Na iVolanikalou Tabu—na Yavu ni Vakabauta
E sega ni rawa meda beca na bibi ni ivolanikalou tabu ena gauna ni saumaki mai kei na yalodina tiko ena kosipeli.
O au kei na watiqu, o Mary, keirau a raica e dua na siqeleti e droinitaki toka kina e dua na ivola kei na vosa oqo: “Books: The Original Handheld Device.”
Au vakasamataka sara na talei ni itukutuku oqo kei na kena bibi na veimataqali gacagaca sa tu oqo. Niu vakasamataka tiko, au raica ni yaya kece sa mai vakaiyaragitaki ena vuku vakalivaliva ena sega vakadua me ka bibi se kilai vakalevu me vakataka na veidusimaki vakayalo e tadu mai na ivakatakila vakalou.
Se tauri e ligada na iyaya vakalivaliva, na iVola Tabu kei na iVola i Momani: E Dua Tale na iVakadinadina kei Jisu Karisito e vakarautaka na veidusimaki vakayalo kei na veivakavulici maivei Jisu Karisito, na iVakabula kei vuravura Eda sa vakamareqeta na ivolarua oqo ni sa cecere na nodrau vola na veidusimaki ni Kalou vei ira na parofita makawa kei ira na tamata kei na veivakasalataki rau vakarautaka ki na noda dui bula.
Cokonaki vata kei na nodra veivakavulici na parofita bula, o irau na ivolanikalou tabu oqo e vakarautaka na veidusimaki vakaivunau vei keda e vuravura nikua. Na ivolanikalou oqo e kaukauwa sara ni rau veivakasalataki, veivakadodonutaki, veivakacegui kei na veikaroni kina tamata yadua kei na vuvale era vakasaqara na nona veidusimaki na Turaga.
Na ivolanikalou, ni cokonaki vata kei na veivakauqeti vakayalo ni Yalo Tabu, ena tomana tiko me ivurevure taumada e vakarautaka na nodra saumaki mai o ira era sa “yalo raramusumusu ka yalo bibivoro” ka gadreva me muri Jisu Karisito. Na ivolanikalou ena vukea me tarai cake na yavu ka na rawa me vorata na sasaga tikoga nei vunimeca me vakaluluqataka na vakabauta.
O ira na saumaki vou era vakalougatataka ka yavu bula ni Lotu ena veigauna taucoko ni Lotu. Dua na kena ivakaraitaki au dau vakamareqeta. Niu se qai bisopi vou ga, rau vakavulica tiko na goneyalewa daukaulotu na matavuvale nei William Edward Mussman. O tamadratou, e loya gugumatua, e daunivakasala raraba ni dua na kabani levu. Na watina yalodina, o Janet, a sasagataka ka vukea tiko na vuvale me ratou bula vakalevu ena “bula vaKarisito.”
Rau vakavulica talega na luvedrau tagane kei na yalewa, rau se qai yabaki 20 tiko. Ratou ciqoma na lesoni na le va oqo ka ratou lotu tiko. Rau vakamatatataka na goneyalewa daukaulotu me wiliki na iVola i Momani kei na masulaki na ivakadinadina baleta na ivolanikalou tabu. E ka talei, ratou sa qai masulaka ka wilika na iVola i Momani vakavuvale.
Oi rau na daukaulotu ni tabanalevu, e rau peresitedi talega e liu ni iSoqosoqo ni Veivukei, a tomani iratou ki na soqoni ni sakaramede.
Ni sa volekata tiko na vuvale na nodratou papitaiso, ratou a ciqoma e vuqa na ivola e vakacacana na Lotu. Oqo ni se bera na Initaneti, ia na veivola oqo a vakasinaita e dua na kateni levu.
Rau sureti au na sisita daukaulotu niu se qai bisopi kacivi vou yabaki 34 meu veivuke ena saumi taro. Ni keitou sa soqoni vata yani e loma ni vale, sa tu e loma ni vale na kateni ni tikidua era vakacacana na Lotu. Au masulaka tiko mai na ilesilesi oqo. Ena loma ni masu, a vosa vakamalua vei au na Yalotabu, “Sa kila oti tu o koya ni ka dina.” Oqo e bibi sara. Rau vakabauta na sisita ni vo ni matavuvale sa tu oti na nodratou ivakadinadina. Rau se sega ni vakadeitaki tamadratou tiko.
Au sa qai tukuna sara vei koya ni “Yalotabu sa vakauqeti au ni sa tu oti na nona ivakadinadina. E dina beka?” A raici au vagumatua ka kaya ni Yalotabu sa vakadeitaka vua ni dina na iVola i Momani kei na Lotu.
Au sa qai taroga ke na rawa beka me dikevilesu na veitikidua, ke sa vakadeitaki oti vakayalo vei iratou?
A sauma mai o tamadratou ni sega tale ni gadrevi me caka. Era a duavata na matavuvale ena isaunitaro.
A kaya mai ni dua tiko nona taro bibi: Dua na inaki ratou a ciqoma kina e levu na ivola e saqata na Lotu o ya ni ratou lewena tiko e dua tale na vakabauta. Me ikuri, a yalataka e dua na ilavo levu me vukea na tara ni valenilotu ni matalotu o ya A tukuna vei au nio rau na sisita daukaulotu a vakavulici koya ena bibi ni ikatini, ka a ciqoma ena marau, ia a vakasamataka de na cala beka me doka talega na yalayala a cakava e liu. Au a vakadeitaka vua ni nona sauma na yalayala o ya ena ka dokai ka dodonu.
Na vuvale na Mussman kei luvena tagane, vugodrau yalewa, kei na luvena yalewa.
E ratou a qai papitaiso taucoko na vuvale. Ni oti e dua na yabaki e ratou a laki vauci na vuvale ena Valetabu e California Oakland. Au kalougata niu tiko kina. A vakacavara o luvena tagane na vuli lawa, rawata na veitarogi ni California Bar, ka laki kaulotu yalodina sara ki Japani. Au sa sarava ena veiyabaki na nodra yalodina tiko ena kosipeli na itabatamata e muri. Au kalolugata meu qarava na nona vauci e dua na makubudrau yalewa.
Na saumaki mai sa yaco tiko ena noda siga nikua sa ka talei talega. Ena June sa oti a vosa o Coach Andy Reid, na dauveivakavulici ni futupolo ni Kansas City Chiefs, o au, kei na so tale me matataka na noda lotu kei na matalotu tale eso, ena dua na soqo ni veimatalotu ena Riverside Church e New York City. A vakamatatataka o Coach Reid na ikarua ni madigi kei na dolei ni veisureti kei na veigauna vinaka, ni oqo sara ga na usutu ni kosipeli i Jisu Karisito. Na mataka e tarava, keitou a gole vata kei na wati keirau, o Tammy Reid kei Mary, ki na soqoni ni sakaramede ena iKarua ni Tabanalevu o Manhattan. A dua na soqoni vakayalo. Era levu sara na saumaki vou ena ivavakoso. E lima na lewenilotu papitaiso vou, va na turaga ka dua na cauravou, a maliwai ira tiko na lewe ni Matabete i Eroni ena votai ni sakaramede. Au marau meu tukuna ni sa vakatalega oqo na kui yani ni lewenilotu vou ena loma taucoko ni Lotu.
Keimami sa vakavinavinaka ena kena laurai ni sa tubu na iwiliwili era vakaio kina veisureti tabu, veisautaka na nodra bula, ka ciqoma na madigi mera muri Jisu Karisito. Era sa curuma na salatu ni veiyalayalati ena vakabauta, veivutuni, papitaiso, ka vakadeitaki ni sa vakatavulici tiko ena iVola Tabu kei na iVola i Momani.
E sega ni rawa meda beca na bibi ni ivolanikalou tabu ena gauna ni saumaki mai kei na yalodina tiko ena kosipeli. Era kila na parofita makawa era tukuni tiko ena iVola i Momani na ilesilesi i Jisu Karisito ka vakatavulica na Nona kosipeli. E vukei keda na iVola i Momani meda toro voleka vua na Kalou nida vuli, kila vinaka, ka bulataka na kena ivakavuvuli. E kaya na Parofita o Josefa Simici “ni na toro voleka cake vua na Kalou e dua na tagane [se yalewa] ena nona bulataka na ivakavuvuli ni [ivola], mai na ivola tale eso.”
Me kilai na iVola i Momani ni sa vosa ni Kalou, ena gadrevi meda wilika, tugana, ka masulaka ka qai cakacakataka na kena ivakavuvuli. E yalataka na parofita Moronai ni na vakatakila vei keda na Kalou na dina ni ivola oqo ni da masuta ena yalodina, ena gagadre dina, ka vakabauti Jisu Karisito. Sa gadrevi sara me vulici na iVola i Momani me baleta na saumaki tudei.
Nida vakasamataka na nodrau veiwekani na iVola Tabu kei na iVola i Momani sa gacagaca e ligada, ena taroga beka e dua. Ena nomu nanuma ena yaga ka veicokonaki vakalevu na rua na ivola oqo kevaka me kaya na Turaga me rau sa “dua bau ga” ka “yaco kina me dua vata ga e ligamu”? Oqo na ka sa kaya oti na Turaga me baleta tiko nai “titoko i Juta,” na iVola Tabu, kei na “titoko i Josefa,” na iVola i Momani.
Ena vuqa na ituvaki bibi, e vakarautaka na iVola i Momani na veivunau bibi e laveta cake ka tarai cake ena iVola Tabu. Na ivunau ni Veisorovaki i Jisu Karisito sa ivakaraitaki bibi sara.
Na iVola Tabu e vakarautaka e dua na itukutuku dodonu me baleta na cakacaka e vuravura i Jisu Karisito, oka kina na Nona mate kei na Tucaketale. Na iVola i Momani sa vakamatatataka sara na Veisorovaki i Jisu Karisito, era vakamacalataka oqo vakamatailalai na parofita ni bera na Nona sucu.
Na ulutaga ki na Alama wase 42 e tukuna tiko na matata vakaivunau ni Veisorovaki i Jisu Karisito.
Sa gauna ni vakatovolei na bula ena vuravura oqo me rawa kina vua na tamata me veivutuni ka qarava na Kalou—Na Lutu e kauta mai na mate vakayago kei na mate vakayalo vei ira na tamata kecega—Sa yaco na veisereki ena vuku ni veivutuni—Sa veisorovaki na Kalou Vakaikoya ena vuku ni ivalavala ca ni vuravura—Sa baleti ira na veivutuni na loloma cecere—Ko ira kece na kena vo era sa vakatautaki ki na lewa dodonu ni Kalou—Sa yaco rawa na loloma cecere ena vuku ni veisorovaki—Ko ira walega na veivutuni vakaidina era na vakabulai.
E kaya kina o Peresitedi Russell M. Nelson: “Au yalataka ena nomuni vulica ena masumasu na iVola i Momani e na veisiga, oni na dau vakatulewa vinaka cake—e veisiga..” A yalataka talega ni kevaka “mo dromuci iko ena iVola i Momani e veisiga, sa rawa ni o cula ena itatarovi ni veika ca ni siga oya.”
Me vaka au sa vakamacalataka, au a taleitaka na vakasama ni imatai ni gacagaca e ligada—e dua na ivola. Ia, au sa kila na veika bibi cecere ni Initaneti e vuravura nikua. E dua na yaya veikauyaki eda taura nikua e rawa ni vakarautaka na itukutuku makawa sa vakasinaita na vei valenivolavola lelevu. Eda vakavinavinaka nida bula tiko ena gauna vakaoqo. Au vakavinavinaka vakatabakidua ni vakatara na vei ivola tabu kei na itukutuku ni Lotu me biu ena livaliva. Na initaneti e dua na iyaya ni cakacaka kaukauwa ni kena vulici na kosipeli. Nikua, e vuqa na tamata era wasea tiko na ivolanikalou vei ira na itokani ena vakayagataki ni tekinolaji. Me vakataka na app ni iVola i Momani, sa dua na sala totoka me vakatakilai vei ira na itokani na iVola i Momani ka rawa me wasei ga vakadodonu kei na sala vakayago eso evei ga na vanua o tiko kina.
Ni sa vakarautaka na Initaneti e vuqa na kalougata, e ka ni rarawa, me vaka na volai ni tikidua e vakacacana na Lotu au a kaya taumada, sa mai vakayagataki tale tikoga me vakavurea na vakatitiqa ka tabaka sobu na vakabauti ni ivakavuvuli mareqeti ni kosipeli. Sa rawa me tiki ni “butobuto ni siga oqo” a vakamacalataka o Peresitedi Nelson.
Na vunimeca kei ira era vukei koya, kila tiko se sega, era sa bulia ena Initaneti na vakatautauvata ni kateni sinai tu ena veivola volai e vakacacana na Lotu au a tukuna tiko e liu, e nakiti me kauti iko tani mai na dina ni Kalou.
Na veika sa tukuni tiko me vakavurea na vakatitiqa ena veiyabaki sa tautauvata vinaka sara ga. Oqo e dina vakabibi nio vakatauvatana siga nikua kina 1960, niu se qai yabaki 20.
Na ivolanikalou e vakavulica vei keda meda lewa vinaka ka vuku sara ena ka kecega. E rawa ni vakayagataki na Initaneti ena veika dodonu se ena sala veivakarusai.
O ira na lewenilotu makawa kei ira se qai vulica vou tiko na kosipeli e gadrevi me lomadra dina na veika era sarava. Mo kakua ni lasama na veika e tawa savasava, sega ni dina, se tawa dodonu. Kevaka o cakava, na ituvatuva oqo ena rawa me muataki iko sobu ki na sala e vakarusa na vakabauta ka vakatanitaka na nomu sasaga tawamudu. Sa rawa mo lewai mai ena dodonu se veiluluqataki. Vakasaqara na valavala dodonu ka lako tani mai na qara butobuto ena Initaneti kei na sarasara vakasivia. Vakasinaita nomu bula ena veika dodonu, vakasama vinaka, mo reki, ka marau ia gole tani mai na veika lialia. E tiko e dua na duidui. Na ika tinikatolu ni yavu ni vakabauta e idusidusi vinaka. Kena usutu, dromuci iko vakalevu ena iVola i Momani, ni kauta mai na Yalotabu ki na nomu bula ka vukea mo kila na dina mai na cala.
Sa noqu ivakasala kivei ira era sa rairai gole tani mai na salatu ni veiyalayalati mo ni lesu ki na ivolanikalou tabu, veidusimaki vakaparofita, na bula vakalotu e vale, kei na sere ni vakabauta Na yalo yadudua sa ka talei ena mata ni Turaga. Keimami gadrevi kemuni! Na Turaga e gadrevi iko, ka o gadrevi Koya! O sa na dau taleitaki tikoga. Ena gauna ni noqu veiqaravi dede ena Lotu au marautaki ira na tamata vinaka era lesu kina salatu ni veiyalayalati ka qarava ka vakalougatataki ira yadua era lomana se vei ira era sotava.
Na ivolanikalou tabu kei ira na parofita bula sa sala cecere e bulia na Tamada Vakalomalagi na Nona ituvatuva ni bula marau sa nodra na Luvena taucoko.
Au wasea na noqu ivakadinadina bula ni nona itutu tabu o Jisu Karisito ka dina na Nona Veisorovaki, ena yaca i Jisu Karisito, emeni.