Anij Ej Iakwe Aolep Ajri Ro Nejin
Jisōs Kraist ej kūr kōj aolep iien, im E ej kōjerbal kōj, ro Rikarejeran rejjab jenolo̧k, n̄an jipan̄ bōktok ajri ro Nejin n̄an E.
Ta eo Jemedwōj Ilan̄ ej kōņaan jen kwe? Komelele ke kwar bed ilo mour eo mokta, Jemedwōj Ilan̄ eaar kōpooje eok mokta jān am itok ñan laļ in? Ekōnono n̄an jodikdik ro, Būreejtōn Russell M. Nelson ekar, “Jemedwōj Ilan̄ eaar kōpooj elōn̄ iaan jetōb ro Nejin—bōlen … kumi eo An em̧m̧an tata—n̄an m̧ōttan in āliktata.” Kōnke kar kōpooj kōj n̄an raan kein āliktata, ekanooj aorōk n̄an kōj n̄an katak n̄an erom rikaļoor ro an Jisōs Kraist.
Irooj Jisōs Kraist ej juon Seperd Em̧m̧an, im E ejelā kajjeen sip ko An, im sip ko rejelā kajjeen Seperd eo aer kōnke “ej kūr sip ko an kōn etaer.” E ej kūr kōj aolep iien, im E ej kōjerbal kōj, ro Rikarejeran rejjab jenolo̧k, n̄an jipan̄ bōktok ajri ro Nejin n̄an E.
Juon iien emootļo̧k, juon stake bureejtōn im n̄a kar loļo̧k ro uwaan Kabun̄ in ilo juon jikin ijo jokwe ie. Ālkin an dedeļo̧k loļo̧k ko am̧ro kar jikejuuļi, stake būreejtōn eo ekar kajjitōk ippa eļan̄n̄e kōm maron̄ lo bar juon baam̧le. Ekar en̄jake im̧we bwe kōmij aikuj kōnono ippāer.
Kōm kar kōļaļļaļ ilo kōjām in m̧weo, im juon sister ar kōpelloke. Kōrā eo ej kaļimjōk eō, ak ejaje kar wōn n̄a, im ejjab lukkuun eltok. Ikar jitōn̄ļo̧k stake būreejtōn, eo ekar iak-iakwe liin kōn etan. Ilo iien eo wōt ekar ron̄ im loe, liin ekar lem̧ōņōņō. Jutak ijo ilo kōjām eo, raar jim̧or atbakwoj doon im jan̄ ippān doon. Menin ekar būlik m̧aan loļo̧k eo am. Kōm kar jab jeļā bwe sister in ekar chemo raan eo m̧oktaļo̧k. Liin ekar kanooj m̧ōjņo n̄an lale ļaddik eo erūtto nejin. Kōn mennin iaar jipan̄ stake bureejtōn eo kanuknuki ļaddik eo nejin, im kōm kar doore ilo wiiļjea eo an. Kōm kar najdiki m̧ōn̄ā eo me juon bar sister jān ward eo ekar bōktok m̧oktaļo̧k, im kōm kar jipan̄ kōn jerbal ko jet. M̧okta jān am kar ilo̧k jān m̧weo im̧weer, kōm kar maron̄ kōjeraam̧m̧an er.
Ke aolepān men kein raar pād ilo ļōmņak eo aō ilo iien loļo̧k in ekar juon kapen bwe Jisōs Kraist ej lukkuun iakwe er. E emeļeļe kōn er im jeļā kōn metak eo kōn jekjek eo aer ejej uwaan. Eitōn aolepen iien eo kōm ar lolok er ekar ilo ikōn̄. Ilo iien in kōm ar jab kōm̧m̧an juon iien jar laplap ak kwaļo̧k juon eoon em̧m̧an ippām, ak Irooj ar lukkuun lap an kōjeram̧m̧an kōm kōn Jetōb eo An.
Juon iaan un ko Jemām Ilan̄ ekar jilkintok eok n̄an ijin ilo iien in ej bwe kom̧in maron̄ kile aolepān aorōk eo ami. Kwalok Gospel eo Ao ej katakin kōj bwe āinwōt ro rikalooran Kraist, jej aikuj jab keidi kōj make n̄an bar juon. Maron̄ ko ami ilo jetōb ejej uwaer, an juon make, im uwaan, im Jemām Ilan̄ ekōņaan jipan̄ kom̧ kaddōkiļo̧k. Renaaj aolep iien erom juon eo kom̧ maron̄ jipan̄ en̄jake iakwe eo an Jemām Ilan̄. Aorōk eo am̧ ej aeboojoj. Ilo an lukkuun aorōk n̄an am̧ kōpooj eok make n̄an ļe ilo laļ in eļap aitwerōk, juon iaan mijen ko am̧ raorōk ilo aolepān mour eo am̧ ej n̄an erom juon rikaļoor an Jisōs Kraist im ļoor im̧we ko an Jetōb eo. Ilo am̧ naaj kōm̧m̧ane mennin, Anij enaaj kōjeram̧m̧an mour eo am̧; Enaaj kōjeraam̧m̧an baamle eo am̧ kiiō im jōkļaj; im Enaaj kōjeraam̧m̧an mour ko an ajri ro Nejin ro kwonaaj ioon er.
Jej mour ilo juon iien eļap iien em̧m̧an. Men̄e jej jelm̧ae elōn̄ men eppen ko, ijeļā rej pād n̄an kōtļo̧k ad jipan̄ ro jet en̄jake iakwe eo an Jemādwōj Ilan̄. Būreejtōn Nelson ar katakin, “Ilo raan kane rej itok, jenaaj lo kajoor eo eļap an Rilo̧mo̧o̧r me laļ in ejjan̄in kar loe.” Ewōr ippād jeraam̧m̧an eo n̄an mije armej ro me rej aikuj pein jipan̄, atbakwoj, juon en̄jake in kaenōm̧m̧an, ak n̄an kōj n̄an pād ippāer ilo ikōn̄. Eļan̄n̄e jemaron̄ jipan̄ kōmeraikļo̧k eddo ko aer, jekdo̧o̧n eļan̄n̄e wōt ilo juon iien, innām jenaaj maron̄ in lo waļo̧ktok eo eļap an kajoor eo an Rilo̧mo̧o̧r ilo mour ko aer.
Āinwōt rikaļoor ro an Jisōs Kraist, Armej ro Rekwojarjar ilo Raan Ko Āliktata remaron̄ kōm̧m̧ane juon oktak em̧m̧an ilo laļ in. Jemaron̄ leļo̧k juon en̄jake in lan̄lōn̄ eo me ej kwaļo̧k ilo paotok eo ad—juon lan̄lōn̄ eo me jemaron̄ kwaļo̧k kōn naan ko an iakwe im jerbal in jouj. Jen ro rūturin rem̧m̧an, jikin jerbal ko rem̧m̧an, rijerbal ro rem̧m̧an. Jen kajjieon̄ erom Rikūrijin em̧m̧an ilo aolep iien.
Emōj an Irooj kōjōplaaktok gospel eo An ippān kain̄i ko remenin aikuj bwe ajri ro nejin Jemādwōj Ilan̄ ren maron̄ bōk aolep kallim̧ur ko me rej lukōj kōj n̄an E. Kōn jipan̄ ro jeid im jatid ilo idajon̄jon̄ ko aer raan otemjeļo̧k, jen barāinwōt keememej n̄an jipan̄ er kōm̧m̧an im kōjparok kallim̧ur ko rekwojarjar ippān Jemāer Ilan̄ bwe E en maron̄ kōro̧o̧lļo̧k n̄an er kōjeraam̧m̧an ko reļļap n̄an mour in im indeeo. Kallim̧ur kein rej wōt kōm̧m̧an kōn Jepļaaktok eo an gospel eo an Jisōs Kraist im priesthood ki ko An.
Ilo bar jet naan, jemaron̄ jipan̄ ro jet pād ilo iaļ in bujen eo. Jet iaad jej jejļo̧k jān iaļ eo jān iien n̄an iien, im bwe jen maron̄ keememej bwe n̄an Jemādwōj Ilan̄ aolep iien ewōr ad maron̄ n̄an bar ro̧o̧lļo̧k. Jekdo̧o̧n eļan̄n̄e iaļ eo ad ejjab lukkuun weppān, Rilo̧mo̧o̧r eo ej aolep iien kakeememej kōj, “Jon̄an emmakijkij in [ad ukeļo̧k] im [kappukot] jeorļo̧k bōd, kōn jibadbad em̧ool, [naaj jeorļo̧k ad] bōd.”
Juon iaan jerbal ko an rikapo eo rainin ej n̄an kōm̧m̧an bwe jen ļōmņak im tōmak bwe ejjeļo̧k wāween n̄an kōj n̄an oktak ak bwe ejjeļo̧k ad kōjatdikdik. Ļōmņak in kakkure in ej kōm̧m̧an bwe elōn̄ iaad en bōjrak jān kajjieon̄. Im ej tōre eo in n̄e iakwe eo ad, naan in kōketak ko ad im rie, iien eo ad, im jipan̄ eo ad maron̄ leļo̧k n̄an juon ebwe kōjatdikdik n̄an bar kajjieon̄.
Bōlen kwoj ļōmņak, “Em̧m̧an, ak kiiō wōn ej jerbal in karejar n̄an n̄a?” Jān kōm̧m̧ane im kōjeraam̧m̧an mour ko an ro jeid im jatid, jenaaj ain naan in kam̧ool ko me renaaj kobrak mour ko ad kōn tōmak ilo Irooj Jisōs Kraist. Naan in kam̧ool kein renaaj bar door ilo kōj n̄an bar kajjieon̄ juon alen kōj make. Jetōb Kwojarjar eo enaaj kemour kōj im jipan̄ kōj kōn naan in kam̧ool ko rekāāl n̄an wōnm̧aanļo̧k kōn men ko reppen ad make im mālijjon̄ ko an juon make. Jabdewōt iien jej pukot n̄an kōjeraam̧m̧an mour ko an ro jet, Irooj ej likūt jouj iood em̧ool eļapļo̧k; E ej kōkajoor kōj im jipan̄ kōj ilo mour ko ad.
Jouj im keememej bwe Irooj Jisōs Kraist ej am̧ Rilo̧mo̧o̧r im emeļeļe kōn wōn kwe. E ejeļā ta eo ej menin aikuj n̄an kakūrm̧ool juon kūr im door men ko itulik n̄an jipan̄ ajri ro nejin Anij. Ewōr Ippān kajoor eo n̄an kōjeraam̧m̧an eok ilo aolep men, eļan̄n̄e kwoj tōmak ilo E im jab pere.
Ro jeiū im jatū, ilo raan eo n̄e juon ritōl an priesthood eo ekar en̄jake im̧we n̄an kōm n̄an loļo̧k juon m̧am̧a im juon ļaddik nejin me rekar jab pād ilo laajrak in loļo̧k eo am, ij kean̄ bwe Anij ekar jeļā bwe raar aikuji kōm. Im ilo jem̧ļo̧kin, ekar n̄a eo kar jerbal in karejar n̄an e. Ilo raan jab eo, ikar bōk juon iaan katak ko reļļap tata kōn iakwe eo an Rilo̧mo̧o̧r n̄an kōj.
Ij kam̧ool bwe Jisōs Kraist ej Rilo̧mo̧o̧r eo an laļ, bwe E emour, bwe E ekar mour im mej kōn kwe im n̄a, im bwe E ekar jerkakpeje n̄an kwe im n̄a bwe jen maron̄ tōlļo̧k n̄an bar koba ilo celestial obrak kōn lan̄lōn̄ ippān ro me repād kadede ilo rājet eo juon an rōn̄ōl eo. Ijeļā bwe eweppān An meļeļe kōn kwe im n̄a. E emeļeļe kōn iien ko reppen ad kajjojo, im ewōr Ippān kajoor eo n̄an jipan̄ kōj ilo iien ko n̄e jej en̄jake jedematmat tata. Ijelā bwe Irooj Jisōs Kraist im Jemādwōj Ilan̄ raar waļo̧k n̄an Josep Smith n̄an kōjepļaaktok gospel eo ilo raan kein. Ijeļā bwe rikanaan eo ad ejitōnbōro, Būreejtōn Russell M. Nelson, ej juon rikanaan an Irooj, im ij kam̧ool kōn men kein ilo etan Jisōs Kraist, amen.