“Raica Sai Au Ga na Rarama Moni Dulaka Cake”
Eda dulaka cakena rarama ni Turaga nida taura matua na noda veiyalayalati kei na gauna eda tokona kina na noda parofita bula.
Mai na vei ivakadinadina ena koniferedi oqo, au vakuria kina na noqu ivakadinadina vaka-iapositolo ni ko Jisu Karisito na Luve ni Kalou, noda Turaga ka iVakabula, na Dauveivueti ni luvena kece na Tamada. E na Nona Veisorovaki, e vakarautaka o Jisu Karisito vei keda, kevaka eda bula kilikili, meda lesu kina iserau ni Tamada Vakalomalagi ka tiko vata kei ira na noda matavuvale me tawamudu.
E sega ni yali na iVakabula mai na noda ilakolako ni bula oqo. Ena rua na siga sa oti eda sa rogoci Koya ni vosa mai vei ira na Nona iliuliu digitaki me rawa nida toro voleka kina Vua. Ena veigauna kece, ena Nona loloma savasava kei na loloma veivueti, e tokoni keda o Koya ni da sotava na veilecayaki ni bula. E vakamacalataka o Nifai, “Sa dau totaki au na noqu Kalou; sa tuberi au ena noqu rarawa. … E vakasinaiti au ena Nona loloma.”
Na loloma oya e dau vakavotukana nida sa veitokoni tiko vakai keda ena Nona cakacaka.
Eda tokona na noda parofita bula ena koniferedi raraba, kei iratou na Mataveiliutaki Taumada, na Kuoramu ni iApositolo Le Tinikarua, Vakaitutu Raraba, kei na Vakailesilesi Raraba ni Lotu. Me tokoni e dua na tamata e kena ibalebale meda dulaka cake meda solia vei ira na noda vakanananu, yalodina kina nodra veivakabauti, ka cakacakataka na nodra vosa. Era vosa ena veivakauqeti ni Turaga; era kila na veika sotavi ena gauna oqo, na siro sobu ni bula savasava ni vanua, kei na levu ni sasaga ni vunica me vakacala na ituvatuva nei Tamada. Nida dulaka cake na ligada, eda sa solia na noda veitokoni, sega ni ena gauna ga oya ia ena noda bula e veisiga.
Na veitokoni e okati kina noda dulaka cake noda peresitedi ni iteki kei na bisopi, iliuliu ni kuoramu kei na mataisoqosoqo, qasenivuli, kei ira talega na dairekita ni keba ena noda tabanalevu kei na iteki. Voleka mai ivale, eda dulaka cake na watida yalewa kei na tagane, gone, itubutubu, matavuvale raraba, kei ira na tiko voleka. Nida dulaki cake vakai keda eda tukuna tiko, “Au mai tiko ena vukumu, ka sega ni dulaka cake ga na ligamu ena gauna era sa ‘wadamele’ kina ia meu dua e veivakacegui ka kaukauwa e yasamu.”
Na vakasama ni dulaka cake e yavutaki ena volanikalou. Ena Wai i Momani, era yalataka o ira na lewe ni Lotu papitaiso vou nira na, “colata vata na nomudou icolacola, me mamada kina; [me] vakacegui ira sa gadreva na veivakacegui, ka mo dou tu ka vakadinadinataka na Kalou ena veigauna kecega, kei na veika kecega, kei na veivanua kecega.”
E kaya na iVakabula vei ira na Nifaiti: “Dulaka cake na nomuni rarama me cilavi vuravura. Raica sai Au ga na rarama mo ni dulaka cake.” Eda dulaka cake na rarama ni Turaga nida taura matua na noda veiyalayalati kei na gauna eda tokona kina na noda parofita bula ni sa vosataka na vosa ni Turaga.
E kaya o Peresitedi Russell M. Nelson, ni veiqaravi voli ena Kuoramu ni iApositolo Le Tinikarua, “Na noda tokoni ira na parofita sa dina yadua ni tamata meda gumatuataka nodra vakaliuci vakaparofita.”
Na dulaka cake na parofita sa dua na cakacaka tabu. Eda sega ni dabe galugalu ia eda taqomaki koya, vakamuria na nona ivakasala, vakatavulica na nona vosa, ka masulaki koya.
Ena iVola i Momani, e kaya o Penijamini na Tui, vei ira na tamata, “Au sa vakataki kemuni ga, kau sa vakatovolei tu mai na veimataqali malumalumu kecega ni yago kei na vakasama; ia au sa digitaki ka sa vakatarai mai na liga ni Turaga, kau sa maroroi ka taqomaki tu mai ena nona kaukauwa e sega ni vakatautauvatataki rawa, meu qaravi kemuni ena igu taucoko, kei na vakasama, kei na kaukauwa kecega sa solia vei au na Turaga.”
Me vakakina, ena yabaki 100, o Peresitedi Nelson e sa maroroi ka taqomaki mai vua na Turaga. Ena gauna a se lewe ni Mataveiliutaki Taumada kina, o Peresitedi Harold B. Lee, a cavuta na ivakaraitaki nei Mosese nia tiko e dela ni ulunivanua mai Rifitimi. “Na liga ni [Peresitedi ni Lotu] e rawa ni oca,” a kaya o koya. “Era na rairai dau bale ena so na gauna ena vuku ni nona itavi bibi; ia nida sa laveta cake na ligana ka veiliutaki ena nona veidusimaki, e yasana, ena sega ni rawai kemuni kei Isireli na matamata kei eli. Na nodaru taqomaki e vakatau kina noda vakamuria se sega o ira e sa tuvana tu na Turaga me liutaka na Nona Lotu. E kila o Koya ocei me vakatulewataka na Lotu, ka na sega vakadua ni cala o Koya.”
E kauta mai o Peresitedi Nelson ena veiyabaki ni veiqaravi vua na Turaga. Na nona matua, na veika e sotava raraba, vuku, kei na ciqomi tudei ni ivakatakila e ganita na noda gauna oqo. E kaya o koya: “Na Lotu i Jisu Karisito ni Yalododonu Edaidai sa vakarautaka tiko na vuravura me baleta na siga ‘me na roboti ko vuravura ena veikilai kei Jiova’ (Aisea 11:9). … Na cakacaka oqo sa vakaukauwataki tu ena dua na ivakaro vakalou ena 200 na yabaki sa oti. E kovuta e vitu ga na qaqa ni vosa: ‘Oqo na Luvequ Lomani. Mo Rogoci Koya!” [raica na Josefa Simici—Ai Tukutuku 1:17).”
E tukuna talega o Peresitedi Nelson ni: “Se bera mada vakadua ena itukutuku kei vuravura me kilai na noda iVakabula ni sa bibi ka ganita vakalevu sara na tamata vakayadua. Raitayalotaka na totolo ni yaco na veisaqasaqa levu e vuravura taucoko—kei na kena ena noda dui bula—ena wali rawa kevaka me da digitaka kece meda muri Jisu Karisito ka rogoca Nona ivakavuvuli.”
Kemun na taciqu kei na ganequ, e gadrevi me da veilaveti cake ka kakua ni vosakudrukudru, ka tokona vakalevu cake na vosa ni Turaga, Nona sala, kei na Nona parofita, ka a kaya: “E dua na ibolebole levu vei keda ni kua o ya meda kila na duidui ni vei dina ni Kalou kei na lasu nei Setani. O ya na vuna e vakasalataki keda kina na Turaga meda dau ‘masu tikoga, … [meda] rawa ni qaqa kina vei Setani, ka … drovaka kina na ligadra na italai nei Setani era tokona tiko na cakacaka ni [vunica].’”[Doctrine and Covenants 10:5; vakamatatataki].”
Keirau a kalougata kei Sister Rasband ena Epereli sa oti, ni keirau veitomani kei na noda parofita lomani kei Sister Nelson me vakatabui tale na Valetabu e Manti Utah.
Era kidacala ni sa curu yani kina rumu o Peresited Nelson. E vica ga vei keitou ea kila ni na lako mai o koya. Ena nona itutu, au vakila vakasauri na rarama kei na itutuvi vaka-parofita e kauta voli. Na irairai ni reki ena matadra na tamata era raica vakataki ira na parofita ena tiko vata kei au me tawamudu.
Ena masu ni veivakatabui tale, o Peresitedi Nelson a kerea vua na Turaga mena dulaka cake o ira kece era curu kina Nona valetabu savasava “mera ciqoma na veivakalougatataki tabu ka bula kilikili tikoga ka yalodina kina nodra veiyalayalati me yaco kina oqo me vale sautu, vale ni vakacegu, ka vale ni ivakatakila yadua me baleti ira kece era curu kina katuba oqo ena savasava.”
Eda gadreva kece meda laveti cake mai vua na Turaga ena vakacegu, sautu, ka bibi duadua ena ivakatakila yadua me da vorata kina na rere, butobuto, kei na veileti e kovuta na vuravura.
Se bera na soqoni, keitou a duri ena siga e tautuba vata kei Peresitedi kei Sisita Nelson ka sarava na totoka ni vanua. E titobu na isema nei Peresitedi Nelson ki na vanua o ya. Eratou a tauyavu e lewe walu na tukana-vakarua ena buca vakavolivolita na valetabu, me vaka talega kina eso na noqu. A veiqaravi o Andrew Anderson na tukaqu-vakarua ena kabani ni taravale ni painia ena nodra cakacaka me 11 na yabaki me vakacavara na valetabu e Manti, na ikatolu ena Veiulunivanua Veivatu.
Ni keimami tucake vata kei na Peresitedi Nelson, sa neimami na madigi me dulaka cake ka tokona na parofita ni Kalou ena marautaki ni vakatabui tale ni vale tabu ni Turaga. E dua na siga au na sega ni guilecava rawa.
“Eda tara na valetabu me vakacaucautaki kina na Turaga,” Ea tukuna o Peresitedi Nelson ena siga oya. “Era tara me ka ni sokalou ka sega ni ivakarairai. Eda cakava na veiyalayalati tabu ka tawamudu na kena bibi ena loma ni lalaga tabu oqo.” Eda sa sokomuni Isireli tiko.
Era sa karona e ligadra na valetabu savasava o Peresitedi Nelson kei ira na parofita ni se bera o koya. Nikua, ena veiyasai vuravura, e sa 350 na vale tabu ka sa vakayagataki tiko, kacivaki se tara tiko. Me vaka ni parofita, mai na 2018, sa kacivaka oti kina o Peresitedi Nelson e 168 na valetabu.
“Ena noda gauna,” e kaya okoya, “me vakayacori mada e dua na veisemati e taucoko, ena nodra umani vata na veitabagauna, idola, kei na kaukauwa (raica na Vunau kei na Veiyalayalati 128:18) Me baleta na inaki vakalou oqo, sa roboti vuravura tu kina oqo na veivaletabu savasava. Au kaya tale ena sega beka ni veisautaka na nomuni bula na tara ni veivaletabu, ia nomu veiqaravi ena loma ni valetabu ena vakayacora vakaidina.”
“Na iVakabula kei na Nona ivunau sa uto ni valetabu,” e kaya na Peresitedi. “Na veivakavulici kece e valetabu, mai na ivakasala kei na Yalotabu, e vakalevutaka na noda kilai Jisu Karisito vinaka. Na Nona cakacaka vakalotu bibi sa vauci keda Vua ena veiyalayalati tabu ni matabete. Ia, nida maroroya na noda veiyalayalati, sa solia o Koya vei keda na Nona kaukauwa veivakabulai, veivaqaqacotaki.”
“O ira kece era sokalou ena valetabu” e tukuna o Peresitedi Nelson, “ena tiko vei ira na kaukauwa ni Kalou kei ira na agilosi me ‘vakatawai ira.’ [Vunau kei na Veiyalayalati 109:22]. E vakalevutaka vakacava na nomu yalodei nio kila, nio marama se turaga edaumeni se itabagone dau tiko e valetabu o vakayaragi ena kaukauwa ni Kalou, e sega ni rawa ni ko bula duadua? Na yalo cava e solia vei iko mo kila ni na agilosi ena rawa ni vukei iko dina?”
E vakamacalataki ena ivolanikalou na nodra dodoliga yani vei Jisu na agilosi mera dulaka cake ena nona tekiduru tiko ena Were i Kecisemani. Mai na Nona rarawa ea vakarautaka o Koya na Veisorovaki tawayalani. “E kea,” e tukuna o Peresitedi Nelson, “na cakacaka cecere duadua ni loloma ni itukutuku volai kece sara a yaco kina. E kea mai Kecisemani, na Turaga e ‘sa mai colata na nodra rarawa na tamata kecega, me rawa vei ira … na veivutuni ka lako mai vua’ [Vunau kei na Veiyalayalati 18:11].”
“Ni kauta tani vei au na bilo oqo:” a kerea o Jisu Karisito, “ia me kakua ni yaco na noqu lewa, me yaco ga, na nomuni lewa.
A sa rairai mai vei koya e dua na agilosi mai lomalagi, a sa mai vakaukauwataki koya.”
Era sa wavoliti keda tu nikua na agilosi. E kaya o Peresitedi Nelson ni “[Ena valetabu,] o na vulica na sala mo curuma na ilati ena tadrua i lomalagi kei vuravura, kei na sala mo kerei ira na agilosi ni Kalou mera qaravi iko.”
Era kauta mai na rarama na agilosi. Rarama ni Kalou. Ki vei ira na Nona Apositolo Nifaiti, e kaya o Jisu, “Raica sai Au ga na rarama mo ni dulaka cake.” Nida tokona na noda parofita, eda vakadinaidinataka ni kacivi koya na iVakabula, na “rarama kei vuravura.”
Peresitedi Nelson, ena vuku ni itokani kei na lewe ni Lotu ni Turaga e vuravura raraba, kemami kalougata ni keimami taura cake na nomuni ivakavuvuli, me taura cake na nomu ivakaraitaki ni bula vaka-Karisito, ka dulaka cake na nomu ivakadinadina yalomatua ni noda Turaga kei na iVakabula, na noda Dauveivueti kecega.
Au wasea na noqu ivakadinadina vakaiapositolo ni o Jisu Karisito “na rarama kei vuravura.” Meda sa Nona tisaipeli kece, meda “taura cake” na Nona rarama. Ena yacai Jisu Karisito, emeni.