Na Tamata Ka Veivosaki vata kei Jiova
O Josefa Simici e “vakalougatataki me dolava na iotioti ni itabagauna,” da sa kalougata ni vakayacora o koya.
Na noqu inaki ena siga nikua meu dau vakadinadinataki Jisu Karisito, nio Koya na Luve ni Kalou, na Dauniveibuli ka iVakabula kei vuravura, na noda Dauveisereki ka Dauveivueti. Baleta “na yavu ni ivakavuvuli ni noda lotu sai koya na nodra ivakadinadina na iapositolo kei na parofita me baleti Jisu Karisito,” nikua au wasea vei kemuni na noqu kila ka kei na ivakadinadina ni iVakabula me vaka sa vaqaqacotaki ka vakatitobutaki mai na bula kei na ivakavuvuli ni dua na iapositolo bibi kei na parofita.
Na iVakatekivu ni Vuku
Ena mataka ni dua na siga makare vinaka ena itekivu ni vulaitubutubu ni 1820, a curuma yani o Josefa Simici yabaki 14 e dua na veikau volekata na nodratou vale me masulaka na nona ivalavala ca ka kerea se lotu cava me lewena. Na nona masu yalodina, cabori ena vakabauta tawa yavalati rawa, ciqomi ena kaukauwa levu duadua e vuravura taucoko, oka kina na Tamana kei na Luvena. Kei koya na tevoro. O ira yadua oqo era dui tu na nodra malele kaukauwa ena vuku ni masu oya kei na gonetagane oya.
Na ka eda vakatoka oqo me iMatai ni Raivotu e ivakatakilakilataka na itekivu ni Vakalesui mai ni veika kecega ena iotioti ni itabagauna oqo. Ia vei Josefa, na veika a sotavi e ka ni tamata yadua ka ka ni vakavakarau. Na ka walega a vinakata oya na veivosoti kei na veidusimaki. Na turaga a solia ruarua mai vua. Na ivakasala me “kakua ni lewena e dua [na lotu]“ a veidusimaki. Na osa, “Sa bokoci na nomu ivalavala ca“ sa vueti.
Ena vuku ni dina totoka kece eda na vulica mai na iMatai ni Raivotu oya, e rairai ni ikaukau lesu levu duadua i Josefa oya, “Au a kunea ni dina na ivakadinadina i Jemesa—ni tamata sa lailai na nona vuku me kerea vua na Kalou, ka rawata.“
Me vaka e kaya e dua na vuku: “Na voqa dina ni iMatai ni Raivotu nikua o ya me da kila ni sa ivakarau ni Kalou me solia vei ira era sega ni vuku. … Na Kalou ka vakatakilai Koya vei Josefa Simici ena veikau tabu sa ikoya e dua na Kalou ka dau sauma na nodra taro na itabagone ena gauna ni leqa.”
Na veika a sotava o Josefa ena veikau a solia vua na yalodei me kerea na veivosoti kei na veidusimaki ena vo ni nona bula. Na veika a sotava e sa solia talega vei au na yalodei meu kerea kina na veivosoti kei na veidusimaki ena vo kece ni noqu bula.
Veivutuni e Veigauna
Ena Sepiteba-21, 1823, a masulaka vagumatua o Josefa na veivosoti, ka nuidei ni baleta na veika a sotava ena veikau ena tolu na yabaki yani ki liu, ena sauma tale mai o Lomalagi. A qai yaco vakakina. A tala mai e dua na agilosi na Turaga,Moronai,me vakasalataki Josefa ka tukuna vua ni dua na ivolatukutuku makawa ena vakadewataka ena isolisoli kei na kaukauwa ni Kalou—Na iVola i Momani.
Voleka ni 13 na yabaki mai na gauna o ya, erau a tekiduru vakarokoroko o Josefa kei Oliver Cowdery ena masu vakanomodi, ena Valetabu vou o Kirtland. Eda sega ni kila na ka e rau masulaka, ia na nodrau masu e rawa ni okati kina e dua na kerekere ni veivosoti, ni rau sa tucake, a rairai mai na iVakabula ka kaya, “Raica, sa bokoci na nomudrau ivalavala ca; drau sa savasava e mataqu.“
Ena veivula kei na veiyabaki ni oti na veika oqo, erau na ivalavala ca tale o Josefa kei Oliver. Ka cakava tale! Ia ena gauna oya, baleta na gauna oya, me isau ni nodrau kerekere kei na vakavakarau ki na vakalesui mai lagilagi ni idola ka sa vakaurau yaco, a vakavuna o Jisu me rau tawacala.
Na bula nei Josefa ni veivutuni e veigauna e solia vei au na yalodei meu ”doudou ni lako mai ki na itikotiko vakaturaga ni loloma soli wale, [meu] rawata kina na loloma cecere.” Au sa vulica ni o Jisu Karisito sa dina ni sa “vu ni veivosoti.” Ni sa sega ni Nona ilesilesi ka sega ni nona ituvaki me veivakacacani. E lako mai o Koya me veivakabulai.
Kerea vua na Turaga
Me tiki ni “vakalesui mai ni veika kecega,” a kauta mai na Turaga, mai vei Josefa Simici, na iVola i Momani kei na ivakatakila tale eso ka tiko kina na taucoko ni Nona kosipeli. Na dina ena soli na kena veivakadeitaki kei na kena vakataucokotaki ni kerea vakawasoma o Josefa na nona veidusimaki na Turaga. Vakasamataka na veika oqo:
-
Na Tamana kei na Luvena e rau sa vakayago “me vaka na tamata.”
-
A sega walega ni taura o Jisu na noda ivalavala ca ia na noda tauvimate, vakararawataki, kei na malumalumu.
-
Na Nona Veisorovaki a voravora sara ka vakavuna me dra mai na veqara ni kuli kecega.
-
Eda na vakabulai ena Nona loloma soliwale “ni oti na veika kece eda rawa ni cakava.”
-
Nida lako mai vei Karisito, ena sega walega ni vosota o Koya na noda ivalavala ca, ia ena veisautaka talega o Koya na keda ituvaki ka “sa sega tale kina nida gadreva meda caka ca.”
-
Sa dau vakaroti ira tu ga na Nona tamata na Karisito me ra tara valetabu, na vanua e vakaraitaki Koya kina vei ira ka vakatikora vei ira na kaukauwa mai cake.
Au vakadinadinataka ni sa dina taucoko na veika oqo. Era matataka ga e dua na iwase lailai ni taucoko a vakalesuya mai o Jisu Karisito mai vei Josefa Simici me isau ni kerekere wasoma nei Josefa me baleta na veidusimaki.
Tarai Cake ni Matanitu Oqo
Ena 1842, a vola kina o Josefa na veika veivakurabuitaki ena yaco ena iotioti ni itabagauna oqo. A vakaraitaka o Koya ni ena noda gauna, “ena duavata na Matabete vakalomalagi kei ira na kai vuravura, me vakayacori kina na inaki cecere oqori; ia nida sa duavata tiko ena dua ga na inaki, meda kacivaka yani na matanitu ni Kalou, sa sega ni dau sarasara wale na Matabete vakalomalagi.”
Vei nona itokani o Benjamin Johnson, a kaya kina o Josefa, “Penijamini, [kevaka au na mate] au na sega ni yawa mai vei iko, ia kevaka au tiko ena yasa kadua ni ilati, au [na] cakacaka vata tiko ga kei iko, ka na vakalevutaki sara na kaukauwa me tosoya na matanitu oqo.”
Ena June 27, 1844, erau vakamatei kina o Josefa Simici kei na tuakana o Hyrum. A vakadavori me cegu na yagoi Josefa, ia e tomana tikoga na voqa nona ivakadinadina ena e vuravura raraba kei na yaloqu:
“Au sa raica e dua na raivotu, au kila, au kila ni kila na Kalou, au sega ni rawa ni cakitaka.”
“Au se sega ni bau kaya niu taucoko; ia e sega ni dua na cala ni vakatakila au vakatavulica.”
“Na ivakavuvuli maucokona ni noda lotu sa ikoya na nodra ivakadinadina na iApositolo kei na Parofita, me baleti Jisu Karisito, ni a mate o Koya, a bulu, ka tucake tale ena ikatolu ni siga, ka lako cake ki lomalagi; kei na veika tale eso e tiki ni noda lotu era sa kena ikuri ga.”
Na ka a tukuni me baleti Joni na Dauveipapitaisotaki ena rawa talega ni tukuni me baleti Josefa Simici: “E dua ka talai mai vua na Kalou, na yacana o [Josefa]. E sega nio Koya na Rarama, ia a talai mai me vakadinadinataka na Rarama oya,” “mera vakabauta na tamata kecega ena vukuna.”
Au vakabauta. Au vakabauta ka vakadeitaka ni o Jisu na Karisito, na Luve ni Kalou bula. Au vakadinadinataka ni na Kalou bula e Tamada dauloloma. Au kila oqo baleta ni sa vosa vei au na domo ni Turaga, ka sa vakakina na domodra na Nona italai, na iapositolo kei na parofita, oka kina ka tekivu vei Josefa Simici.
Au vakadinadinataka ni o Josefa Simici e parofita ni Kalou, e ivakadinadina ka italai ni Turaga o Jisu Karisito. A “vakalougatataki o koya me dolava na iotioti ni itabagauna,” ka da sa vakalougatataki ni a vakayacora o koya.
E vakaroti keda kece kei Oliver Cowdery na Turaga, “Tu raviti Josefa na noqu italai, ena yalodina.” Au vakadinadinataka ni raiti na Nona italai o Josefa na Turaga ka yaco kina na Veivakalesui mai,
O Josefa Simici e sa tiki ni matabete vakalomalagi o ya ka a tukuna tiko o koya. Me vaka e yalataka vei Benjamin Johnson, sa sega ni yawa sara mai vei keda, ka vakakina ena yasa kadua ni ilati, e se cakacaka tiko ga kei keda, ka sa vakalevutaki sara ena kaukauwa, me toso kina matanitu oqo. Ena marau kei na vakavinavinaka, au dulakacake na domoqu ena “vakacaucautaki na tamata e veivosaki kei Jiova.” Mai na veika kece, me vakacaucautaki o Jiova ka veivosaki kei na tamata oya! Ena yacai Jisu Karisito, emeni.