Na Vosa i Karisito kei na Yalo Tabu ena Liutaki Keda kina Dina
Na kilaka ni yavu vakasakiti oqo ena vukei keda meda kila na noda ivakatakilakila vakalou ni luve ni Kalou kei na noda rawa ni vakataki Koya.
Na Kalou e Tamada Vakalomalagi. Eda Luvena dina vakayalo, eda buli meda ucui Koya. O koya gona, keda yadua, me vaka edua na luve ni Kalou, e tiko na kaukauwa vakalou me yaco meda vakataki Koya.
Eda bula vata kei Koya vakayalo ni bera noda lako mai kina vuravura oqo. Na Tamada Vakalomalagi, ni noda itubutubu vakayalo, e lomani keda, ka vinakata na veika vinaka duadua, e vakarautaka edua na ituvatuva vei keda meda rawa ni ciqoma na Nona veivakalougatataki cecere, oya na tawa mate rawa kei na bula tawamudu. Me vaka na ituvatuva, o keda, nida luvena vakayalo, ena soli vei keda na galala ni digidigi meda digitaka na Nona ituvatuva. Na gole mai kina vuravura, eda na biuta na itutu ni Kalou, ka guilecava kece na bula taumada, ciqoma na yago ni sui kei na lewe, rawata na veika eda sa sotava, ka vakatorocaketaka na noda vakabauta. Na yagoda ni lewe kei na sui, me vaka na tamata vakavuravura, eda na sikalutu ki na veitemaki, dukadukali ka yawaki tani mai vua na Kalou, ka sega ni rawa ni lesu ki na Nona itikotiko. Ena vuku ni Nona loloma tawacava vei keda na Tamada Vakalomalagi, e sa tala mai kina o Koya na Luvena, ko Jisu Karisito, me noda iVakabula. Mai na Nona solibula, na Veisorovaki, sa rawa kina vei Jisu Karisito me vakabulai keda mai na noda ivalavala ca, tucaketale mai na mate ka rawata na bula tawamudu.
Au vakavinavinakataka vakalevu na dina lagilagi oqo—na ka eda vakatoka me yavu ni veivakabulai nei Tamada, na Nona ituvatuva ni loloma cecere, se na Nona ituvatuva cecere ni bula marau. Na vulici ni dina bibi oqo sa vukei au meu kila na noqu ivakatakilakila dina kei na veivakalougatataki cecere sa vakarautaka tu na Kalou me baleti keda ena bula vakacerecerei kei na bula tawamudu sa vakarautaka vei keda na Kaloiu. E vakavulici vei keda na sala o Nifai: “O koya, kana magiti ena vosa i Karisito; ia, raica na vosa i Karisito sa tukuna vei kemudou na veika kece mo dou kitaka.” E vakuria okoya, “Kevaka dou sa curu ena sala, ka ciqoma na Yalo Tabu, ena vakaraitaka vei kemudou na veika kece mo dou kitaka” Nikua au via wasea ni vukei au vakacava na vosa i Karisito kei na Yalo Tabu meu kunea kina na veidina bibi ena noqu bula vaka cauravou.
Na Vosa i Karisito Ena Tukuna Vei Kemudou na Veika Kece Mo Dou Kitaka
Me vaka e tukuna o Nifai ena itekivu ni tikina ena 1 Nifai, au a “sucu mai vei rau na itubutubu yalovinaka.” Au susugi cake mai Nagano, Japani, ena vale edau vakayaloqaqataki kina na dina, gugumatua, kei na yalomalua, ka muri vakavinaka na itovo makawa. Sa dua na tamata dau lotu o tamaqu. Au dau vakasaravi koya ni masu voli ena icabocabo ni Shinto kei Buddha ena veimataka kei na veibogi. E dina ga niu sega ni kila o cei e masu tiko kina kei na ka e masulaka tiko, au vakabauta ni so na kaukauwa vuni se na Kalou e “kaukauwa me veivakabulai” se vukei keitou kevaka keitou masu ena yalodina.
Me vakataki ira na itabagone tale eso, au sotava e levu na veika dredre. Au dau sotava na dredre, niu nanuma ni sega ni taucoko na bula ka levu na gauna vinaka kei na ca. Au vakila niu yali, sega ni kila na veidusimaki ena noqu bula. E vaka me sega ni dede na bula ena oti ga nida sa mate. E veilecayaki na bula kevaka eda sega ni kila na ituvatuva ni marau.
Sega ni bera ena noqu vulica na vosa Vakavalagi ena koronivuli ecake, era ciqoma kece na gonevuli ena noqu koronivuli e dua na ilavelave ni Veiyalayalati Vou. Dina ga ni keimami se qai tekivu vulica na vosa Vakavalagi, e kaya vei keimami na neimani qasenivuli ni dodonu me keimani vulica na vosa Vakavalagi ena kena wiliki. Au dolava sara ka railesuva na lewena. E dredre sara vei au na vosa ena Veiyalayalati Vou. E tautauvata talega na kena dredre na vosa vaka Japani. Ia, au vagolei kina lisi ni tukutuku kei na taro ni bula vakayalo ka okati ena itekitekivu ni iVolatabu ni Kitioni—na taro me baleta na galili, lailai ni yalodei, veilecayaki, na sotavi ni veivakatovolei ni bula, kei na so tale. Na itukutuku yadua ena lisi a tarava mai e dua na idusidusi kina veitikina kei na tabana ena Veiyalayalati Vou. Au vagolei vakabibi kina vosa “Nio sa oca.” Na idusidusi e vakavuna meu dolava na Maciu 11:28–30, ka tukuna o Jisu vei ira na Nona tisaipeli:
“Dou lako mai vei au, koi kemudou vakaduaga sa oca, ka colata na icolacola bibi, ia kau na vakacegui kemudou.
“Vakataqara vei kemudou na noqu ivua, ka vuli vei au; niu sa yalomalua ka yalomalumalumu: dou na kunea kina na vakacegu ni yalomudou.
“Ni sa rawarawa na noqu ivua, ka mamada na noqu icolacola.”
Oqo na imatai ni gauna au nanuma niu wilika na vosa i Jisu Karisito. E dina ga niu sega ni kila na vosa kece e tukuna o Koya, a vakacegui au na Nona vosa, laveta na yaloqu, ka solia vei au na inuinui. Na levu ga ni noqu wilika na Nona vosa, na levu ni noqu vakila ni dodonu meu tovolea na mana ni Nona vosa. Au se sega mada ni vakila na veika oya me vaka na siga ya. Au vakila niu sa lomani. Au vakila nio Jisu Karisito edua au kila.
Niu tomana tiko na noqu vuli, au vakila ni vosa vakadodonu tiko o Koya vei au ni tukuna: “Sa kalougata ko ira sa viakana ka viagunuva nai valavala dodonu: nira na vakamamautaki.”
E vakasinaita na yaloqu na Nona vosa, e dina ga niu sega ni vakamacalataka rawa na veika au vakila ena gauna oya. E dina ga ni bula voli o Jisu Karisito ena vuqa na senitiuri sa oti ena dua na vanua au sega ni kila, au nanuma ni rawa niu nuitaka na Nona vosa ena yaloqu taucoko. Au a nuitaka ena dua na siga mai muri au na ciqoma e vuqa tale na vosa i Jisu Karisito.
Na Yalo Tabu Ena Vakaraitaka Vei Iko Na Veika Kece Mo Kitaka
Na siga oya e lako mai ena vica walega na yabaki ka tarava. Au sotava na daukaulotu yalodina, gone, ni Lotu i Jisu Karisito ni Yalododonu Edaidai. Au sotava e dua na ilawalawa lailai yalovinaka ka marau ni Yalododonu Edaidai ka saga tiko me muri Jisu Karisito. Dina ga ni taura e dua na gauna meu vakabauti ira vakavinaka sara, a yaco meu raica ena kosipeli vakalesui mai na veika au gadreva ena noqu vulica na Veiyalayalati Vou—na vosa i Jisu Karisito kei na inuinui kei na vakacegu e lako mai vei ira.
E dua na ka tabu au sotava e na gauna era vakavulici au kina na daukaulotu meu masu. Au vulica ni dodonu meda kaciva na Kalou ena yacana. Nida masu, e dodonu meda vosa mai na vu ni yaloda, vakaraitaka na noda vakavinavinaka, ka wasea na noda vakanuinui kei na gagadre. Nida sa tukuna kece na veika eda via tukuna, eda qai tinia na noda masu ena noda kaya, “Ena yacai Jisu Karisito, emeni.” Noda cakava oqo baleta ni vakarota vei keda o Jisu meda masu ena Yacana. Na masu vua na Tamada Vakalomalagi e vukei au meu kilai Koya kei na noqu veiwekani kei Koya—niu luvena tagane lomani. Au vulica baleta ni Tamada Vakalomalagi e kilai au ka lomani au, ena vosa taudua vei au o Koya, vakasakiti, kei na sala eda kila mai na Yalo Tabu.
E dua na gauna au sega soti ni kila vakavinaka na Yalo Tabu. Au nanuma cala, ni ka ga meu cakava oya meu muria na ituvatuva ni masu ka na yaco e dua na ka vakasakiti. Dua na siga, ena dua na lesoni vata kei rau na daukaulotu, au taura e dua na gauna ni vakacegu mai na lesoni. Au se veilecayaki tikoga ena veika meu cakava ena noqu bula kevaka e dina na kosipeli vakalesui mai i Jisu Karisito.
Niu sa vakarau lesu tale kina rumu ka rau wawa tiko kina na daukaulotu, au rogoca na domo ni dua na daukaulotu. Au rogoca na yacaqu. Au sega ni dolava na katuba, au rogocana domo ena yasa kadua ni katuba. Au kurabui sara ga. Erau a masu ga vua na Tamada Vakalomalagi. Na kena a cavuta na masu a vakamamasu tiko vua na Kalou me rogoca na noqu masu o Koya. Dina ga ni sega ni maqosa na nona vosa vaka-Japani, ia noqu rogoca ni nona masu ena yalodina e vakamalumalumutaka na lomaqu. Au vakasamataka se cava erau dau kauwaitaki au vakalevu kina. Au kila nira masulaki au e ivakaraitaki ni loloma ni Tamada Vakalomalagi kei na loloma ni iVakabula baleti au. Na loloma oya e solia vei au na inuinui, ni oti oya au qai kerea vua na Kalou ena vakabauta kei na yaloqu taucoko. Niu vakayacora vakakina, au vakila e dua na yalo reki ka vakacegu niu sa luve ni Kalou ka sa tu vei au e dua na rawa ka vakalou kei na icavacava. E lutu vakatitobu ki yaloqu na yavu ni veivakabulai.
E kaya o Peresitedi Russell M. Nelson, “Na sala o vakasamataka kina o cei o iko e vakilai ena vei digidigi kece o na cakava.” E dina taucoko vei au. Na digidigi meu muria na iVakabula o Jisu Karisito ena papitaiso ka ciqoma na isolisoli ni Yalo Tabu e sa vakalougatataka na noqu bula ena veisala au sega ni vakasamataka rawa. Nida curu kina veiyalayalati ni papitaiso vata kei na Kalou, eda yalataka nida sa tu vakarau meda taura na yaca i Jisu Karisito, muria na ivakaro ni Kalou, ka qaravi Koya ena vo ni noda bula. Sa yalataka vei keda na Tamada Vakalomalagi, ni na rawa ni tiko vata kei keda na Nona Yalo Tabu—na tomani ni veidusimaki mai vua na Yalo Tabu.
Au sureti iko mo vakabauta na itukutuku e vakavulica vei keda o Nifai—na vosa i Karisito kei na Yalo Tabu ena vakaraitaka vei iko na “veika kece [mona] kitaka.” Veika kece! Oqo e dua na isolisoli talei mai vua na Kalou.
Taciqu kei na ganequ, au vakavinavinakataka na ituvatuva ni marau ni Tamada Vakalomalagi. Baleta ni lomani keda o Koya, e vakarautaka na sala lesu mai vua na Nona Gone ni Toko, Jisu Karisito kina Nona itikotiko. Na kila ni yavu vakasakiti oqo ena vukei keda meda kila na noda ivakatakilakila vakalou ni luve ni Kalou kei na noda rawa ni vakataki Koya. Au vakavinavinakataka na dina bibi oqo. Au wasea vei iko na noqu ivakadinadina ni na vosa i Jisu Karisito kei na Yalo Tabu e muataki keda meda ciqomi na bula tawamudu. Au kila ni dina na veika oqo. Ena yaca tabu i Jisu Karisito, emeni.