Sa Vakarau Tu Na Ligana me Vukei Keda

Mai vei Elder Juan Pablo Villar

Ena Vitusagavulu

Nida dolele yani vei Jisu Karisito ena vakabauta, ena dau waraki keda o Koya.

Niu se gone, keitou a gade vakavuvale kina dua na baravi voleka kina noqu vanua o Chile. Au namaka meu marautaka vata kei na noqu vuvale na vulaikatakata. Au marau talega baleta au nanuma niu sa na qai rawa ni tomani rau na tuakaqu qase ena veika lasa erau dau cakava e wai.

Dua na siga, erau gole na tuakaqu me qito ena vanua ka dau tasevu kina na biau, kau nanuma niu sa tamata levu ka matua meu muri rau. Niu tosova voleka yani na vanua oya, au raica nira lelevu cake na biau mai na kena laurai mai matasawa. Vakasauri, e tosovi au mai vakatotolo edua na biau, kau kidacala kina. Au vakila na kaukauwa ni waitui ni ologi au, au laudre yani i vanua titobu. Au sega ni raica rawa se vakila edua na ka me vakadeitaka vei au na vanua au tiko kina niu kolotaki wavoki tiko. Ena gauna sara ga au nanuma kina ni sa na mai cava na noqu bula e vuravura, au vakila edua na liga ni vueti au cake. Au raica tale na matanisiga ka taura tale na noqui cegu.

A raica toka mai na taciqu o Claudio na noqu via vaqaseqasea ka lako yani me vueti au. Au sega saraga ni yawa mai baravi. E dina ga ni a vovodea na wai, au veilecayaki ka sega ni kila niu a rawa ni vukei au vakataki au. E a tukuna vei au o Claudio ni dodonu meu dau qaqarauni ka na rawa ni vakavulici au, keu vinakata. Dina ga niu tiloma e vica vata na qaloni wai, ia na noqu qaciqacia kei na gagadre meu gonetagane levu, a vakavuna meu kaya, “Io.”

E kaya vei au o Claudio niu gadreva meu vorata na ua. Kau kaya e lomaqu niu na sega ni qaqa vua edua na lalaga wai vakaitamera.

Ni toro tale mai edua na ua levu, a kaya vakatotolo o Claudio, “Raici au mai; oqo na ka mo cakava.” E cici yani o Claudio ka dokoulu yani ki loma ni biau ni bera ni tasevu. Au a qoroqoro dina ena nona dokoulu kau sega ni raica kina na ua ka tarava mai. Ka, vakadua tale, au a viritaki tale ki boto ni waitui ka biliraki ena kaukauwa ni wai. Ni oti e vica na sekodi, ea vesuka na ligaqu edua tale na liga, kau vueti cake tale meu cegu rawa. E a kautani yani vakamalua na noqu via vaqaseqasea.

Oqo, a sureti au o taciqu me keirau dokoulu vata. Me vaka na nona veisureti, au muri koya, ka keirau dokoulu vata yani. Au vakila ni vaka au a valuta tiko edua na tamani bolebole vereverea. Dina ni a sega ni rawarawa, ia au a cakava, vinaka vakalevu na veivuke kei na ivakaraitaki nei taciqu. A vueti au vakarua na ligana; na nona ivakaraitaki a vakaraitaka vei au na sala meu walia kina na noqu bolebole ka qaqa ena siga oya.

Sa sureti keda o Peresitedi Russell M. Nelson meda vakasama vakasilesitieli, kau vinakata meu muria na nona ivakasala ka vakayagataka ena noqu italanoa ni vulaikatakata.

Na Nona Kaukauwa mana na iVakabula mai vua na Vunica

Nida vakasama vakasilesitieli, eda na kila kina nida na sotava na bolebole eso ena noda bula, ka na kaukauwa cake mai na noda igu meda rawai ira kina. Ena gauna ni noda bula vakayago, eda na dau valuti mai vua na vunica. Me vaka na biau ka a rawai au ena siga ni vulaikatakata oya, eda na vakila nida uabaleti ka vinakata meda soro kina dua na leqa eda sega ni rawa ni levea. O ira na veibiau rerevaki oya era rawa ni biliraki keda vaka ka vaka. Ia kua ni guilecava se o cei e kaukauwa cake mai na veibiau oya, ka vakakina, na veika kecega. Sai koya na noda iVakabula, o Jisu Karisito. E tu Vua na kaukauwa me kauti keda tani mai na veika rarawa kei na veikadredre eda sota kaya. Se vakacava noda vakila nida voleka Vua, e se rawa tikoga Vua me yacovi keda ena vanua kei na cava ga eda sotava tiko.

Nida kere veivuke Vua ena vakabauta, ena dau tiko o Koya, ka ena Nona gauna ga, ena tu vakarau tu ka yalorawarawa me taura na ligada ka vueti keda cake ki na dua na vanua taqomaki.

Na iVakabula kei na Nona iVakaraitaki ni Veiqaravi

Nida vakasama vakasilesitieli, eda na qai kila nio Jisu Karisito edua na ivakaraitaki uasivi ni veiqaravi. E tiko edua na ivakarau vei keda ena ivolanikalou, ni dau dodoliga yani o Koya se o iratou na Nona tisaipeli vua edua e kere veivuke, veivueti, se veivakalougatataki nira dodoka yani na ligadra. Me vaka ena noqu italanoa, au kila ni tiko o tuakaqu, ia nona tiko ekea e sega ni veiraurau. E kila saraga o Claudio niu sa leqa, ka gole yani me vueti au mai wai.

So na gauna, eda nanuma nida gadrevi ga me tiko ena vukuna edua e gadreva na veivuke, ia vakavuqa, e na tu eso tale na ka eda rawa ni cakava. Na rai tawamudu ena rawa ni vukei keda meda ciqoma na ivakatakila, ka vukei ira na tani era vakaleqai tu ena kena gauna donu. E rawa nida nuitaka na veidusimaki kei na veiuqeti ni Yalo Tabu meda kila na veivuke cava e gadrevi, se veitokoni vakayago me vaka na vakacegui ni lomada, kakana, vukei ena itavi ni veisiga, se veituberi vakayalo me vukei ira eso ena nodra ilakolako ni vakavakarau, cakava, ka rokova na veiyalayalati tabu.

Sa Tu Vakarau Tu Na iVakabula me Vueti Keda

Ko Pita na iApositolo liu, ena gauna a “lako kina e dela ni wai, me lako vei Jisu ea qai rere; ka vakatekivu me lutu dromu,” sa “kaci sara, ka kaya, na Turaga, ni vakabulai au.” A kila o Jisu na vakabauta a vakayagataka o Pita me lako mai kina Vua e dela ni wai. Ea kila talega o koya na taqaya nei Pita. Me vaka na italanoa, o Jisu “sa qai dodoka sara na ligana, a sa tauri koya,” ka kaya vua na veivosa oqo: “O iko sa lailai na nomu vakabauta, o sa vakatitiqa ena vuku ni cava?” Ea sega ni vosa me cudruvi Pita ia me vakananuma vua nio Koya, na Mesaia, a tiko vata kei koya kei iratou na tisaipeli.

Nida vakasama vakasilesitieli, eda na ciqoma e lomada na veivakadeitaki nio Jisu Karisito na noda Dauniveisereki dina, na noda Dautataro vei Tamada, ka noda Dauniveivueti. Nida vakabauti Koya, ena vakabulai keda o Koya mai na keda ituvaki lutu, na noda bolebole, malumalumu, kei na veigagadre eso ena bula oqo, ka solia vei keda na isolisoli uasivi duadua, sai koya na bula tawamudu.

Na iVakabula Ena Sega ni Soro ena Vukuda

A sega ni soro ena vukuqu o taciqu ena siga oya ia a vosota tikoga meu vulica na sala meu cakava kina vakai au. E sega ni soroo Koya dina ga ni gadrevi me vueti au vakarua. E sega ni soro o Koya dina ga niu ega ni rawata ena imatai ni gauna. E sega ni soro o Koya me rawa niu rawa kina na bolebole oya ka rawata. Nida vakasama vakasilesitieli, eda na kila ni noda iVakabula ena dau tiko kei keda ena gauna ga e gadrevi me solia kina na veivuke eda via vuli, veisau, qaqa, vosota, se rawaka ena cava ga ena kauta mai na marau dina ka tawamudu. kina noda bula.

Na Ligana Na iVakabula

Na ivolanikalou e vakananuma na ivakatakarakara kei na bibi ni liga ni iVakabula. Ena Nona isoro ni veivakaduavatataki, ea lauvako na ligana me lili kina o Koya ena kauveilatai. Ni oti Nona Tucake tale, a rairai o Koya vei iratou na Nona tisaipeli ena yago e taucoko tu, ia na mawe ni vako ea tu ga e ligana mei ivakananumi ni Nona isoro tawayalani. Na ligana ena dau tiko ga kei keda, dina nida na sega ni raica se vakila taumada, baleta nia digitaki mai vua na Tamada Vakalomalagi me noda iVakabula, na Dauveivueti ni kawatamata kecega.

Tu Ena Qeteqete ni Ligada, mai vei Jay Bryant Ward

Na Liga ni Kalou, mai vei Yongsung Kim

Keu vakasama vakasilesitieli, au kila nida na sega ni biu taudua tu ena bula oqo. Dina nida na sotava na bolebole kei na veivakatovolei, na Tamada Vakalomalagi e kila na noda igu ka kila nida rawa ni vosota ka ulabaleta na veika dredre. E dodonu meda cakava na noda itavi ka rai vei Koya ena vakabauta. Na Luvena Lomani, o Jisu Karisito, sa noda dauniveisereki ka na dau tikoga kei keda. Ena Yacana tabu, na yaca i Jisu Karisito, emeni.

iDusidusi

1. Russell M. Nelson, “Vakasama Vakasilesitieli!,” Liahona, Nov 2023, 118.

   “Ni o caka digidigi, au sureti iko mo rai vakayawa—ena rai tawamudu. Vakaliuci Jisu Karisito, baleta na nomu bula tawamudu ena vakatau ena nomu vakabauti Koya kei na Nona Veisorovaki. …

   “Nio sotava na lomalomarua, vakasama vakasilesitieli! Nio vakatovolei ena veitemaki, vakasama vakasilesitieli! Ni vakanadakui iko na bula se o ira na daulomani, vakasama vakasilesitieli! Ni dua e mate vaka sakasaka, vakasama vakasilesitieli. Ni dua e tauvimate bibi vakabalavu, vakasama vakasilesitieli. Ni solegi iko na veivakasosataki ni bula, vakasama vakasilesitieli! Nio vakabulai mai na vakacalaka se mavoa, vaka au cakava tiko oqo, vakasama vaka silesitieli!”

2. Raica na Marika 4:35–41.

3. Dina ga nida vakabauta nio Tamada Vakalomalagi kei Jisu Karisito erau rawa ni vukei keda ena gauna cava ga eda gadreva kina, na Nodrau veivuke ena sega beka ni yaco mai ena sala eda namaka. E bibi meda nuitaka ni Rau kilai keda vinaka mai na noda kilai keda ka na solia na veitokoni kei na veivuke e vinaka duadua vei keda ena gauna donu: “Mo kila tiko na luvequ, ni veika kece oqori ko na yalomatua kina, ka vinaka cake” (Vunau kei na Veiyalayalati 122: 7).

   Na veivakatovolei kei na bolebole eda sotava era vukei keda me tara cake na kaukauwa kei na itovo ni bula me vorati kina na veitemaki ka rawa na tamata vakavuravura.

4. Raica na Marika 1:31; Marika 5:41; Marika 9:27. Maciu 14:31. Cakacaka 3:7; 3 Nifai 18:36.

5. Ena nona sureti keda o Peresitedi Russel M. Nelson meda veiqaravi ena sala vou ka savasava cake (raica na “Na Veiqaravi,” Liaona, Me 2018, 100), a kerei keda talega meda kila vakavinaka ni sala vou oqo ni veiqaravi e sega ni baleti au kei na ka au via solia ia e baleta na cava era gadreva na tani. Ko Jisu Karisito e solia tiko vei keda na madigi meda lomani ira na wekada (raica na Luke 10:27) ena sala e cecere ka savasava cake.

6. Maciu 14:29–30.

7. Maciu 14:31.

8. Me kilai na ibalebale dina ni marau, e gadrevi meda kila na itavi ni veivakalougatataki ena noda bula. Na ibalebale ni veivakalougatataki e vukea me vakamatatataki na vakasama oqo: “Na veivakalougatataki sai koya na soli ni veitokoni vakalou vua edua. Na ka kecega ena vakabasikata na marau dina, na tiko vinaka, se na bula sautu sa ka ni veivakalougatataki” (iDusidusi ki na iVolanikalou, “Vakalougatataka, Kalougata, Veivakalougatataki,” Valenivola Vakosipeli). Na vuravura e nanuma ga de marau dina e tautauvata kei na marau vakayago, ka vaka edua na “marau” e lekaleka-wale.

9. Raica na Aisea 49:16.