Qarava Vinaka na Wakana, era na Qai Tubu Cake na Tabana

Mai vei Elder Dieter F. Uchtdorf

Ena Kuoramu ni iApositolo Le Tinikarua

Na veitabana ni nomu ivakadinadina ena vakaukauwataki mai na titobu ni nomu vakabauta na Tamada Vakalomalagi kei na Luvena Daulomani.

E Dua na Valenilotu Makawa e Zwickau

Na yabaki oqo 2024 sa na yabaki cecere tiko vei au Sa ika 75 ni yabaki ni noqu a papitaiso ka vakadeitaki ena Lotu i Jisu Karisito ni Yalododonu Edaidai e Zwickau, e Jamani.

Na noqu lewena na Lotu i Jisu Karisito sa ka mareqeti vei au. Meu wili vata kei ra na tamata veiyalayalati ni Kalou, kei kemuni, na taciqu kei na ganequ, sa dua na ka dokai levu duadua ena noqu bula.

Niu vakasamataka na noqu ilakolako vakatisaipeli, au dau nanuma lesu e dua na vale makawa mai Zwickau, kau dau nanuma tu ga niu se gone na gauna ni soqoni ni sakaramede ni Lotu i Jisu Karisito. E kea sara ga a qaravi taumada mai kina na soreni noqu ivakadinadina.

Na valenilotu oqo e dua tiko na kena oqani makawa. Ena vei-Sigatabu kece e dau lesi e dua na cauravou me pamuta na kena liva tudei me yavala na iuvu me rogo kina na oqani. Eso na gauna a noqu madigi cecere meu veivuke ena cakacaka bibi oqo

Nira lagata na ivavakoso na neimami serenilotu taleitaki, au dau pamu ena noqu kaukauwa kece me kua ni oti na cagi ena oqani. Ena idabedabe nei dauniuvu, au dau sarava vakavinaka eso na iloilo droinitaki, e dua a vakaraitaka na iVakabula o Jisu Karisito ka dua e droinitaki Josefa Simici ena Veikau Tabu.

Au se nanuma tikoga noqu vakila na yalo tabu niu sarava na katuba leleka ni cilava na siga ka vakarogoca na nodra ivakadinadina na Yalododonu ka lagata na serenilotu kei Saioni.

Ena vanua tabu ko ya, a vakadinadinataka na Yalo ni Kalou ki na noqu vakasama kei na yaloqu ni sa ka dina—o Jisu Karisito sa iVakabula kei vuravura. Oqo na Nona Lotu. Na Parofita o Josefa Simici a raica na Kalou na Tamada kei Jisu Karisito ka rogoca na Domodrau.

Ena itekivu ni yabaki oqo, ena dua na ilesilesi e Iurope, au a lesu rawa sara ki Zwickau. Ka ni rarawa, sa sega ni tu e kea na valenilotu makawa talei o ya. A talaraki sobu ena vuqa na yabaki sa oti me rawa ni tara e dua na vale ni vulagi

Na Cava e Tawamudu, kei na Cava e Sega?

E dina sara noqu rarawa niu sa mai kila ni vale talei oqo niu se gone sa balolo tu ga ni vakanananu. Sa dua na vale tabu dina vei au. Ia a dua ga na vale.

Kena duidui ga, ni ivakadinadina vakayalo au a ciqoma mai vua na Yalo Tabu ena vuqa na yabaki sa oti e sega ni yali. E dina sara, sa kaukauwa cake tikoga. Na veika au a vulica niu se cauravou baleta na ivakavuvuli bibi ni kosipeli i Jisu Karisito sa noqu yavu tudei tikoga ni noqu bula taucoko. Na sema ni veiyalayalati au a cakava vei Tamaqu Vakalomalagi kei na Luvena Daulomani sa tu ga vei au—ni oti makawa sara na kena basu na valenilotu e Zwickau ka yali yani na iloilo rokataki.

“Ena takali ko lomalagi kei vuravura,” a kaya o Jisu, “ia na noqu vosa ena sega ni takali.”

“Ni na takali na veiulunivanua, ka yavavala na veiulunikoro, ia na noqu yalololoma ena sega ni takali vei iko, ka na sega tale ga ni yavavala na noqu veiyalayalati ni sautu, sa kaya ko Jiova.”

Dua vei ira na ka bibi eda rawa ni vulica ena bula oqo o ya na duidui ni ka e tawamudu kei na ka e sega. Ni da sa kila vinaka oqo, sa na veisau na ka kecega—na noda veiwekani, na digidigi eda cakava, kei na sala eda qarava kina na tamata.

Nida kila na ka e tawamudu kei na ka e sega sa idola kina tubu ni ivakadinadina i Jisu Karisito kei na Nona Lotu.

Kakua ni Nanuma Cala ni Tabana e Wakana

Na kosipeli vakalesuimai i Jisu Karisito, me vaka a vakavulica o Josefa Simici, “e cokonaki tu kina na veigacagaca taucoko ni ka dina.” Ia e sega ni kena ibalebale oqori ni dina taucoko sa tautauvata na kedra yaga. Eso na dina era sa usutu, bibi, ka wakani noda vakabauta. Eso tale era sa ikuri se tabana—e yaga, ia kevaka ga era sa semati ki na veika bibi

A tukuna na Parofita o Josefa, “ Na yavu bibi ni ivakavuvuli ni noda Lotu o ya na nodra ivakadinadina na iApositolo kei na Parofita me baleti Jisu Karisito, ni a mate, bulu, ka tucaketale ena ikatolu ni siga, ka lako cake ki lomalagi; kei na veika kece tale eso e salavata kei na noda Lotu era sa tokona talega.”

Ena dua tale na vosa, o Jisu Karisito kei na Nona isoro veisorovaki sa waka ni noda ivakadinadina. Na veika tale eso era sa tabana.

Sega ni tukuni eke nira sega ni bibi na tabana. Ena gadreva na vunikau na tabana. Ia ni kaya na iVakabula vei ira na Nona tisaipeli, “Sa sega ni vua rawa na tabana vakai koya, kevaka sa sega ni tu vata kei na vaini.” Ni sega na isema vua na iVakabula, ena veiqaravi vinaka e tiko ena wakana, ena malai na tabana ka mate.

Ni yaco meda qarava vinaka na noda ivakadinadina baleti Jisu Karisito, au vakasamataka de so na gauna eda nanuma cala ni tabana e wakana. Oqo na cala a raica o Jisu vei ira na Farisi ena Nona gauna. Era sa vakatabakidua ga ki na veika lalai baleta na lawa ka yaco mera vakawalena na vosa ni iVakabula “na veika bibi cake”—na ivakavuvuli bibi me vaka na “lewa kei na loloma veivueti kei na vakabauta.”

Kevaka o vinakata mo qarava vinaka e dua na vunikau, o na sega ni suiva na tabana ena wai. O na suiva na wakana. Vakakina, ke o vinakata na nomu ivakadinadina me tubu ka vakavuana, mo qarava vinaka na wakana. Ke o lecava e dua na ivunau se ivalavala se gacagaca ni itukutuku ni Lotu, tara cake nomu vakabauti Jisu Karisito. Vakasaqara mo kila vinaka na Nona solibula baleti iko, na Nona lomani iko, na Lomana baleti iko. Mo Muri Koya ena yalomalumalumu Na veitabana ni nomu ivakadinadina ena vakaukauwataki mai na titobu ni nomu vakabauta na Tamada Vakalomalagi kei na Luvena Daulomani.

Me vakataka, ke o vinakata me qaqaco nomu ivakadinadina ni iVola i Momani, mo raicamatua ga na kena vakadinadinataki Jisu Karisito. Raica na sala e vakadinadinataki Koya kina na iVola i Momani, na veika e vakavulica baleti Koya, kei na sala e veisureti ka vakauqeti iko kina mo lako mai Vua.

Kevaka o vakasaqara tiko mo sotava e dua na ka e vakaibalebale cake ena soqoni ni Lotu se ena valetabu, tovolea mo vakasaqara na iVakabula ena cakacaka tabu eda ciqoma e kea. Mo kunea na Turaga ena Nona vale tabu

Kevaka o sa vakila na oca se uabaleti ena veikacivi ni Lotu, tovolea mo raica tale nomu veiqaravi vei Jisu Karisito. Cakava me ivakaraitaki ni nomu lomani Koya.

Qarava vinaka na wakana, era na qai tubu cake na tabana. Ni toso na gauna, era na vua mai na vuana.

Vakawakana ka Tarai Cake Vua

Na kaukauwa ni vakabauti Jisu Karisito e sega ni yaco vakasauri. Sega, ena vuravura vakayago oqo, na kau vakavotona kei na soni era na tubu ga vakai ira. Na vunikau bulabula, ka vuavuai vinaka ni vakabauta e gadrevi kina na sasaga dina. Kei na dua na tiki bibi ni sasaga oqo o ya me vakadeitaka ni da sa teivaki dei vei Karisitro.

Me vakataka: iMatai mada, eda na rairai muataki ki na kosipeli kei na Lotu ni iVakabula baleta ni da sa qoroi ira na lewenilotu yalovinaka se bisopi dauloloma se irairai savasava ni valenilotu. Na veituvaki oqo era sa ka bibi dina me tubu kina na Lotu.

Ia, ke sega ni tubu titobu cake tiko na waka ni noda ivakadinadina, na ka ena yaco ni da toki ki na dua tale na tabanalevu e luluqa vakalailai na kena valenilotu, ka ra sega so ni yalovinaka na lewena, ka cavuta o bisopi e dua na ka eda cudru kina?

Se meda raica mada oqo: e sega beka ni vinaka cake meda nuitaka ni da maroroya na ivakaro ka vauci e valetabu, eda na vakalougatataki ena dua na vuvale levu, ka mamarau, kei na gone era vuku ena talairawarawa, era qaqaco tu ena Lotu, laki kaulotu, lagasere ena tabanalevu, ka volodia me vukea na samaki ni valenilotu ena veimataka ni Vakarauwai?

Au nuitaka nio keda kece eda naraicana ka oqo ena noda bula. Ia vakacava ke sega ni yaco? Meda na tiko vata ga kei na iVakabula ena ituvaki cava ga—ka vakararavi tiko ga Vua kei na Nona gauna.

Meda sa qai tarogi keda: E yavutaki tiko beka na noqu ivakadinadina ena ka au nuitaka me yaco ena noqu bula? Sa na vakatau tiko beka ki na nodra ivalavala se nanuma eso? Se sa yavutaki dei tiko vei Jisu Karisito, “tauyavutaki ka tara cake vua.” se cava ga na veiveisau ni ituvaki ni bula?

iVakarau ni bula, iTovo, kei na Vakabauta

Na iVola i Momani e tukuna na tamata eso era “sa dodonu sara ena nodra muria na veicakacaka vakalotu ni Kalou.” Ia e dua sa dauvakatitiqa na yacana o Korio, a vosabeca na kosipeli ni iVakabula, ka vakatoka me “veika lialia” ka “ivakarau lialia ni [nodra] qase.” Sa liutaka o Korio “e vuqa na tamata, a sa vakavuna me ra viavialevu ka kitaka na ivakarau ca.” Ia a sega ni rawa o koya eso tale, baleta kivei ira, na kosipeli i Jisu Karisito sa uasivia cake na ivakarau ni bula.

Ena kaukauwa na vakabauta ke sa teivaki titobu tu ena bula ni tamata yadua, na nona yalodina vei Jisu Karisito, duatani mai na noda ivakarau ni bula se na veika era kaya se cakava eso.

Na noda ivakadinadina ena vakatovolei ka vakayavalati. Na vakabauta ena sega ni vakabauta ke sega ni vakatovolei. Na vakabauta ena sega ni kaukauwa ke sega ni saqati. Mo kua ni yalolailai ke tovolei na nomu vakabauta se taro tawasaumi mai.

Meda kua ni namaka meda kila vinaka na ka kece ni bera ni da cakava. Qori e sega ni vakabauta. Ni a vakavulica o Alama, “Na vakabauta e sega ni noda kila taucoko vakavinaka na ka.” Kevaka meda waraka meda cakava me yacova ni sa saumi kece na noda taro, eda sa yalana vakaukauwa na vinaka eda rawa ni rawata, ka yalana na kaukauwa ni noda vakabauta.

Na vakabauta ena totoka baleta ni gugumatua tikoga ni sega mada ga ni yaco mai na kalougata sa nuitaki tiko. Eda na tawaraica na veimataka, eda sega ni kila na isaunitaro kece, ia sa rawa meda ravi ga vei Jisu Karisito ni da toso tikoga ki liu ka rai cake tiko baleta ni o Koya na noda iVakabula ka Dauveivueti.

Na vakabauta ena vosota tiko na veivakatovolei kei na veilecayaki ni bula baleta ni sa teivaki dei tu vei Karisito kei na Nona ivunau. O Jisu Karisito kei na Tamada Vakalomalagi sai Rau na ituvaki tawa veivukiyaki, ka igugumatua ni noda vakararavi.

Na ivakadinadina e sega ni ka mo tara ena dua ga na gauna, ka sa tudei me tawamudu. Sa vaka sara e dua na vunikau o dau qarava vinaka e veigauna. Na teivaki ni vosa ni Kalou ena yalomu sa imatai ga ni ikalawa. Ni sa tekivu me tubu na nomu ivakadinadina, sa qai tekivu na cakacaka dina! Oya na gauna ”meda qarava vinaka mada, me tete na wakana, ka tubu cake ka vua.” Ena taura na “cakacaka vakaukauwa” kei na ”vosota na vosa.” Ia na yalayala ni Turaga sa dei: “Mo ni na tauca vakaidina na vua ni nomuni vakabauta, na nomuni gugumatua kei na nomuni vosota, kei na vosota vakadede, ena nomuni waraka tiko na vunikau me vuataka na vuana vei kemuni.”

Kemuni na taciqu kei na ganequ, na noqu itokani, e dua na tiki ni noqu bula e dau diva tu ga na valenilotu makawa mai Zwickau kei na kena katuba leka iloilo roka. Ia ena 75 na yabaki sa sivi, sa mai liutaki au o Jisu Karisito ena ilakolako ni bula sa totoka dina kau sega vakadua ni bau se raitayalotaka. Sa mai vakacegui au o Koya ena noqu rarawa, vukea meu kila na noqu malumalumu, vakabula na noqu mavoa vakayalo, ka qarava vinaka na noqu vakabauta sa tubu tiko.

Sa noqu masu ena yalodina kei na veivakalougatataki ni da na qarava vinaka tikoga na waka ni noda vakabauta vua na iVakabula, ena Nona ivunau, kei na Nona Lotu. Au vakadinadinataka na ka oqoena yaca tabu ni noda iVakabula, ka Dauveivueti, noda iVakavuvuli—ena yaca i Jisu Karisito, emeni.