Na Siga me Kua Vakadua ni Guilecavi
Na veigauna muri mai ena vakatara vei ira na lewe ni Lotu e veivanua mera vakalevutaka na madigi ni wasei ni tukutuku vinaka ni kosipeli i Jisu Karisito.
Ai Vakamacala Taumada
Kemuni na taciqu kei na ganequ, na itukutuku makawa ni Na Lotu i Jisu Karisito ni Yalododonu Edaidai ni itabagauna oqo sa saunaki tu ena veika lagilagi e sotavi e matanataka na nona veidusimaki na Turaga ena Nona Lotu. Ena loma ni tini na yabaki ni nodatukutuku ni lotu, e votu qaqa kina na veika cecere duadua—na tini na yabaki mai na 1820 kina 1830. Tekivu mai na ka a sotava o Parofita Josefa Simici ena Veikau Tabu ena vula itubutubu ni 1820 ni raica na Kalolu na Tamada kei na Luvena, o Jisu Karisito, ka tomani yani kina 6 ni Epereli, 1830, na tini na yabaki duatani duadua.
Raica mada na veigauna cecere oqo! A veivosaki na parofita gone oqo kei na agilosi o Moronai, vakadewataka na peleti koula, ka tabaki vakaivola na iVola i Momani! E vakarautaki na kena vakalesuimai na Matabete i Eroni kei na Melikiseteki, ni oti a qai tauyavutaka na Lotu! A vakamacalataka vakavinaka o Oliver Cowdery na gauna o ya: “Oqo na veisiga me kua vakadua ni guilecavi.” Na veigauna mana sa tomani tikoga kina veisiga nikua.
Ena yalodei au via tukuna ena yabaki oqo eda tekivutaka e dua na tini na yabaki ena rawa me cecere duadua sara vakatekivu mai na tini na yabaki yavutaki ena rua na senitiuri sa oti.
Noda Tini na Yabaki
Meu vakamacala mada. Ena maliwa, ni 2024 kina 2034, eda na sotava na veika vata ga ena yaco kina na veimadigi vovou meda veiqaravi, duavata kei na lewenilotu kei na itokani, ka vakatakila Na Lotu i Jisu Karisito ni Yalododonu Edaidai kina vuqa cake na tamata mai na kena e liu.
Eda se qai vakadinadinataka na kaukauwa ni gauna guiguilecavi ena noda mai marautaka kei na tini vakacaca namilioni na tamata na ika 100 ni yabaki nei Peresitedi Russell M. Nelson.
Ni volatukutukutaki na siganisucu nei Peresitedi Nelson, a vola na Newsweek e dua na ulutaga e vakaoqo, “Sa Yabaki 100 na iLiuliu ni Lotu Qase Duadua.” Ratou qai volai ira na 10 na iliuliu ni lotu qase e vuravura—a imatai o Peresitedi Nelson oka kina o Pope Francis vata kei Dali Lama.
Na itukutuku oqo mai na New York Times e tukuna tiko na yalo ni cecere ni volaitukutuku e vuravura: “Ena dua na cowiri ni digitaki na peresitedi e [Amerika] sa vakavurea na vakasaqarai maqusataki na yabaki ni bula kei na veiliutaki, na bula nei Nelson e tukuna tiko, taumada ena nona lotu, na siganisucu ni tolu na fika e sega ni ka me vakamacalataki rawa. E se kilai raraba tikoga vei ira na lewenilotu, e ra raica ni nodra peresitedi e sega walega ni iliuliu ia e ‘parofita, daurairai, ka daunivakatakila.’”
Eda vakavinavinaka ni isausau ni siganisucu nei Peresitedi Nelson e solia mai na madigi me vakarogoi vuravura raraba na parofita oqo ni Kalou, e dua na marau me kakua vakadua ni guilecavi.
Ena vulaitubutubu oqo, a cereki e dua na ivakananami vou ena Rara ni Valetabu—era tu kina na kuila ni veimatanitu e vuravura e tu kina na Lotu—ka kilai. Na katuba kina ivakananumi e duri tu kina e dua na vatu ceuti tu kina na vosa vakaparofita oqo: “Sa na yaco ena gauna maimuri, ni na vakataudeitaki na ulunivanua ni vale i Jiova me sivia na veiulunivanua, ena vakaceceretaki ka me lolovira na veiulunikoro; ka ra na drodro kina na veimatanitu kecega.”
E dina, na gauna guiguilecavi ena yaco ena 10 na yabaki mai qo ena baleta tiko e dua ivakaraitaki ni sa yaco na parofisai oqo nei Aisea.
Raica mada vakasakiti ni iwiliwili ni valetabu na kena dolavi raraba na veivaletabu kei na kena vakatabui ena rawa ni yaco ena tini na yabaki mai oqo, e dua na madigi vou kina 164 na valetabu ka toso tiko. Vakasamataka mada e milioni vakatini vei kemuni kei na itokani moni taubale voli ena loma ni vale ni Turaga. Na usutu ni soqo lagilagi oqo oya na vakatabui tale ni Valetabu e Salt Lake kei na veiitaviqaravi e sema kina. Oqo dina na siga me na kua vakadua ni guilecavi.
Na yabaki 2030 ena kauta mai na veimadigi e vuravura raraba me ivakananumi ni rua na drau na yabaki ni kena tauyavutaki na Lotu. E dina ga ni rui totolo meda kaya ni Lotu ena rokova na sausau oqo, ia ena vakatara meda sureta na matavuvale, itokani, veiwekani, kei na vulagi dokai mera “lako mai ka raica” ka kila vinaka cake na kaukauwa mana sa cakava kina nodra bula na lewe ni Lotu.
Ena 2034, ena udolu na iliuliu, vulagi, kei na dauqito e vuravura raraba era na takui yani kina veigaunisala e Salt Lake City, na vanua mena caka kina na Winter Olympic Games. E rairai sega tale na soqo e cecere cake me vakaraitaka na duavata e vuravura me vakataka na Olympic Games. Ena laki sarava o vuravura na Lotu kei ira na lewena, nira na maqusa kina veimadigi mera volodia, veiqaravi, ka wasea na itukutuku vinaka ena cakacaka ena loloma—na soqo ena sega vakadua ni guilacavi.
E dina sara ni soqo namaki oqo ena vakarautaki ira na lewe ni Lotu e veivanua kece kina vuqa na veimadigi mera wasea na itukutuku vinaka ni kosipeli i Jisu Karisito ena vosa kei na cakacaka, na tini na yabaki ena sega vakadua ni guilecavi.
iTukutuku Vinaka
Ena dua na soqoni ni vo e vica na macawa kina nona siganisucu, a wasea o Peresitedi Nelson na vuna e taleitaka kina na malanivosa “itukutuku vinaka” Ni kakavaki kina, e raica, ni malanivosa oqo e kauta mai na reki kei na marau. Ia “na itukutuku vinaka” e tukuna vakalevu cake mai na kena o ya. A vakamacalataka ni malanivosa oqo e yavu mai na vosa va-Kiriki euangelion, e kena ibalebale dina na “itukutuku vinaka” se na “kosipeli.” Na marau kei na reki ena bula oqo kei na kena e tarava sa sema tiko ga ki na kosipeli i Jisu Karisito. Koya gona na malanivosa “ïtukutuku vinaka” e kovuta na rua na ibalebale oqo ena sala totoka.
“Sa sucu na [tagane kei na yalewa], me rawata na marau.” Sa vakarautaka na Tamada Vakalomalagi na ituvatuva ni bula marau e kauta mai na reki ni Nona kalougata. Oqo e oka kina na bula tawamudu tiko vakamatavuvale ena Nona iserau Na Veisorovaki i Jisu Karisito sa usutu ni ituvatuva ni Kalou me vueti keda. Meda ciqoma na bula tawamudu, sa dodonu meda lako vei Karisito. Nida cakava oqo ka “vukei ira eso mera cakava vakakina, eda sa qai vakaitavi ena cakacaka ni Kalou ni veivakabulai kei na bula vakacerecerei.”
Na itukutuku vinaka oqo ni kosipeli i Jisu Karisito sa itukutuku bibi duadua e vuravura. Oqori na vanua era na curu mai kina na itabagone kei na itabaqase cake ena Lotu.
Me iSakisaki ni iTabagone
Ia, me vaka na tini na yabaki mai oqo ena vakasinaiti ena veisiga me kakua vakadua ni guilecavi kivei ira yadua na lewe ni Lotu, ena rawa me dina oqo vei kemuni na itabatamata e tarava. O ni sa tiko oqo e vuravura baleta ni ko a digitaki moni mai tiko eke nikua. E tu veiiko na kaukauwa kei na igu moni tisaipeli i Karisito sa na sala vou.
E vakatavulica o Peresitedi George Q. Cannon, “Sa vakarautaka tu mai na Kalou na yalo baleta na itabagauna oqo era yaloqaqa ka gugumatua mera sotava na vuravura oqo kei na kaukauwa taucoko nei vu-ni-ca, [ka me] tara cake na Saioni ni noda Kalou sa sega ni rerevaka na veika ca taucoko ena muri mai.”
Me ikuri, au gadreva meu vosa vei kemuni na itabatamata oqo, meu sureti kemuni moni raitayalotaka na totoka dina ni yabakitini e tarava, onina sega vakadua ni guilecava. Ena vica kina na noqu vosa matata ni ivakasala kei na veivakayaloqaqataki mena qaqacotaki kemuni ena yabakitini sa roro tiko mai.
Me vaka e vuqa vei kemuni, na noqu talevoni, e dau dreta totolo vata mai vakaikoya eso na itaba e vakaraitaka na veika au cakava ena dua na siga. E veivakurabuitaki nida raica na levu ni veika sa veisau baleti au kei na noqu vuvale ena vica walega na yabaki.
Raitayalotaka mada na itaba ena qarava na nomu talevoni ena 10 na yabaki mai oqo! O rawa ni raica na nomu taurivola mai na koronivuli torocake se koliji, ciqoma na nomu edaumeni, gole ki kaulotu, vakamau, kei na sucu ni nomu ulumatua. Vei iko mada ga, oqo na yabakitini mo kakua vakadua ni guilecava. Ia ena yaco me vakaruataki kevaka mo sasaga mo rarama kei vuravura me yaco na itukutuku vinaka ni kosipeli i Jisu Karisito me vakabulabulataka ka laveta sega ni nomu bula ga ia na nomu vuvale, itokani, kei ira na imuri ni itukutuku raraba.
O na vakataroga beka na sala mo cakava kina.
Era vakavulici keda na parofita ni Kalou ni na caka oqo ena va na itaviqaravi rawarawa, e vakatokai me ilesilesi vakalou: imatai, mo bulataka na kosipeli i Jisu Karisito; ikarua, vukei ira era tiko leqa; ikatolu, sureta na tamata kece mera ciqoma na kosipeli; ka ikava, vakaduavatataki ira na vuvale kina bula tawamudu. E veivakurabuitaki, ni rawa me caka yadua ena noda ivakarau ga ka tudei.
iTavi Lesi Vakalou
Au yalataka vei kemuni ni yabakitini oqo ena sega ni guilecavi vakadua maivei iko kevaka mo na ciqoma na va na itavi lesi vakalou oqo. Meda raica mada na veika ena kovuti kina.
iMatai, bulataki ni kosipeli i Jisu Karisito. Vulica na nodra vosa na parofita, ka vulica mo lomana na Tamada mai Lomalagi. Vagolea na yalomu Vua, ka saga mo lako tu ena Nona sala. Mo laveti cake ena “nuidei ni veiyalayalati” a vakamacalataka o Elder Ulisses Soares. Na nuidei oqo e tadu mai na cakava na veiyalayalati mo muri Jisu Karisito, ni ko kila ni iVakabula ena yaco me vaqaqacotaki ka tokoni iko.
Mera raica na nomu itokani na reki o sa vakila nio bulataka tiko na kosipeli, ni sai iko na itukutuku vinaka duadua ni kosipeli era bau ciqoma.
iKarua, mo dodoliga yani ena yalololoma mo vukei ira era tiko leqa. Na nomu itabatamata e duatani na nomuni daunanumi ira na vakaloloma Ni dau yaco na tavuki ni vanua era totolo yani na lewe ni Lotu mera samaka tani na benu ka vakacegui ira na vakaleqai, ka vaka me levu na itabagone kei na yabaki 20 era dara na siqeleti “Helping Hands”. E nomu ivakarau tudei moni “colata vata na nomuni icolacola” ka “vakacegui ira sa gadreva na veivakacegui.” Nida cakava oqo eda sa “vakayacora kina na vunau i Karisito.”
O Evan, e cauravou ena yabaki ni Lalai, a vakayagataka na nona sereki ni vulaikatakata mai koronivuli me sokumuni iyaya me isau ni pinati bata kei na jeli seniwiji me cau kina nodra ilololo ni kakana. A kunea na cakacaka oqo ena mataveilawa ni JustServe. A vola o Evan na lewe ni nona kalasi taucoko mera veivuke ni kena soqoni e 700 na tavaya ni jeli! Mera kila o ira ko qarava tiko ni nomu kauwaitaki ira ni sa teivaki tu ena nomu lomana na Kalou ka sa nomu gagadre mo lomani ira na kainomu me vakataki iko.
iKatolu, sureta na tamata kecega mera ciqoma na kosipeli. Ena yabaki oqo eda a dolava kina e 36 na tabana ni kaulotu e vuravura raraba mera qaravi kina o ira era gadreva mera kaulotu tudei. Ena gauna e vuqa na itabagone era digitaka mera sa gole tani vakadua mai na itaviqaravi vakalotu, e veivakurabuitaki ka tukuna tiko na totoka ni ituvaki ni nomuni ivakadinadina. Nio kaulotu tudei se sega, yalovinaka mo kila na cecere ni nomu rawa ni vakauqeti ira nomu itokani nio loloma, wasea ka sureti ira mera digova na kosipeli i Jisu Karisito.
iKava, vakaduavatataka na matavuvale me tawamudu. Niu sikova na veivaletabu e vuravura raraba, au qoroya na rumu ni tucake vei ira na itabagone era wawa ena tobu ni papitaiso kei na tubu ni iwiliwili ni itabagone qase cake mera daucakacaka vakalotu. Walega qo e 600 mai na ilawalawa ni itabagone mai Sikoteladi kei Ireland era a gole kina Valetabu e Preston Igiladi, mera cakava e 4,000 vakacaca na cakacaka vakalotu, ka vuqa na wekadra sa takali yani! Au vakamasuti kemuni moni cakava na tuva kawa, gole ki valetabu, ka vakarautaki iko vinaka mo tagane se yalewa sa tu vakarau mo vakamautaka e valetabu e dua sa itokani kilikili vakataki iko. Tauyavutaka e dua na ivakarau ni nomu bula nikua me yaco na valetabu me gauna tudei ni nomu bula.
iTinitini
Kemuni na taciqu kei na ganequ, kemuni na noqu itokani gone, ena dau yaco na veika dredre vei keda yadua ena veisiga mai qo. Ia, nida curuma yani na yabakitini mai qo ni veika vovou, meda na wasea yani na itukutuku vinaka ena itaviqaravi rawarawa ni bula, veivukei, veisureti, kei na duavata. Nida cakava oqo, na Turaga ena vakalougatataki keda ena veika tawa guilecavi rawa.
Au vakadinadinataka nio ira era gole vua na Turaga ena yalodra dina kei na gagadre dina, kei ira era cavuta na iVakabula mai na gusudra ka tiko na Yalo Tabu e yalodra, kei ira era gutaka yani na cecere kei na lagilagi vakalou oqo, au sa vakalougatataki kemuni moni na kunea ka sotava na kalougata levu vakasilesitieli ka ciqoma na ivakadinadina ni Kalou sa rogoci iko, kilai iko, ka lomani iko. O na sotava na veisiga me na kakua vakadua ni guilecavi. Ena yacai Jisu Karisito, emeni.