Ni sa Kidavaki kina Lotu ni Marau
Baleta na nona bula ni veivueti kei na veiqaravi na noda iVakabula, ko Jisu Karisito, sa rawa kina—ka dodonu—me da tamata mamarau duadua e vuravura!
Au papitaiso meu lewena Na Lotu i Jisu Karisito ni Yalododonu Edaidai me tekivu mai na yakavi ni siga sebera na Siganisucu 1987, voleka ni 37 na yabaki. Oya e dua na siga vakasakiti dina ena noqu bula, kei na noqu ilakolako tawamudu, au vakavinavinaka mai vuniyaloqu vei ira na itokani era vakarautaka na sala e kauti au mai kina wai ni sucu vou oya.
Se o papitaiso e nanoa se ena vicasagavulu na yabaki sa oti, se o lotu tiko ena dua na valenilotu vakaitamera era dau lotu kina e vica na tabanalevu se ena dua na vatuniloa, se o vakayagataka tiko na sakaramede moni na numa na iVakabula ena vosa vaka Thailand se vaka-Swahili, au via kaya vei iko ni sa kidavaki kina lotu ni marau! Ni sa Kidavaki kina Lotu ni Marau!
Na Lotu ni Marau
Ena vuku ni nona ituvatuva ni loloma na Tamada Vakalomalagi ena vukuda yadua na Luvena, vakakina ena vuku ni nona bula ni veivueti kei na itavi na noda iVakabula, ko Jisu Karisito, e rawa, ka dodonu vei keda meda tamata mamarau taudua e vuravura! Ni liwavi keda tiko na cava ni bula ena dua na vuravura leqaleqa, e rawa nida susuga e dua na yalo ni marau kei na sautu qaqaco ka veimaroroi ena vuku ni noda inuinui vei Karisito kei na noda kila na noda tikina ena ituvatuva totoka ni marau.
Na Apositolo liu ni Turaga, o Peresitedi Russell M. Nelson, e cavuta tiko na marau e yaco mai ena bula ni kena itakele o Jisu Karisito voleka ena nona vosa kece me tekivu mai na gauna kece e yaco kina me Peresitedi ni Lotu. E umana vata vakamatata: “E yaco na marau mai Vua ena Vukuna. Vei keda na Yalododonu Edaidai, e vuni marau o Jisu Karisito!”
Eda na lewe ni Lotu i Jisu Karisito. Eda na lewe ni lotu ni marau! Ka sega ni dua na vanua e dodonu me kune votu kina na noda marau me vaka ena noda dau soqoni vata ena vei Siga ni Vakacecegu ena noda soqoni ni sakaramede meda qaravai koya na ivurevure ni marau kecega! Eke eda soqo vata kei ira na noda matavuvale ni tabanalevu kei na tabana me da vakananuma na sakaramede ni Vakayakavi ni Turaga, na noda vueti mai na ivalavala ca kei na mate, kei na nona loloma soliwale mana na iVakabula! Eda lako mai kina me vakila na marau, na veitaqomaki, na veivosoti, na vakavinavinaka, kei na noda duavata ena vukui Jisu Karisito!
Sai koya beka na yalo cokoti vata ni marautaki Karisito oqo o mai kunea? Sai koya beka na ka oqo o kauta mai? O na nanuma beka ni sega ni baleta iko oqo, se rairai sa matau tu beka ga vei iko na iwalewale sa dau yaco tu ga mai. Ia o keda kece eda rawa ni cau, se cava na nomu yabaki ni bula se na nomu veikacivi, me vakasinaiti na noda soqoni ni sakaramede ena marau, vakanamata vei Karisito, ka auwa ni veikidavaki bulabula sinai ena yalo ni marau kei na vakarokoroko.
Marau ena Vakarokoroko
Mamarau ena Vakarokoroko? “Dua beka na ka qori?” o na taroga. Io, e tiko kina! Eda lomana vakatitobu, doka, ka rokova na noda Kalou, ka drodro mai na noda vakarokoroko ena dua na yalo e rekitaka na sinai ni loloma, loloma uasivi, kei na veivakabulai nei Karisito! Na marau ena yalo vakarokoroko oqo vua na Turaga e dodonu me vakaitovotaki kina na noda soqoni ni sakaramede.
Ia, e vuqa vei keda na ibalebale ga ni vakarokoroko oqo: roqota matua na ligamu ki seremu, cuva na uluda, bobo na matada, ka toka malua—me dua na gauna! E rawa ni veivuke na ivakarau oqo me ra vakavulici kina na gone yamasamasa, ia nida tubu ka vuli, sa dodonu meda kila ni vakarokoroko e ka levu cake sara. Eda na vaka beka oya keveka e tiko vata kei keda na iVakabula? E sega ni “sa ka uasivi vakaidina na marau sa tu e matamuni”!
E vuqa vei keda na veisau oqo ena noda lotu ni sakaramede sa yaga me vakatovotovotaki.
Na Tiko Rawa rau sota kei Sokalou
Eda sega ni soqoni vata ena Siga ni Vakacecegu meda tiko ga ena sakaramede me rawa ni toqai na yacada. Eda lako vata mai meda sokalou. E tiko e dua na duidui levu vei rau na rua oqo. Mo tiko rawa kena ibalebale nio tiko kina. Ia mo sokalou sai koya na nomu vakacaucautaka ka qoroya na Kalou e vuniyalomu me vakayaco veisau ena nomu bula!
Ena Dabedabe e Cake kei ira na iVavakoso
Kevaka eda soqoni meda vakananuma na iVakabula kei na veivueti sa mai rawata, sa dodonu me na rairai e matada na noda reki kei na vakavinavinaka! A talanoataka o Elder F. Enzio Busche e dua na italanoa ni se peresitedi voli ni tabana ka raici koya mai e dua na gonetagane ena ivavakoso ni dabe tiko ena tavata ka qai taroga ena domo levu, “Na cava e cakava tiko mai cake ya na tamata mata cudrucudru oya?” O ira era dabe ena tavata—mera vosa, ira na iliuliu, matasere—kei ira ena ivavakoso era vakadewataka ena irairai ni matadra na veikidavaki oqo kina lotu ni marau!
Laga Serenilotu
Nida lagasere, eda sa duavata tiko beka meda vakacaucautaka na noda Kalou ka noda Tui veitalia na irogorogo ni domoda, se eda veimamayaka ga na malanivosa se sega ni lagasere sara ga? E volai ena ivolanikalou ni nodra sere na yalododonu sa masu vua na Kalou sa dau marau kina na Yalona. Meda lagasere! Ka vakacaucautaki Koya!
Veivosa kei na iVakadinadina
Me yavutaki na noda vosa kei na ivakadinadina vei Tamada Vakalomalagi kei Jisu Karisito kei na vua ni noda bulataka ena yalomalumalumuna na Nodrau kosipeli, e vuanikau sa “kamikamica cake mai na veika kamikamica kecega.” Eda na qai “kanamagiti vakaidina, me yacova ni da sa vakasiinaiti, me da kua tale ni viakana, se viagunu,” sa yaco me mamada na noda icolacola, ena vuku ni reki ni Luvena.
Na Sakaramede
Na ulunivanua lagilagi e vakanamata kina na noda veiqaravi sai koya na veivakalougatataki kei na ciqomi ni sakaramede, na madrai kei na wai e sosomitaka na nona iloloma ni veivakaduavataki na noda Turaga kei na inaki taucoko ni noda vakasoqoni. Oqo e “gauna tabu ni vakavoui vakayalo” nida vakavoutaka noda vakadinadina nida na taurivaka tiko ga vei keda na yaca i Jisu Karisito ka cakava tale na veiyalyalati meda nanuma tiko ga na iVakabula ka muria nona ivunau.
Ena so na draki ni bula, eda na torova yani na sakaramede ena yalo bibi kei na icolacola veirawai. Ena so tale na gauna, eda lako mai ena yalo galala ka sega ni vakaicolacola ena lomaleqa kei na dredre. Ni da vakarorogo mai vuniyaloda ena vakalougatataki ni madrai kei na wai ka vakaivotavota ena ivakatakarakara tabu oya, eda na vagolei beka me da nanuma na veisorovaki ni iVakabula, na Nona lolosi mai Kecisemani, na Nona yaluma ena kauveilatai, kei na rarawa kei na mosi a vosota ena vukuda. Oqori na veika ena vueta na yaloda nida semata na noda rarawa kina Nona. Ena so tale na gauna, eda na nanuma me da qoroqoro ga ena vakavinavinaka ena reki tawayalani kamica ni veika sa rawata ki na noda bula kei na noda veigauna tawamudu na iloloma vakasakiti nei Jisu! Eda na reki ena veika ena yaco mai—noda veilesuvi talei kei na Tamada kei na iVakabula sa tucake tale.
Sa matau veikeda meda nanuma ni inaki ga ni sakaramede meda dabe ena idabedabe ka vakasamataka ga na veika eda malumalumu kina ena macawa sa oti. Meda moica na uluni itovo. Ena vakanomodi oya, e rawa nida vakananuma vakatitobu na levu ni sala eda raica kina na Turaga ena nona sasaga gumatua me toboki keda ena Nona loloma uasivi ena loma ni macawa oya! E rawa ni da vakananuma na kena ibalebale me da “vakila na reki ni da veivutuni e veisiga.” E rawa nida vakavinavinakataka na veigauna e curu mai kina na iVakabula ena noda gauna ni druka kei na gauna eda vakila kina na Nona loloma soliwale, veivosoti, kei na kaukauwa ka solia vei keda meda vorata kina na veika dredre ka colata na noda icolacola ena yalovosota kei na marau sara mada ga.
Io, meda vakananuma na veivakararawataki kei na veika tawadodonu a vakayacori vua na Dauveivueti ena vuku ni noda ivalavala ca, oqori e gadrevi kina na vakasama savasava. Ia ena so na gauna eda dau tao tu kina—ena were, ena kauveilatai, ena loma ni ibulubulu qaravatu. Eda dau sega ni rawata meda toso cake kina marau ni sa tadola na ibulubulu, ni sa druka ko mate, kei na nona sa vakamalumalumutaka na Karisito na veika kece e rawa ni vakataotaka noda rawata na vakacegu ka lesu tale kina noda itikotiko vakalomalagi. Se da vakaturuya na wainimata ni yaluma se wainimata ni vakavinavinaka ena gauna ni sakaramede, me yaco ena kurabui kei na qoroqoro ena itukutuku vinaka ni nona isolisoli na Tamada ni Luvena!
iTubutubu Vakaluveni era se Gone se Vakaleqai tu Vakayago.
Ena vukumuni na itubutubu ni gone era se gonelalai era vakaleqai tu vakayago na luvemuni, e vakavuqa ni dau sega ni dua na gauna ni tu vakadua se vagagalu kei na vakanananu ena gauna ni sakaramede. Ia ena veigauna lalai ena loma ni macawa, e rawa kina nio veivakavulici ena nomu ivakaraitaki ni loloma, vakavinavinaka, kei na marau o vakila ena vukuna vakakina mai vua na iVakabula ena nomu qaravi ira tiko na Nona lami lalai. E sega ni dua na igu ena sasaga oqo ena maumau. Sa rui kauwaitaki iko na Kalou.
Matabose ni Matavuvale,Tabanalevu kei naTabana
Vakakina e vale, sa rawa ni da tekivu vakavinakataka cake na noda inuinui kei na nanamaki ena vuku ni noda gauna ena lotu. Ena bose vakamatavuvale, e rawa ni veivosakitaki kina na ivakarau e rawa ni vakaibalebale kina na cau ni tamata yadua ena nodra kidavaki na tamata kecega kina lotu ni reki! E rawa nida tuva ka namaka me rekitaki na gauna eda sotava ena lotu.
E rawa ni raica ka bulia na matabose ni tabanalevu e dua na itovo tudei ni vakarokoroko ena yaloreki ena noda auwa ni sakaramede, ena kena laurai eso na iwalewale e rawa ni vakayagataki kei na iyaloyalo me veivuke.
Marau
E duidui na irairai ni tamata nira marau. Vei ira eso, e rawa ni veikidavaki ena mamarau mai katuba. Vei ira tale eso, e rawa nio koya na nomu veivuke vuni vei ira na tamata mera logavinaka ena nomu matadredredre ka dabe tikivi ira ena yalovinaka e tadola tu. Vei ira era vakila nira sega ni kawaitaki se vakatikitikitani, na nona veiciqomi sa rui ka bibi.l Kena ilutua, e rawa nida taorgi keda ena nona nanuma na noda iVakabula se me vakacava na noda auwa ni sakaramede. Me vakaivei na ka e vinakata ena nodra kidavaki, kauwaitaki, vakamamautaki, ka lomani na Luvena? Me vakacava beka na ivakarau ni yaloda e vinakata o Koya ena noda lako mai meda vakavoui ena noda mai vakananuma ka sokalou Vua?
iTinitini
Ena itekivu ni noqu ilakolako ni vakabauta, na rekitaki Karisito na imatai ni ka cecere au kila rawa, ka veisautaka na noqu vuravura. Kevaka se bera nio raica rawa na marau oqo, saga mo rawata. Oqo na veisureti me ciqomi na isolisoli ni iVakabula ni sautu, rarama, kei na marau—mo marautaka, meda qoroya, ka marautaka, ena vei Siga ni Vakacecegu.
E vakamacalataka o Amoni ena iVola i Momani na nanuma ni lomaqu ena nona kaya:
“E sega beka ni kilikili meda marau? Io, au sa kaya vei kemuni, sa sega na [tamata] me tekivu mai na ivakatekivu kei vuravura e kilikili me marau vakalevu cake me vakataki keda; io, sa vuabale sara na noqu marau au a dokadokataka kina na noqu Kalou; ni sa tu vua na kaukauwa kece, kei na yalomatua, kei na kila ka; ka sa kila na ka kecega, ka sa yalololoma sara ko koya, sa vakabulai ira kecega, sa veivutuni ka vakabauta na yacana.
Kevaka sa okati oqo me dokadoka, ia au na dokadoka; ni sai koya oqo na noqu bula kei na noqu rarama, na noqu reki kei na noqu vakabulai, kei na noqu sereki mai na rusa tawavakaiyalayala.”
Ni sa Kidavaki kina Lotu ni Marau! Ena yaca i Jisu Karisito, emeni.