Muri Jisu Karisito
Nida muria na Karisito, meda vakavulica ka vakadinadinataki Jisu Karisito, na noda iVakaraitaki Uasivi sara. Meda muri Koya ka kua ni veileti.
Ena yabaki oqo e milioni vakamilioni era sa vakauqeti ena ituvatuva ni vuli kosipeli ka vakayacani ena nona veisureti na iVakabula “Lako Mai, mo Muri Au.” Na muri Karisito e sega ni dua na itovo ga me rawa se me caka ga ena so na gauna. Sai koya e dua na yalayala tomani tikoga ka ivakarau ni bula e dodonu me dusimaki keda tiko ena veigauna kecega kei na veivanua kecega. Na Nona ivakavuvuli kei na Nona ivakaraitaki e vakamacalataka na sala me muria na tisaipeli kece i Jisu Karisito. E sureta na tamata kecega me lako mai Vua—“na tamata loaloa kei na tamata vulavula, bobula kei na galala, tagane kei na yalewa; … kecega e tautauvata ena mata ni Kalou.”
I.
Na imatai ni kalawa ena muri Karisito sai koya me da muria na ka e vakatoka o Koya “na ivunau cecere duadua ena lawa”:
“Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega.
“Oqo na imatai ka ivunau levu.
“Kei na kena ikarua sa tautauvata kaya, mo lomana na kainomu me vaka ko lomani iko.
“Sa vu ni vunau taucoko kei ira na parofita na vunau e rua oqo.”
Na ivakaro ni Kalou e vakarautaka na kaukauwa veidusimaki ka veivakataudeitaki ena noda bula. Na veika eda sotava ena bula oqo e vakataki rau na gonetagane lailai kei tamana ena nodrau vakavuka kaite tiko ena dua na siga ni bula tiko na cagi. Ni tubu cake na kaite, qai vakavuna na cagi me tao tiko ena kena wa ka taura tiko na gonetagane lailai. Na sotavi ni kaukauwa ni cagi ni bula oqo, a kerea me musuka na wa me rawa ni vuka tubu na kaite. A vakasalataka o tamana yalomatua me kua, ka vakamacalataka ni wa sara ga e vakadeitaka tiko na kaite ena kaukauwa ni cagi. Kevaka e daru laiva na wa, ena sega ni vuka tubu na kaite. Ena veivukayaki ena cagi ka yaco na gauna me lutu lesu mai i vuravura.
Na wa oya e matataka na noda veiyalayalati ka semati keda vua na Kalou, na Tamada Vakalomalagi, kei na Luvena, o Jisu Karisito. Nida rokova na veiyalayalati oya ena noda maroroya na Nodrau ivakaro ka muria na Nodrau ituvatuva ni veivueti, na Nodrau veivakalougatataki yalataki ena rawa kina vei keda meda tubu cake kina veicecere vakasilesitieli.
Sa dau vunautaka vakavuqa na iVola i Momani ni Karisito sai “koya na rarama kei vuravura.” Ena Nona rairai vei ira na Nifaiti, a vakamacalataka na Turaga sa tucake tale na ivakavuvuli oya ena nona tukuna vei ira: “Au sa laiva e dua na ivakarau vei kemudou.” Raica sai Au ga na rarama moni dulaka cake—me vaka oni sa raica niu a kitaka.” Sai Koya na noda ivakaraitaki. Eda vulica na veika sa tukuna o Koya ka cakava ena noda vulica na ivolanikalou ka muria na ivakavuvuli vakaparofita, me vaka sa uqeti keda kina o Peresitedi Russell M. Nelson. Ena cakacaka vakalotu ni sakaramede, eda sa yalataka kina ena vei Siga ni Vakacecegu ni da na dau nanumi Koya tikoga ka talairawarawa ki na nona ivakaro.”
II.
Ena iVola i Momani, sa solia kina vei keda na Turaga na veika taumada ena ka e vakatoka o Koya “na ivunau i Karisito.” Oqori na vakabauta na Turaga o Jisu Karisito, veivutuni, papitaiso, ciqoma na isolisoli ni Yalo Tabu, vosota me yacova na ivakataotioti, ka yaco me vaka na gonelailai, kena ibalebale me da nuitaka na Turaga ka soli keda ki na veika kece e gadreva mai vei keda.
E rua na kena mataqali na ivakaro ni Turaga tudei me vaka na ivunau i Karisito, kei koya e vakawawa. Na ivakaro vakawawa sai koya e gadrevi ena Lotu ni Turaga se o ira na yalodina ena ituvaki vakawawa, ia me na vakatikitikitaki ni sa oti na kena gadrevi. E dua na ivakaraitaki ni ivakaro vakawawa na nona veidusimaki na Turaga kina veiliutaki taumada ni Lotu mera toki na Yalododonu mai Niu Ioka ki Oaio, ki Misauri, ki Ilinoi, qai tinia me ra liutaki na ivuvu ena nodra toki yani kina Veiulunivanua ena Ra. E dina ni vakawawa walega, ni se vakayacori tiko era na ivakaro oqori mera muri.
Eso na ivakaro tudei e taura e dua na gauna balavu me qai muri raraba. Kena ivakaraitaki, na ivunau kilai levu nei Peresitedi Lorenzo Snow ena lawa ni ikatini a vakabibitaki tale kina e dua na ivunau ka a soli taumada ia era a sega mada ni muria na lewe ni Lotu. A gadrevi me vakabibitaki tale ena vuku ni ituvaki a sotava tiko ena gauna oya na Lotu kei ira na lewena. Na ivakaraitaki ni gauna oqo e vakananumi kina na vuku ni ituvaki era sotava tiko ena gauna oqo na Yadodonu Edaidai ni Lotu. Oqo e oka kina na ivakaro ni matavuvale, a solia o Peresitedi Gordon B. Hinckley ena dua na itabatamata sa sivi, kei na nona kaci o Peresitedi Russell M. Nelson me kilai na Lotu ena yacana ka a vakatakilai mai, Na Lotu i Jisu Karisito ni Yalododonu Edaidai.
III.
E dua tale na nona ivakavuvuli na noda iVakabula e vaka me gadrevi kina me vakabibitaki tale baleta na ituvaki ni noda gauna.
Oqo na gauna e levu kina na vosa kaukauwa ka mosimosi ena noda veimaliwai raraba ka so na gauna sara ena noda dui matavuvale. Na duidui kaukauwa ena veika ni lawatu raraba sa dau yaco kina na ivalavala ni veisaqasaqa—na veicati sara mada ga—ena veika raraba kei na tamata yadua. Na draki ni veimecaki vaqo ena so na gauna sa dau vakamalumalumutaka na kaukauwa ni bulilawa ena veika bibi ka ra gadreva kina na iwase levu ni lewenivanua me ra raica eso na cakacaka yaga raraba.
Na cava e dodonu me ra vakavuvulitaka ka cakava na daumuri Karisito ena gauna oqo ni veivosaki gaga? Na cava a vakavuvulitaka ka kena ivakaraitaki o Koya?
Sa bibi sara ni ena maliwa ni imatai ni veivakavuvuli a vakavuvulitaka o Jisu ena Nona rairai vei ira na Nifai me ra kakua ni dau veileti. A vakavuvulitaka oqo o Koya me baleta na veiletitaki ni ivakavuvuli vakalotu, na yavu e solia kina e matata ni baleta sara talega na veivosakitaki kei na veiwekani vakapolitiki, lawatu raraba, kei na isema vakamatavuvale. E vakatavulica o Jisu:
“Ko koya sa tiko vua na yalo ni veileti, sa sega ni noqu; ia sa nona ga na tevoro, ni sai koya na vu ni veileti, ka sa dau vakauqeti ira na tamata me ra veileti ka veicudruvi vakai ira.
“Raica e sega ni noqu ivakavuvuli me vakayavalati na yalodra na tamata me ra veicudruvi vakaira; ia sa noqu ivakavuvuli me muduki tani sara na veika vakaoqo.”
Ena vo ni Nona veiqaravi vakalotu vei ira na Nifai, a vakavulica o Jisu eso tale na ivakaro ka veiwekani voleka kei na nona vakatabuya na veileti. Eda vulica ena iVolatabu ni vakavulici oti o koya na veika oqo nona vuvanu cecere ena Ulunivanua, vakavuqa ena vosa vata sara ga a qai vakayagataka e muri vei ira na Nifai. Au na cavuta na ivosavosa kilai ni iVolatabu:
“Lomani ira na nomudou meca, dou vosavinakataki ira sa rukaki kemudou, dou cakavinaka vei ira sa cati kemudou, ka masulaki ira sa vakacacani kemudou, ka vakararawataki kemudou.”
Oqo e dua na nona ivakaro kilai levu na Karisito—vakayaco veisau levu duadua ka dredre sara me muri. Ia e dua vei ira na tiki bibi ni Nona veisureti me muri Koya na tamata kecega. E vakatavulica o Peresitedi David O. McKay, “E sega tale ni dua na sala vinaka cake me vakaraitaki kina na noda lomana na Kalou mai na noda vakaraitaka na loloma sega ni nanumi koya ga vua na kainona.”
Oqo e dua tale na ivakavuvuli bibi mai vei Koya na noda ivakaraitaki: “Sa kalougatata ko ira sa dautataro: nira na vakatokai me ra luve ni Kalou.”
Dautataro! Ena veisautaka vakacava na nomu veiwekani kei Karisito kevaka era vakuwai mai na vosa kaukauwa ka mosi ena veika era tukuna.
ENa koniferedi ena yabaki sa oti, e bolei keda o Peresitedi Russel M. Nelson:
“Edua na sala rawarawa duadua me kilai kina edua ka muri Jisu Karisito dina sai koya na ivalavala ni nona qaravi ira na tani ena yalololoma na tamata oya.
“O ira na tisaipeli dina i Jisu Karisito era dau veiyaloni.
“E dua na sala uasivi eda rawa ni rokova kina na iVakabula sai koya meda yaco meda dautataro.”
E vakcava na nona veivakatavulici: “Na Veileti e dua na digidigi. Na dautataro e dua na digidigi. E tiko vei iko na galala mo digitaka na veileti se veivakaduavatataki. Au vakauqeti iko mo digitaka mo dua na dautataro, edaidai kei na veigauna kecega.”
E so na ka dredre e rawa ni tekivu ena veitalanoataki ni kilai ni veika e tautauvata ka vakadonui taucoko.
Meda muria na noda iVakaraitaki Uasivi kei na Nona parofita, eda na gadreva meda bulataka na ka e dau kilai levu me Lawa Koula: “Na ka vakayadua ga dou sa vinakata mera kitaka vei kemudou na tamata, dou kitaka vakatalega kina vei ira: ni sa vakaoqo na vunau kei ira na parofita.” Eda gadreva meda lomana ka caka vinaka vei ira na tamata kecega. Eda gadreva meda levea na veileti ka dautataro ena noda veitaratara kecega. E sega ni kena ibalebale qo meda vakalailaitaka kina na noda itovonibula kei na ka eda vakaliuca, ia me muduka na noda dau vakacacani ira na tani ena vuku ni nodra. Oqori na ka e vakayacora na noda iVakaraitaki Uasivi ena Nona veiqaravi vakalotu. Oqori na ivakaraitaki e vakaraitaka o Koya vei keda ka sureti keda o Koya meda muri Koya.
Ena koniferedi oqo ena va na yabaki sa oti, a solia vei keda o Peresitedi Nelson e dua na bolebole vakaparofita me baleta na noda gauna:
“O sa tuvakarau beka mo laiva me qaqa tikoga na Kalou ena nomu bula? O sa tu vakarau beka mo laiva na Kalou me dau veivakayarayarataki bibi duadua ena nomu bula? Ko na vakatara beka na Nona vosa, na Nona ivakaro, kei na Nona veiyalayalati me veivakayarayarataki ena veika o vakayacora e veisiga? Ona vakatara beka na Domona me bibi mai na veika kece?”
Nida muria na Karisito, meda vakavulica ka vakadinadinataki Jisu Karisito, na noda iVakaraitaki Uasivi sara. Meda muri Koya ka kua ni veileti. Nida segata na lawatu eda taleitaka ena veicakacaka raraba, meda rawata na Nona veivakalougatataki ena noda vakayagataka na vosa kei na iwalewale ni dautataro. Ena noda veiwekani yadua vakamatavuvale kei na so tale meda vakuwai keda mai na kena e rogo ca ka sega ni taleitaki. Meda sega meda savasava, me vaka na noda iVakabula, ena yacana tabu au vakadinadinataka ka kerea nona veivakalougatataki me vukei keda meda Yalododonu. Ena yacai Jisu Karisito, emeni.