Jeje Ko Rekwojarjar—rej Pedped in Tōmak
Jejjab maron̄ kōjekdo̧o̧n aorōk eo an jeje ko rekwojarjar jim̧or ilo oktak ko im ilo tiljek wōt ilo gospel eo.
Lio pāleō, Mary, im n̄a kiiō epaak kar lo juon jiiln̄ij kōn juon pija in juon bok im juon ennaan itum̧aani eo ej riit, “Books: The Original Handheld Device.”
Ikar ļōmņak kōn ennaan in ekaitoktok limo im ekōjkan an device ko likūt ilo bar in aolep kain kar erom aorōk. Kōn eļapļo̧k kejekļo̧kjeņ, ikar kile bwe jabdewōt device ko ak em̧ool juon eo epolel dkōn māletlet ko kōm̧m̧ani ejjamin naaj aorōk in wōt ak ļap in wōt tōl eo ilo jetōb me ej itok jān revelesōn kwojarjar.
Men̄e kōm̧m̧an in pā ak digital, Baibōļ eo Kwojarjar im Bok in Mormon: Bar Juon Kallim̧ur Kōn Jisōs Kraist rej letok tōl ilo jetōb im katak jān Jisōs Kraist, Rilo̧mo̧o̧r eo an laļ. Jej kaorōk bok kein kōn jerbal eo aer eaorōk n̄an je tōl eo an Anij n̄an rikanaan ro etto im armej ro im tōl eo rej letok n̄an mour ko ad make.
Kobaļo̧k ippān katak ko an rikanaan ro remour, jeje kein rekwojarjar rej letok tōl in katak eo n̄an kōj ilo laļin rainin. Jeje Kein Rekwojarjar relukkuun kajoor n̄e rej letok tōl, kipel, aenōm̧m̧an, im leļo̧k ineem̧m̧an n̄an kajjojo armej im baam̧le ko me rej pukot tōl jān Irooj.
Ilo jeje ko Rekwojarjar, koba ippān jetōbin im̧we jān Jetōb Kwojarjar, ej wōnm̧aanļo̧k wōt in un eo eļap tata me ej kapidodoik oktak eo an ro me ewōr aer bōro ko rerup im jetōb ko rettā im ikdeelel n̄an ļoor Jisōs Kraist. Jeje ko Rekwojarjar rej jipan̄ kalōk juon pedped me emaron̄ jutak pen ņae kijejeto ko rejjab bōjrak an rikapo eo n̄an kōm̧ōjņo̧ikļo̧k tōmak.
Rioktak ro rekāāl kar jeraam̧m̧an im reļakkar aorōk an Kabun̄ in ilo aolepān bwebwenato eo an. Juon waanjon̄ok eļap an aorōk n̄an n̄a. Ke ikar juon bisop edik, ruo sister mijenede ro rekabwilōn̄lōn̄ rekar katakin baam̧le eo an William Edward Mussaman. Baba eo, juon lawyer elukkuun ekkeke, kar eo eutiej tata aj juon corporation eļap. Lio pāleen, Janet, ekar jipan̄ baam̧ļe eo kajjieon̄ mour eļapļo̧k āinwōt mour āinwōt Kraist.
Ļaddik eo im leddik eo nejier, kar 20 jim̧a aer iiō, rekar barāinwōt ekkatak. Er jāān̄ emen aolep raar bōk katak ko im raar etal n̄an jar. Sister mijenede ro raar kōmejajaik n̄an riiti Bok in Mormon im jar kōn juon naan in kam̧ool kōn jeje ko rekwojarjar jab in. Ekabwilōn̄lōn̄, baam̧le eo ekar riiti aolepān Bok in Mormon ilo aer jar ilo juon iien ekadu.
Ward mijenede ro, erro jim̧ro raar būreejtōn n̄an Doulul eo an Kōrā ro an ward m̧oktakļo̧k, kar etal ippāerļo̧k n̄an kweilo̧k in kwojkwoj ko.
Ke ekar epaake an baam̧le in peptaij, raar bōk juon bo̧o̧k peba in ko rej kōnanaik Kabun̄. Menin ekar waļo̧k m̧okta ilo intōrnet, bōtaab peba ko rekar kobrak bo̧o̧k eo.
Sister mjenede ro rekar kajjitōk ippa āinwōt juon bisop 34 an iiō eo ejjab to kar kūri n̄an jipan̄ uwaaki kajjitōk ko rekar waļo̧k. Ke kōm kar kukļo̧k ilo ettōņaak eo aer, bo̧o̧k kileplep in kōn bok in kōnanaik Kabun̄ in ekar pād io̧lepen ruum̧ eo. Ikar jar kōn ijjitōn̄ in. Ilo iien jar in kōppeļļo̧k eo, Jetōb ekar unoojdikdik n̄an eō, “E ejejļā kadede bwe em̧ool.” Menin ekar aorōk. Sister ro raar tōmak bwe ewōr kadede an baam̧le in naan in kamool. Raar jab jeļā kōn eo jemeer.
Ekar m̧ōkaj aō jiron̄ ļeo bwe “Jetōb ekar im̧we eō bwe ewōr kadede an juon naan in kam̧ool. “Ekar ke m̧ool?” Ekar kalimjōk eō im ba bwe Jetōb ekar kapene m̧ool eo kōn Bok in Mormon im Kabun̄ eo n̄an e.
Innām ikar kajjitōk n̄e enaaj menin aikuj n̄an etale bok jiddik ko, eļan̄n̄e ewōr kadede juon an kam̧ool jen jetōb.
Baba in ekar uwaak bwe ejjab menin aikuj. Aolepān baam̧ļe rekar errā kōn uwaak eo an.
Ekar ba ewōr juon an kajjitōk eaorōk: Juon un raar bōk elōn̄ peba ko rej kōnanaik Kabun̄ in ej bwe raar pād ilo bar juon kabun̄. N̄an kakkobaba, ekar wōr juon an kallim̧ur bwe enaaj kar lelo̧k juon oran jāān eļap n̄an kalōk juon m̧ōn jar an kabun̄ eo. Ekar karon̄ eō bwe sister mijenede ro raar katakin e kōn aorōk eo an juon m̧ōttan jon̄oul, eo ekar kam̧oolol ilo an bōke, ak ekar ļōmņak eļan̄n̄e kar bōd n̄an barāinwōt ļoor kallim̧ur eo ekar kōm̧m̧ane m̧oktaļo̧k. Ikar jiron̄ e bwe kōļļāik kallim̧ur eo enaaj kar jim̧or menin utiej im jetjet.
Mussman baam̧le ippān ļaddik eo nejier, leddik eo ippān ļaddik eo nejier, im leddik eo nejier.
Aolepān baam̧le eo rekar peptaij. Juon iiō tokālik raar liāp āinwōt juon baam̧le ilo Oakland Oakland Tampeļ. Ikar jeraam̧m̧an n̄an pād. Ļaddik eo nejier ekar kadedeļo̧k jikuuļ in law, kar pāāje California Bar Exam eo, im ejjab to ekar jerbale juon mijen ilo Japan. Ikar mije ilo iiō ko ke ekar diktak in epepen ko kar tokālik kar pād wōt ilo tiljek n̄an gospel in. Ikar jeraam̧m̧an n̄an kōm̧m̧ane liāp eo an juon iaan leddik ro jibwier.
Oktak ko me rej waļo̧k ilo tōre in ad rekabwilōn̄lōn̄. Juun eo ļo̧k Coach Andy Reid, head football coach eo an Kansas City Chiefs, im n̄a, ippān bar jet jutak ilo etan kabun̄ in ad im kabun̄ ko jet, kar kōnono ilo juon m̧akūtkūt an elōn̄ kabun̄ ko ilo Riverside Church ilo New York City. Coach Reid ekar kōmejajaik bar juon iien ko im uwaaki kūr ko im iien ko rem̧m̧an, eo ej ta eo gospel eo an Jisōs Kraist ej kake. Jibbon̄ōn eo tok juon, ippān lim̧aro pāleem, Tammy Reid im Mary, kōm kar pād ilo kweilo̧k in kwojkwoj eo ilo Manhattan Second Ward. Ekar juon iien kabun̄ ejetōbtōb. Ekar elōn̄ riooktak ro rekāāl ilo jarlepju eo. Ļalem membōr ro rej kab peptaij, emān em̧m̧aan im juon likao, raar ibwilijin ro uwaan Priesthood eo an Aron rej letok letak kwojkwoj eo. Ij m̧ōņōņō in riboot bwe juon ejja jekjek in ekilep an membōr kāāl ro ej kōm̧m̧an ilo aolepān Kabun̄ in.
Jej kam̧m̧oolol kōn ļapļo̧k in kile ilo ro me rej uwaake kūr ko rekwojarjar, ukōt mour ko aer, im bōk iien eo em̧m̧an n̄an ļoor Jisōs Kraist. Rej deļo̧n̄e iaļ in bujen eo kōn tōmak, ukweļo̧k, peptaij, im kapene āinwōt kar katakin ilo Baibōļ Kwojarjar eo im Bok in Mormon.
Jejjab maron̄ atowaane aorōk eo an jeje ko rekwojarjar jim̧or ilo oktak ko im ilo tiljek wōt ilo gospel eo. Rikanaan ro etto raar kōmeļeļeik ilo Bok in Mormon kar jeļā kōn mijen eo an Jisōs Kraist im kar katakin gospel eo An. Bok in Mormon ej jipan̄ kōj epaakeļo̧k Anij ilo ad katak, meļeļe, im kōjerbal katak ko an. Rikanaan Josep Smith ekar katakin “Juon em̧m̧aan [ak kōrā] enaaj epaakeļo̧k Anij kōn mour kōn katak ko an [bok eo], jān jabdewōt bar bok.”
N̄an jeļā bwe Bok in Mormon eo ej naan an Anij, jej aikuj riiti, kejekļo̧kjeņ, im jar kake innām jerbal ekkar n̄an katak ko an. Rikanaan Moronai ekar kallim̧ur bwe Anij enaaj kwaļo̧k m̧ool eo an bok eo n̄an kōj ilo ad jar kōn juon bōro em̧ool, kōn lukkuun kōttōpar, im kōn tōmak ilo Kraist. Ekkatak Bok in Mormon ej aorōk n̄an oktak indeeo.
Ilo ad kōļmānļo̧kjeņ kōn kadkad eo ikōtaan Baibōļ eo im Bok in Momon āinwōt keidi n̄an handheld device ko, juon emaron̄ kajjitōk juon kajjitōk. Ewi tokjān im aorōkin n̄an am̧ ļōmņak kōn ruo bok ko naaj eļan̄n̄e Irooj ekar ba renaaj kobaik erreo im “erom juon ilo peim”? Bwe ej ta eo Irooj ekar kean̄ ikkijen “aļaļ an Juda,” Baibōļ eo, im “aļaļ an Josep,” Bok in Mormon.
Ilo elōn̄ ļamļam ko raorōk, Bok in Mormon eo ej letok pedped in katak ko m̧oktata me rej kōkōm̧anm̧an im kalōk ioon Baibōļ eo. Katak eo an Pinmuur eo an Jisōs Kraist ej juon waanjon̄ok em̧wilaļ.
Baibōļ eo ej leotk juon bwebwenato ejim̧we kōn jerbal in karejar eo an Jisōs Kraist ilo mour in, ekoba mej im Jerkakpeje eo An. Bok in Mormon eļapļo̧k an alikkar an kōmeļeļeik kōn Pinmuur eo an Jisōs Kraist, jet iien rikanaan ro raar kōmeļeļeik ilo tipdik in m̧okta jān ļotak eo An.
Taitōļ eo n̄an Alma jebta 42 ej kwaļo̧k aorōk in katak eo an Pinmuur eo an Jisōs Kraist.
Ej riit: “Mour in ej iien mālejjon̄ n̄an kōm̧m̧an bwe armej ren ukeļo̧k im jerbal n̄an Anij—Wōtlo̧k eo eaar bōktok mej ilo kanniōk im mej ilo jetōb ioon armej otemjeļo̧k—Lo̧mo̧o̧r ej itok kōn ukeļo̧k—Anij Make ej pinmuur kōn jero̧wiwi ko an laļ—Tūriam̧okake ej n̄an ro rej ukeļo̧k—Aolep ro jet renaaj jelm̧ae ekajet an Anij—Tūriam̧okake ej itok kōn Pinmuur eo—Ro wōt rem̧ool ilo ukeļo̧k rej mour.”
Būreejtōn Russell M. Nelson ekar ba, “Ij kallim̧ur bwe ilo ami lukkuun ekkatak Bok in Mormon eo aolep raan, kwonaaj kōm̧m̧ani kālet ko rem̧m̧an—aolep raan.” Ekar barāinwōt kallim̧ur bwe eļan̄n̄e “kom̧wij leļo̧k kom̧ make aolep raan n̄an Bok in Mormon eo, kom̧ maron̄ lo kōjparok ņae men ko renana an raan kein.”
Āinwōt aō kar ba, ikar bwilōn̄ kōn katak eo kōn the concept of the original handheld device—a book. Mekarta, ij kile aorōk eo ekabwilōn̄lōn̄ an intōrnet ilo laļ rainin. Juon handheld device raan kein emaron̄ letok meļeļe eo me ilo etto ekar kobrak juon ļaiprāre eļap. Jej kam̧m̧oolol n̄an mour ilo juon tōre āinwōt in. Eļaptata ij kam̧m̧oolol bwe ej kōtļo̧k bwe bok ko rekwojarjar im bok in kein katakin ko an Kabun̄ ren pād ilo digital. Intōrnet ej juon kein jerbal ekajoor n̄an ekkatak gospel in. Rainin, elōn̄ armej rej kwaļo̧k eoon ko ippān ro m̧ōttaer kōjerbal technology. Ilo Bok in Mormon app eo, n̄an waanjon̄ok, ej juon wāween aiboojoj n̄an kwaļo̧k n̄an ro m̧ōttad Bok in Mormon eo im emaron̄ pidodo n̄an kwaļo̧ke ilo wāween ko iminene kaki im remake jabdewōt iien kwomaron̄.
Ilo an intōrnet kwaļo̧k elōn̄ kōjeraam̧m̧an ko, ejerata, āinwōt bok jiddik ko kar kōnanaik Kabun̄ in ikar kōmeļeļeik im̧aanļo̧k, ekar barāinwōt kōn kōjerbale n̄an ejake pere im kōm̧ōjņo̧ikļo̧k tōmak ilo pedped in katak ko an gospel eo raorōk. Emaron̄ in m̧ōttan “nana ko an raan kein” me Būreejtōn Nelson ekar ba.
Rikapo eo im ro rej jipan̄ e, jeļā ak jab jeļā, kar ejake ilo intōrnet eo ainwōt peba ko kar je kōraate Kabun̄ in ikar ba im̧aanļo̧k, kar jibadbad n̄an bōkļo̧k eo jān m̧ool eo an Anij.
Jorrāān ko kar jarjar n̄an ejake pere ilo an iien kar eļļā kar lukkuun eier wōt. Menin ekar m̧ool eļap tata n̄e kwoj keidik tōre in ad ippān 1960 ko, ke ikar 20 jim̧a.
Jeje ko rekwojarjar rej katakin kōj n̄an kōjerbal ekajet im māletlet ilo aolep men otemjeļo̧k. Intōrnet maron̄ kōjerblae ilo juon wāween em̧m̧an ak juon wāween ekakkure.
Membōr ro jim̧or eto aer ekkatak im ro rej kab ekkatak gospel eo aikuj in ļōmņak kōn ta eo rej lale. Jab ļōmņak in lale men ko renana, rejjab m̧oo, ak jab jim̧we. Eļan̄n̄e kwoj kōm̧m̧ane, algorithm ko remaron̄ tōlļo̧k eok n̄an juon iaļ me ej kakkure tōmak im kōm̧ōjņoik eddōkļo̧k indeeo eo am̧. Kwomaron̄ kipel n̄an kōm̧m̧an em̧m̧an ak nana. Pukot jim̧we im joļo̧k men ko ejjeļo̧k tokjāer ilo intōrnet im joļo̧k iien lali men ko ejej tokājer. Kobrak mour eo am̧ kōn aitia ko rem̧m̧an, rejim̧we; lan̄lōn̄; limo bōtaab joļo̧k men ko rōbwebwe. Ewōr juon oktak. Ilo laajrak in tōmak ko jon̄ouljilu ej juon unin tōl ekabwilōn̄lōn̄. Ilōn̄ in aolep, lukkuun ajeļo̧k eok make iien otemjej ilo Bok in Mormon, eo enaaj kan̄ōltok Jetōb eo n̄an mour eo am̧ im jipan̄ eok kile m̧ool eo jān bōd eo.
Kapilōk eo aō n̄an ro me raar ilo jabdewōt wāween raar irļo̧k jān iaļ in bujen eo ej n̄an bar ro̧o̧lļo̧k n̄an jeje ko rekwojarjar, tōl an rikanaan, niknik mour kōn pedped an gospel eo ilo m̧we, im al in tōmak. Aolep jetōb ej aorōk n̄an Irooj. Kōmij aikuji eok! Irooj ej aikuji eok, im kwoj aikuji E! Kwonaaj aolep iien ruwainene. Ilo iiō lōn̄lōn̄ ko in aō jerbal ilo Kabun̄ in, ikar kaorōk armej ro rōm̧m̧an me raar bar ro̧o̧lto n̄an iaļ in bujen eo innām kar jerbal im kōjeraam̧m̧an aolep ro raar iakwe ak ro raar iioon er.
Jeje ko rekwojarjar im rikanaan ro remour rej juon wāween eļap Jemedwōj Ilan̄ eo iakwe ej kōm̧m̧ane bwe en pād karōk in m̧ōņōņō eo An n̄an aolep ro Nejin.
Ij kwaļo̧k aō kam̧ool epen kōn kwojarjar eo an Jisōs Kraist im lukkuun eo an Pinmuur eo An, ilo etan Jisōs Kraist, amen.