Vakasaqara na Isau ni Veitaro Vakayalo
Na noda loma tarotaro ni kosipeli e rawa ni solia vua na Tamada Vakalomalagi kei Jisu Karisitio na madigi me rau vukei keda meda tubu kina.
Au kila ni veivakurabuitaki beka oqo, ia au nanuma rawa na gauna e vakatavulici kina e koronivuli ni ciwa na vuravura lalai ena noda vuravura levu. E dua vei ira na vuravura oqori, o Pluto, a vakayacana e dua na yabaki 11 o Venetia Barney mai Oxford, Igiladi, ni oti na kena kune ena 1930. Me yaco mai na 1992, e kilai nio Pluto e yawa mai na noda vuravura. Ena gauna oqo, e matau tu me dau laurai na ivakaraitaki pepa ni vei vuravura ena loma ni rumu ni kalasi kei na soqo ni vakadidike, ira yadua vakaraitaka na tutu ni Pluto kei na iyalayala kilai. E levu vei ira na daunivakadidike era vakabauta, ni lala tu na vanua e sivita na iyalayala oya.
Ia, vei ira na ilawalawa ni vakadidike e dua na taro e vo tiko ena vuku ni itekitekivu ni dua na mataqali vuravura era dau vakadikeva wasoma na daunivakadidike ni maliwalala. Ka tomani tiko na taro oya me sivia e vicasagavulu na yabaki ni bera ni kune e dua tale na vanua yawa ena noda ivakarau ni matanisiga. Ni yalani na nodra kilaka, era vakayagataka na sainisi na vicasagavulu na yabaki tarava mera rawata kina na tekinolaji vovou me rawa nira vulica ka vakadidike tale vakalevu. Era qai rawa ni raica rawa na iyala ni noda vuravura ka qai yaco me biu na vuravura vaka Pluto kina na dua na vanua vou ena maliwa lala kei na noda vuravura e tiko kina e walu na vuravura lalai.
E dua na sainisi ni vuravura ka dauvakadidike eliu me baleta na tabana ni vakadidike ni maliwalala na New Horizons ka vakaitavi na dikevi ni Pluto a tukuna na veika oqo: “Keimami nanuma ni keimami kila na vuravura. E sega. Keitou nanuma ni keitou kila na iwiliwili ni vuravura lalai ena nodanoda maliwa lala. Ka keitou cala sara.”
Na ka e tarai au me baleta na gauna ni vakadidike ni maliwalala oqo eso na vakatauvatani kei na duidui bibi ena kedrau maliwa ni kena vakalevutaki na rai vakasainisi kei na ilakolako eda saga, nida luve ni Kalou, meda vakasaqara na isau ni noda taro vakayalo. Vakatabakidua, meda na sauma vakacava na iyalayala ni noda kila ka vakarautaki keda kina wasewase tarava ni tubu vakayadua—kei na vanua keda rawa ni kunea kina na veivuke.
Vosa e na Vosa
Tarogi ni taro kei na vakasaqarai ni kena ibalebale e tiki ni veika eda sotava ena bula oqo. Ena so na gauna, e rawa ni kauti keda kina icavacava ni noda kila ni sega ni taucoko tu na isaunitaro, ka rawa ni veivakararawataki se veivakadrukai. E veivakurabuitaki, e tuva tu na yavu ni bula marau me baleti keda kece na Tamada Vakalomalagi ka me vukei keda meda tobu dina ga ni tu noda yalayala ka rawata na veika eda sega ni rawata vakataki keda, nida sega mada ga ni kila na veika kecega. Na ituvatuva ni Kalou dauloloma kina iyalayala ni kawatamata; e vakarautaka vei keda na noda iVakabula, o Jisu Karisito, me noda iVakatawa Vinaka; ka vakauqeti keda meda vakayagataka na noda galala ni digidigi meda digitaki Koya.
E vakavulica o Elder Dieter F. Uchtdorf ni, “taro e sega ni ivakatakilakila ni malumalumu,” ia “sa itekitekivu ni tubu.” E vosa vakadodonu kina noda sasaga yadua nida dauvasaqara na dina, na noda parofita, Peresitedi Russell M. Nelson, e vakavulica ni dodonu me tiko vei keda na “gagadre titobu” ka “kerea ena yalodina [kei na] inaki dina, ka vakabauti [Jisu] Karisito.” E tomana tale okoya ni balebale ni “yalodina” e dua e navuca dina me muria na veidusimaki vakayalo e soli mai.”
Na noda sasaga yadua meda tubu ena kilaka ena rawa ni vakavuna meda dikeva na noda lomatarotaro, dredre se sega, mo raica na kena inaki kei na kena revurevu, vakasaqara ka kila na kena ivakarau ka qai bulia na italanoa me rawa nida kila ka vakatawana na veivanua galala ena veika eda kila. Nida vakasamataka na noda vakasaqara na kila-ka vakayalo, ia, e rawa ni veivuke ena so na gauna na iwalewale ni vakasama oqo, ia era sega ni taucoko vakataki ira nida raica meda kila na veika e baleta na Tamada Vakalomalagi kei na noda iVakabula, o Jisu Karisito, Na Nodrau kosipeli, Nodrau Lotu, kei na Nodrau ituvatuva me baleti keda kece.
Na nodrau wasea vei keda na Nodrau vuku na Kalou na Tamada kei na Nona sala na Luvena meda vakaliuca ka sureta na kaukauwa ni Yalo Tabu me noda qasenivuli yadua nida vakaliuci Jisu Karisito ena noda bula kei na noda vakasaqara ena yalodina na Nodrau isaunitaro kei na Nodrau ibalebale. Erau sureti keda meda kunea na dina ena gauna yalodina e vakayagataki ena vulici ni ivolanikalou tabu ka vakasaqara na dina vakatakilai mai nikua me baleta na noda siga kei na noda gauna, era wasea na parofita kei na iapositolo ni gauna oqo. Era vakamasuti keda meda dau lako wasoma, ka sokalou ena vale ni Turaga ka tekiduru ena masu “me da rawata na itukutuku mai lomalagi.” Na iyalayala e solia o Jisu vei ira a tiko me rogoca na Nona vunau e Ulunivanua e dina vei keda ena noda gauna me vaka na Nona gauna ni veiqaravi e vuravura: “Dou kerekere, ka na soli vei kemudou; dou vakasaqara, ka dou na kunea; dou tukituki, ka na dolavi vei kemudou.” E vakadeitaka na noda iVakabula ni na “solia na veika vinaka na Tamamudou mai lomalagi vei ira sa kerekeke vua.”
Na iwalewale ni veivakavulici ni Turaga sa, “vosa ena vosa, vunau ena vunau.” Ena gadrevi meda “waraki Jiova” ena loma ni noda kila ena gauna oqo kei na kena e tarava e se bera ni soli mai. Na vanua tabu oqo e rawa ni dua na vanua e yaco kina na noda vakavakarau vakayalo—na vanua eda rawa ni “vosota vakadede” na noda vakasaqara vagumatua ka vakavouiya na noda kaukauwa me tomani tikoga na noda maroroya na iyalayala tabu eda sa cakava vua na Kalou ena veiyalayalati.
Na noda veiwekani ni veiyalayalati kei na Tamada Vakalomalagi kei Jisu Karisito e vakaraitaka na noda lewena na matanitu ni Kalou. Kei na noda itikotiko e kea e gadrevi kina na vakatautauvatataki ni noda bula kina ivakavuvuli vakalou kei na sasaga me tubu vakayalo.
Talairawarawa
E dua na ivakavuvuli bibi e vakavulici ena iVola i Momani taucoko oya nira digitaka na luve ni Kalou mera talairawarawa ka maroroya na nodra veiyalayalati, era na ciqoma na veivakasalataki kei na veidusimaki vakayalo. Sa kaya vei keda na Turaga nida na rawata na kilaka, kei na vuku mai na noda talairawarawa kei na gugumatua. E sega ni buli me itatao ni noda bula na lawa kei na vunau ni Kalou ia e dua na matamata kaukauwa ni ivakatakila yadua kei na vuli vakayalo. E vakavulica o Peresitedi Nelson na dina bibi oya ni “ivakatakila mai vua na Kalou e dau duavata kei na Nona lawa tawamudu” ka tomana ni “sega ni vakacala na Nona ivunau.” Na nomu talairawarawa ki na ivakaro ni Kalou, dina ni sega ni taucoko na kila-ka ni Nona inaki, e biuti iko ena kabani ni Nona parofita. E vakavulica vei keda na Mosese 5 na veivosaki e rau cakava o Atama kei dua na agilosi ni Turaga.
Ni soli oti vei Atama kei Ivi sa “vakarota ko koya me rau qarava na Turaga na nodrau Kalou, ka vakacabora na ulumatua ni nodrau qele ni manumanu me ivakacacabo vua na Turaga,” e tukuna na ivolanikalou ni “sa talairawarawa ko Atama kina ivakaro ni Turaga.” Ni tomani noda wiliwili “ia ni sa oti e vuqa na siga, sa rairai vei Atama e dua na agilosi ni Turaga, ka kaya: A cava ko sa vakacabo isoro kina vua na Turaga? A sa sauma ko Atama ka kaya vua: Au sega ni kila. Ia sa vakaroti au vakakina na Turaga.”
Na talairawarawa ni Atama e yaco sebera nona kila ka vakarautaki koya me ciqoma na kila-ka tabu ni a vakaitavi tiko ena dua na ivakatakilakila tabu ni Veisorovaki ni Jisu Karisito. Na noda talairawarawa ena, vakakina, caramaka na sala ni noda kila vakayalo na sala ni Kalou kei na Nona inaka tabu vei keda yadua. Na sasaga me lavetaka cake na noda talairawarawa e kauti keda vakavoleka ki na noda iVakabula, o Jisu Karisito, baleta na talairawarawa kina Nona lawa kei na ivakaro e yaco meda dodoliga yani Vua.
Me kena ikuri, na noda dina kina kila-ka kei na vuku sa tu vei keda taukeni oti ena yalodina kina ivakavuvuli ni kosipeli kei na veiyalayalati tabu e vakavakarau bibi kina noda tu vakarau me ciqoma ka dau taukena na veitaratara mai na Yalo Tabu.
E ivurevure ni dina kece na Tamada Vakalomalagi kei Jisu Karisito ka wasea vakalevu na Nodrau vuku. Vakatalega kina, na kila nida sega ni taukena na kila-ka vakataki keda mai vua na Kalou e rawa ni vukei keda me kila o cei meda vuki kina kei na vanua me biuta kina na noda inuinui taumada.
Veivakabauti Titobu
Na itukutuku mai na Veiyalayalati Makawa ni Nemani, na iliuliu ni mataivalu ka vakabulai mai na vukavuka mai vei Ilaisa na parofita, e dua taleitaka vakalevu vei au. Na italanoa oqo e vakaraitaka na dei ni vakabauta ni dua na “goneyalewa lailai” e veisautaka na bula ni dua na turaga ka, vei ira na dau vakabauta, vakaraitaka na vanua e yaco kina na loloma ni Kalou vei ira era nuitakai Koya kei na Nona parofita. Dina ni sega ni vakayacani, na goneyalewa oqo e vukea na kena toso eilu na noda kila. Kei na nona vakabauta o Nemani ki na nona ivakadinadina e vakauqeti koya me kauta na nona kerekere ki vua na dauveiqaravi digitaki ni Kalou.
Na isau nei Nemani ki na idusidusi mai vei Ilaisa na parofita me savati koya ena Joritani e matai a vakatitiqataka ka sega ni kauwai. Ia na veisureti vei koya me talairawarawa kina ivakasala ni parofita e vakavuna me vakabulai kei na nona kila vakavinaka ni dina na Kalou.
Eda na raica beka ni so na noda kerekere vakayalo e tiko na kena isau e matata vinaka ka sega beka ni vakavuna vakalevu na lomaleqa. Se, me vakai Nemani, keda rawa ni kunea ni so tale na gagadre e veibolei ka rawa ni vakavuna na yalo dredre ka vereverea e lomada. Se, me vaka na ivakamacala ni nodra itinitini taumada na daurairai imaliwalala me baleta na noda ivakarau ni matanisiga, ena noda vakasaqara na dina vakayalo, eda na rawa ni yacova na kena sega ni vakadewataki vakavinaka kevaka eda vakararavi vakatabakidua kina noda kila vakaiyalayala, e dua na revurevu rarawa ka sega ni namaki ka na rawa ni kauti keda tani mai na salatu ni veiyalayalati. Ka kena ikuri, eso na taro ena rawa ni tomani tiko me yacova na Kalou, o koya sa “tu vua na kaukauwa kecega” kei na “vuku kecega, kei na kila ka kecega,” o koya “sa kila na ka kecega” ena Nona loloma cecere, sa vakarautaka na veivakararamataki ena noda vakabauta na Yacana.
E dua na ivakasala bibi mai na itukutuku nei Nemani o ya ni noda vorata na talairawarawa ki na lawa kei na ivakaro ni Kalou ena rawa ni vakabalavutaka se vakaberaberataka na noda tubu. Eda sa kalougata ni sa noda iVakabula o Jisu Karisito. Na noda talairawarawa kina lawa kei na ivakaro ni Kalou ena rawa ni dolava na sala vua na noda iVakabula me vakarautaka na kila kei na veivakabulai e kila o Koya ni da gadreva, me vaka na Nona ituvatuva ni veiqaravi sa vakadeitaki me baleti keda.
E vakavulica o Elder Richard G. Scott ni “bula oqo e dua na ka e sotavi ena veivakabauti bibi—vakararavi vei Jisu Karisito, vakararavi kina Nona ivakavuvuli, vakararavi ki na noda rawa ka ena veidusimaki ni Yalo Tabu me da talairawarawa kina ivakavuvuli oqori me baleta na marau ena gauna oqo kei na dua na bula tawamudu vakainaki, mamarau cecere. Me nuitaki e kena ibalebale mo talairawarawa ka sega ni kila na icavacava mai na itekivu (raica na Vakaibalebale 3:5–7). Me vuataka na vuana, na nomu vakararavi vua na Turaga e dodonu me kaukauwa cake ka tudei mai na nomu yalodei kina nomu nanuma kei na veika o sotava.”
Tomana Elder Scott: “Na cakacakataki ni vakabauta sai koya mo nuitaka ni kila tu na Turaga na veika sa cakava tiko vata kei iko ka sa rawa Vua me rawata na nomu vinaka tawamudu e dina ga nio sega ni kila rawa na sala e rawa ni cakava kina o Koya.”
iOtioti ni iVakadinadina
Kemuni na itokani lomani, au vakadinadinataka ni noda taro dina ni kosipeli e rawa ni vakarautaka vei Tamada Vakalomalagi kei Jisu Karisito na madigi me vukei keda meda tubu. Na noqu sasaga yadua meu vakasaqara na isau ni taro mai vua na Turaga ki na noqu taro vakayalo—ena veigauna sa oti kei na gauna oqo—sa vakatarai au meu vakayagataka na vanua ena maliwa ni noqu kila kei na nona na Kalou meu vakatovotovotaka na talairawarawa Vua kei na yalodina kina kila-ka vakayalo sa tu rawa vei au.
Au vakadinadinataka ni nomu vakararavi vua na Tamada Vakalomalagi kei ira na Nona parofita, sa tala mai o Koya, ena vukei iko mo laveti cake vakayalo ka tosoi iko ki liu kina vunilagi rabailevu ni Kalou. Ena veisau na nomu rai baleta nio sa veisau. E kila na Kalou ni rawa nio rai vakayawa, ni cere icake na nomu bula. E sureti iko na iVakabula mo kaba cake. Ena yacai Jisu Karisito, emeni.