Mije Jisōs Kraist im Gospel eo An
N̄e jej kejool menin kapo ko an laļ in im mije Kraist im Gospel eo An, ejjeļo̧k kajjitōk ke jenaaj tōpar.
Ilo 1996 kumi in football eo an em̧m̧aan jān Nigeria rekar bōk gold ilo ikkure ko an Olympic kar kōm̧m̧an ilo Atlanta ilo Amedka. Ilo an ikkure eo ālikktata jem̧ļo̧k, jarlepju in armej ro rem̧ōņōņō rekar ibweebļo̧k ilo iaļ ko ilo aolep jikin ko im bukwōn eo ilo Nigeria; jikin in obrak kōn ilōn̄in 200 milien armej ro rekar m̧ōkaj im oktak n̄an juon iien pade kileplep ilo ruo awa jibbon̄! Ekar wōr juon ajedeed in lan̄lōn̄, m̧ōņōņō, im iktōltōl ilo an armej m̧ōn̄ā, al im eb. Ilo iien eo, Nigeria ekar bar ippān doon im aolep armej in Nigeria rekar m̧ōņōņō bwe er ri Nigeria.
Mokta jān Olympic eo, tiim in ekar jelm̧ae elōn̄ apan̄ ko. Ke tournament eo ekar ijjinoe, jāān in jipan̄ eo aer ekar jem̧ļo̧k. Tiim in ikkure in ekar jiāe kōn ejjeļo̧k kein jerbal, jikin kōmālmel ko, m̧ōn̄ā, ak jikin kwaļkoļ nuknuk.
Jerome Prevost/Getty Images
Ilo juon iien, kar m̧ōttan wot jejjo minit bwe ren luuj ilo iien jiāe eo, ak tiim in Nigeria eo ekar bōk tūb eo kōjekdoon aolep apan̄ ko. Iien in eaorōk ekar ukōt wāween aer kalimjek er make. Kōn peran ekāāl, im kōn aer kate er kajojo im an tiim eo, im kwaļo̧k peran, rekar ippen doon im kejool elōn̄ kain kapo ko im mije wōt aer bōk tūb eo. Kōttōpar in ekar kōm̧m̧an bwe ren bōk gold metal ko, im riNigeria ro rekar ņa etaer “Tiim in Kōttōpar eo.” Tiim in Kōttōpar eo ilo 1996 Olympic eo rej ekenono wōt kake er ilo ikkure ko an ri Nigeria.
David Cannon/Allsport/Getty Images
Ālkin an tiim in football eo an em̧m̧aan ekkatak n̄an kejool ļōkapokpok ko rekar jelm̧aik er im mije wōt kōttōpar eo aer, rekar tōpak eļapļo̧k jān jon̄o̧n eo rekar kōtmene—im rekar en̄jake lan̄lōn̄ eļap. (Āinwōt bar kōm ilo Nigeria!)
Ilo juon wāween āinļo̧k wōt, n̄e jej kejool menin kapo ko an laļ in im mije Kraist im Gospel eo An, ejjeļo̧k kajjitōk ke jenaaj tōpar eļapļo̧k jān ta eo jej anto̧o̧ne im maron̄ en̄jake lan̄ļōn̄ eļap. Būreejtōn Russell M. Nelson ekar katakin: “N̄e mour ko ad rej pedped wōt ilo … Jisōs Kraist im gospel eo An, jemaron̄ en̄jake m̧ōņōņō jekdo̧o̧n ta eo ej waļo̧k—ak ejjab waļo̧k—ilo mour ko ad.”
Ij jar bwe Jetōb Kwojarjar enaaj jipan̄ kajjojo iaad n̄an im ļoor kūr eo an Rikanaan Nelson n̄an mije mour ko ad ioon Jisōs “Kraist im gospel eo An” bwe jen maron̄ m̧ōņōņō ilo Kraist jekdoon ta eo ej waļo̧k—ak ejjab waļo̧k— ilo mour ko ad.”
Elōn̄ bwebwenato ko ilo Bok in Mormon ej kōmeļeļe ro kajjojo raar ukōt mour ko aer ilo aer mije Jisōs Kraist im Gospel eo An.
Ļōmņak Kōn Alma eo Edik Ekar eļļo̧k jene im jum̧ae Kabun̄ in. Eo jemān, Alma, ekar jar im jitlo̧k. Juon enjeļ ekar waļokļo̧k im kūr Alma eo Edik n̄an ukweļo̧k. Ilo iien eo, Alma ekar jino an en̄taan kōn “metak ko an juon jetōb eatajinemjen.” Ilo awa ko remarok, ekar kemeemej katak ko an jemen bwe Kraist enaaj itok im pinmuur kōn jerawiwi ko an laļin. Ilo an ļo̧kjeņ an kake im mije ļōmņak in, ekar akweļap n̄an Anij kōn tūriam̧o. Mōņōņō ej tōprak eo, juon m̧ōņōņō ej kōmeļeļeiki āinwōt eaibooojojļo̧k! Im m̧ōņōņō eo ekar itok n̄an Alma kōnke e im jemān rekar mijeļo̧k Rilo̧mo̧o̧r eo.
N̄an m̧am̧a im baba ro ewōr nejier ajiri ro em̧ōj aer eļļo̧k, bōk peran! Ijjelo̧kin am̧ ļōmņak etke juon enjeļ ejjab itok im jipan̄ ajri eo nejūm ukweļok, jeļā bwe Irooj em̧ōj an likūt juon enjeļ eo emour ilo iaļ eo an: bisop eo, ak ritōl ro an Kabun̄ in, ak juon em̧m̧aan ak kōrā eo ej jerbal in karejar. Eļan̄n̄e konaaj jitlo̧k im jar wōt, eļan̄n̄e kwojjab kāālet iien eo n̄an Irooj, im eļan̄n̄e kwoj lōke bwe E ej erļo̧ke Pein n̄an jipan̄, innem—ejjab to ak tokālik—kwoj lo an Anij un̄ur būruon ajri eo nejūm̧ n̄e ajri eo nejūm̧ ej kāālet n̄an ron̄jake. Menin ej kōnke Kraist ej lan̄lōn̄—Kraist ej kōjatdikdik; E ej kallim̧ur kōn “men ko rem̧m̧an rej itok.” Kōn menin lōke Jisōs Kraist kōn ajri eo nejūm̧, bwe E ej kajoor eo an aolep ro jinen im jemān, im aolep ajri.
Ālkin an en̄jake m̧ōņōņō ilo Kraist, Alma eo Edik ekar mour kōn m̧ōņōņō eo. Ak ewi wāween an kar dāpij jon̄an m̧ōņōņō eo ilo apan̄ im mālijjon̄ ko? Ekar kōmeļeļeik:
“Jān iien eo im bar n̄an kiiō, iaar jerbal ilo ejjeļo̧k bōjrak, [n̄an] bōktok armej ro n̄an ukeļo̧k; bwe in maron̄ bōktok er n̄an nemake m̧ōņōņō eo ekanooj ļap eo iaar nemake. …
“… Im … Irooj ej letok n̄an eō m̧ōņōņō eļap otem ļap ilo leen jerbal ko aō. …
“Im kar rejetake eō ium̧win māllijon̄ ko im inepata ko otemjeļo̧k.”
Mōņōņō ilo Kraist ekar ijjino n̄an Alma ke ekar kōjerbal tōmak ilo E im akweļap kōn tūriam̧o. Innām Alma ekar kōjerbal tōmak ilo Kraist ke ekar jerbal n̄an jipan̄ ro jet nemake ejja m̧ōņōņō eo wōt. Jerbal kein ko rejjab bōjrak ekar kwaļo̧k eļap m̧ōņōņō ilo Alma em̧ool ilo mālijjon̄ im jorrāān ko ilo aolep men. Kwoj lo, “Irooj ej iakwe kijejeto,” im kijejeto ko rej pedped ioon E rej boktok kōjeram̧m̧an. Barāinwōt māllijon̄ ko reļļap remaron̄ “jakoļo̧k ilo lan̄lōn̄ an Kraist.”
Bar juon kumi ilo Bok in Mormon ro im rekar kōm̧m̧an bwe Jisōs Kraist im gospel eo An ren pedped in mour ko aer im kar lo m̧ōņōņō rej ro rekar kalōk jikin Helam—juon jikin ijo remaron̄ karrūtoļo̧k ajiri ro nejier im m̧ōņōņō ilo anemkwoj n̄an kwaļo̧k tōmak ko aer. Armej rein rewāppen me rekar mour mour ko rem̧m̧an kar likūt er ilo kōm̧akoko jān juon kumi aņokņak im kar bōk jān er jim̧we im maron̄ eo aer n̄an kwaļo̧k tōmak eo aer. Jet iien men ko renana rej waļo̧k n̄an armej ro rem̧m̧an:
“Irooj Eaar watōke ekkar n̄an kauweik armej ro An; aaet, Eaar idajon̄jon̄e kōmmaanwa eo aer im tōmak eo aer.
“Mekarta—jabdewōt eo ej likūt an lōke ilo E ejja in wōt naaj kotak e ilo raan eo āliktata. Aaet, im āindein eaar āinwōt ippān armej rein.”
Ekōjkan an armej rein niknik ilo mālijjion̄ im kaen̄taanan ko aer? Jān aer mijeļo̧k Kraist im gospel eo an. Jorrāān ko aer rekar jab kwaļo̧k kadkadier; bōtaab; ijjelo̧kin, kajjojo iaer ekar jitļo̧k n̄an Anij kōnke kalikkar er make āinwōt ajri ro nejin Anij, juon ajri in bujen, im juon rikaļooraņ Jisōs Kraist. Ilo aer kemeemej wōn er im kar kūr n̄an Anij, rekar bōk ainem̧m̧an, kajoor, im eļaptata m̧ōņōņō ilo Kraist:
“Alma im armej ro an … raar lutōkleplep burueer ñan [Anij]; im eaar jeļā lōmņak ko an burueer.
“Im ālikin men kein ainikien Irooj eaar itok n̄an er ilo en̄taan ko aer, im ba: Kom̧in kotak bōrami im kom̧in ineem̧m̧an, bwe I jeļā kōn bujen eo kom̧ ar kōm̧m̧ane n̄an Eō; im Inaaj bujen ippān armej ro Aō im kōtļo̧k er jān kōm̧akoko.”
N̄an uaake, Irooj ekar “kameraik eddo ko … ioon aeraer. … Aaet, Irooj Eaar kōkajoorļo̧k er bwe ren maron̄ kotak eddo ko aer ilo ejjeļo̧k pen, im raar ajeļo̧k er ilo itok-limo im kōn ineem̧m̧an n̄an aolep ankilaan Irooj.” Jeļā bwe rein rekwojarjar rekar leļo̧k inepata ko, en̄taan ko, im mālijjon̄ ko aer bwe ren jakoļo̧k ilo lan̄lōn̄ an Kraist! Innem ilo jejjōt in iien, E ekar kwaļo̧k n̄an Alma iaļ eo n̄an ko, im Alma—juon rikanaan an Anij—ekar tōl er n̄an kejparok.
Ilo ad mijeļo̧k Kraist im ļoor rikanaan eo An, naaj barāinwōt tōl kōj n̄an Kraist im m̧ōņōņō eo ilo gospel eo An. Būreejtōn Nelson kar katakin: “Mōņōņō ej lukkun kajoor, im mijeļo̧k wōt m̧ōņōņō in ebōktok kajoor eo an Anij n̄an mour ko ad. “Bwe ilo aolep men otemjeļo̧k, Jisōs Kraist ej riwaanjon̄ok eo ad eļap ‘kōn lan̄lōn̄ eṃōj likūt e im̧aan, Ear en̄taan ilo debwāāl’ [Hibru 12:2].”
Jino ekar jako jet iien emootļo̧k; ekar juon menin kainepata. Ij iakwe jinō im ikar jab kōtmene an jako jān eō ilo an dik wōt. Ak kōn jako eo an, n̄a im baam̧le eo aō kar en̄jake jim̧or būrom̧ōj im m̧ōņōņō. Ijeļā kōn E, jinō ejjab mej—emour! Im ijeļā kōn Kraist im ki ko an priesthood em̧ōj aer jepļaaktok kōn Rikanaan Josep Smith, Inaaj bar ped juon alen. Būrom̧ōj eo kōn jako eo an jinō ekar jakoļo̧k ilo lan̄lōn̄ an Kraist. Ij ekkatak n̄an “ļōmņak kōn selestial” im “kōm̧m̧an bwe Anij en anjo̧” ekūtbuuj mijeļo̧k ilo m̧ōņōņō eo eped ilo Kraist.
E ej iakwe ilo an kūr, “Kom̧win itok n̄an Ippa, kom̧ otemjej rej jerbal in ban, im Inaaj kakkijeik kom̧.” Ilo etan Jisōs Kraist, amen.