Mour in Kanniōk Ej Jerbal!
Mekarta apan̄ ko jej jelm̧ai, Jemedwōj Ilan̄ eo ej iakwe ekar kōm̧m̧ane karōk in m̧ōņōņō eo bwe jen jab likjab.
Ium̧win jejjo iiō ko kar kappeik eō n̄an loļo̧k juon kōrā erūtto ilo ward eo aō. Kōrā in ekar jab pidodo mour eo an. Ekkar lōn̄ an nan̄inmej ko im ar en̄taan kōn metak aolepān mour eo an itok jān juon jorrāān ke ekar dik ilo juon jikin ikkure an ajri. Ekar jepel ke ej 32 an iiō kōn emen ajri ro n̄an lale im kake n̄an er, kōrā in ekar bar m̧are ke ekar 50. Ļeo ippān kein karruo ar mej ke kōrā in ekar 66 an iiō, im sister in ekar mour bar 26 iiō ko āinwōt lio emej pāleen.
Mekarta apan̄ ko ilo aolepān mour eo an, kōrā in ekar tiljek n̄an bujen ko an n̄an jemļo̧kin. Sister in ekar juon eo eitok limo in ilo menmenbwij, juon rital n̄an tampel, im juon eo ej aiin bwebwenato ko an baam̧le. Men̄e kōrā in ekar wōr an mālijjon̄ ko reppen, im kōn ejjeļo̧k kajjitōk kōrā in ilo iien ko kar en̄jake būrom̧ōj im ajimakeke, ekar kalimomo paotokin im ettā im em̧m̧an m̧antin.
Ruatimjuon allōn̄ ālkin an kar kōrā eo jako, juon iaan ļaddik ro nejin ekar wōr juon an en̄jake ekabwilōn̄lōn̄ ilo tampeļ. Ekar katak kōn kajoor eo an Jetōb Kwojarjar bwe ekar wōr juon an jinen ennaan n̄an e. Kōrā in ar kōnono ippān, bōtaab ejjab kōn visōn ak naan ko maron̄ ron̄. Ennaan in ekar itok n̄an ļōmņak eo an ļeo nejin jān jinen: “Ikōnaan bwe kwon jelā bwe mour in kanniōk ej jerbal, im ikōņaan bwe kwoj jeļā bwe ij meļeļe kiiō etke aolep men raar waļok [ilo mour eo aō] ilo wāween eo ekar waļo̧k—im aolep men REM̧M̧AN.”
Ennaan in eļap an lukkuun kabwilōn̄lōn̄ n̄e juon ej ļōmņak kōn jekjek eo an im men ko reppen sister in ekar dibuki im anjo̧ ioer.
Ro jeiū im jatū, mour in kanniōk ej jerbal! Em̧ōj kar kōm̧m̧ane bwe en jerbal! Mekarta apan̄ ko, metak bōro ko, im men ko repen jej jelm̧ai, Jemedwōj Ilan̄ eo ej iakwe, emeletlet im weeppān ekar kōm̧m̧ane karōk in m̧ōņōņō eo bwe jen jab likjab. Karōk eo An ej letok juon iaļ n̄an kōj n̄an ļōn̄jak ioon likjab ko ad ilo mour in. Irooj ekar ba, “En̄in ej jerbal eo Aō—n̄an kakūrm̧ool jab wabanban im mour indeeo an armej.”
Mekarta, eļan̄n̄e jenaaj kar bōk leen ro an “jerbal im … aebojooj” eo an Irooj, jekdo̧o̧n “wabanban im mour indeeo,” jej aikuj in kōtemen n̄an kar jikuuļ im katakin, im n̄an dibuk mālijjon̄ ko im apan̄ ko n̄an karreoik kajjojo—jet iien n̄an jon̄an maron̄ ko ad. N̄an kanooj kijoon jorrāān ko, apan̄ ko, im men ko reppen an laļ in ej n̄an maron̄ joļo̧k jekjek eo me ej ilo m̧ool aorōk n̄an an mour in kanniōk eo jerbal.
Im kōn menin jejjab aikuj ilbōk n̄e iien ko reppen rej itok iood. Jenaaj ioon jekjek ko me rej idajon̄jon̄e kōj im armej ro me rej kōtļo̧k bwe jen kamineneik iakwe eo em̧ool im kijenmej. Bōtaab jej aikuj dim ilo jekjek ko ad reppen im keememej, āinwōt an Irooj kar ba:
“Im jabdewōt eo ej likūt mour eo an ilo jibadbad eo Aō, kōn Eta, enaaj bar lo e, em̧ool mour indeeo.
“Kōn menin, jab mijak rikōjdat ro ami [ak jorren ko, apan̄ ko, ak mālijon̄ ko an mour in], bwe Iaar jeke ilo Buruō … , Irooj ej ba, bwe Inaaj idajon̄jon̄e kom̧ ilo men otemjej, elan̄n̄e kom̧ naaj pād wōt ilo bujen eo aō … bwe maron̄ lo kom̧ ritōllo̧ke.”
N̄e jej en̄jake abņōņō ak kijerjer ko ad kōn inepata ko ak en̄jake eo me jemaron̄ bōke eļapļo̧k jān ijo ad an men ko reppen an mour, jemaron̄ keememej ta eo Irooj ekar ba n̄an ro nejin Israel:
“Im keememej aolepen iaļ [ko] Jeova am̧ Anij ear tōl eok ie ium̧win iiō kein 40 ilo āne jem̧ade, bwe En kōttāik eok im mālejjon̄ eok, bwe En jeļā ta eo ilo būruom̧, eļan̄n̄e kwō naaj pokake kien ko, ke jab.”
Ke Liai ar katakin ļaddik eo nejin Jekab:
“Kwaar en̄taan elōn̄ kaen̄tanaan ko im eļap kabbūrom̧ōjm̧ōj. … Mekarta, … [Anij] Enaaj ukōti en̄taan ko am̧ n̄an am̧ ļapļo̧k. … Kōn menin, ijelā ke emōj lo̧mo̧o̧ren eok, kōn wānōk an am̧ Ripinmuur.”
Kōnke mour in ej juon jikin melijjon̄ im “inepata ko im apan̄ ko rej pād n̄an kamijak n̄an kakkure aenōm̧m̧an eo ad,” elukkuun jipan̄ n̄an keememej kapilōk in im kallim̧ur in loe ilo Mosiah 23 ej iookļo̧k idajon̄jon̄ ko an mour: “Mekarta—jabdewōt eo ej likūt an lōke ilo [Irooj] ejja in wōt naaj kotak e ilo raan eo āliktata.”
Āinwōt juon jodikdik, n̄a make ikar en̄jake eļap en̄jake in metak im kajookok me ekar itok āinwōt juon tōprak in m̧akūtkūt ko rejjab jim̧we an ro jet, eo ekar ium̧win elōn̄ iiō ko kar jelet aorōk eo aō im en̄jake in wōr tokjān eo im̧aan Irooj. Mekarta, ikar kwaļo̧k aō make kam̧ool bwe Irooj emaron̄ kōkajoorļo̧k kōj im kotak kōj ilo jabdewōt men ko reppen kar kūr kōj n̄ane n̄an jelm̧ae ilo iaļ eo ad ilo mour in epen im apan̄.
Jejelā kōn iminene eo an Paul:
“Im bwe in jab juwalōn̄lōn̄ kōn an kanooj ļap revelesōn n̄an eō [eo ikar bōk], emōj letok n̄an eō kālōklōk ilo kanniōkō, juon rū jelōkan Setan bwe en kaen̄tan eō, bwe in jab juwaļōn̄ļōn̄.
“Iar akweļap n̄an Irooj kōn men in alen jilu, bwe en jako jān eō.
“Im em̧ōj An ba n̄an eō, Aō jouj e bwe n̄an eok: bwe Aō kajoor e weeppānļo̧k ilo m̧ōjņo̧. Innām inaaj kanooj m̧ōņōņō in kōmmejāje kōn m̧ōjņo̧ ko aō, bwe kajoor an Kraist en pād ioō.”
Jejjab jelā ta “kālōklōk ilo kanniōk” eo me ekkar an Paul. Ekar kāālet n̄an jab kōmeļeļeik eļan̄n̄e ekar juon nan̄inmej ilo ānbwin, juon m̧ōjņo̧ ilo kōmālij ak en̄jake, ak juon kapo. Bōtaab jej aikuj in jeļā tipdik in n̄an jeļā bwe ekar kakkōt im akweļap ippān Irooj kōn jipan̄ im bwe, ilo jem̧ļo̧kin, kajoor eo an Irooj im maron̄ eo rej ta eo ekar jipan̄ e ilo iien eo.
Āinwōt an kar n̄an Paul, ekar kōn jipan̄ eo an Irooj me ikar ilo jem̧ļo̧kin kar kōkajoorļo̧k eō ilo en̄jake im ilo jetōb im āliktata kar kile ālkin elōn̄ iiō ko me ikar aolep iien armej eo aorōk im wōr tokjān n̄an kōjeraam̧m̧an ko an gospel eo. Rilo̧mo̧o̧r eo ekar jipan̄ eō anjo̧ ioon en̄jake ko aō an jab erreo im n̄an letok juon jeorļo̧k bōd em̧ool n̄an rikakkur eo. Āliktata ikar meļeļe bwe Pinmuur eo an Rilo̧mo̧o̧r eo ekar juon menin letok an juon make n̄an n̄a im bwe Jema Ilan̄ im Nejin eweppān aer iakwe eō. Kōnke kōn Pinmuur eo an Rilo̧mo̧o̧r eo, mour in kanniōk ej jerbal.
Āliktata ke ikar jeraam̧m̧an n̄an kile ekōjkan an Rilo̧mo̧o̧r eo kar lo̧mo̧o̧rān eō im kar jutak ituriu ilo aolep en̄jake ko, ealikkar aō meļeļe bwe jekjek eo ejerata an iiō in jodikdik ko aō ekar iaļ eo aō make im jeļā eo, jokāālet eo me im āliktata tōprak eo jab maron̄ kōtmene n̄an ro me raar en̄taan im wōnm̧aanļo̧k wōt in en̄taan jān m̧wil jab jim̧we eo an ro jet.
Ij kile bwe en̄jake ko an mour in—rem̧m̧an im nana—maron̄ katakin kōj katak ko raorōk. Kiiō ijeļā im ij kwaļo̧k naan in kam̧ool bwe mour in kanniōk ej jerbal! Ij kōjatdikdik bwe āinwōt juon tōprak in aolep men ko ekar dibuki ilo mour eo aō—em̧m̧an im nana—ewōr aō tūruiam̧o n̄an ro ejjeļo̧k ruier an kōm̧m̧an ko an ro jet im meļeļe n̄an ejjab em̧m̧an kōm̧m̧an n̄an er.
Ij lukkuun kōjatdikdik bwe āinwōt juon tōprak in en̄jake ko ilo mour eo aō—em̧m̧an im nana—ij jouj ļo̧k n̄an ro jet, kōm̧m̧an n̄an ro jet āinwōt n̄e Rilo̧mo̧o̧r eo en kar, im ļapļo̧k meļeļe n̄an rijerawiwi eo im edipio aō m̧ool. Ilo ad pedped ioon jouj eo an Rilo̧mo̧o̧r eo im kōjparok bujen ko ad, jemaron̄ jerbal āinwōt waanjon̄ok ko an jelet ko reļlapļo̧k an Pinmuur eo an Rilo̧mo̧o̧r.
Ij kiiō kwaļo̧k waanjon̄ok eo āliktata me mour in kanniōk ej jerbal.
Aunty eo an Elder Hales. Lois VandenBosch, im jinen, Klea VandenBosch.
Ekar jab pidodo iaļ eo an jinō ilo aolepān mour in. Liin ekar bōk ejjeļo̧k mennin nebar ko ak utiej ko an laļ im ekar jab lōn̄ an iien rem̧m̧an ilo jikin jikuuļ ko rōutiejļo̧k jān high school. Kōra eo ekar bōk nan̄inmej in boļio, aolepān mour eo an ekar metak im abņōņō ne eo tuanmiin̄. Ke ekar rūtto, liin ekar iioon elōn̄ men ko reppen im apan̄ in ānbwin im jekjek ko kōn jāān bōtaab ekar tiljek n̄an bujen ko an im kar iakwe Irooj.
Ke jinō ekar 55 an iiō, leddik eo erūtto jān n̄a ekar jako, likūt juon nin̄n̄in leddik ruwalitōk an allōn̄, eo nej neju, ejeļo̧k jinen. Kōn elōn̄ un ko, jinō ekar ļap wōt an lale leddik eo nej neju ium̧win 17 iiō ko, emakijkij an ilo jekjek ko relukkuun in apan̄. Aaet, mekarta en̄jake kein, kōrā in ekar m̧ōņōņō im kōņaan lale baam̧ļe eo an, ro rūturin, im ro uwaan ward eo im kar jerbal āinwōt juon rijerbal in kain̄i ilo tampeļ ium̧win elōn̄ iiō ko. Ilo iiō ko jejjo āliktata in mour eo an, jinō ekar en̄taan jān juon jekjek in dementia, eo ekar kōmakijkij an tarpok, im ekar dāpij wōt ilo im̧ōn lale rūtto ro. Būromōj, ak kōrā in ekar make iaan ke ekar mej ilo jab kōtmene.
Jejjo allōn̄ ālkin jako eo an, ekar wōr juon aō ettōņak iban meļo̧kļo̧ke. Ilo ettōņak in aō, ikar jijet ilo opiij eo aō ilo Church Administration Building eo. Jinō ekar deļo̧n̄tok ilo opiij eo. Ikar jeļā kōrā in ekar itok jān laļ eo an jetōb. Inaaj aolep iien keememej en̄jake ko kar aō. Ekar jab ba jabdewōt men, bōtaab aiboojoj in jetōb eo an ekar romaak jon̄an ikar jan̄in loe m̧o̧kta im epen aō kōmeļeļeik.
Paotokin im an raar ilo m̧ool aiboojoj! Ij keememej aō ba n̄an e, “Jinō, kolukkuun aiboojoj!,” kōnono kōn kajoor in jetōb eo im aiboojoj eo an. Kōrā in ekar kile eō—bar juon alen jab kōnono. Ikar en̄jake iakwe eo an n̄an n̄a, innām ikar jeļā bwe kōrā in ej m̧ōņōņō im kar mour jān en̄taan ko an an mour in im apan̄ ko im kijooror ilo an kōttar “jerkakpeje eo ewōj.” Ijeļā bwe n̄an jinō, mour in kanniōk ekar jerbal—im bwe ej bar jerbal n̄an kōj.
Jerbal im aiboojoj eo An Anij ej n̄an kakūrm̧ool jab wabanban im mour indeeo an armej. En̄jake ko an mour in rej m̧ōttan iaļ eo me ej kōtļo̧k bwe jen eddōkļo̧k im wōnm̧aanļo̧k n̄an mour jab wabanban eo im mour indeeo eo. Kar jab jilkintok kōj n̄an likjab bōtaab n̄an ļe ilo karōk eo an Anij n̄an kōj.
Ilo an Kiin̄ Benjamin kar katakin: “Im eļapļo̧k, ikōņaan bwe kom̧in ļōmņak kōn jekjek eo ejeraam̧m̧an im ekōm̧ōņōņō an ro raar kōjparok kien ko an Anij. Bwe lo, rej jeraam̧m̧an ilo aolep men ko otemjeļo̧k, jim̧or ilo kanniōk im jetōb; im eļan̄n̄e renaaj dāpdep wōt ilo niknik n̄an jem̧ļo̧kin naaj bōk er ilo lan̄, bwe ren maron̄ jokwe ippān Anij ilo wāween m̧ōņōņō eo ejjeļo̧k jem̧ļo̧kin.” Ilo naan ko jet, mour in kanniōk ej jerbal!
Ij kam̧ool bwe ilo ad bōk kain̄i ko an gospel eo, deļo̧n̄ ilo bujen ko ippān Anij innām kōjparok bujen ko, ukwelo̧k, jerbal n̄an ro jet, im niknik n̄an jem̧ļo̧kin , jej maron̄ bar bōk jeļā im lōke eo edipio ilo Irooj bwe mour in kanniōk ej jerbal! Ij kam̧ool kōn Jisōs Kraist im bwe aiboojoj eo ad jekļaj ippān Jemādwōj Ilan̄ kar kapidodoik kōn jouj im Pinmuur eo an Rilo̧mo̧o̧r. Ilo etan Jisōs Kraist, amen.