Luvena Tagane kei na Yalewa ni Kalou
Eda vakabauta dina ni tamata kece era luve ni Kalou vakaidina, baleta na dina oqori, sa rawa nida yaco meda vakataki Koya.
Nikua au vinakata meu tukuna e dua vei ira na dina lagilagi, reki, ka kaukauwa duadua ni kosipeli sa vakatakila mai na Kalou. Ena gauna vata, e ka ni veivakurabuitaki ni dua eda dau vakalewai kina. E dua na ka au sotava ena vica na yabaki sa oti e vakatitobutaka vakalevu na noqu vakavinavinakataka na dina ni kosipeli oqo.
Me vaka niu dua na mata ni Lotu, au sureti ena dua na gauna ki na koniferedi vakalotu ka kacivaki kina ni mai na gauna oya ka lako yani era na ciqoma ni sa dodonu kece na papitaiso era vakayacora e voleka ni veimatalotu Vakarisito tale eso, ni vei gauna kece e vakayacori kina na cakacaka vakalotu ena wai kei na yaca ni Tamana kei na Luvena kei na Yalo Tabu. E vakamacalataki ni lawatu oqo e sega ni lavaki kina vei papitaiso era vakayacora na Lotu i Jisu Karisito ni Yalododonu Edaidai.
Ni oti na koniferedi au a rawa ni vakadikeva vakatitobu vata kei na iliuliu ka liutaka na itukutuku oqo na vuna e vakavo kina. E totoka ka vakaibalebale na neirau veivosaki.
Me vakalekaleka ga, e vakamacalataka vei au ni vakavo ga o keda ni noda vakabauta me baleta na Lewe Tolu Vakalou, ka dau vakatoka na veimatalotu vakarisito tale eso me Letoluvakalou. Au vakaraitaka na noqu vakavinavinaka ni taura na gauna me vakamacalataka na nona vakabauta kei na lawatu ni nona lotu. Ni mai tini na neirau veitalanoa, keirau veimokomoko ka veivakamocetaki.
E muri au vakasamataka na neirau veitalanaoa, na veika e tukuna na liuliu oqo e tiko ena noqu vakasama me baleta na Yalododonu Edaidai ni ira sega ni kila na ka e vakatoka okoya me “veika vuni ni Letoluvakalou.” O cei beka e tukuna tiko o koya? E dina, e baleta na noda kila me baleta na ituvaki ni Kalou. Keda vakabauta ni Kalou na Tamada e “dua na tamata vakacerecerei” e vakalagilagi ka “vakalewena ka vakasuina na yago i koya ka rawa ni da tara me vaka ga edua na tamata; [kei] koya na Luvena.” Vakakina, ni veigauna kece eda veivosakitaka na ituvaki ni Kalou, ena so na sala eda sa veivosakitaka talega kina na noda ituvaki.
Ka dina oqo ni sega walega baleta ni da a buli kece “mei tovo vata kei [Koya], ka me ucui [Koya],” ia vakatalega kina, ni vaka a vola na daunisame, e kaya na Kalou, “Dou sa kalou; kei na luve i Koya sa Cecere sara koi kemudou kecega.” Sa ikoya oqo e dua na ivunau lagilagi ka kune ena itekitekivu ni Vakalesui mai. Ena kena ivakaleka, e sega ni levu cake se lailai sobu mai na veika era vakavulica na noda daukaulotu me imatai ni lesoni, imatai ni parakaravu, imatai ni laini: “Na Kalou sa Tamada Vakalomalagi, keda sa Luvena.”
O na rairai kaya beka ni vuqa na tamata era vakabauta ni da luve ni Kalou. Io, e levu era na rairai kaya nida luve ni Kalou kece, ia na nodra kila ena rairai duidui vakalailai mai na kena ibalebale titobu eda vakadeitaka. Vei keda na Yalododonu Edaidai, na ivakavuvuli oqo e sega ni vakatautauvatataki. Ia, eda vakabauta dina ni tamata kece era luve ni Kalou vakaidina. O Koya “na Tama ni yaloda,”6baleta na veika oqori, sa rawa nida vakataki Koya, ka vaka me sega ni vakasamataki rawa mai vei ira eso.
Sa sivi qo e 200 na yabaki mai na gauna a dolava kina na katuba na iMatai ni Raivotu ki na Veivakalesui mai. Ena gauna oya, a vakasaqara veidusimaki o Josefa Simici gone mai lomalagi me a kila se na lotu cava me lewena. Mai na ivakatakila e ciqoma ena siga oya, kei na vei ivakatakila e soli malua vei koya, a rawata na kila-ka na Parofita Josefa me baleta na ituvaki ni Kalou kei na noda veiwekani vata kei Koya ni da Luvena.
Ena vuku ni ka oya, keda vulica vakamatata ni vakavulica mai na itekivu ni gauna na Tamada Vakalomalagi na ivunau talei oqo. Vakatarai au meu cavuta e rua na veika ea yaco ena ivolanikalou e vakaraitaka na veika oqo.
O na rawa ni nanuma na nona ivakaro na Kalou vei Mosese me vaka ni volai tu ena Mataniciva Talei.
Eda wilika ni “Ka sa vosa vei Mosese na Kalou, ka kaya: Raica sai Au na Turaga na Kalou Kaukauwa, na yacaqu ko Tawacava.” Ena dua tale na kena vosataki, Mosese, Au vinakata mo kila o cei o Au. Ka qai kuria o Koya, “Ia, raica, ko iko na luvequ.” iMuri sa qai kaya, “Au na solia vei iko e dua na cakacaka, Mosese, na luvequ; raica ko sa tautauvata kei koya na noqu Le Duabau ga.” Ka qai tinia vata o Koya, “Ia oqo, raica, au na vakaraitaka vei iko e dua na ka, I Mosese na luvequ.”
E vaka me sa vakadeitaka na Kalou me vakavulici Mosese ena dua mada ga na lesoni: “O iko na luvequ,” ka a tukuna vakatolu. A sega mada ga ni cavuta rawa na yacai Mosese ke sega ni vakuria nio koya na Luvena.
Ia, ni sa biu duadua tu o Mosese, sa malumalumu sara baleta ni sa sega tale ni tiko ena mata ni Kalou. Qori na gauna sa lako mai kina o Setani me temaki koya. E rawa beka ni o raica na kena ivakarau? Na matai ni ka ea tukuna o Setani vei Mosese, “I Mosese, na luve ni tamatamo qaravi au.”
Ena ituvaki oqo, na kerekere nei Setani me qaravi koya e rairai veivagolei tani ga. E dua na veitemaki bibi vei Mosese ena gauna ni malumalumu oya me veilecayaki ka vakabauta ni o koya e “luve ni tamata,” walega ka sega ni luve ni Kalou.
“Ka sa yaco ni sa raici Setani yani ko Mosese ka kaya: Ko cei ko iko? Raica koi au oqo, e dua na luve ni Kalou; au sa tautauvata kei koya na nona Le Duabau ga.” E kalougata ni a sega ni veilecayaki o Mosese ka sega ni vakatara me vagolei koya tani. A sa vulica okoya na lesoni ni o cei dina o koya.
Na itukutuku tarava e kune ena Maciu 4. Era sa vakatoka oqo na kena dau vakavuli na “na tolu na veitemaki i Jisu,” me vaka ea temaki ga vakatolu na Turaga, ka sega ni dina na veika oqo.
E drau na qaloni iqi era sa vakayagataki me vakamacalataka na ibalebale kei na lewe ni veitemaki oqo. Nida kila, na iwase e tekivu ni vakamacalataki ni gole o Jisu kina lekutu, “Ia ni lolo ko koya e na siga e vasagavulu kei na bogi e vasagavulu, sa qai viakana.”
Na imatai ni veitemaki nei Setani ea rairai baleta walega me vakacegui na nona gagadre vakayago na Turaga. “Kaya mada me vuki mei buli madrai na veivatu oqo,” a bolea na iVakabula.
Ai karua ni veiveretaki e baleta na temaki ni Kalou: “Mo rika sobu: ni sa volai, ena vakarota na Nona agilose ko Koya e na vukumu.”
iOtioti, nai katolu ni veiveretaki nei Setani e vakaibalebaletaki ki na gagadre kei na lagilagi ni vuravura. Ni sa vakaraitaka oti vei Jisu na “matanitu kecega e vuravura, … [o Setani] a kaya vua, A ka kece oqori kau na solia vei iko, kevaka ko na cuva sobu ka vakarokoroko vei au.”
Na ka dina, na veitemaki levu nei Setani e sega beka ni baleta na tolu na veiveretaki oqori ka levu cake ena nona temaki o Jisu Karisito me vakataroga kina na Nona ituvaki vakalou. Ke lailai vakarua, na ibolebole ni veibeitaki e liu sebera ni veretaki mai vei Setani “Kevaka ko sa Luve ni Kalou”—kevaka o vakabauta dina, mo cakava oqo se oya.
Yalovinaka vakaraica na veika e yaco sebera ni gole o Jisu ki na lekutu me laki lolo ka masu: eda raica na itukutuku ni papitaiso ni Karisito. Ni sa cabe mai na wai o Koya, sa rogo e dua “na domo mai lomalagi”, ni sa kaya, Oqo na noqu Gone ni toko, au sa dauvinakata vakalevu.”
Eda raica beka na isema? E rawa beka ni da raica e dua na iwalewale matau?
Sa sega ni kurabuitaki ni veigauna kece eda vakavulici kina me baleta na noda ituvaki vakalou kei na icavacava, ena temaki keda na meca ni ivalavala dodonu kecega meda taroga tale.
Ena duidui sara na noda vakatulewa ke da kila vakavinaka se o cei dina o keda.
Eda bula tiko ena dua na vuravura dredre, e dua na vuravura sa tubu cake tikoga na yavavala, ka ra segata kina na tamata dokai me ra vakabibitaka na noda bula dokai vakatamata, nida lewena tiko e dua na Lotu ka ciqoma e dua na kosipeli ka laveta cake na noda rai ka sureti keda ki na veika vakalou.
Na ivakaro nei Jisu me “vinaka sara me vaka sa vinaka sara na [Tamada]” sa ivakaraitaki matata ni Nona nanamaki cecere kei na veika eda rawa ni cakava tawamudu. Ena sega ni yaco na ka oqo ena dua na bogi. Ena vosa nei Peresitedi Jeffrey R. Holland, ena yaco “vakamalua.” Ia na iyalayala ni kevaka keda “lako mai vei Karisito,” ka keda na “vakataucokotaki vua.” E gadreva vakalevu na cakacaka—sega ga ni dua na cakacaka, ia na cakacaka vakalou. Nona cakacaka!
Ia oqo, na tukutuku vinaka sai koya ni Tamada mai Lomalagi saraga e vakaraitaka ni, “Oqo na noqu cakacaka kei na noqu lagilagi—meu vakavuna na tawamate rawa kei na bula tawamudu ni tamata.”
Na veisureti ni Peresitedi Nelson meda “vakasama vakasilesitieli” e vakaibalebaletaka e dua na ivakananumi totoka ni noda ituvaki vakalou, itekitekivu, kei na vanua e rawa ni yacovi. Eda na rawa ga ni rawata na silesitieli ena isoro ni veivakaduavatataki i Jisu Karisito.
De dua beka ni oya na vuna e veretaki Jisu kina o Setani ena veitemaki vata ga mai na ivakatekivu kina otioti ni Nona veiqaravi e vuravura. A vola o Maciu ni gauna sa vakoti kina kauveilatai o Jisu, o ira era “lako voli, era sa vosavakacacataki koya, ka kaya, Kevaka ko sa Luve ni Kalou, mo kevu sobu mai na kauveilatai.” Me vakarokorokotaki na Kalou ni sega ni vakarorogo o Koya ia sa vakarautaka ga na sala m da ciqoma kina na veivakalougatataki kece vakasilesitieli.
Meda nanuma tiko, ni saumi e dua na isau levu me baleta na noda marau.
Au vakadinadinataka me vaka i Paula na iApositolo ni “a Yalo oqo sa tukuna mai kina yaloda, nida sa luve ni Kalou: ia kevaka eda sa gone, eda na qai taukei; eda na taukena na veika ni Kalou, eda sa taukei vata kei Karisito; kevaka eda sa vosota vata kaya na ca, eda na vakalougatataki vata kaya talega.” Ena yacai Jisu Karisito, emeni.