Mo Savasava
Na veivutuni e veisiga e vakatara vei keda meda kila na veidusimaki ni Turaga ena Yalo Tabu.
Niu se qai yabaki lima, au qito soka tiko kei ira na noqu itokani ena daku ni valenilotu ni neitou koro e Côte d’Ivoire. Au nanuma vinaka na nona kacivi ira na vavakoso na dauvunau mera vakasavasavataka na nodra isulu mera vakavakarau ena nona yaco mai na iVakabula. Niu se gone, au taura dina na veikacivi oqo. Au cici i vale na kena totolo duadua e rawata na yavaqu lailai ka kerei tinaqu me savata na noqu isulu me kua ni tauvi duka ka vakavakarau kina nona lako mai na iVakabula ena siga ka tarava. E dina ga ni vakatitiqataka o tinaqu na nona sa voleka ni lesu mai na iVakabula, e savata ga na noqu isulu vinaka duadua.
Ena mataka ka tarava, au tokara na isulu suasua ka waraka na itukutuku ni nona yaco mai na iVakabula. Ni toso na siga ka sega ni dua na ka e yaco, au nanuma meu lako i valenilotu. Au rarawa vakalevu niu raica ni lala na valenilotu ka se bera ni yaco mai na iVakabula. O rawa ni raitayaloyalotaka na noqu taubale vakamalua i vale.
Ni oti e vica na yabaki, na noqu vulica tiko na lesoni mai vei rau kaulotu ena vakavakarau meu lewena Na Lotu i Jisu Karisito ni Yalododonu Edaidai, au wilika na veika oqo: “Ia sa sega na ka tawasavasava sa curu rawa kina nona matanitu; o koya sa sega kina e dua sa curu ki na nona ivakavakacegu, ko ira ga sa savata na nodra isulu ena noqu dra, ena vuku ni nodra vakabauta, kei na veivutuni ni nodra ivalavala ca kecega, kei na nodra yalodina me yacova na ivakataotioti.”
Na veivakadeitaki au ciqoma ena gauna oya e vukei au meu kila na dina bibi ka vakacalai na noqu vakasama ena vuqa na yabaki sa oti. Na itukutuku ni dauvunau e vakanamata kina bibi ni savasava vakayalo. A vakauqeti ira na ivavakoso mera vakasaqara na veivutuni, veisautaka na nodra bula, ka gole vua na iVakabula me baleta na veivueti.
E kila vinaka tu na Tamada Vakalomalagi na noda ilakolako vakayago kei na ivalavala ca ena noda bula. Au vakavinavinaka vakalevu ni vakarautaka o Koya e dua na iVakabula me sorovaka na noda ca. Mai na solibula ni veivueti ni iVakabula, sa rawa vei keda yadua meda veivutuni ka vakasaqara na veivosoti ka yaco meda savasava. Na veivutuni, e dua na yavu ni ivakavuvuli ni kosipeli, e ka bibi sara kina noda tubu vakayalo kei na nuidei nida curuma yani na veibolebole ni bula.
Ena koniferedi raraba ni Epereli 2022, a sureti ira kece na lewe ni Lotu o Peresitedi Russell M. Nelson mera lako curuma na reki ni veivutuni e veisiga. A kaya o Koya:
Yalovinaka kua ni rere se lokuyarataka na veivutuni. O Setani e marautaka mo rarawa. Vakalekalekataka. Tagutuva na nona veivakayarayarataki kina nomu bula! Tekivu nikua mo vakila na reki ni nomu biuta tani na tamata vakavuravura. Na iVakabula e lomani keda e veigauna taucoko ia vakauasivi sara nida veivutuni. …
Ke o vakila nio lako sese vakayawa se vakadede mai na salatu ni veiyalayalati ka sega ena sala mo lesu kina, qori e sega ni dina.”
Kevaka e tiko e dua na ka o se bera ni veivutunitaka vakaidina, au vakayaloqaqataki iko mo muria na veikacivi i Peresitedi Nelson mo kua ni lokuyarataka na nomu veivutuni. Ena gadrevi na yaloqaqa me rawati na veika oqo oqo; ia, au rawa ni vakadeitaka vei kemuni ni reki e lako mai na veivutuni dina e uasivita na kilaka. Ena veivutuni, e laveti cake na noda icolacola ni cala ka vakaisosomitaki ena yalo ni vakacegu kei na vakanomodi. Nida veivutuni vagumatua, eda vakatabui ena dra ni iVakabula, ka vakalevutaka na noda kila vakavinaka na veivakauqeti kei na veivakayarayarataki ni Yalo Tabu.
E sucu na noqu itokani tawamudu ni leqa na daligana, ka vakavuna me dara na ivukevuke ni vakarorogo. Na kuvu kei na buno e rawa ni vakaleqa na kena cakacaka na gacagaca oqo, ena veimataka au dauraica me vakasavasavataki ni bera ni daramaka. Na kena dau savati vakawasoma na duka, suasua, se cawa, e vakavinakataka kina na nona rawa ni rogoca vakavinaka na veivosaki. Ni raibaleta na ivalavala oqo e veisiga, ena vakadredretaka me rogoca edua na ka ena siga taucoko; ena seavu na vosa ka sega ni rogo rawa. Me vaka na kena dau sava me rogoca vakavinaka o koya, na veivutuni e veisiga e vakatara vei keda meda kila na veidusimaki ni Turaga ena Yalo Tabu.
Ni voleka ni cava na nona veiqaravi na Turaga ena bula oqo kei na nona bera ni gole kina Were o Kecisemani, a vakarautaki ratou na Nona tisaipeli me ratou sotava na veivakatovolei ena yaco mai. A vakadeitaka vei ira o Koya, ka kaya: “Ia na Dauveivakacegui, sai koyana Yalo Tabu, o koya ena tala mai ko Tamaqu ena yacaqu, ena vakavulici kemudou ena ka kecega, ka vakananuma vei kemudou na ka kecega au sa tukuna vei kemudou.”
E dua na itavi bibi ni Yalo Tabu oya me veivakasalataki, liutaka, ka dusimaki ira era vakarorogo kina domo malumu, e loma. Me vaka ga ni rawa ni vakataotaka na cakacaka dodonu ni noda veitaratara ni dua na veivuke ni vakarorogo, na noda isema vakayalo kei na Tamada Vakalomalagi e rawa talega ni vakaleqai, e rawa ni veivakacalai se sega ni rogoca na Nona ivakasala. Na kena yaco mai na initaneti e vakarautaka e levu na itukutuku mai na veigauna sa oti. Oqo ena rawa ni muataki keda meda vakasaqara na veidusimaki ni vuravura ka sega vua na Kalou. A vakavulica o Peresitedi Russell M. Nelson, “Ia ena veisiga ka lako mai, ena sega ni rawa nida bula tiko vakayalo ke sega na veituberi, veidusimaki, kei na veivakacegui ni Yalo Tabu.”
Au vakavinavinaka nida rawa ni ciqoma yadua na isolisoli ni Yalo Tabu ena gauna ni noda veivakadeitaki. Ia, e veivakasalataki o Peresitedi Dallin H. Oaks ni na “veivakalougatataki e tiko ena isolisoli ni Yalo Tabu e vakatau ena bula kilikili [kei] ‘na Yalo ni Turaga e sega ni tiko ena valetabu tawasavasava’ [Ilamani 4:24].”
Nida digitaka vakavinaka meda muria na nodra veidusimaki na parofita kei na apositolo, ena tubu na noda rawata meda veitokoni ni Yalo Tabu. Na Yalo Tabu e vakarautaka na vakatulewa matau, na vakasama vinaka kei na veivakauqeti e salavata kei na loma ni Tamada Vakalomalagi. Na veitokani tudei ni Yalo Tabu e ka bibi sara kina noda tubu vakayalo.
Au lesi wale ga qo meu vakatulewa ena dua na koniferedi ni iteki ena iTeki o Salt Lake Granger West e Utah. Ena gauna ni soqo oqo, au sotavi peresitedi ni iteki ka tovolewa vagumatua na nona rawa ni kila na veivakauqeti ni Yalo Tabu ena buladodonu kei na veivutuni e veisiga. Me tiki ni neitou sasaga ni veiqaravi, keitou sikova e tolu na vuvale. Ni vakarau cava na neirau veisiko, keirau raica ni vo tiko e rauta ni 30 na miniti ni bera na neirau ituvatuva e tarava. Ni keirau lesu tale kina valenivolavola ni iteki, a vakauqeti o Peresitedi Chesnut me sikova tale e dua na matavuvale. Keirau duavata me keirau muria na veivakauqeti oqo.
Keitou sikova na matavuvale na Jones, keirau kunei Sisita Jones ni moce tu ga ena vuku ni tauvimate. E matata ni gadreva e dua na veivakalougatataki vaka matabete. Ena nona veivakadonui, keitou qaravi koya. Ni keirau vakarau biubiu, a taroga o Sisita Jones se keirau kila vakacava na nona gadreva vakatotolo e dua na veivakalougatataki. Na ka dina, keirau sega ni kila. Ia, na Tamada Vakalomalagi, e kila na nona gagadre, a kila ka vakauqeti Peresitedi Chesnut me sikova na nona vale. Nida ciqoma na veidusimaki ni domo lailai, ka malumu, eda na vakarautaki vakavinaka cake meda qaravi ira vakavinaka cake era vakaleqai tu.
Au vakadinadinataka e dua na Tamada Vakalomalagi yalovinaka ka dauloloma. O Jisu Karisito na iVakabula kei na Dauniveivueti ni tamata kece ga. Au vakadinadinataka ni dina na Veisorovaki i Jisu Karisito nida vulica meda muria na veidusimaki ni Yalo Tabu, ena tuberi keda o Koya meda veivutuni ka vakayagataka na kaukauwa ni Veisorovaki ni iVakabula ena noda bula. O Peresitedi Russell M. Nelson sa parofita dina ka bula ni Turaga, ka tiko kina na idola kece ni matabete e vuravura nikua. Ena yacai Jisu Karisito, emeni.