Irooj Jisōs Kraist Enaaj Bar Itok
Ro jeiū im jatū kiiō ej iien bwe kwe im n̄a n̄an pojak n̄an Itok eo Kein Karuo an ad Irooj im Rilo̧mo̧o̧r, Jisōs Kraist.
Ro jeiū im jatū rejitōnbōro, ij m̧ōņōņō kōn iien in em̧m̧an n̄an kōnono n̄an kom̧.
Ilo kweilo̧k in, Irooj eaar kōnono n̄an kōj jān ro Rikarejeran. Ij kipel kom̧ n̄an katak naan ko aer. Kōjerbali āinwōt juon teej kōn ta eo em̧ool im ta eo ejjab ium̧win allōn̄ kaņe tok jiljino.
Jerbal in kōkāāl eo an Salt Lake Temple, im eria ko ilo Temple Square eo kar jerbali enan̄in ļalem iiō. Būrojāāk in ej kwaļo̧k ke jerbal in enaaj dedeļo̧k jemļo̧kinļo̧k 2026. Jej kam̧m̧oolol aolep ro rej jerbale būrojāāk in.
Ilowaan jiljino allōn̄ ko remootļo̧k, jaar aje im bar aje ratimjuon tampeļ ko ilo ļalem laļ ko. Kōtaan in kiiō im jem̧ļo̧kinļo̧k iiō in, jenaaj bar aje ļalem.
Rainin jej m̧ōņōņō in kōjjeļļā kōn karōk ko n̄an bar 17 tampeļ ko. Jouj im ron̄jake ilo kautiej ilo aō kōjjeļļāiki jikin kein.
-
Juchitán de Zaragoza, Mexico
-
Santa Ana, El Salvador
-
Medellín, Colombia
-
Santiago, Dominican Republic
-
Puerto Montt, Chile
-
Dublin, Ireland
-
Milan, Italy
-
Abuja, Nigeria
-
Kampala, Uganda
-
Maputo, Mozambique
-
Coeur d’Alene, Idaho
-
Queen Creek, Arizona
-
El Paso, Texas
-
Huntsville, Alabama
-
Milwaukee, Wisconsin
-
Summit, New Jersey
-
Price, Utah
Ro jeiū im jatū rejitenbōro, jej ke loe ta in ej waļo̧k kiiō im̧aan mejād? Ij jar bwe jeban jerwane iien in eaorōk! Em̧ool Irooj ej kōm̧ōkajļo̧k jerbal in An.
Etke jej kalōk tampeļ ko ilo iien rōt in? Etke? Kōnke Irooj eaar jiron̄ kōj n̄an kōm̧m̧ane. Kōjeraam̧m̧an ko an tampeļ rej jipan̄ aiintok Israel jim̧or ilo ron̄ol nuknuk eo. Kōjeraam̧m̧an kein rebar jipan̄ kōj kepooj armej ro renaaj kepooj laļin n̄an Itok eo an Irooj Kein Karuo!
Āinwōt kar kanaan eo an Aiseia, im āinwōt an waļo̧k ilo Handel Messaia, n̄e Jisōs Kraist enaaj jepļaaktok, “aiboojoj an Irooj naaj waļo̧k, im kanniōk otemjej enaaj jimo̧r loe.”
Ilo raan eņ “kien enaaj pād ioon Aeran, im naaj ṇa etan Ri Pepe e Kabwilōn̄lōn̄, Anij e Kajoor Bōtata, Jemān Indeeo, Irooj in Aenōṃṃan.”
Jisōs Kraist enaaj kien jim̧or Jerusalem eo m̧okta im Jerusalem eo ekāāl “naaj kalōke ioon kontinent in Amedka.” Jān jikin kweilo̧k kein ruo, E enaaj tōl Kabun̄ eo An.
Ilo raan eņ, Irooj naaj jeļā kake āinwōt “Kiin̄ in Kiin̄ ro, Irooj in Irooj ro.” Ro rej pād Ippān kar “kāālōt er, im re tiljek.”
Ro jeiū im jatū, kiiō ej iien bwe kwe, im n̄a, n̄an pojak n̄an Itok eo Kein Karuo an ad Irooj im Rilo̧mo̧o̧r, Jisōs Kraist. Kiiō ej iien bwe jen kōm̧m̧an bwe ad rikaļooraņ en jibadbad eo ad eaorōktata. Ilo an laļin eobrak kōn abwilōn̄lōn̄ ko, elmen ad maron̄ kōm̧m̧ane menin?
Kabun̄jar emakijkij ilo tampeļ enaaj jipan̄ kōj. Ilo m̧weeo im̧ōn Irooj, jej mije wōt Jisōs Kraist. Jej katak kōn E. Jej kōm̧m̧an bujen n̄an ļoor E. Jej jino jeļā E. Ilo ad kōjparok bujen tampeļ ko ad, jej bōk eļapļo̧k kajoor eo an Irooj. Ilo tampeļ, jej bōk katak ko n̄an jipan̄ kōj anjo̧ jān laļin. Jej en̄jake iakwe eo erreeo an Jisōs Kraist im Jemedwōj Ilan̄ kōn kōjeraam̧m̧an eļap. Jej en̄jake aenōm̧m̧an im jetōbin lōke, n̄an keidi jorrāān ko an laļin.
En̄in ej kallim̧ur eo aō n̄an kom̧: Aolep rikapukot ro rem̧ool an Jisōs Kraist renaaj lo E ilo tampeļ. Kwonaaj en̄jake tūriam̧o eo An. Kwonaaj lo uwaak ko n̄an kajjitōk ko am̧. Kwonaaj jino meļeļe kōn m̧ōņōņō in gospel in An.
Iaar jeļā bwe kajjitōk ko ad reļļap me kōj kajjojo maron̄ uwaki ej en̄in: N̄an wōn ak mour rot eo aō inaaj lelo̧k?
Kāālet eo aō n̄an ļoor Jisōs Kraist ej kāālet eo aō eaorōktata iaar kōm̧m̧ane. Ilo aō kar pād ilo jikuuļ in taktō, iaar bōk juon naan in kam̧ool kōn kwojarjar eo an Anij Jemed im Nejin, Jisōs Kraist. Jen tōre eo ad Rilo̧mo̧o̧r eaar ājm̧aan eo iaar kalōk mour eo aō ie. Kāālet in eaar kōm̧m̧an eļap oktak! Kāālet in eaar kōm̧m̧an bwe kāālet ko jet ren pidodo. Kāālet in eaar letok n̄an eō jibadbad im tōl. Eaar bar jipan̄ eō dipuk ļan̄ ko an mour in. Ikōņaan kwaļo̧k ruo waanjon̄ak ko:
Juon, ke kōrā eo ippa Dantzel eaar mej, iaar jab maron̄ tōpar aolep ajri ro nejū. Ikar pād ijo, make ļo̧k, būrom̧ōj, im jan̄ kōn jipan̄. Kam̧m̧oolol, kōn An Jetōb, Irooj eaar katakin eō unin an Dantzel eo ejitenbōro ippa kar jepļaak n̄an kapijuknen. Kōn meļeļein, iaar ineem̧m̧an. Aolep iien, eaar em̧m̧anļo̧k n̄an dāpij aō būrom̧ōj. Tokālik, iaar m̧areik kōrā eo ejitenbōro ippa Wendy. Ekar m̧ōttan waanjon̄ak eo kein karuo eaorōk ilo mour eo aō.
Ke kom̧ro Wendy kar pād ilo juon ijjitōn̄ ilo juon āne ettoļo̧k, jet ruko̧o̧t raar jitōn̄ bōra kōn juon bu im jino bu. Ak bu eo ekar jab jerbal. Jen en̄jake in, ekar kamijak aolepen mour ko am̧ro. Aaet Wendy im n̄a kar en̄jake juon aenōm̧m̧an eo ban kaarmejete. Ekar aenōm̧m̧an eo “eḷḷā jān jeḷā otemjej.”
Ro jeiū im jatū, Irooj enaaj kaenōm̧m̧an eok barāinwōt! E enaaj kōkajoor eok. E enaaj kōjeraam̧m̧an eok kōn aenōm̧m̧an, em̧ool ilo iien ko reppen.
Jouj im ron̄jake kallim̧ur in jen Jisōs Kraist n̄an eok: “Inaaj pād ianbwijmaron̄imi im ianmiin̄imi, im Aō Jetōb enaaj pād ibūruōmi, im enjeļ ro Aō ipeļaakimi, n̄an kotak kom̧.”
Ejjeļo̧k jon̄an n̄an an Rilo̧mo̧o̧r jipan̄ eok. En̄taan eo An ilo Getsemane im ioon Calvary ekar n̄an eok! Pinmuur eo An ejjeļo̧k jem̧ļo̧kin ej n̄an eok!
Ij kipel eok n̄an wūjlepļo̧k kajjojo wiik—kōn aolepen mour eo am̧—n̄an kōļapļo̧k am̧ meļeļe kōn Pinmuur eo an Jisōs Kraist. Būruwō emetak kōn ro rej lokjak kōn jerawiwi im rejjab jeļā elmen etal jeni. Ij jan̄ kōn ro rej lokjak ilo jetōb ak ro rej inene kōn eddodo ko aer make kōnke rejjab jeļā ta eo Jisōs Kraist ekar kōm̧m̧ane n̄an er.
Jisōs Kraist eaar bōk ioon E make jerawiwi ko am̧, metak ko am̧, rub bōro ko am̧, im m̧ōjņo̧ ko am̧. Kwojjab aikuj make eddodo kaki! E enaaj jeo̧rļo̧k am̧ bōd ilo am̧ ukweļo̧k. E enaaj kōjeraam̧m̧an eok kōn ta eo kwoj aikuji. E enaaj kōmour jetōb eo am̧. Ilo am̧ leļo̧k eok make n̄an E, eddodo ko am̧ renaaj meraļo̧k. Eļan̄n̄e kwonaaj kōm̧m̧ani im kōjparok bujen ko n̄an ļoor Jisōs Kraist, kwonaaj lo bwe metak ko am̧ ilo mour eo am̧ rej men bajjōk. Am̧ en̄taan enaaj “jakoļo̧k ilo lan̄lōn̄ an Kraist.”
Emaron̄ m̧ōkaj ak rum̧wij bwe kwon erom̧ juon rikaļoor eo ewūjlepļo̧k an Jisōs Kraist. Innām kwonaaj en̄jake aolepen kōjeraam̧m̧an in Pinmuur eo An. Enaaj bar em̧m̧anļo̧k am̧ jipan̄ n̄an aiintok Israel.
Ro jeiū im jatū, ilo raan kaņe rej itok, Jisōs Kraist enaaj jepļaaktok n̄an laļin āinwōt millennial Messaia eo. Kōn menin rainin ij kūr eok n̄an bar wūjlepļo̧k am̧ mour n̄an Jisōs Kraist. Ij kūr eok n̄an jipan̄ aiintok Israel im n̄an kepooj laļin n̄an Itok eo Kein Karuo an Irooj. Ij kūr eok n̄an kōnono kōn Kraist, kam̧ool kōn Kraist, bōk tōmak ilo Kraist, im m̧ōņōņō ilo Kraist!
Itok n̄an Kraist im “wūjlepeļo̧k aolepen [jetōb] ko ami n̄an E.” En̄in ej men eo n̄an juon mour elem̧ōņōņō!
Men eo em̧m̧antata ej itok wōt, ro jeiū im jatū, kōnke Rilo̧mo̧o̧r ej bar itok! Men eo em̧m̧antata ej itok wōt kōnke Irooj ej kōm̧ōkajļo̧k jerbal in An. Men eo em̧m̧antata ej itok wōt ilo ad lukkuun ukōtļo̧k būruwōd im mour ko ad n̄an Jisōs Kraist.
Ij kam̧ool ilo ettā bwe Jisōs Kraist ej Nejin Anij. Ij juon An rikam̧ool. Ij utiej bwe ij An rijerbal. Ilo Itok eo An Kein Karuo, “aiboojoj an Irooj naaj waļo̧k, im kanniōk otemjej enaaj jimo̧r loe.” Raan eņ enaaj obrak kōn m̧ōņōņō n̄an ro rōwānōk!
Kōn kajoor eo an kii ko rekwojarjar an priesthood eo ij kabwijeri, ij kwaļo̧k m̧ool in n̄an eok im n̄an aolepen laļin! Ilo etan Jisōs Kraist, amen.