua o lako kina. E dua na cakamana ni bula vakalou oya ni gauna eda tovolea kina meda wasea na loloma i Jisu, eda kunea nida vakasinaiti tu ena dua na ivakarau ni ivakavuvuli ni “ko koya yadua sa vakayalia na nona bula ena vukuqu ena kunea.”
Nida vakasinaiti ena loloma ni Kalou ena taqomaki keda ena cava ni bula ia ena vakamarautaki talega na veigauna mamarau—na noda veisiga rekitaki, ni tiko na rarama ni matanisiga mai lomalagi, ena vakararamataki vakalevu cake mai na rarama ni matanisiga ni yaloda.
Meda yaco meda “vakawakana ka yavutaki” vei Jisu kei na Nona loloma. Meda vakaraica ka vakamareqeta na veika eda sotava nida vakila na Nona loloma kei na Nona kaukauwa ena noda bula. Na reki ena kosipeli e tiko me baleti keda kece: sega wale ga vei ira na marau tiko, sega walega vei ira na rugurugua. Na reki e noda inaki, sega ni isolisoli ni keda ituvaki. E tu vei keda na inaki vinaka kecega meda “reki ka vakasinaiti ena loloma vua na Kalou kei ira na tamata kecega.” Meda sa qai vakasinaiti. Ena yacai Jisu Karisito, emeni.